Con e Pas di e Cristo Por Tin Control den Nos Curason?

“Laga e pas di e Cristo tin control den boso curason, pasobra en realidad boso a ser yamá na dje den un solo curpa.”—COLOSENSENAN 3:15.

1, 2. Di ki manera “e pas di e Cristo” tin control den curason di un cristian?

CONTROL ta un palabra desagradabel pa hopi hende, pasobra e ta pone nos pensa riba hende cu ta forsa i manipulá otro. P’esei, kisas loke Pablo a animá su compañeronan cristian na Colósas haci, esta: “Laga e pas di e Cristo tin control den boso curason,” lo por zona irazonabel den orea di algun hende. (Colosensenan 3:15) Acaso nos no tin boluntad liber? Pakico nos lo mester laga cualkier hende of cos tin control den nos curason?

² Pablo no tabata bisa e colosensenan cu nan mester a entregá nan boluntad liber. E término griego traducí como “tin control” na Colosensenan 3:15 tin di haber cu e palabra cu nan a usa pa e ‘umpire’ cu tabata otorgá premio den competencianan atlético dje tempu ei. E participantenan tabatin un grado di libertad pa actua den límite dje reglanan dje wega, pero na final ta e umpire tabata dicidí ta ken a cumpli cu e reglanan i, pues, a gana e competencia. Mescos, nos tin libertad pa tuma hopi decision den bida, pero segun cu nos ta haci esei, semper e pas di e Cristo mester ta nos “umpire,” of manera e traductor Edgar J. Goodspeed ta traducié, “e principio cu ta guia” nos curason.

3. Kico “e pas di e Cristo” ta?

³ Kico “e pas di e Cristo” ta? E ta e trankilidad, e pas interno cu nos ta adkerí ora nos bira disipel di Jesus i haña sa cu Jehova Dios i su Yu ta stima nos, i cu nos tin nan aprobacion. Net promé cu Jesus a bai laga su disipelnan, el a bisa nan: “Mi ta duna boso mi pas. . . . No laga boso curason keda molestiá ni no lagu’e krimp di miedu.” (Juan 14:27) Pa casi 2.000 aña caba, e fiel miembronan ungí dje curpa di Cristo a gosa di e pas aki, i awe nan compañeronan, e ‘otro carnénan,’ tambe ta compartié. (Juan 10:16) E pas aki mester ta un influencia cu tin control den nos curason. Ora nos ta pasa den prueba pisá, e por yuda nos evitá di preocupá di mas of ser paralisá dor di miedu. Laga nos mira con esaki ta e caso ora nos ta enfrentá inhusticia, ora ansiedad ta molestiá nos i ora nos ta sinti nos mes indigno.

Ora Nos Ta Enfrentá Inhusticia

4. (a) Con Jesus a siña conocé inhusticia? (b) Con cristiannan a reaccioná ora nan a bira víctima di inhusticia?

⁴ Rey Sálomon a remarcá: “Hende a dominá hende pa su perhuicio.” (Eclesiástes 8:9) Jesus tabata sa cu e palabranan aki ta berdad. Tempu e tabata den shelu el a mira con hende a cometé inhusticianan masha teribel contra otro. Riba tera, e mes a pasa den e inhusticia di mas grandi ora cu nan a acusá é—un homber sin picá—di blasfemia, anto a mat’é manera un criminal. (Mateo 26:63-66; Marco 15:27) Awe ainda inhusticia ta reina, i cristiannan berdadero a sufri mas ainda dor cu nan ta “obheto di odio di parti di tur nacion.” (Mateo 24:9) Pero apesar cu nan a pasa den experencianan horibel  den camponan di morto nazi i den gulag (camponan di trabou forsá) soviético, i apesar di a bira víctima di multitudnan violento, acusacion falsu i atakenan mentiroso, e pas di e Cristo a mantené nan firme. Nan a imitá Jesus, di ken nos ta lesa: “Ora nan a zundr’é, e no a zundra bek. Ora e tabata sufri, e no a menasá, sino a sigui confia su mes na esun cu ta husga cu husticia.”—1 Pedro 2:23.

