Haci Bo Hubentud un Éxito

DEN un encuesta cu a ser tené entre habitantenan di un pais europeo, a pidi nan scoge entre tres alternativa: bunitesa, rikesa of hubentud. E promé escoho a cai riba hubentud. Sí, hende di tur grupo di edad ta considerá e añanan di tiener i yega te cu bint’i picu aña, como un tempu special den bida. I tur hende kier pa hóbennan pasa di infancia bira adulto na un manera exitoso. Pero con?

Bijbel por yuda? E contesta ta definitivamente cu sí. Laga nos examiná dos área den cua e Palabra di Dios por ta di yudansa special pa hóbennan, tal bes mas pa nan cu pa cualkier otro grupo di edad.

Con pa Sali Bon cu Otro Hende

Jugend 2000 ta un informe riba un encuesta hopi extenso cu nan a tene riba actitud, balornan i comportacion di mas cu 5.000 hóben na Alemania. E encuesta ta revelá cu ora hóbennan ta den nan actividadnan di tempu liber—manera scucha música, participá den deporte of djis para combersá—casi semper nan ta den compania di otro hende. Tal bes mas cu cualkier otro grupo di edad, hóbennan kier ta huntu cu nan pareunan. Consecuentemente, sigur un dje secretonan di éxito den hubentud ta pa sali bon cu otro hende.

Pero no ta semper fácil pa sali bon cu otro hende. Sí, relacionnan humano ta un área den cua mucha homber i mucha muher ta admití cu hopi bes nan tin problema. Aki Bijbel por ta un berdadero yudansa. E Palabra di Dios ta contené guia básico cu ta yuda hóbennan desaroyá relacionnan balansá. Kico Bijbel ta bisa?

Un dje principionan mas importante di relacionnan humano yama e Regla di Oro: “Trata otro hende den tur kos meskos ku bo ke pa nan trata bo.” Ora bo trata otro hende cu respet, dignidad i bondad, esei ta animá nan pa trata bo den e mésun manera. Un trato bondadoso por neutralisá un atmósfera di friccion i tension. Si bo ta conocí como un persona cu ta trata otro hende cu consideracion, probablemente bo ta haña reconocimentu i aceptacion cerca nan. Bo no ta sinti bo contentu ora otro hende ta aceptá bo?—Mateo 7:12, Beibel na papiamentu koriente.

Bijbel ta consehá bo pa “stima bo próhimo mescos cu bo mes.” Bo tin cu stima bo mes den e sentido di soru pa bo mes i mantené un midí saludabel di respet propio, ni di mas ni di ménos. Pakico esei ta yuda? Wel, si bo no tin respet  pa bo mes, bo por bira demasiado crítico di otro hende, loke ta stroba bon relacion humano. En cambio, balor propio balansá ta un fundeshi riba cua bo por edificá bon amistad.—Mateo 22:39.

Una bes un amistad desaroyá, mester tin esfuerso di ámbos banda pa fortifik’é. Ora bo ta invertí tempu den un amistad esei mester laga bo sinti contentu, ya cu “tin mas felicidad den duna cu tin den ricibí.” Un forma di duna ta di pordoná, loke ta encerá pasa por haltu di fayonan menor i no spera perfeccion di otronan. Bijbel ta bisa nos: “Laga tur hende sa cu boso ta razonabel.” Sí, “cuantu cu ta dependé di boso, sea pacífico cu tur hende.” Ora un amigu mustra bo riba un di bo debilidadnan, con bo ta reaccioná? Pensa riba e conseho práctico aki for di Bijbel: “No sea lihé den bo spiritu pa sinti bo ofendí,” ya cu “e golpinan di un amigu ta bon intencioná.” No ta berdad cu amigu tin influencia riba bo manera di pensa, di papia i di comportá bo mes? P’esei, Bijbel ta advertí: “Mal asociacion ta daña custumbernan útil.” Di otro banda, “esun cu ta cana cu hende sabí lo bira sabí.”—Echonan 20:35; Filipensenan 4:5; Romanonan 12:17, 18; Eclesiástes 7:9; Proverbionan 13:20; 27:6, Revised English Bible; 1 Corintionan 15:33.

