Tene Fe Manera di Abraham!

“Esnan cu ta pega na fe ta esnan cu ta yu di Abraham.”—GALATIONAN 3:7.

1. Con Abram a trata cu otro prueba na Canan?

ABRAM a bandoná un bida di hopi comodidad na Ur obedeciendo e ordu di Jehova. E incumbiniencianan cu el a pasa aden durante e añanan cu a sigui tabata djis un preludio dje prueba di fe cu el a enfrentá na Egipto. E relato di Bijbel ta bisa: “Awor a surgi un hamber den e pais.” Ki fácil lo tabata pa Abram sinti su mes amargá tocante su situacion! En bes di esei, el a dal pasonan práctico pa percurá pa su famia. “Abram a baha bai Egipto pa biba einan como stranhero, pasobra e hamber den e pais tabata severo.” E famia grandi di Abram sigur lo no a keda sin hala atencion na Egipto. Jehova lo a cumpli cu su promesa i protehá Abram contra peliger?—Génesis 12:10; Éxodo 16:2, 3.

2, 3. (a) Pakico Abram a sconde e berdadero identidad di su esposa? (b) Den Abram su manera di resolvé e problema, con el a trata cu su casá?

² Nos ta lesa na Génesis 12:11-13: “A sosodé cu asina cu e tabata cerca di drenta Egipto, cu e ora ei el a bisa Sarai su esposa: ‘Mira, por fabor! Mi sa bon cu bo ta un muher di bunita aparencia. Pues sigur lo sosodé cu e egipcionan lo mira bo i nan lo bisa: “Esaki ta su esposa.” I nan lo mata mi sigur, pero abo nan lo laga na bida. Por fabor, bisa cu bo ta mi ruman muher, pa por bai mi bon pa causa di bo, i mi alma sigur lo keda na bida pa causa di bo.’” Aunke Sarai tabatin mas cu 65 aña di edad, ainda e tabata sumamente bunita. Esei a pone e bida di Abram na peliger. * (Génesis 12:4, 5; 17:17) Mas importante ainda, e interesnan di Jehova tabata den wega, pasobra el a bisa cu pa medio dje desendencia di Abram tur nacion di tera lo a bendicioná nan mes. (Génesis 12:2, 3, 7) Siendo cu Abram no tabatin yu ainda, tabata masha importante pa el a keda na bida.

³ Abram a papia cu su esposa tocante un táctica cu mas promé nan a palabrá, esta, pa bisa cu e tabata su ruman muher. Ripará cu aunke e tabatin autoridad como patriarca, e no a malusá su posicion, sino a busca manera di haña Sarai su cooperacion i apoyo. (Génesis 12:11-13; 20:13) Den esaki, Abram a pone un ehempel excelente pa esposonan ehercé hefatura amoroso, i Sarai, dor di demostrá su sumision, ta un ehempel pa esposanan awe.—Efesionan 5:23-28; Colosensenan 4:6.

4. Con fiel sirbidónan di Dios djawe mester comportá nan mes ora e bida di nan rumannan ta na peliger?

⁴ Sarai por a bisa cu e tabata ruman muher di Abram pasobra en berdad e tabata su mitar ruman. (Génesis 20:12) Ademas, Abram no tabata obligá pa divulgá informacion na hende cu no tabatin derecho riba esei. (Mateo 7:6) Fiel sirbidónan di Dios den tempu moderno ta tuma na pechu e mandamentu di Bijbel pa ta onesto. (Hebreonan 13:18) Por ehempel, hamas nan lo gaña bou di huramentu den corte. Sin embargo, ora e bida físico i spiritual di nan rumannan ta na peliger, manera den tempu di persecucion of desordu civil, nan ta tuma na pechu e conseho di Jesus pa ta “cauteloso manera colebra i tog inocente manera palomba.”—Mateo 10:16;  mira E Toren di Vigilancia di 1 di november 1996, página 18, paragraf 19.

5. Pakico Sarai tabata dispuesto pa obedecé e peticion di Abram?

⁵ Con Sarai a respondé n’e peticion di Abram? Apostel Pedro ta describí muhernan manera Sarai como hende cu ta “spera den Dios.” P’esei Sarai por a comprendé e cuestionnan spiritual enbolbí den e asuntu. Ademas, el a stima i a respetá su casá. Pues Sarai a scoge pa ‘someté su mes na su esposo’ i sconde e echo cu e tabata casá. (1 Pedro 3:5) Claro cu haciendo esei, e mes tambe a core riesgo. “Manera Abram a drenta Egipto, e egipcionan a mira e muher i a ripará cu e tabata masha bunita. I e prinsnan di Fárao tambe a mir’é i nan a cuminsá gab’é cerca Fárao, di manera cu nan a hiba e muher cas di Fárao.”—Génesis 12:14, 15.

