Diabel—Ta Mas cu Simpel Supersticion

“Henter Testament Nobo ta papia di un gran conflicto entre, di un banda, e forsanan di Dios i loke ta bon, i di otro banda esnan di maldad guiá dor di Satanas. Esaki no ta e concepto di un of dos dje escritornan [bíblico] so: tur ta di acuerdo. . . . E testimonio cu Testament Nobo ta duna ta bon cla. Satanas ta real, maligno, i semper e ta contra Dios i e pueblo di Dios.”—“The New Bible Dictionary.”

ANTO pakico hopi hende cu ta profesá di ta cristian, i cu ta pretendé di kere loke Bijbel ta bisa, ta rechasá e idea di cu Diabel ta existí di berdad? Debí cu nan no ta aceptá Bijbel realmente como e Palabra di Dios. (Jeremías 8:9) Nan ta bisa cu e escritornan di Bijbel a reflehá filosofia dje nacionnan rond di nan, i cu nan no a transmití e berdad di Dios cu exactitud. Teólogo católico Hans Küng por ehempel, a skirbi: “Mitonan tocante Satanas cu su legionnan di diabel . . . a drenta  hudaismo antiguo for di mitologia babilónico, i djei nan a drenta Testament Nobo.”—On Being a Christian (Tocante Ser un Cristian).

Pero Bijbel no ta simpel palabra di hende; e ta berdaderamente e Palabra inspirá di Dios. P’esei, ta sabí di nos parti pa tuma na serio loke e ta bisa tocante Diabel.—2 Timoteo 3:14-17; 2 Pedro 1:20, 21.

Kico Jesus A Kere?

Jesucristo a kere cu Diabel ta real. No ta un maldad den Jesus a tent’é. Ta un persona real a atak’é, un persona cu despues el a yama “e gobernante di mundu.” (Juan 14:30; Mateo 4:1-11) Tambe el a kere cu tabatin otro criaturanan spiritual cu ta apoyá Satanas su plannan malbado. El a cura hende “poseí pa demoño.” (Mateo 12:22-28) Asta e publicacion ateo A Rationalist Encyclopædia ta hala atencion na loke esaki ta nificá, bisando: “Semper e echo cu e Jesus di Evangelio a kere den diabel tabata un piedra di tropieso pa teólogonan.” Ora Jesus a papia tocante Diabel i su demoñonan, e no tabata simplemente ripití supersticionnan cu a bini for di mitonan babilónico. E tabata sa cu nan ta existí di berdad.

Nos ta siña hopi tocante Diabel ora nos considerá e palabranan aki di Jesus dirigí na e lidernan religioso di su tempu: “Boso ta di boso tata e Diabel, i boso kier cumpli cu e deseonan di boso tata. Esei tabata matadó ora el a cuminsá, i no a para firme den e berdad, pasobra e berdad no ta den dje. Ora e ta papia mentira, e ta papia segun su mes disposicion, pasobra e ta un mentiroso i e tata di mentira.”—Juan 8:44.

Segun esaki, Diabel—un nomber cu ta nificá “calumniadó”—ta “un mentiroso i e tata di mentira.” E tabata e promé criatura cu a gaña riba Dios, i el a haci esei den hofi di Eden. Jehova a bisa cu nos promé mayornan lo a “muri positivamente” si nan a come for dje palu di conocimentu di bon i malu. Via boca di un colebra, Satanas a bisa cu e palabranan ei no tabata berdad. (Génesis 2:17; 3:4) Apropiadamente, Bijbel ta yam’é “e colebra original, esun yamá Diabel i Satanas.”—Revelacion 12:9.

Diabel a gaña tocante e palu di conocimentu di bon i malu. El a razoná cu nan cu e prohibicion pa come for dje palu ei no tabata hustu, cu e tabata un abusu di poder. El a bisa cu Adam cu Eva por tabata “manera Dios” den e sentido di por determiná pa nan mes kico ta bon i kico ta malu. Satanas a duna di comprendé cu, ya cu nan tabatin boluntad liber, nan mester a dicidí pa nan mes tocante tur cos tambe. (Génesis 3:1-5) E atake aki contra e husticia  di Dios su forma di goberná a lanta algun cuestion crucial. P’esei Jehova a permití tempu pasa pa resolvé e cuestionnan aki. Esei kier men cu El a permití Satanas sigui biba pa un tempu. Awor, su tempu limitá ta cerca di yega su fin. (Revelacion 12:12) Apesar di esei e ta sigui alehá humanidad for di Dios dor di usa mentira i engaño. E ta usa hende manera e escriba i fariseonan den tempu di Jesus pa plama su siñansanan.—Mateo 23:13, 15.

Jesus a bisa tambe cu Diabel tabata un “matadó ora el a cuminsá” i cu e “no a para firme den e berdad.” Esei no kier men cu Jehova a crea Diabel como “matadó.” Dios no a cre’é p’e ta un sorto di monster encargá cu un lugá di candela i tormento pa hende cu oponé Dios. E “fiernu” cu Bijbel ta papia di dje no ta Satanas su lugá di biba. E ta simplemente e graf comun di humanidad.—Echonan 2:25-27; Revelacion 20:13, 14.

