Vence Obstáculo Cu Ta Stroba Bo Progreso!

BO AUTO ta di start i e ta den ‘speed,’ pero e no kier bai dilanti. Problema cu motor? No, tin un piedra grandi dilanti di un di e tayernan. E único cos cu bo mester haci p’e auto move ta kita e piedra.

Den un manera similar, algun hende cu ta studia Bijbel cu Testigonan di Jehova tin obstáculo cu por stroba nan progreso spiritual. Por ehempel, Jesus a spierta cu cosnan manera “e ansiedad dje sistema di cosnan aki i e poder engañoso di rikesa” por “sofocá e palabra” di berdad i stroba crecementu.—Mateo 13:22.

Tin otro hende su progreso ta ser strobá dor di custumber of debilidadnan fuertemente ankrá. Un homber hapones cu yama Yutaka tabata gusta e mensahe di Bijbel, pero e tabatin un problema serio cu gèmbelmentu. Hopi bes el a purba vence e mal hábito aki, pero e no tabata logra. Su adiccion a cost’é masha hopi placa, tres cas, e respet di su famia i su propio dignidad. Lo e por a kita e piedra di tropieso aki i bira un cristian?

Of considerá un señora cu yama Keiko. Cu yudansa di Bijbel el a libra su mes di bicionan manera idolatria, inmoralidad i wakmentu di destino. Sin embargo, Keiko ta admití: “Pa mi, e obstáculo di  mas grandi tabata humamentu. Hopi bes mi a purba stop. Pero mi no tabata por.”

Kisas bo tambe tin un problema cu ta parce un obstáculo inmovibel pará den caminda di bo progreso. Sin importá kico e ta, sea sigur cu bo por venc’é cu Dios su yudansa.

Corda e conseho cu Jesus a duna su disipelnan despues cu nan no por a saca un demoño for di un homber cu epilepsia. Despues cu Jesus sí a logra loke nan no tabata por, el a bisa su disipelnan: “Si boso tin fe dje tamaño di un pipita di mosterd, boso lo bisa e ceru aki: ‘Hala djaki p’aya,’ i lo e hala, i nada lo ta imposibel pa boso.” (Mateo 17:14-20; Marco 9:17-29) Sí, un problema cu pa nos lo por parce un ceru inmenso, ta algu chikitu i insignificante den bista di nos Creador omnipotente.—Génesis 18:14; Marco 10:27.

Identificá Loke Ta Stroba Progreso

Pa bo por vence bo obstáculonan, bo tin cu identificá nan. Con bo por haci esei? Tin biaha un miembro dje congregacion, manera un anciano of e persona cu ta studia Bijbel cu bo, ta hala bo atencion riba algu. En bes di rabia pasobra nan a duna bo e conseho amoroso ei, di un manera humilde bo mester “scucha disiplina i bira sabí.” (Proverbionan 8:33) Tin bes, ta bo studio di Bijbel kisas ta haci bo conciente di bo debilidadnan. Sí, e palabra di Dios ta “bibu i ta ehercé poder.” (Hebreonan 4:12) Lesa Bijbel i publicacionnan basá riba Bijbel por saca na cla bo pensamentu, sintimentu i motivacionnan di mas profundo. E lesamentu aki ta yuda bo evaluá bo mes di acuerdo cu e normanan elevá di Jehova. E ta revelá i identificá cosnan cu lo por stroba bo progreso spiritual.—Santiago 1:23-25.

Por ehempel, suponé cu un studiante di Bijbel tin e hábito di sinta pensa riba fantasianan inmoral. Kisas e no ta mira nada malu den esei, i ta razoná cu bon mirá, e no ta haciendo nada malu. Segun cu e sigui studia, e ta topa cu e palabranan di Santiago 1:14 i 15: “Cada un ta ser probá dor di ser atraí i tentá pa su mes deseo. Anto e deseo, ora e bira fértil, ta duna lus na picá; en buelta, picá, ora el a ser realisá, ta producí morto.” Awor e ta comprendé con dañino sigui cu e proceder ei lo ta pa su progreso! Con e por eliminá e obstáculo aki?—Marco 7:21-23.

Con pa Vence Obstáculo

Kisas cu yudansa di un cristian maduro, e studiante por haci algun investigacion adicional den e Palabra di Dios, usando e Index di Publicacionnan Watch Tower. * Por ehempel, e tema “Pensamentu,” ta dirigí e lector na un cantidad di artículo publicá cu ta mustra con pa vence e problema di fantasianan perhudicial. E artículonan aki ta enfatisá textonan bíblico práctico, manera Filipensenan 4:8, cu ta bisa: “Cualkier cos cu ta berdadero, cualkier cos cu ta di consideracion serio, cualkier cos cu ta hustu, cualkier cos cu ta decente, cualkier cos cu ta amabel, cualkier cos cu tin bon reputacion, cualkier birtud cu tin i cualkier cos digno di alabansa cu tin, sigui considerá e cosnan aki.” Sí, mester remplasá pensamentu inmoral cu pensamentu puru i edificante!

