Bo Ta Corda?

Bo a apreciá di por a lesa e edicionnan recien di E Toren di Vigilancia? Wel, wak si bo por contestá e siguiente preguntanan:

• Di con e preguntanan hací den Job capítulo 38 merecé nos consideracion awe tambe?

Ni científiconan no por caba di comprendé hopi dje obranan maraviyoso cu Dios a hala atencion na dje. Esakinan ta entre otro con gravedad ta tene e tera den órbita, kico exactamente ta lus, di con tin un variedad infinito di sneuvlok, con gotanan di awaceru ta forma, i cuantu energia tin den tempestad compañá pa bos i weerlicht.—15/4, página 4-11.

• Cua ehempelnan bíblico por yuda nos trata cu sintimentunan negativo?

Asaf, Baruc i Noemí a haña nan cu periodonan di desanimacion of otro sintimentunan negativo. I registro bíblico di e manera cu nan a trata exitosamente cu e situacionnan ei por yuda nos.—15/4, página 22-4.

• Cua ta algun manera práctico pa yuda biudanan cristian?

Amigunan por ofrecé yudansa di un manera bondadoso i cla. Miembronan di famia of otronan kisas ta den posicion pa ofrecé yudansa financiero of material caminda tin berdadero necesidad. Compañeronan cristian tambe por yuda dor di duna un man amoroso manera un bon amigu, i percurá apoyo spiritual i consuelo.—1/5, página 5-7.

• Di con ta importante pa casa “solamente den Señor” manera 1 Corintionan 7:39 ta consehá?

Casa cu hende incrédulo hopi bes a resultá di ta desastroso. Ademas, sigui e conseho divino aki ta un asuntu di lealtad na Jehova Dios. Ora nos cumpli cu e Palabra di Dios, nos curason no ta condená nos. (1 Juan 3:21, 22)—15/5, página 20-1.

• Siendo cu Jehova ta esun cu por pordoná nos picánan, di con cristiannan ta confesá nan picánan serio na ancianonan den e congregacion?

Ta cierto cu si un cristian a cometé picá serio, e tin cu busca e pordon di Jehova. (2 Samuel 12:13) Pero mescos cu profeta Natan a duna yudansa na David, awe tin ancianonan maduro den e congregacion cu por yuda pecadónan repentí. Acudí n’e ancianonan ta na armonia cu e instruccion duná na Santiago 5:14 i 15.—1/6, página 31.

• Ki evidencia tin cu nos mester percurá pa huérfano i biuda den necesidad?

Historia skirbí ta mustra cu percurá pa hende asina tabata un marca di adoracion berdadero cerca hebreonan di antigwedad i tambe e cristiannan di promé. (Éxodo 22:22, 23; Galationan 2:9, 10; Santiago 1:27) Apostel Pablo a duna instruccionnan bon cla den e Scritura pa cristiannan percurá pa biudanan den necesidad. (1 Timoteo 5:3-16)—15/6, página 9-11.

• Kico ta e clave pa un bida felis i cu nificacion?

Nos tin cu cultivá i mantené un bon relacion cu Jehova, nos Tata celestial. Un studio di Bijbel ta un yudansa importante pa nos haci hustamente esei.—1/7, página 4-5.

• Cada hende tin un spiritu inmortal cu ta keda bibu despues di morto?

Maske tin hende ta kere cu hende tin un spiritu—no un alma—inmortal, Bijbel no ta apoyá e idea ei. Bijbel ta mustra cu ora un persona muri, e ta bolbe na stòf i e ta stop di existí. Pero Dios tin e abilidad pa restor’é na bida, p’esei anto, cualkier speransa pa un futuro bida mediante resureccion ta keda den man di Dios. (Eclesiástes 12:7)—15/7, página 3-6.

• Unda Daniel tabata ora e tres hebreonan a ser poné na prueba riba e yanura di Dura?

Bijbel no ta bisa. Kisas pa motibu di su rango, Daniel no tabatin nodi di ta presente, of podisé e tabata ausente debí na un asignacion di trabou. Pero nos por ta sigur cu e no a comprometé su fieldad na Jehova.—1/8, página 31.