Briyando Como Iluminadó den e Ciudad di Lus

Fluctuat nec mergitur, esta: “Ola ta sut’é, pero e no ta sink,” ta e lema dje stad di Paris.

MESCOS cu un barcu, durante e último 2.000 añanan, Paris a hañ’é ta soportá balentemente vários tormenta di pafó i rebelion interno pa por a keda drif. Awor, como un dje stadnan mas bunita di mundu, Paris ta masha gustá pa su arkitectura espléndido, su bulevardnan cu careda di palu i museonan mundialmente famoso. Algun hende ta pensa cu ta ei ta caminda poëta, pintor i filósofonan ta frecuentá. Otronan ta encantá cu su delicianan gastronómico i ta admirá su casnan di moda.

Históricamente, Paris tabata un dje bastionnan di catolicismo. Doshen aña pasá, pa motibu di su papel crucial den un movementu intelectual europeo conocí como Iluminacion, Paris a bira conocí como e Ciudad di Lus. Awe, mayoria habitante di Paris, sea cu nan ta realisá esei of no, ta mas bou di influencia di filosofia cu ta data for di e periodo ei, cu bou di influencia di religion.

Sin embargo, sabiduria humano no a iluminá bida di hende manera nan a spera. Awe, hopi ta busca iluminacion for di un otro fuente. Pa mas o ménos 90 aña caba, Testigonan di Jehova ta ‘briyando como iluminadó’ na Paris.  (Filipensenan 2:15) Mescos cu nabegantenan ábil, nan a haña nan ta ahustá nan mes constantemente na coriente of sucesonan nobo pa por tuma na bordo “e cosnan deseabel di tur e nacionnan.”—Ageo 2:7.

Un Stad Yen di Reto

Na 1850, Paris tabata un stad di 600.000 habitante. E poblacion actual, incluso e suburbionan, ta mas cu 9 miyon hende. E crecementu ei a pone cu Paris a bira Francia su stad di mas diversificá. E ta un centro mundial di educacion avansá, e tin un dje universidadnan mas bieu na mundu i e tin rond di 250.000 studiante. Algun suburbio di Paris cu tin hopi edificio haltu di flet i den cua ta reina delincuencia i desempleo, ta representá e banda scur di Paris. Sin duda, p’e Testigonan di Jehova presentá e bon nobo den un manera atractivo na tur sorto di hende, nan mester ta ábil i flexibel.—1 Timoteo 4:10.

Mas cu 20 miyon turista ta bishitá Paris tur aña. Bo por mira nan yen di entusiasmo ta subi Eiffel Toren, ta cana keiru banda di riu Seine of ta sinta trankil den café i restaurant  riba acera ta disfrutá dje ambiente. Pero pa e habitante di Paris, e ritmo di bida di tur dia por ta basta agitá. “Henter ora nan ta na careda,” segun Christian, un minister di tempu completo. “Ora nan yega cas bek for di trabou, nan ta morto cansá.” No ta fácil pa papia cu hende ocupá asina.

Sin embargo, un dje problemanan di mas grandi cu Testigonan di Jehova ta confrontá na Paris, ta pa haña hende na cas. Algun edificio tin intercom. Pero cu e aumento di crímen, hopi bes e edificionan di flet tin sistemanan di siguridad electrónico instalá na porta, i ta imposibel pa drenta. Esaki sin duda ta splica e motibu pakico den algun área tin un promedio di solamente 1 Testigo pa cada 1.400 persona. P’esei, mas i mas e rumannan ta duna testimonio via telefon i testimonio informal. Testigonan di Jehova a logra laga nan “lus briya” den mas manera?—Mateo 5:16.

Oportunidad i lugá pa duna testimonio informal tin na granèl. Martine a mira un señora cu a parce angustiá, pará na un parada di bus. E señora a caba di perde su único yu muher. Martine a dun’é un foyeto cu ta contené e speransa bíblico consolador di resureccion. Anto pa un par di luna e no tabatin contacto cuné. Ora Martine a mira e señora atrobe, el a logra cuminsá un studio di Bijbel cuné. Apesar di oposicion di parti di su esposo, e señora a bira un Testigo.

Testimonio Informal Fructífero

Paris su sistema di transporte público ta un di esnan mas eficiente na mundu. E famoso Metro ta transportá 5.000.000 pasahero pa dia. Nan ta bisa cu Paris su stacion central subteráneo, Châtelet-Les-Halles, ta un di esnan mas grandi i mas druk na mundu. Tin hopi oportunidad pa topa hende. Tur dia Alexandra ta bai trabou cu Metro. Un dia el a combersá cu un yoncuman cu tabata malu pa muri cu leukemia. Alexandra a dun’é un tratado tocante e speransa di Paradijs. Pa seis siman largu nan a combersá tocante Bijbel tur dia n’e mésun sitio i ora. Riba un dia, e homber a stop di bini. Poco despues, su esposa a yama Alexandra na telefon pa pidié bin hospital pasobra su casá tabata den condicion crítico. Lamentablemente, Alexandra a yega lat. Despues cu e homber a muri, su esposa a muda bai Bordeaux, den zuidwest di Francia, caminda Testigonan di einan a bishit’é. Tabata un noticia maraviyoso pa Alexandra ora el a tende un aña despues cu e biuda a bautisá como Testigo cristian di Jehova, cu e speransa di mira su casá resucitá!—Juan 5:28, 29.