Liberacion di Parti di Jehova

6, 7. Den ki circunstancia angustioso Abram i Sarai a haña nan mes, i con Jehova a libra Sarai?

⁶ E situacion aki lo mester a causa basta angustia pa Abram i Sarai! Parce cu nan tabata cla pa violá Sarai sexualmente. Ademas, Fárao, inconciente di Sarai su berdadero estado civil, a duna Abram masha hopi regalo, di manera cu “Abram a bin haña carné i baca i buricu i sirbidó homber i sirbidó muher i buricu hembra i kamel.” * (Génesis 12:16) Ki un desprecio Abram lo mester tabatin p’e regalonan aki! Pa malu cu cos por a parce, Jehova no a bandoná Abram.

⁷ “E ora ei Jehova a dal Fárao i su cas cu plaganan grandi pa causa di Sarai, esposa di Abram.” (Génesis 12:17) Den un of otro manera desconocí pa nos, e berdadero causa dje “plaganan” aki a ser revelá na Fárao. Mesora el a reaccioná: “Riba esei Fárao a yama Abram i a bis’é: ‘Ta kico e cos cu bo a haci cu mi aki ta? Pakico bo no a bisa mi cu e tabata bo esposa? Pakico bo a bisa: “E ta mi ruman muher,” di manera cu mi tabata a punto di tum’é como mi esposa? I awor, ata bo esposa aki. Tum’é i bai!’ I relacioná cuné Fárao a duna ordu na algun homber, i nan a escoltá e cu su casá i tur loke e tabatin.”—Génesis 12:18-20; Salmo 105:14, 15.

8. Ki clase di proteccion Jehova ta primintí cristiannan awe?

⁸ Awe, Jehova no ta garantisá nos proteccion for dje efectonan dañino di morto, crímen, hamber of desaster natural. Jehova ta primintí nos sí cu semper lo e soru pa proteccion contra di cosnan cu por pone nos spiritualidad na peliger. (Salmo 91:1-4) E ta haci esei principalmente dor di duna nos spiertamentu oportuno mediante su Palabra i “e esclabo fiel i discreto.” (Mateo 24:45) Kico dje menasa di muri pa causa di persecucion? Aunke Dios por permití algun persona individual muri, hamas lo e permití pa su pueblo ser exterminá den su totalidad. (Salmo 116:15) I si algun persona fiel muri, nos por ta sigur di nan resureccion.—Juan 5:28, 29.

Sacrificio pa Mantené Pas

9. Kico ta indicá cu Abram a keda move constantemente den Canan?

⁹ Despues cu tur cos tabata mustra cu e hamber na Canan a pasa, “Abram a subi for di Egipto, e cu su casá i tur loke e tabatin, i Lot huntu cuné, rumbo pa Négueb [e área semi-secu zuid dje cerunan di Huda]. I Abram tabatin gran cantidad di tou di bestia i plata i oro.” (Génesis 13:1, 2) Pues e residentenan lo a mir’é como un homber di poder i influencia, un cabesante poderoso. (Génesis 23:6) Pero Abram no tabata kier a establecé su mes einan i mete cu política cananeo. Mas bien, “el a sigui padilanti, di un campamentu pa otro campamentu for di Négueb i pa Betel, pa e lugá caminda su tent tabata na promé instante entre Betel i Ai.” Manera semper, unda cu Abram a bai, el a duna prioridad n’e adoracion di Jehova.—Génesis 13:3, 4.

10. Ki problema a desaroyá entre e wardadónan di Abram i esnan di Lot, i pakico tabata importante pa resolvé esei rápidamente?

 ¹⁰ “Awor Lot, kende tabata compañá Abram, tambe tabata doño di carné i baca i tent. Di manera cu e tera no a permití nan tur biba huntu, pasobra nan propiedadnan a bira hopi i nan tur no por a biba huntu. I a lanta un pleitu entre e wardadónan di Abram su bestianan i e wardadónan di Lot su bestianan; i den e tempu ei e cananeo i e perizita tabata biba den e pais.” (Génesis 13:5-7) E tera no tabatin suficiente awa i yerba pa sostené tantu Abram como Lot su tounan. Di manera cu a lanta tension i rencor entre e wardadónan di bestia. E pleitunan ei no tabata pas pa adoradó dje Dios berdadero. Si e pleitamentu a sigui, lo por a surgi un brecha permanente. Pues, con Abram lo a atendé e asuntu aki? El a adoptá Lot despues cu Lot su tata a muri, tal bes lantand’e como su mes yu. Como esun di mas edad entre nan dos, Abram no tabatin derecho di tuma lo mihó pa su mes?

11, 12. Kico Abram a ofrecé Lot generosamente, i pakico loke Lot a scoge tabata imprudente?

