Mas Duradero cu Oro Puru

ORO ta mashá solicitá debí cu e ta bunita i duradero. Hende ta gust’é principalmente pasobra ta parce cu e ta keda briya i lombra pa tempu indefiní. Ta asina pasobra oro ta resistente contra awa, oxígeno, sulfur i casi tur otro cos. Hopi artefacto di oro cu nan a yega di descubrí den boto cu a sink i otro caminda, ainda tin nan briyo despues di cientos di aña.

Sin embargo, ta interesante cu Bijbel ta mustra cu tin algu muchu mas duradero i “di hopi mas balor cu oro cu ta perecé apesar di ser probá pa candela.” (1 Pedro 1:7) Oro “probá,” esta, oro refiná pa candela, por alcansá 99,9 porciento di puresa. Sin embargo, asta oro refiná ta perecé, esta, ta disolvé ora expon’é na aqua regia (‘koningswater’), un mescla cu ta consistí di tres parti di zoutzuur i un parti di zuur di salpeter. Pues, Bijbel ta científicamente corecto ora e ta bisa cu ‘oro ta perecé.’

Contrali cu esei, berdadero fe cristian “ta conserbá e alma bibu.” (Hebreonan 10:39) Hende por mata un persona cu tin fe fuerte, manera nan a haci cu Jesucristo. Pero Dios ta duna esnan cu tin berdadero fe e promesa aki: “Duna prueba di ta fiel te na morto, i lo mi duna bo e corona di bida.” (Revelacion 2:10) Esnan cu muri fiel ta keda den Dios su memoria, i lo e resucitá nan. (Juan 5:28, 29) Ningun cantidad di oro por logra esei. Den e sentido aki, fe realmente tin hopi mas balor cu oro. Sin embargo, pa fe tin e balor sobresaliente ei, e tin cu ser probá of di test. De echo, Pedro a bisa cu ta ‘e calidad probá di fe’ ta loke ta di hopi mas balor cu oro. Gustosamente Testigonan di Jehova lo yuda bo studia Bijbel pa asina bo por desaroyá i mantené un fe fuerte den e Dios berdadero, Jehova i den su Yu Jesucristo. Segun Jesus, esaki “ta nificá bida eterno.”—Juan 17:3.