Historia di Bida

Gradicidu p’e Recuerdonan Precioso Cu Mi Tin!

SEGUN E RELATO DI DRUSILLA CAINE

Tabata aña 1933, i mi a caba di casa cu Zanoah Caine, kende tabata un colporteur, esta, un evangelisadó di tempu completo, mescos cu mi. Yen di entusiasmo mi a planea pa djoin mi casá den su asignacion, pero pa logra esei mi tabatin mester di un baiskel. Pero esaki tabata un luho cu nunca mi no por a aford, ya cu situacion tabata pertá durante e depresion económico. Kico mi por a haci?

ORA mi suanan a tende di mi problema, nan a bai lugánan di tira sushi local en busca di piesanan bieu pa nan traha un baiskel pa mi. Nan a haña piesa i a hinca un baiskel den otro! Asina cu mi a siña cor’é, ami cu Zanoah, felis di nos riba baiskel, a cuminsá biaha atrabes di e teritorionan ingles di Worcester i Hereford, dunando testimonio na tur hende cu nos a topa.

Mi no a realisá cu e simpel paso aki di fe lo a hiba na un bida yen di recuerdonan precioso. Sin embargo, ta mi kerido mayornan a pone e fundeshi spiritual di mi bida.

Añanan Difícil di e Guera Grandi

Mi a nace na december 1909. Djis despues, mi mama a obtené un ehemplar di E Plan Divino di Épocanan, i na 1914 nan a hiba mi Oldham, Lancashire, pa wak e “Foto Drama di Creacion.” (Tur dos a ser producí dor di esnan cu awor ta conocí como Testigonan di Jehova.) Maske mi tabata yong, mi ta corda cla-cla con mi tabata bula di alegria ora nos tabata bai cas bek, debí na loke mi a mira! Despues di esei, Frank Heeley a cuminsá un grupo di studio di Bijbel na Rochdale caminda nos a biba. Nos asistencia na e studio aki a  yuda nos famia haña un comprendimentu di e Scritura.

E mésun aña ei nos a perde nos bida trankil ora cu e Guera Grandi, cu awor nos ta yama Promé Guera Mundial, a dal aden. Nan a reclutá mi tata pa ehército, pero el a tuma un posicion neutral. Den corte nan a describié como “un homber masha decente,” i e korant local a informá cu a bini vários carta for di “hende di noblesa cu a bisa cu nan ta kere cu e ta sincero den su obhecion contra tuma parti den ehército.”

Sin embargo, en bes di exonerá tata completamente, nan a excluyé “solamente for di Servicio di Combate.” Mesora el a bira blanco di mofa, i ami cu mi mama tambe. Cu tempu nan a reconsiderá su clasificacion, i el a ser asigná pa traha den agricultura. Pero algun cunukero a probechá di e situacion i tabata pagu’é tiki cen of no tabata pagu’é mes. Pa sostené e famia, mi mama a bai traha—pa un chipi-chipi—den un labanderia privá haciendo trabou pisá. I tog awor mi ta mira con e echo cu mi a enfrentá e circunstancianan difícil ei durante mi hubentud a fortalecé mi; esei a yuda mi haña mas aprecio pa cosnan spiritual.

Un Comienso Chikitu

No a dura mashá cu Daniel Hughes, un studiante di Bijbel celoso, a bin forma parti di nos bida. E tabata traha den mina di carbon na Ruabon, un pueblito cu ta keda un 20 kilometer for di Oswestry, caminda nos a muda bai biba. Tio Dan, manera mi tabata yam’é, a keda den contacto cu nos famia, i ki ora cu el a bishitá nos e tabata papia semper tocante asuntunan bíblico. Nunca e tabata papia di cos general. Na 1920 a cuminsá un klas di studio di Bijbel na Oswestry, i na 1921 tio Dan a duna mi un ehemplar di E Harpa di Dios. Esaki tabata manera un tesoro pa mi pasobra e publicacion aki a haci e siñansanan di Bijbel hopi mas fácil pa mi comprendé.

Tambe tabatin Pryce Hughes, * kende despues a bira superintendente di e oficina di sucursal di Testigonan di Jehova na Londen. E cu su famia a biba den becindario na Bronygarth, na e frontera di Wales, i su ruman muher Cissie, a bira amiga cerá di mi mama.

