Pregunta di Lector

Cuantu tempu Job a sufri?

Tin hende ta pensa cu Job su pruebanan a dura hopi aña, pero e buki di Job no ta indicá cu su sufrimentu a dura asina largu.

Ta parce cu e promé fase di Job su pruebanan, esta, e pérdida di miembronan di famia i pertenencianan, a dura masha poco. Nos ta lesa: “Awor a yega e dia cu [Job] su yu hombernan i su yu muhernan tabata come i bebe biña den cas di nan ruman homber, e primogénito.” Job a haña un noticia tras di otro cu el a perde su bacanan, buricunan, carnénan, camelnan i su sirbidónan cu tabata cuida e animalnan ei. Aparentemente, ta djis despues di esei Job a haña sa dje morto di su yunan, cu “tabata come i bebe biña den cas di nan ruman homber, e primogénito.” Ta parce cu tur e sucesonan aki a tuma lugá riba un solo dia.—Job 1:13-19.

E siguiente fase di e pruebanan di Job lo mester a tuma mas tempu. Satanas a acercá Jehova i a pretendé cu Job lo a faya si e sufrimentu lo a afectá e mes, esta su curpa, personalmente. Despues el a dal Job cu “un blufein maligno for di su plant’i pia te na corona di su cabes.” Kisas a tuma un poco tempu p’e malesa aki plama rond su curpa. I probablemente lo a tuma tempu promé cu e noticia di “tur e calamidad aki” a yega na orea di su supuesto consoladónan cu a bini cerca dje.—Job 2:3-11.

Elifas tabata di Teman den e pais di Edom, i Zofar tabata dje área den nortwest di Arabia, pues nan teritorionan natal no tabata leu for di esun di Job na Uz, cu probablemente tabata ubicá den nort di Arabia. Pero Bildad tabata un suhita, i tin hende ta pensa cu su pueblo a biba cantu di riu Eufrátes. Si Bildad tabata den becindario di su cas e tempu ei, lo a tuma siman of lunanan promé cu el a tende di e situacion di Job i p’e biaha bai Uz. Claro cu por ta posibel cu e tres hombernan aki tabata den becindario di Job ora su sufrimentu a cuminsá. En todo caso, ora Job su tres compañeronan a yega, nan “a keda sinta cuné den tera shete dia i shete anochi” sin papia.—Job 2:12, 13.

Despues a bini e fase final di e pruebanan di Job. Hopi capítulo dje buki ta cubri e detayenan di e fase aki. Tabatin un seri di debate of discurso di parti di e supuesto consoladónan, i hopi bes Job a contestá nan. Despues cu esei a terminá, e yoncuman Elihú a reprendé nan i Jehova a corigí Job for di su posicion den shelu.—Job 32:1-6; 38:1; 40:1-6; 42:1.

P’esei anto, Job su sufrimentu i fieldad bou di prueba lo a dura un par di luna, kisas ménos cu un aña. Podisé di experencia bo sa cu pruebanan difícil ta parce di dura pa eternidad. Sin embargo, nos no mester lubidá cu nan ta caba un dia, manera a sosodé den e caso di Job. Pero pa largu cu nos pruebanan por dura, laga nos corda cu nos tin Dios su apoyo, manera e palabranan inspirá ta mustra: “Aunke e tribulacion ta pa un momento i ta liviano, e ta obra pa nos un gloria cu ta di peso mas i mas excelente i ta eterno.” (2 Corintionan 4:17) Apostel Pedro a skirbi: “Despues cu boso a sufri un poco tempu, e Dios di tur bondad inmerecí, kende a yama boso pa su gloria eterno den union cu Cristo, mes lo terminá boso entrenamentu, lo e haci boso firme, lo e haci boso fuerte.”—1 Pedro 5:10.