5. Ora nos tende di un supuesto inhusticia cu a tuma lugá den congregacion, kico nos mester tuma na consideracion promé?

⁵ Riba un escala hopi mas chikitu, kisas nos ta di opinion cu nan a trata un hende di manera inhustu den e congregacion cristian. Si ta asina, por ta nos ta sinti mescos cu Pablo, kende a bisa: “Ken ta ser trompecá, i ami no ta cunsumí?” (2 Corintionan 11:29) Kico nos por haci? Nos mester puntra nos mes: ‘Di berdad ta un inhusticia a tuma lugá?’ Hopi bes nos no ta na altura di tur echo. Kisas debí cu nos a scucha un hende cu ta pretendé di tin informacion confidencial nos ta reaccioná fuerte asina. Cu bon motibu, Bijbel ta declará: “Cualkier persona sin experencia ta pone fe den tur palabra.” (Proverbionan 14:15) Pues, nos mester tene cuidou.

6. Con nos por reaccioná ora cu, segun nos, inhusticia a tuma lugá den congregacion?

⁶ Pero suponé cu nos ta sinti cu nos mes a bira víctima di un inhusticia. Con un hende cu tin e pas di e Cristo den su curason lo reaccioná? Kisas nos ta haña cu nos mester papia cu e hende cu segun nos a haci algu contra nos. Despues, na lugá di papia e asuntu cu ken cu ta cla pa scucha, di con no presentá e asuntu na Jehova den oracion i confia cu e lo percurá pa husticia ser efectuá? (Salmo 9:10; Proverbionan 3:5) Por ta masha bon cu ora nos caba di haci esei, nos lo keda satisfecho pa djis resolvé e asuntu den nos curason i “keda ketu.” (Salmo 4:4) Den mayoria caso, e animacion di Pablo lo ta aplicabel: “Sigui soportá otro i pordoná otro libremente si un hende tin un motibu pa keha contra otro. Mescos cu Jehova a pordoná boso libremente, asina boso tambe haci mescos.”—Colosensenan 3:13.

7. Kico nos mester keda corda semper den nos trato cu nos rumannan?

⁷ Pero kico cu nos haci, nos mester corda cu maske nos no por controlá loke a pasa, nos por controlá nos reaccion sí. Si nos reaccioná na un manera desbalansá na loke segun nos ta un inhusticia, esei lo por tin un efecto mas perhudicial riba nos pas cu e inhusticia mes. (Proverbionan 18:14) Nos lo por asta trompecá i stop di asociá cu e congregacion te ora nos sinti cu husticia a tuma lugá. E salmista a skirbi cu pa esnan cu stima Jehova su leynan “no tin piedra di trompecá.” (Salmo 119:165) Echo ta cu tur hende ta sufri inhusticia de bes en cuando. Nunca laga experencianan lamentabel asina interferí cu bo sirbishi na Jehova. Mas bien, laga e pas dje Cristo tin control den bo curason.

Ora Ansiedad Ta Molestiá Nos

8. Kico ta algun cos cu ta causa ansiedad, i kico ansiedad por hiba na dje?

⁸ Ansiedad ta un parti masha real di bida den e “último dianan” aki. (2 Timoteo 3:1) Ta  berdad cu Jesus a bisa: “Stop di ansha tocante boso alma en cuanto loke boso lo come of en cuanto boso curpa en cuanto loke boso lo bisti.” (Lucas 12:22) Pero no ta tur ansiedad ta debí na preocupacion pa cos material. Lot tabata “masha afligí” debí n’e bida baho di Sódoma. (2 Pedro 2:7) “Ansiedad pa tur e congregacionnan” a molestiá Pablo. (2 Corintionan 11:28) Jesus a pasa den asina un agonia e anochi promé cu el a muri, cu “su sodó a bira manera gota di sanger cu tabata cai na suela.” (Lucas 22:44) Claramente, no ta tur ansiedad ta un indicacion di fe swak. Pero sin importá kico ta caus’é, si nos ta den ansiedad intenso i pa hopi tempu, e por kita nos pas. Ansiedad a yega di aplastá algun cristian, i pone cu nan no a sinti nan mes capas di sigui cumpli cu e responsabilidadnan conectá cu Jehova su sirbishi. Bijbel ta bisa: “Ansiedad den curason di un homber ta loke lo hacié dobla.” (Proverbionan 12:25) Kico nos por haci anto si ansiedad ta afligí nos?