Mi ta corda e entusiasmo cu tabatin na 1922 ora a sali e yamada pa ‘anunciá e Rey i su reino.’ Durante e siguiente añanan, maske mi tabata bai scol ainda, cu entusiasmo mi a djoin e rumannan den distribucion di tratadonan special, foral di Un Denuncia Contra Eclesiásticonan na 1924. Mirando atras na e década ei, mi tabatin e excelente oportunidad pa asociá cu masha hopi ruman homber i muher fiel. Entre nan tabatin Maud Clark * i su partner Mary Grant, * Edgar Clay, * Robert Hadlington, Katy Roberts, Edwin Skinner, * huntu cu Percy Chapman i Jack Nathan, * kendenan tur dos a bai Cánada pa yuda cu e trabou einan.

E discurso bíblico “Miyones na Bida Awor Lo No Muri Nunca” a resultá den un testimonio oportuno den nos teritorio extenso. Dia 14 di mei 1922, Stanley Rogers, un famia di Pryce Hughes, a bini di Liverpool pa duna e discurso aki na Chirk, un pueblito djis parti nort di nos pueblo, i mas lat e anochi ei n’e teater The Plachi Playhouse na Oswestry. Ainda mi tin un di e pamfletanan cu a ser imprimí specialmente p’e ocasion ei. Durante henter e periodo ei, tres superintendente biahero—peregrino manera nos tabata yama nan—a sigui fortalecé nos grupo chikitu. Nan tabata Herbert Senior, Albert Lloyd i John Blaney.

Un Tempu pa Tuma Decision

Na 1929, mi a tuma e decision di bautisá. Mi tabatin 19 aña di edad i durante e mésun tempu ei mi a enfrentá mi promé berdadero prueba. Mi a topa cu un yoncuman kende su tata  tabata político. Nos a gusta otro, i el a pidi mi pa casa. E aña promé, e buki Gobernacion a sali, pues mi a dun’é un ehemplar. Pero despues di poco tempu a bira bisto cu e no tabata interesá den e tema di e buki aki, esta, un gobernacion celestial. For di mi studio di Bijbel mi tabata sa cu e israelitanan di antigwedad a haña mandato pa no forma ningun aliansa matrimonial cu hende no-creyente, i cu e principio aki a conta pa cristiannan tambe. P’esei, maske tabata duru, mi a rechasá su proposicion.—Deuteronomio 7:3; 2 Corintionan 6:14.

Loke a fortalecé mi tabata e palabranan di apostel Pablo: “Laga nos no entregá di haci loke ta excelente, pasobra n’e debido tempu nos lo cosechá si nos no cansa.” (Galationan 6:9) Kerido tio Dan tambe a yuda mi ora el a skirbi: “Ora bo haña bo cu prueba chikitu i grandi, aplicá Romanonan 8, versículo 28,” cu ta bisa: “Awor, nos sa cu Dios ta haci tur su obranan cooperá huntu p’e bienestar di esnan cu ta stima Dios, esnan cu ta yamá segun su propósito.” No tabata fácil, pero mi tabata sa cu mi a tuma e decision corecto. E aña ei mi a inscribí pa traha como colporteur.

Enfrentando e Desafio

Na 1931, nos a ricibí nos nomber nobo, Testigonan di Jehova, i den e aña ei nos tabatin un campaña vigoroso usando e foyeto chikitu E Reino, e Speransa pa Mundu. Tur político, clero i comerciante a haña un ehemplar. Mi teritorio tabata di Oswestry pa Wrexham, rond di 25 kilometer den direccion nort. Pa cubri tur e teritorio tabata un berdadero desafio.

E siguiente aña na un congreso na Birmingham, tabatin un yamada pa 24 boluntario. Ansiosamente nos 24 a duna nos nomber pa un rasgo nobo di sirbishi, sin sa kico lo e bai ta. Imaginá bo e sorpresa ora cu nos a ser asigná dos-dos pa bai ofrecé e mésun foyeto, E Reino, e Speransa pa Mundu, bistí cu un borchi dilanti i patras di nos curpa cu ta anunciá e Reino.

Trahando den área di e catedral, mi a sinti hopi bergwensa cu hende ta wak mi, pero mi a consolá mi mes cu e idea cu niun hende den e stad no tabata conocé mi. Sin embergo, e promé persona cu a acercá mi tabata un amiga bieu di scol, i el a keda wak mi i a bisa: “Ta kico e cos cu bo tin bistí ei?” E experencia ei a kita tur miedu di hende cu mi por tabatin!

