Pregunta di Lector

Relacioná cu e Yu di Dios, Colosensenan 1:16 ta bisa cu ‘tur otro cos a ser creá mediante dje i pa e.’ Den ki sentido tur cos a ser creá ‘pa’ e Yu di Dios, Jesus?

Jehova a usa su Yu unigénito como e obrero maestro pa crea tur otro cos fuera di Jesus mes. (Proverbionan 8:27-30; Juan 1:3) P’esei ta apropiado cu e Yu di Dios tin hopi placer den e obranan aki, i ta den e sentido ei nan ta “p’e.”

Nos sa cu mayornan humano ta spera di haña, i hopi bes ta haña, placer den loke nan ta producí, esta, nan yunan. P’esei, e proverbio bíblico ta papia di “un yu den ken [su tata] tin placer.” (Proverbionan 3:12; 29:17) Di manera similar, Jehova Dios tabatin goso den Israel ora su pueblo tabata fiel. (Salmo 44:3; 119:108; 147:11) Fieldad di su sirbidónan leal den nos tempu tambe ta dun’é goso.—Proverbionan 12:22; Hebreonan 10:38.

P’esei, tabata apropiado pa Dios a permití su co-trahador Jesus haña goso for di su logronan. De echo, Proverbionan 8:31 ta bisa cu e Yu ‘tabata alegre tocante e tereno productivo di su tera, i e cosnan cu e tabatin cariño p’e tabata cu e yunan di hende.’ Ta den e sentido aki Colosensenan 1:16 ta bisa: ‘Tur otro cos a ser creá mediante dje i pa e.’