9. Cua ta algun paso práctico cu nos por tuma pa baha nos ansiedad, pero ki causanan di ansiedad nos no por kita?

⁹ Den algun situacion kisas nos ta den posicion pa tuma medida práctico. Si ta un problema médico t’e rais di nos ansiedad, lo ta bon pa dun’é atencion; aunke ta cada ken mester tuma un decision personal riba tal asuntunan. * (Mateo 9:12) Si nos ta cargá cu hopi responsabilidad, kisas nos por delegá algun di nan. (Éxodo 18:13-23) Pero ke tal di esnan cu tin responsabilidad pisá cu no por ser delegá, manera mayornan por ehempel? Kico di un cristian cu ta biba cu un casá cu ta opon’é? Kico di un famia cu problema económico serio, of cu ta biba den un zona di guera? Claramente, nos no por eliminá tur fuente di ansiedad den e sistema di cosnan aki. Apesar di esei nos por mantené e pas di e Cristo den nos curason. Con?

10. Con ta dos manera cu un cristian por aliviá su ansiedad?

¹⁰ Un manera ta di busca consuelo den e  Palabra di Dios. Rey David a skirbi: “Ora mi pensamentunan inkietante a bira hopi den mi, bo mes consolacion a cuminsá cariciá mi alma.” (Salmo 94:19) Nos por haña Jehova su “consolacion” den Bijbel. Si nos consultá e Buki inspirá aki regularmente, esei lo yuda nos mantené e pas di e Cristo den nos curason. Bijbel ta declará: “Tira bo carga riba Jehova mes, i e mes lo sostené bo. Nunca lo e permití e hustu tambaleá.” (Salmo 55:22) Den e mésun direccion, Pablo a skirbi: “No sea anshá riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.” (Filipensenan 4:6, 7) Oracion regular i cu fervor lo yuda nos mantené nos pas.

11. (a) Den ki manera Jesus tabata un excelente ehempel pa loke ta oracion? (b) Con nos mester mira oracion?

¹¹ Jesus a pone un ehempel excelente den esaki. Na algun ocasion el a pasa oranan largu ta papia cu su Tata den oracion. (Mateo 14:23; Lucas 6:12) Oracion a yud’é soportá e pruebanan di mas teribel. E anochi promé cu el a muri, su angustia a bira hopi intenso. Con el a reaccioná? El a haci oracion “cu mas fervor.” (Lucas 22:44) Sí, e Yu perfecto di Dios tabata un hacidó di oracion. Pues, cuantu mas nos cu ta su siguidónan imperfecto lo mester desaroyá e custumber di haci oracion! Jesus a siña su disipelnan pa nan “haci oracion semper sin entregá.” (Lucas 18:1) Oracion ta un comunicacion real i vital cu Esun cu conocé nos mihó cu nos conocé nos mes. (Salmo 103:14) Si nos kier mantené e pas di e Cristo den nos curason, nos mester “haci oracion sin stop.”—1 Tesalonicensenan 5:17.

Vence Nos Limitacionnan

12. Pa ki motibunan algun cristian ta sinti cu nan sirbishi no ta suficiente?

¹² Jehova ta considerá cada un di su sirbidónan como precioso. (Ageo 2:7, nota na pia di página) Sin embargo, hopi hende ta haña esaki algu difícil pa aceptá. Algun cristian ta desanimá kisas debí na nan edad cu ta subi, nan obligacionnan di famia, of nan salú cu ta bai atras. Kisas otronan ta sinti cu nan tin un desbentaha debí na afliccionnan cu nan a pasa aden durante nan infancia. Otronan kisas ta ser tormentá debí na erornan cu nan a cometé den pasado, i ta duda si Jehova por pordoná nan un dia. (Salmo 51:3) Kico nos por haci tocante sintimentunan asina?

13. Ki consuelo bíblico tin pa esnan cu ta sinti cu nan ta deficiente?

¹³ E pas di e Cristo lo duna nos confiansa cu Jehova ta stima nos. Nos por renobá e pas ei den nos curason dor di refleccioná riba e echo cu nunca Jesus no a bisa cu nos balor ta ser midí dor di compará loke nos ta haci, cu loke otro hende ta haci. (Mateo 25:14, 15; Marco 12:41-44) Loke sí el a enfatisá ta cu nos mester ta leal. El a bisa su disipelnan: “Esun cu a wanta te na fin ta esun cu lo ser salbá.” (Mateo 24:13) Jesus mes a ser “despreciá” dor di hende, pero e no a duda niun ora so cu su Tata sí a stim’é. (Isaías 53:3; Juan 10:17) I el a bisa su disipelnan cu e i su Tata a stima nan tambe. (Juan 14:21) Pa enfatisá esaki, Jesus a bisa: “Nan no ta bende dos mofi pa un moneda di poco balor? Sin embargo, ni un di nan lo cai na suela sin conocimentu di boso Tata. Pero tur e cabeinan mes di boso cabes ta contá. P’esei no tene miedu: boso ta bal mas cu hopi mofi.” (Mateo 10:29-31) Esta un garantia caluroso di cu Jehova ta stima nos!