¹¹ Pero “Abram a bisa Lot: ‘Por fabor, no laga tin mas pleitu entre ami cu bo i entre mi wardadónan di bestia cu bo wardadónan di bestia, pasobra ta ruman nos ta. No ta henter e pais ta na bo disposicion? Por fabor, separá for di mi. Si bo bai banda robes, e ora ei ami lo bai banda drechi; pero si bo bai banda drechi, e ora ei ami lo bai banda robes.’” Den cercania di Betel tin loke a ser yamá “un dje bon sitionan cu ta duna un bista panorámico riba Palestina.” Kisas ta for di einan “Lot a hisa su wowonan i a mira henter e Distrito di Jordan, cu henter esei tabata un region unda hopi awa ta core, promé cu Jehova a ruiná Sódoma i Gomora, manera e hardin di Jehova, manera e tera di Egipto te na Zoar.”—Génesis 13:8-10.

¹² Aunke Bijbel ta describí Lot como “hustu,” pa un of otro motibu e no a duna preferencia na Abram den e asuntu aki. Ta parce cu e no a consultá cu e homber mayor cuné aki tampoco. (2 Pedro 2:7) “Lot a scoge pa su mes henter e Distrito di Jordan, i Lot a muda su campamentu pa oost. Asina nan a separá for di otro. Abram a biba den e tera di Canan, pero Lot a biba meimei dje stadnan dje Distrito. Finalmente el a arma su tentnan banda di Sódoma.” (Génesis 13:11, 12) Sódoma tabata próspero i a ofrecé hopi beneficio material. (Ezekiel 16:49, 50) Aunke cu for di un punto di bista material loke Lot a scoge por a parce sabí, den sentido spiritual sí e tabata un mal escoho. Pakico? Pasobra “e hombernan di Sódoma tabata malbado i tabata gran pecadó contra Jehova,” segun Génesis 13:13. Cu tempu, Lot su decision pa muda bai ei lo a causa su famia hopi tristesa.

13. Con e ehempel di Abram ta probechoso pa cristiannan cu por haña nan den un disputa financiero?

¹³ Di otro banda, Abram a manifestá fe den Jehova su promesa di cu su desendencia finalmente lo a poseé henter e pais; e no a kibra cabes cu un parti chikitu di dje. Generosamente, el a actua na armonia cu e principio declará mas despues na 1 Corintionan 10:24: “Laga cada un sigui busca, no su mes bentaha, sino esun dje otro persona.” Esaki ta un bon recordatorio pa esnan cu por haña nan metí den un disputa financiero cu un compañero creyente. En bes di sigui e conseho na  Mateo 18:15-17, algun a hiba nan rumannan corte. (1 Corintionan 6:1, 7) E ehempel di Abram ta mustra cu ta mihó sufri pérdida financiero cu trece reproche riba e nomber di Jehova of daña e pas dje congregacion cristian.—Santiago 3:18.

14. Con Abram lo a ser bendicioná pa su generosidad?

¹⁴ Abram lo a ser bendicioná pa su generosidad. Dios a declará: “Lo mi haci bo simia mescos cu stof di tera, di manera cu si un hende por conta stof di tera, e ora ei lo por conta bo simia.” Ki un animacion e revelacion aki lo mester tabata pa Abram kende no tabatin yu! Siguientemente, Dios a mand’é: “Lanta, pasa dor dje tera, den su largura i den su hanchura, pasobra na abo mi ta bai dun’é.” (Génesis 13:16, 17) No, Jehova lo no a permití Abram establecé su mes den e circunstancianan confortabel di un stad. E mester a keda separá for dje cananeonan. Mescos tambe, awe cristiannan tin cu keda separá for di mundu. Nan no ta considerá nan mes superior na otro hende, pero nan no ta asociá estrechamente cu ningun hende cu lo por seducí nan pa participá den conducta no-bíblico.—1 Pedro 4:3, 4.

15. (a) Kico por tabatin tras dje biahenan cu Abram a haci p’aki p’aya? (b) Ki ehempel Abram a pone pa famianan cristian awe?

¹⁵ Den tempunan bíblico, promé cu un persona bira doño di un tereno, e tabatin derecho di inspeccion’é. P’esei e biahamentu p’aki p’aya lo por a sirbi como un recordatorio continuo cu un dia e tera aki lo a bin pertenecé na desendiente di Abram. Obedientemente, “Abram a sigui biba den tent. Mas despues el a bini i a biba entre e palunan grandi di Mamre, cu ta na Hébron; i ei el a construí un altar pa Jehova.” (Génesis 13:18) Un biaha mas Abram a demostrá cu el a duna adoracion e promé prioridad. Studio di famia, oracion como famia i asistencia na reunion ta na promé lugá den bo famia?

Atake di Enemigu

16. (a) Pakico e palabranan di introduccion di Génesis 14:1 ta den un tono di mal noticia? (b) Pa ki motibu e cuater reynan di oost a invadí Canan?