Marco ta papia pa hopi homber i muher hóben ora e bisa: “Principionan bíblico ta un gran yudansa pa sali bon cu otro hende. Algun hende cu mi conocé ta simplemente biba pa nan mes i pa loke nan por saca for di bida. Bijbel ta siña nos pensa, no asina tantu riba nos mes, sino riba otronan. Te asina leu cu mi por mira, esei ta loke mas ta contribuí na bon relacion humano.”

Loke hóbennan manera Marco ta siña for di Bijbel ta yuda nan no solamente den hubentud sino pa añanan den futuro. I relacioná cu futuro, nos ta haña un otro manera den cua Bijbel por ta di yudansa special p’e generacion mas yong.

Ansiedad Tocante Futuro

Hopi hóben tin un mente curioso. Tal bes mas cu cualkier otro grupo di edad, nan kier sa kico ta sosodiendo i pakico. I Bijbel, mas cu cualkier otro buki, ta splica e motibunan tras di condicionnan di mundu i ta bisa nos kico pa spera den futuro. I esaki ta loke e generacion mas yong kier sa. Pakico nos por ta sigur di esei?

Wel, aunke hopi hende ta kere cu hóbennan ta biba djis pa biba, algun encuesta ta pinta un cuadro un tiki diferente. Nan ta mustra cu hopi bes hóbennan ta tuma bon nota di loke ta pasa rond di nan, i despues nan ta saca nan mes conclusionnan con bida probablemente lo ta den futuro. Evidencia di esaki ta cu 3 di cada 4 hóben ta pensa “hopi bes” of “masha hopi bes” riba futuro. Aunke hóbennan por lo general ta optimista, e mayoria di nan ta mira futuro cu un poco ansiedad.

Pakico nan tin ansiedad? Ya caba gran parti dje siguiente generacion di adulto tin problema cu crímen, violencia i uso di droga. Hóbennan ta preocupá si nan lo haña trabou vast den un  sociedad sumamente competitivo. Nan ta sinti nan bou di preshon pa haña bon punto na scol of pa score haltu na trabou. Un mucha muher di 17 aña a lamentá: “Nos ta biba den un sociedad caminda cachó ta come cachó. Tur hende ta busca moda di sigui nan mes kièr. Semper bo tin cu duna prueba di kico bo por haci, i esei tin mi fadá.” Un otro persona yong di 22 aña a bisa: “Hende cu logra éxito ta bai dilanti den bida i por biba cómodamente. Esnan cu ta di malu, cu pa un of otro motibu no por mantené e ritmo, gewoon ta keda atras.” Pakico bida ta asina competitivo? Bida lo keda asina pa semper?

Splicacion Realístico

Ora hóbennan mira sociedad cu inkietud of ansiedad, nan ta di acuerdo cu Bijbel, sea cu nan ta realisá esei of no. E Palabra di Dios ta mustra cu e ‘sociedad djawe den cua cachó ta come cachó’ ta un señal di e tempu cu nos ta aden. Apostel Pablo a skirbi tocante nos tempu den un carta n’e yoncuman Timoteo: “Lo presentá tempu crítico, duru pa trata cuné.” Pakico crítico i pakico duru pa trata cuné? Pasobra, manera Pablo a skirbi mas aleu, hende lo  ta “stimadó di nan mes, stimadó di placa, presumido, halsá, . . . malagradecidu, desleal, . . . feros.” Esei no ta un descripcion exacto dje manera cu hopi hende ta comportá nan awe?—2 Timoteo 3:1-3.