Un muher cristian di edad a papia cu Renata sintá den un trein cu tabata biaha for di Paris pa Limoges, den parti central di Francia. Den su pais natal, Polonia, Renata a studia teologia, hebreo i griego pa cincu aña, pero el a perde fe den Dios. Tres luna promé cu e encuentro den trein, el a resa na Dios. Aunke e no tabata ègt interesá den loke e ruman muher di edad tabata bisa i a pensa cu tog lo e no tende mas di dje, Renata a dun’é su number di telefon. Sin embargo, e ruman tabata persistente i a soru pa djis despues Renata haña un bishita. Ora un pareha Testigo a pasa cerca dje, Renata a pensa: ‘Ta kico nan por bin siña mi?’ Apesar di su educacion den teologia, humildemente Renata a sinti su mes atraí n’e berdad di Bijbel. “Mi a comprendé mesora cu esaki tabata e berdad,” e ta splica. Awor e ta contentu di por compartí e mensahe di Bijbel cu otro hende.

Michèle tabata siña stuur. Otro studiantenan den su klas di teorí a cuminsá papia tocante sex promé cu matrimonio. Michèle a expresá su desaprobacion abiertamente. Un siman despues, e instructor, Sylvie, a puntr’é: “Ta Testigo di Jehova bo ta?” Sylvie a keda impresioná cu Michèle su punto di bista bíblico. Nan a cuminsá un studio di Bijbel, i un aña despues Sylvie a bautisá.

E hopi parke i hardinnan na Paris ta crea un bunita ambiente pa combersá cu hende. Probechando di su pausa, Josette a bai na un parke, caminda un señora di edad, Aline, tabata cana keiru. Josette a splik’é e promesanan  maraviyoso cu Bijbel ta trece dilanti. Nan a haci areglo pa un studio di Bijbel i pronto Aline a progresá te cu el a bautisá. Awor, cu su 74 aña di edad, Aline ta un minister pionero regular masha productivo, contentu di por compartí e berdad cristian cu otro hende.

Lus pa Tur Nacion

E Testigonan na Paris no tin nodi nabegá bai teranan leu pa topa hende di diferente cultura. Casi 20 porciento dje poblacion ta stranhero. Tin congregacion cristian i grupo den rond di 25 idioma.

Hopi bes creatividad i imaginacion ta hiba na bon resultado den e asignacion special aki di evangelisá. Un Testigo filipino a crea su mes teritorio special. Haciendo cómpras, el a logra cuminsá vários studio di Bijbel dor di iniciá combersacion cu otro filipinonan den e pacusnan.

Ta bale la pena tuma iniciativa den e trabou di predicá. Na december 1996, ora e Testigonan di un congregacion di idioma stranhero a haña sa cu un circo mundialmente famoso tabata biniendo e stad, nan a dicidí di purba haci contacto cu e artistanan. Un anochi despues dje show, nan a logra papia cu e artistanan cu tabata regresando nan hotel. E iniciativa aki a duna nan chens di laga 28 Bijbel, 59 buki cristian, 131 foyeto i 290 revista. Na fin dje estadia di tres siman, un dje acrobatnan a puntra: “Con mi ta haci bira un Testigo di Jehova?” Un otro a declará: “Mi ta bai predicá den mi pais!”

Tin Tesoro Scondí pa Descubrí Ainda

Unda cu bishitantenan di Paris wak, nan ta descubrí tesoronan arkitectónico admirabel di épocanan di pasado. Pero ainda tin mas cos precioso pa descubrí. Aniza a bini Francia huntu cu su tio cu ta un diplomático. Na cas e tabata lesa Bijbel regularmente. Un dia cu e tabata saliendo for di cas purá, un pionero a dun’é e tratado Pakiko bo por konfia e Beibel. Nan a traha un cita pa e siguiente siman i a cuminsá un studio di Bijbel. Aniza a ricibí bastante oposicion di su famia. El a progresá den su studio te cu el a bautisá. Con e ta mira e privilegio cu e tin di compartí e berdad cu otro hende? “Na promé instante e trabou di predicá tabata difícil pasobra mi ta tímido. Sin embargo, ora mi lesa Bijbel, e ta stimulá mi. Mi no por sinta sosegá, sin haci nada.” E actitud ei ta caracterisá hopi Testigo na Paris, kendenan tin “hopi di haci den e trabou di Señor.”—1 Corintionan 15:58.