Durante su investigacion, sigur e studiante lo haña otro principionan bíblico cu lo yud’é evitá cu su problema ta bira pió. Por ehempel, textonan manera Proverbionan 6:27 i Mateo 5:28 ta spierta nos pa no alimentá nos mente cu informacion cu ta excitá nos sexualmente. E salmista a pidi den oracion: “Haci mi wowonan pasa bai pa nan no mira loke ta inútil.” (Salmo 119:37) Claro cu djis lesa e textonan bíblico aki no ta suficiente. E homber sabí ta bisa: “E curason dje hustu ta meditá pa duna contesta.” (Proverbionan 15:28) Dor di meditá no solamente riba loke Dios ta manda, sino tambe pakico e ta duna tal mandamentu, e studiante lo por haña un comprendimentu mas profundo di e sabiduria di Jehova su camindanan i con razonabel nan ta.

 I por último, e persona cu ta lucha pa vence e obstáculo aki cu ta strob’é di progresá, mester sintié liber pa busca Jehova su yudansa. Al fin i al cabo, Dios sa bon con nos ta trahá, cu nos ta imperfecto i cu nos ta trahá di stof. (Salmo 103:14) Oracion na Dios sin stop, pidiend’e yudansa, huntu cu esfuerso vigoroso pa nos no cai den fantasianan inmoral, cu tempu lo duna un resultado masha agradabel: un concenshi limpi i sin remordimentu.—Hebreonan 9:14.

No Entregá

Sea cual sea e problema cu bo ta luchando cuné, tene cuenta cu bo por haña bo de bes en cuando cu un recaida. Ora esei sosodé, ta masha normal cu bo ta sinti bo frustrá i desapuntá. Sin embargo, corda e palabranan di Galationan 6:9: “Laga nos no entregá di haci loke ta excelente, pasobra n’e debido tempu nos lo cosechá si nos no cansa.” Sirbidónan deboto di Dios manera David i Pedro a cometé algun fayo humiyante. Pero nan no a entregá. Humildemente nan a aceptá conseho, haci e cambionan necesario i despues a duna prueba di ta sirbidónan di Dios sobresaliente. (Proverbionan 24:16) Apesar di David su fayonan, Jehova a yam’é “un homber agradabel pa mi curason, cu lo haci tur loke mi ta deseá.” (Echonan 13:22) Asina tambe Pedro a recuperá di su fayonan i a bira un pilá dje congregacion cristian.

Hopi hende awe tabatin mésun éxito den vence obstáculo. Yutaka cu nos a mencioná anteriormente, a aceptá e oferta pa un studio di Bijbel. E ta conta: “Jehova su apoyo i bendicion cu tabata riba cada paso padilanti cu mi a dal, a yuda mi vence mi problema cu gèmbelmentu. Experenciá e realidad di e palabranan di Jesus, esta, cu mediante fe bo por asta move ‘ceru,’ ta duna mi hopi goso.” Cu tempu Yutaka a bira un sirbidó ministerial den e congregacion.

Kico di Keiko, kende tabata adicto na tabaco? E ruman muher cu tabata studia cuné a sugirié p’e lesa vários artículo den Spierta! cu a trata e tema di adiccion na tabaco. Keiko a asta pone e palabranan di 2 Corintionan 7:1 na un lugá bisto den su auto como un recordatorio diario pa keda limpi den bista di Jehova. Tog e no por a stop. “Mi tabata hopi rabiá cu mi mes,” Keiko ta corda. “P’esei mi a cuminsá puntra mi mes kico realmente mi tabata kier, sirbi Jehova of Satanas?” Una bes cu el a dicidí cu ta Jehova e kier a sirbi, el a haci oracion sincero pa yudansa. “Pa mi sorpresa,” e ta corda, “mi por a stop di huma sin sufri mashá. E único cos cu ta duel mi ta cu mi no a actua mas promé.”

Abo tambe por logra vence obstáculo cu ta stroba bo progreso. Mas bo armonisá bo pensamentu, deseo, palabra i accionnan conforme cu e normanan di Bijbel, mas lo bo haña un sintimentu di respet propio i confiansa. Bo rumannan spiritual i tambe miembronan di famia lo sinti nan refrescá i animá ora nan asociá cu bo. I mas cu tur otro cos, lo bo fortalecé bo relacion cu Jehova Dios. El a primintí cu lo e ‘kita tur obstáculo for di den caminda di su pueblo’ ora nan ta hui for di dominio di Satanas. (Isaías 57:14) I bo por ta sigur cu si bo haci esfuerso pa eliminá i vence obstáculo cu ta stroba bo progreso spiritual, Jehova lo bendicioná bo ricamente.

[Nota]

[Plachi na página 28]

Jesus a primintí cu mediante fe, hende por vence obstáculo cu ta manera ceru

[Plachi na página 30]

Lesa Bijbel ta fortalecé nos esfuerso pa vence debilidad spiritual