Victoria den Tribunal Federal Constitucional

TESTIGONAN DI JEHOVA na Alemania a gana un victoria histórico den e Tribunal Federal Constitucional na Karlsruhe. Esei ta un paso importante den nan intentonan pa haña reconocimentu legal.

Testigonan di Jehova ta activo na Alemania pa mas cu un siglo caba. Nan a sobrebibí persecucion amargo na man di dos dictadura di siglo 20: socialismo nacional i comunismo. For di 1990 e Testigonan ta busca manera di haña reconocimentu legal como un corporacion pa obranan di caridad. Despues di dos veredicto faborabel di corte i un revocacion, e Testigonan a apelá n’e Tribunal Federal Constitucional, cu a anunciá su decision dia 19 di december 2000.

Decision Unánime na Fabor di Testigonan di Jehova

Tur shete hues dje tribunal a dicidí na fabor dje Testigonan. E huesnan a anulá un sentencia di 1997 cu e Tribunal Federal Administrativo a tuma i a instruí e tribunal ei pa reconsiderá e aplicacion cu e Testigonan a haci.

E Tribunal Federal Constitucional a usa e ocasion pa comentá riba e relacion fundamental entre Estado i gruponan religioso. Básicamente, loke ta determiná e státus di un religion “no ta su creencianan, sino su comportacion.”

Tambe e corte a remarcá cu ora Testigonan ta mantené nan “neutralidad cristian,” nan “no ta atacá e principio di democracia” i “no ta deseá di remplasá democracia cu un otro forma di gobernacion.” P’esei, no por laga e echo cu e Testigonan no ta participá den eleccionnan político pisa contra nan den nan demanda pa haña reconocimentu legal.—Juan 18:36; Romanonan 13:1.

E tribunal a bisa mas aleu cu un creyente—sea cu e ta un Testigo of un persona di otro fe—por haña su mes tin biaha den un situacion caminda e exigencianan di Estado ta choca contra e rekisitonan di su fe. Si e persona ei mester sigui su concenshi dor di “obedecé e creencianan religioso mas cu ley,” Estado lo por mira esaki como algu hustificá i den cuadro di libertad religioso.—Echonan 5:29.

E decision di corte a alcansá titularnan. Casi tur korant na Alemania tabatin un cobertura dje caso. Tur canal principal di television i di radio a duna reportahe of a pasa entrevista. Nunca promé e nomber Jehova a haña asina tantu publicidad na Alemania.

[Rekonosementu pa Potrèt na página 8]

AP Photo/Daniel Maurer