Diabel Ta Existí?

“Tabatin un tempu den historia dje Iglesia cristian cu diabel, Beelzebub of Satanas e rey di maldad, tabata un personahe real i poderoso, mescos cu ‘Dios’ ta awe te ainda pa un grupo cada bes mas chikitu di hende; algu cu forma di mitar hende mitar bestia cu hudiu i e promé cristiannan a crea pa nan por a splica e maldad cu nan a mira rond di nan. Despues cristiannan a bin reconocé cu e tabata un fantasia sin ningun base real, i ketu-ketu nan a bandoná e idea di Diabel.”—“All in the Mind—A Farewell to God” (Puru Imaginacion—Despedida di Dios), di Ludovic Kennedy.

MANERA escritor i locutor Ludovic Kennedy ta bisa, pa hopi siglo niun hende den cristiandad no a duda cu Diabel ta real. Mas bien, tabatin periodonan cu cristiannan tabata “obsesioná cu e poder di Satanas i su demoñonan,” manera profesor Norman Cohn ta bisa. (Europe’s Inner Demons) No ta campesino humilde i ineducá so tabatin e obsesion aki. Segun profesor Cohn, e creencia, por ehempel, di cu Diabel ta tuma forma di un bestia p’e dirigí ritualnan malbado i obseno, “no tabata un creencia popular dje mayoria analfabeta, sino al contrario, e tabata parti dje concepto cu e clase intelectual tabatin di mundu.” E “clase intelectual” aki, cu a incluí miembronan educá di clero, tabata responsabel p’e campañanan pa persiguí heks (‘heksenjacht’) cu a tuma lugá rond Europa entre siglo 15 i siglo 17, ora cu, segun ta ser bisá, funcionarionan di iglesia i di gobiernu a torturá i mata rond di 50.000 hende acusá di ta heks.

P’esei, no ta nada straño cu hopi hende a rechasá loke nan ta considerá como ideanan absurdo i supersticioso tocante Diabel. For di aña 1726 caba, Daniel Defoe a ridiculisá e echo cu hende a kere cu Diabel ta un monster mahos “cu ala di raton djanochi, cachu, pata cu hoef partí, rabu largu, lenga manera di colebra i cosnan asina.” El a bisa cu e tipo di ideanan ei ta “cuenta bobo, puru fantasia” formulá dor di “e hendenan cu a inventá e idea aki tocante Diabel, i esnan cu ta promov’é”: hende cu “a engañá e mundu ignorante cu un diabel di nan propio invento.”

Esei ta bo punto di bista? Bo tambe ta kere cu “si bo wak bon, diabel ta un invento di hende pa splica hende su propio estado pecaminoso”? E declaracion ei ta aparecé den The Zondervan Pictorial Encyclopedia of the Bible, i hopi hende cu ta profesá di ta cristian ta pensa asina. Segun Jeffrey Burton Russell, mayoria teólogo di cristiandad “a bandoná e idea di cu tin Diabel i demoño, i ta considerá nan como simpel relikia di supersticion.”

 Pero den bista di algun hende, Diabel ta masha real. Nan ta razoná cu mester tin un of otro poder sobrehumano maligno tras dje maldadnan cu ta tuma lugá regularmente den historia di humanidad. Segun Russell, “e horornan cu a tuma lugá den siglo 20” ta un dje motibunan cu “despues di un pausa largu, kerementu den Diabel ta biniendo bek lihé.” Segun autor Don Lewis, un cantidad di hende moderno educá cu ta “smile cu un actitud di superioridad” ora nan ta papia dje creencia i temornan supersticioso di nan “antepasadonan ineducá” ta “birando encantá atrobe cu e elemento di maldad riba tereno di lo sobrenatural.”—Religious Superstition Through the Ages (Supersticion Religioso Atrabes di Siglonan).

Pues, kico anto ta berdad den henter e asuntu aki? Diabel ta djis un supersticion bobo? Of e ta un persona cu nos mester tuma na serio asta den siglo 21?

[Plachi na página 4]

Manera e obra grabá aki di Gustave Doré ta mustra, supersticionnan antiguo a representá Diabel como mitar hende mitar bestia

[Rekonosementu]

The Judecca—Lucifer/The Doré Illustrations For Dante’s Divine Comedy/Dover Publications Inc.