Bijbel ta bisa cu e tempu crítico aki lo presentá “den e último dianan,” promé cu bini cambionan grandi riba henter e sociedad humano. E cambionan aki lo afectá tur hende, tantu hóben como bieu. Ki sorto di cambio? Denter di poco un gobiernu celestial lo tuma mando di asuntunan humano, i e súbditonan lo disfrutá di “e abundancia di pas” tur caminda. “E hustunan mes lo poseé tera, i nan lo biba pa semper riba dje.” Sintimentu di ansiedad i miedu lo pasa pa historia.—Salmo 37:11, 29.

Ta Bijbel so ta duna informacion confiabel di loke tin den futuro. Ora un hóben sa kico pa spera p’e siguiente par di añanan, e por prepará pa desaroyonan i sinti su mes sigur i cu mas control riba su bida. E sintimentu aki ta reducí tension i ansiedad. Den e manera aki Bijbel ta trata cu e necesidad special dje generacion mas hóben, esta, pa comprendé sociedad i pa sa kico futuro lo trece.

Éxito den Hubentud

Con por midi éxito den hubentud? Un educacion avansá, posesion material i un círculo grandi di amistad? Kisas hopi hende ta pensa asina. E añanan di tiener te cu bint’i picu aña mester duna un persona un bon comienso p’e bida di futuro. Cu otro palabra, éxito den hubentud por ta un indicacion di loke lo bini mas despues.

Manera nos a mira, Bijbel por yuda un persona hóben haña éxito den su añanan mas yong. Hopi hóben a descubrí esaki caba den nan mes bida. Nan ta lesa e Palabra di Dios tur dia i ta aplicá loke nan ta siña. (Mira “Tip di un Hóben Sirbidó di Jehova,” na página 6.) Sí, Bijbel ta berdaderamente un buki pa hóbennan awe pasobra e por yuda nan pa “ta plenamente competente, completamente ekipá pa tur bon obra.”—2 Timoteo 3:16, 17.

[Komentario na página 5]

Un dje secretonan di éxito den hubentud ta pa sali bon cu otro hende

[Komentario na página 6]

Tal bes mas cu cualkier otro grupo di edad, hóbennan  kier sa kico ta sosodiendo i pakico

[Kuadro na página 6, 7]

Tip di un Hóben Sirbidó di Jehova

Alexander tin 19 aña di edad. El a lanta den un famia Testigo di Jehova, i e tin goso den practicá su fe di henter curason. Pero esaki no tabata semper e caso. Alexander ta splica:

“Lo bo no kere, pero mi a asociá cu Testigonan di Jehova como hóben no-bautisá pa mas cu shete aña. Durante e tempu ei, mi adoracion tabata sin gracia, djis un asuntu di rutina. Mi ta kere cu simplemente mi no tabatin e ánimo pa haci un evaluacion onesto di mi mes.”

Despues Alexander su actitud a cambia. E ta sigui conta:

“Tur ora mi mayornan i amigunan den congregacion tabata animá mi pa lesa Bijbel tur dia, pa siña conocé Jehova personalmente. Finalmente, mi a dicidí di purba. Pues mi a reducí mi wakmentu di television i haci lesamentu di Bijbel parti di mi rutina di mainta trempan. Por fin, mi a cuminsá comprendé kico Bijbel tin aden. Mi a bin mira con e por yuda mi como hende. I—riba tur cos—mi a comprendé cu Jehova kier pa mi siña conoc’é. Una bes cu mi a tuma esei na pechu, mi propio relacion personal cuné a cuminsá crece, i mi amistadnan den congregacion a mehorá. Bijbel a haci un diferencia masha grandi mes den mi bida! Mi ta recomendá tur hóben sirbidó di Jehova pa lesa Bijbel tur dia.”

Tin miyones di hóben rond mundu cu ta asociá cu Testigonan di Jehova. Abo ta un di nan? Lo bo kier saca probecho for di lesa Bijbel regularmente? Wel, pakico no sigui e ehempel di Alexander? Baha man na actividadnan ménos importante i haci lesamentu di Bijbel parti di bo rutina diario. Esei lo yuda bo sigur.