14. Ki siguransa nos tin di cu Jehova ta balorá cada un di nos?

¹⁴ Jesus a bisa tambe: “Ningun hende por bini cerca mi a ménos cu e Tata, kende a manda mi, ta atra’é.” (Juan 6:44) Ya cu Jehova a atraé nos pa sigui Jesus, anto lo E mester kier pa nos ser salbá. Jesus a bisa su disipelnan: “No ta un cos deseabel pa mi Tata cu ta den shelu pa un dje chikitunan aki perecé.” (Mateo 18:14) P’esei, si bo ta sirbi cu un curason completo, bo por alegrá den bo obranan  excelente. (Galationan 6:4) Si erornan di pasado ta tormentá bo, sea sigur cu Jehova lo pordoná “den un gran manera” esnan cu repentí di berdad. (Isaías 43:25; 55:7) Si pa cualkier otro motibu bo ta sinti bo desanimá, corda cu “Jehova ta cerca di esnan kibrá di curason; i esnan cu tin un spiritu aplastá e ta salba.”—Salmo 34:18.

15. (a) Con Satanas ta purba kita nos pas? (b) Ki confiansa nos por tin den Jehova?

¹⁵ Satanas lo keda masha contentu si e por logra kita bo pas. E ta esun responsabel pa e picá heredá cu nos tur ta lucha cuné. (Romanonan 7:21-24) Sigur-sigur lo e tin gana pa bo sinti cu debí na bo imperfeccion, bo sirbishi no ta aceptabel pa Dios. No laga Diabel demoralisá bo nunca! Sea conciente di su trikinan pa bo por keda determiná di soportá nan. (2 Corintionan 2:11; Efesionan 6:11-13) Corda cu “Dios ta mas grandi cu nos curason i sa tur cos.” (1 Juan 3:20) Jehova ta wak mas ayá di nos fayonan. E ta wak nos motivacionnan i nos intencionnan tambe. P’esei, laga e palabranan aki dje salmista consolá bo: “Jehova lo no bandoná su pueblo, ni lo e no laga su mes herencia.”—Salmo 94:14.

Uní den e Pas di e Cristo

16. Den ki sentido nos no ta so den nos lucha pa mustra awante?

¹⁶ Pablo a skirbi cu nos mester laga e pas di e Cristo tin control den nos curason debí cu nos a ser “yamá na dje den un solo curpa.” E cristiannan ungí cu Pablo a skirbi a ser yamá pa bira parti dje curpa di Cristo, mescos cu e resto dje ungínan awe tambe. Nan compañeronan “otro carné” ta uní cu nan manera “un solo tou” bou di “un solo wardador,” Jesucristo. (Juan 10:16) Unidamente, un “tou” mundial di miyones di hende ta lagando e pas di e Cristo tin control den nan curason. E echo cu nos sa cu nos no ta nos so ta yuda nos perseverá. Pedro a skirbi: “Tuma boso posicion contra [Satanas], sólido den fe, sabiendo cu e mésun cosnan en cuanto sufrimentu ta ser realisá den henter e asociacion di boso rumannan den mundu.”—1 Pedro 5:9.

17. Kico ta yuda motivá nos pa laga e pas di e Cristo tin control den nos curason?

¹⁷ Pues, laga nos tur sigui cultivá pas, e fruta vital ei dje spiritu santu di Dios. (Galationan 5:22, 23) Cu tempu, esnan cu Jehova haña sin mancha, sin defecto i na pas lo ser bendicioná cu bida eterno den paradijs riba tera, caminda husticia lo biba. (2 Pedro 3:13, 14) Nos tin tur motibu pa laga e pas di e Cristo tin control den nos curason.

[Nota]

Bo Ta Corda?

• Kico e pas di e Cristo ta?

• Con e pas di e Cristo por tin control den nos curason ora nos ta enfrentá inhusticia?

• Con e pas di e Cristo ta yuda nos enfrentá ansiedad?

• Con e pas di e Cristo ta consolá nos ora nos ta sinti cu nos ta indigno?

[Preguntanan di Estudio]

[Plachi na página 15]

Dilanti esnan cu a acus’é, Jesus a confia su mes na Jehova

[Plachi na página 16]

Manera e abraso caluroso di un tata amoroso, Jehova su consolacion por calma nos ansiedad

[Plachi na página 18]

Awante ta hopi importante den Dios su bista