Moviendo Padilanti den Veld

Na 1933, mi a casa cu Zanoah, un biudo cu tabata 25 aña mas grandi cu mi. Su promé casá tabata un Studiante di Bijbel celoso, i Zanoah a permanecé fielmente den su asignacion despues cu su casá a muri. No a dura mashá cu nos a muda di Inglatera bai nos teritorio nobo na Nort Wales, un 150 kilometer mas leu. Nos stuur di baiskel i e baranan a tambaleá peligrosamente debí na caha di carton, maleta i otro pertenencianan di balor cu nos a cologá i primi riba nan i a empaketá den macutu. Pero nos a yega sano i salbo! Na e asignacion ei, nos baiskelnan tabata indispensabel pasobra ta nan tabata hiba nos tur caminda, asta cerca di e top di Cader Idris, un ceru di Wales cu ta casi 900 meter haltu. Tabata masha recompensador pa haña hende cu a anhelá di tende “e bon nobo aki dje reino.”—Mateo 24:14.

 Despues di poco tempu cu nos tabata einan, e hendenan a bisa nos cu un tal Tom Pryce a predicá na nan mescos cu nos ta haciendo. Cu tempu nos a localisá Tom, e tabata biba riba Long Mountain, cerca di Welshpool—i esta un sorpresa nos a haña! Tempu cu mi a cuminsá predicá nobo-nobo, mi a laga e yudansa pa studia Bijbel Reconciliacion cuné. El a studi’é riba su mes, anto a skirbi Londen pidi mas literatura i for di e tempu ei e tabata compartí su fe nobo celosamente cu otro hende. Nos a disfrutá di hopi ora felis den compania di otro, i hopi bes nos tres tabata studia huntu pa animá otro.

Un Desaster Ta Hiba na Bendicion

Na 1934 tur colporteur cu tabata biba den becindario di Nort Wales a haña invitacion pa bai e pueblo di Wrexham pa yuda den distribucion di e foyeto chikitu E Gobernante Hustu. Un dia promé cu nos a cuminsá cu e campaña special aki tabatin un desaster nacional eibanda. Un explosion n’e mina di carbon Gresford, 3 kilometer nort di Wrexham, a mata 266 minero. Mas cu 200 mucha a keda sin tata i 160 hende muher a bira biuda.

Nos mester a traha un lista di e personanan cu a perde nan ser kerí, bishitá nan personalmente i laga e foyeto. Un di e nombernan cu mi a haña tabata señora Chadwick kende a perde su yu homber di 19 aña. Ora mi a yega, un yu homber mas grandi, Jack, tabata di bishita cerca su mama pa consol’é. E yoncuman aki a reconocé mi pero e no a bisa mi nada. Despues, el a lesa e foyeto i a bai busca e foyeto E Guera Final, un otro foyeto chikitu cu mi a laga cuné algun aña promé.

Jack cu su casá May a haña sa unda mi tabata keda, i nan a bin busca mas literatura. Na 1936 nan a bai di acuerdo pa tene reunion na nan cas na Wrexham. Despues di un bishita di Albert Lloyd seis luna despues, a establecé un congregacion, i Jack Chadwick tabata e superintendente presidente. Awor tin tres congregacion na Wrexham.

Bida den un Caravana Gitano

Te cu e tempu ei, nos tabata usa cualkier acomodacion cu nos por a haña segun cu nos tabata muda di un lugá pa otro. Pero awor Zanoah a dicidí cu ta tempu pa nos tin nos mes cas, unu cu nos por a transportá di un lugá pa otro. Mi casá tabata un carpinté ábil di desendencia gitano i el a traha un caravana gitano pa nos. Nos a yam’é Elizabeth, un nomber bíblico cu ta nificá “Dios di Abundancia.”

Loke mi ta corda foral ta un cierto lugá caminda nos a keda, e tabata un hofi cantu di un riu chikitu. Pa mi e tabata manera Paradijs! Maske biba den un caravana tabatin su limitacionnan, nada no a daña e añanan felis cu nos a pasa huntu den e caravana ei. Den tempu di friu e pañanan di cama hopi bes a vris i pega na muraya di e caravana, i gotanan di awa cu tabata forma riba superficienan tabata un problema constant. Tambe nos mester a cana un distancia largu pa saca awa bai hiba n’e caravana, pero huntu nos a superá e problemanan aki.

 Tabatin un winter cu mi tabata malu i nos tabatin tiki cuminda i niun cen. Zanoah a cai sinta riba cama i a coge mi man, i a lesa Salmo 37:25 pa mi: “Un homber hóben mi tabata, tambe mi a bira bieu, i tog nunca mi a mira un hende hustu bandoná henteramente, ni su yunan buscando pan.” Mirando mi den mi cara el a bisa: “Si algu no sosodé lihé, nos tin cu pidi limosna, i mi no ta kere cu Dios ta laga esei sosodé!” El a sali bai duna testimonio na nos bisiñanan.