Originalmente Diabel tabata “den e berdad.” Un tempu el a forma parti di Jehova su famia celestial como un yu spiritual perfecto di Dios. Pero e no a “para firme den e berdad.” El a preferá di sigui su propio proceder i su propio principionan basá riba mentira. No ta ora Dios a cre’é como un yu angelical “el a cuminsá,” sino ora el a rebelá deliberadamente contra Jehova i gaña Adam cu Eva. Diabel ta manera e hendenan cu a rebelá contra Jehova den tempu di Moises. Nos ta lesa tocante nan: “Nan a obra ruinosamente riba nan propio cuenta; nan no ta su yunan, e defecto ta di nan mes.” (Deuteronomio 32:5) Nos por bisa mescos tocante Satanas. El a bira “matadó” ora el a rebelá i a bira responsabel p’e morto di Adam cu Eva, i de echo di henter e famia humano.—Romanonan 5:12.

Angel Desobediente

Otro angelnan a djoin Satanas den su rebelion. (Lucas 11:14, 15) E angelnan aki “a bandoná nan propio i debido lugá di biba” i a bisti curpa di hende pa nan gosa di relacion sexual cu ‘yu muher di hende’ den tempu di Noe. (Hudas 6; Génesis 6:1-4; 1 Pedro 3:19, 20) “Un tercera parti dje streanan di shelu,” esta, un minoria di criaturanan celestial, a sigui e proceder aki.—Revelacion 12:4.

E buki sumamente simbólico di Revelacion ta representá Diabel como “un dragon grandi, color di candela.” (Revelacion 12:3) Pakico? No debí cu di berdad e tin un curpa monstruoso of mahos. De echo, nos no sa ki sorto di curpa criatura spiritual tin, pero probablemente Satanas no ta diferente for di otro criaturanan spiritual angelical den e sentido ei. Sin embargo, “un dragon grandi, color di candela” ta un manera apropiado pa describí Satanas su actitud salbahe, horendo, poderoso i destructivo.

Awe Satanas i e demoñonan ta hopi limitá den loke nan por haci. Nan no por bisti curpa di hende mas, manera aparentemente nan por a haci un tempu. Poco despues cu e Reino di Dios a ser establecí den man di Cristo na 1914, nan a ser tirá abou den becindario di tera.—Revelacion 12:7-9.

Diabel Ta un Enemigu Fuerte

Apesar di esei, Diabel ta keda un enemigu fuerte. E ta “cana rond manera un leon cu ta grita, buscando un hende pa devorá.” (1 Pedro 5:8) E no ta djis un concepto vago dje maldad cu ta biba den nos carni imperfecto. Ta berdad cu tur dia nos tin cu bringa contra nos propio inclinacionnan pecaminoso. (Romanonan 7:18-20) Pero nos lucha real ta “contra e gobernantenan dje mundu dje scuridad aki,  contra e mal forsanan spiritual den e lugánan celestial.”—Efesionan 6:12.

Con plamá e influencia di Diabel ta? Apostel Juan ta bisa cu “henter mundu ta drumí den poder dje malbado.” (1 Juan 5:19) Claro cu nos no kier bira obsesioná cu Diabel, ni laga un miedu supersticioso di dje paralisá nos. Pero ta sabí di nos parti pa keda alerto contra su intentonan pa ciega nos p’e berdad i kibra nos integridad na Dios.—Job 2:3-5; 2 Corintionan 4:3, 4.

No ta semper Diabel ta usa medionan brutu pa atacá esnan cu kier haci Dios su boluntad. Tin bes e ta haci su mes parce “un angel di lus.” Apostel Pablo a spierta cristiannan dje peliger aki ora el a skirbi: “Mi tin miedu cu di un of otro manera, mescos cu e colebra a seducí Eva dor di su astucia, boso mente por ser corumpí i alehá di e sinceridad i puresa cu ta debí na e Cristo.”—2 Corintionan 11:3, 14.

P’esei nos mester ‘mantené nos huicio, ser vigilante, i tuma nos posicion contra dje, sólido den fe.’ (1 Pedro 5:8, 9; 2 Corintionan 2:11) Evitá di habri porta pa Satanas su engañonan dor di mors cu cualkier cos cu tin di haber cu ocultismo. (Deuteronomio 18:10-12) Sea un bon studiante dje Palabra di Dios, i corda cu Jesucristo a referí na e Palabra di Dios bes tras bes ora Diabel a tent’é. (Mateo 4:4, 7, 10) Resa pidi p’e spiritu di Dios. Su fruta por yuda bo evitá e obranan di carni cu Satanas ta promové cu asina tantu éxito. (Galationan 5:16-24) Tambe, haci oracion cu fervor na Jehova ora bo sinti e preshon di Diabel i su demoñonan di un of otro manera riba bo.—Filipensenan 4:6, 7.

Nos no tin nodi biba cu miedu di Diabel. Jehova ta primintí nos proteccion real contra cualkier cos cu Satanas por haci. (Salmo 91:1-4; Proverbionan 18:10; Santiago 4:7, 8) Apostel Pablo ta bisa: “Sigui adkerí poder den Señor i den e potencia di su forsa.” E ora ei lo bo “por para firme contra e mal inventonan di Diabel.”—Efesionan 6:10, 11.

[Plachi na página 5]

Jesus tabata sa cu Diabel ta un persona real

[Plachi na página 6]

“Henter mundu ta drumí den poder dje malbado”

[Rekonosementu]

NASA photo

[Plachi na página 7]

Tuma bo posicion contra Diabel dor di studia e Palabra di Dios i haci oracion regular