E berdad di Bijbel ta briya tambe riba e proyectonan di bibienda pafó di Paris, revelando otro “hoyanan.” Bruce a bai bishitá su amigu kende a caba di bira Testigo di Jehova, cu intencion di fia algun grabacion cerca dje. El a haña su amigu ta papia tocante Bijbel cu algun hende cu Bruce conocé, i Bruce a scucha e combersacion. El a aceptá e oferta di un studio di Bijbel, pero e tabatin algun problema sí. “Mi tabata masha conocí den e becindario ei. Mi ruman homber mayó tabata gusta bringa, i ami tabata organisá fiesta di baile cu hopi bochincha. Con otro hende lo a aceptá e echo cu ami tabata birando un Testigo?” Apesar di peticionnan persistente pa organisá fiesta, Bruce a stop cu e actividadnan ei. Un luna despues el a cuminsá predicá: “Tur hende den e becindario kier a sa di con mi a bira Testigo.” Poco despues el a bautisá. Cu tempu, el a haña e privilegio di asistí n’e Scol di Entrenamentu Ministerial.

Buscamentu di tesoro por exigí hopi esfuerso. Pero ta un goso masha grandi ora e trabou duna resultado! Jacky, Bruno i Damien tabata panaderonan na Paris. “Tabata imposibel pa haña contacto cu nos pasobra nos tabata traha tur ora i nos no sa ta na cas,” Jacky ta splica. Patrick, un pionero regular, a mira cu tabatin algun cuarto chikitu te ariba den un edificio, i el a concluí cu por lo ménos un di nan tabata habitá. Su esfuersonan persistente pa alcansá e habitantenan a duna resultado ora cu riba un atardi por fin el topa Jacky cu tabata keda ei temporalmente. E resultado? E tres amigunan  a bira Testigo i a logra haña otro trabou cu a permití nan participá mas tantu den actividad teocrático.

Calmando e Tormenta

Recientemente, algun medio di comunicacion na Francia a pinta Testigonan di Jehova como un secta religioso peligroso. Na 1996, e Testigonan a participá cu entusiasmo den e distribucion di mas cu nuebe miyon ehemplar di un tratado cu informacion special titulá Testigonan di Jehova—Loke Bo Mester Sa. E resultadonan tabata sumamente positivo.

A haci un esfuerso special pa alcansá tur hende. Hopi funcionario a expresá nan aprecio p’e Testigonan. Un consehero municipal a skirbi: “Testigonan di Jehova a haci bon di repartí e tratado aki. E ta pone cosnan stret.” Un dokter a comentá: “Pa hopi tempu mi tabata warda riba esaki!” Un homber dje área di Paris a skirbi: “Pa casualidad mi a lesa e tratado Testigonan di Jehova—Loke Bo Mester Sa. Mi tin gana di sa mas i probechá dje oferta pa ricibí un studio di Bijbel grátis na cas.” Un otro a skirbi: “Danki pa boso onestidad.” Un señora católico a bisa e Testigonan: “Hè! Por fin boso a reaccioná riba e mentiranan aki!”

Un goso special pa hopi Testigo hóben den e área di Paris tabata e campaña di predicacion organisá en coneccion cu e Dianan di Hubentud Mundial Católico na 1997. Aunke e temperatura tabata mas cu 35 grado Celsius, rond di 2.500 Testigo a tuma parti. Den cuestion di algun dia, nan a laga 18.000 ehemplar dje foyeto Un Buki pa Tur Hende cerca hóbennan cu a bini di tur parti di tera. Ademas di duna un testimonio excelente dje nomber di Jehova i sembra simianan dje berdad, e campaña a stimulá e Testigonan hóben. Un ruman muher yong, cu a corta su vakansi p’e por a participá plenamente den e actividad special aki, a skirbi: “Jehova tin un pueblo felis riba tera cu ta usa nan energia pa alabá su nomber. E dos dianan aki, asina yen i asina ricu, a ègt bal tur e vakansinan di henter mi bida! (Salmo 84:10)”

Dia 28 di februari 1998 tabata e di 65 aniversario di un decreto cu Hitler a emití i cu a resultá den e prohibicion di Testigonan di Jehova na Alemania. Riba e fecha ei e Testigonan na Francia a huur salanan pa haci presentacion público dje video Testigonan di Jehova Ta Para Firme Contra Atake Nazi, un video cu ta duna detaye dje persecucion cu e pueblo di Jehova a sufri. Nan a repartí mas cu shete miyon invitacion. Historiadónan i ex-prezunan di campo di concentracion a duna testimonio conmovedor. Den e área di Paris, casi 5.000 persona a asistí, incluso un cantidad grandi di hende cu no ta Testigo.

Hopi hende na Paris ta apreciá e lus spiritual mashá, i nan ta contentu cu publicadónan di Reino ta briyando cla-cla como iluminadó. Ta manera Jesus a declará: “E cosecha ta grandi, pero e trahadónan ta poco.” (Mateo 9:37) E determinacion firme di Testigonan di Jehova pa vence e dificultadnan di predicá den e stad a haci Paris un Ciudad di Lus den un sentido special: p’e gloria di Jehova.

[Plachi na página 9]

Stadhuis

[Plachi na página 9]

Ópera Garnier

[Plachi na página 9]

Museo di Louvre

[Plachinan na página 10]

Compartiendo e mensahe di Bijbel cu hende ocupá tur caminda cu por haña nan