Ora Zanoah a bin cas merdia pa traha algu di bebe pa mi, tabatin un envelop ta sper’é. Den dje tabatin £50 (135 florin) cu su tata a manda p’e. Algun aña promé nan a acusá Zanoah falsamente di fraude, pero nan a caba di establecé su inocencia. E regalo aki tabata pa drecha asuntu. Esta oportuno!

Un Les Probechoso

Tin bes nos ta siña un les despues cu vários aña a pasa. Pa ilustrá: Promé cu mi a kita for di scol na 1927, mi a duna testimonio na tur mi compañeronan di klas i maestronan, cu excepcion di unu: Lavinia Fairclough. Ya cu ningun hende no tabata interesá den loke mi tabatin planeá pa haci cu mi bida, i tog ami cu yufrou Fairclough no tabata bai masha bon cu otro, mi a dicidí di no bis’é nada. Imaginá bo mi sorpresa—i goso—ora cu rond di 20 aña despues mi mama a bisa mi cu e maestra aki a bolbe pa bishitá tur su amigunan i alumnonan di ántes pa bisa nan cu awor e ta un Testigo di Jehova!

Ora nos a topa, mi a splik’é di con mi no a cont’é mas promé di mi fe i e carera cu mi tabatin planeá di sigui. El a scucha trankil i a bisa despues: “Semper mi tabata en busca di e berdad. Esei tabata e mision di mi bida!” E experencia aki tabata un les probechoso pa mi: Semper duna testimonio na tur hende cu mi topa i nunca husga un persona di antemano.

Un Guera Mas—i Despues

Segun cu añanan ’30 tabata cabando, guera a cuminsá menasá atrobe. Dennis, mi ruman homber cu ta 10 aña mas yong cu mi, a ser exonerá di servicio militar bou di e condicion cu e ta sigui cu su trabou seglar. Dor cu nunca e no a mustra masha interes den e berdad, ami cu mi casá a pidi e pioneronan local Rupert Bradbury i su ruman David, pa nan bishit’é. Nan a bishit’é i a studia Bijbel cuné. Na 1942 Dennis a bautisá i despues el a drenta e sirbishi di pionero, i el a ser nombrá como superintendente biahero na 1957.

Nos yu muher Elizabeth, a nace na 1938, i pa cumpli cu e necesidadnan di e famia, Zanoah a rek e caravana. Ora nos segundo yu muher Eunice a bini na mundu na 1942, a parce nos sabí pa busca un hogar mas permanente. P’esei, Zanoah a stop di traha pionero pa un par di aña, i nos a bai biba den un cas chikitu cerca di Wrexham. Despues, nos a establecé na Middlewich den e provincia pegá, Cheshire. Einan mi kerido esposo a muri na 1956.

Nos yu muhernan a bira evangelisadó di tempu completo i nan ta felismente casá. Ainda Eunice i su casá, cu ta un anciano, ta sirbi como pionero special na Londen. E casá di Elizabeth tambe ta un anciano den congregacion, i pa ami ta un goso cu nan i nan yunan, i mi cuater bisanietunan ta biba den mi cercania na Preston, Lancashire.

Mi ta contentu cu mi por sali for di porta dilanti di mi apartamento i crusa bai e Salon di Reino na otro banda di caya. Durante último añanan, mi a asociá cu e grupo di abla gujarati cu tambe ta reuní einan. Debí cu mi ta un poco surdu awor, no tabata fácil pa mi a siña e idioma. Tin bes ta difícil pa capta e vários diferencianan di tono manera un persona hóben sí lo por. Pero e ta un reto interesante.

Ainda mi por predicá di cas pa cas i conducí studio di Bijbel na mi cas. Ora mi amigunan bini cerca mi, semper ta un placer pa conta algun di mi experencianan di ántes. Mi ta masha gradicidu cu mi tin recuerdonan precioso di bendicionnan cu mi a ricibí durante mi asociacion cu e pueblo di Jehova pa casi 90 aña.

[Nota]

[Plachi na página 25]

Pamfleta cu ta anunciá e discurso público “Miyones na Bida Awor Lo No Muri Nunca,” cu mi a tende dia 14 di mei 1922

[Plachi na página 26]

Huntu cu Zanoah djis despues di nos matrimonio na 1933

[Plachi na página 26]

Pará banda di “Elizabeth,” nos caravana cu mi casá a traha