Pregunta di Lector

Na unda Daniel tabata ora e tres hebreonan a ser probá dilanti e imágen inmenso cu Nabucodonosor a traha riba e yanura di Dura?

Bijbel no ta bisa, pues ningun hende no por bisa cu siguridad unda Daniel tabata durante e prueba ei.

Algun hende a sugerí cu e rango cu Daniel tabatin como funcionario tabata mas haltu cu di Sadrac, Mesac i Abednego, of cu e tabatin privilegionan special cerca Nabucodonosor i p’esei, no a ser rekerí di dje p’e bai n’e yanura di Dura. Daniel 2:49 ta indicá cu tabatin un tempu cu Daniel su posicion en berdad tabata mas haltu cu di su tres compañeronan. Pero nos no por proba sí cu ta esaki a pone cu e no mester a reuní huntu cu otro hende dilanti e imágen.

Den un intento pa splica Daniel su ausencia, otro expertonan a bisa cu podisé e no por tabata presente debí cu el a bai cumpli cu un asignacion di trabou of pa motibu di malesa. Sin embargo, Bijbel no ta bisa esei. En todo caso, Daniel su manera di proceder no a duna motibu pa crítica, pasobra si tabata asina, e funcionarionan babilonio yalurs sigur lo a usa esei pa acus’é. (Daniel 3:8) Tantu promé como despues di e episodio ei, Daniel a duna prueba cu e ta un wardadó di integridad, leal na Dios, sin importá e pruebanan cu el a confrontá. (Daniel 1:8; 5:17; 6:4, 10, 11) Pues anto, maske Bijbel no ta bisa di con Daniel no tabata presente n’e yanura di Dura, nos por ta sigur cu el a keda completamente fiel na Jehova Dios.—Ezekiel 14:14; Hebreonan 11:33.