¹⁶ “Awor a sosodé den e dianan di Amrafel rey di Sinar, Arioc rey di Elasar, Kedorlaomer rey di Elam * i Tidal rey di Goyim, cu esakinan tabata den guera.” Den e idioma hebreo original, e palabranan di introduccion (“Awor a sosodé den e dianan di . . . ”) tin un tono di mal noticia, señalando “na un periodo di prueba cu ta terminá den bendicion.” (Génesis 14:1, 2, nota na pia di página) E prueba a cuminsá ora e cuater reynan di oost aki i nan ehército a invadí Canan i causa destruccion. Kico tabata nan obhetivo? Pa caba cu e rebelion dje cincu stadnan di Sódoma, Gomora, Adma, Zeboyim i Bela. Despues cu nan a caba cu tur e resistencia dje cincu stadnan aki, nan a “marcha como aliado bai n’e yanura abou di Sidim, esta, laman Salu.” Lot cu su famia tabata biba eibanda.—Génesis 14:3-7.

17. Pakico e echo cu nan a capturá Lot tabata un test di fe pa Abram?

¹⁷ E reynan cananeo a resistí e invasornan ferosmente, pero nan a sufri un derota humiyante. “E ora ei e vencedónan a tuma tur e  propiedadnan di Sódoma i Gomora i tur nan cuminda i a sigui nan caminda. Tambe nan a tuma Lot yu di Abram su ruman homber i su propiedadnan i a sigui nan caminda. E tempu ei e tabata biba na Sódoma.” No a tarda mashá p’e noticia dje sucesonan devastador aki yega na orea di Abram: “Despues di esei un homber cu a scapa a bini i a informá Abram e hebreo. E tempu ei e tabata biba entre e palunan grandi di Mamre e amoreo, ruman di Escol i ruman di Aner; i nan tabata aliado di Abram. Asina Abram a bin tende cu nan a capturá su ruman.” (Génesis 14:8-14) Ki un test di su fe! Abram lo carga rencor contra su subrino dor cu esaki a tuma e mihó parti dje tera? Corda tambe cu e invasornan aki a bini for di su tera natal, Sinar. Bringa contra nan lo a nificá eliminá tur posibilidad di regresá su tera un dia. Ademas, kico Abram lo por a haci contra un ehército cu e forsanan combiná di Canan no por a derotá?

18, 19. (a) Con Abram a logra rescatá Lot? (b) Ken a ricibí e mérito p’e victoria aki?

¹⁸ Atrobe Abram a pone su confiansa absoluto den Jehova. “Cu esei el a reuní su hombernan entrená, treshentidiesocho esclabo nací den su cas, i a persiguí nan te na Dan. I anochi el a parti su forsanan, e i su esclabonan, contra nan, i asina el a derotá nan i a sigui persiguí nan te na Hoba, cu ta keda na nort di Damasco. I el a recobrá tur e propiedadnan, i tambe el a recobrá Lot, su ruman, i su propiedadnan i tambe e muhernan i e hendenan.” (Génesis 14:14-16) Den un despliegue di fe firme den Jehova, Abram a guia su trupa hopi mas chikitu cu dje enemigu na victoria, rescatando Lot i su famia. Awor Abram a topa Melkísedec, rey i sacerdote di Salem. “Melkísedec rey di Salem a saca pan i biña, i e tabata sacerdote dje Dios Haltísimo. Anto el a bendicion’é i a bisa: ‘Bendicioná sea Abram dje Dios Haltísimo, Productor di shelu i tera; i bendicioná sea e Dios Haltísimo, cu a entregá bo opresornan den bo man!’ Cu esei Abram a dun’é un décimo di tur cos.”—Génesis 14:18-20.

¹⁹ Sí, na Jehova ta pertenecé e victoria. Pa motibu di su fe, un bes mas Abram a haña chens di mira e liberacion di Jehova. Awe, e pueblo di Dios no ta den un guera literal, pero sí nan ta enfrentá hopi prueba i desafio. Nos siguiente artículo lo mustra con e ehempel di Abram por yuda nos enfrentá nan cu éxito.

[Nota]

Bo A Tuma Nota?

• Den ki manera e hamber den e tera di Canan a resultá di ta un test di fe pa Abram?

• Con tantu Abram como Sarai a pone un bon ehempel pa esposo i esposanan awe?

• Ki lesnan nos por siña for dje manera cu Abram a trata cu e disputa entre su sirbidónan i esnan di Lot?

[Preguntanan di Estudio]

[Plachi na página 22]

Abram no a para riba su derecho sino el a pone e interesnan di Lot promé cu di su mes

[Plachi na página 24]

Abram a mustra confiansa den Jehova ora di rescatá su subrino Lot