Para Completo i cu Conviccion Firme

Congresonan—Confirmacion Gososo di Nos Hermandad

JOSEPH F. RUTHERFORD di 50 aña di edad, sufriendo di kebranto di salú despues di casi un aña di encarcelacion inhustu, ta sirbi contentu di dje como cargadó di maleta. Yen di smak e ta carga maleta i yuda compañeronan cristian yega nan kamber di hotel. Dos persona cu tabata prezu huntu cuné—nan tambe ta Studiante di Bijbel—ta repartí asignacion di cuarto na un multitud inmenso cu ta wardando riba acomodacion. Nan ta keda bezig te despues di meianochi. Un entusiasmo contagioso ta poderá di nan tur. Ta kico tin?

Tabata aña 1919, i e Studiantenan di Bijbel (conocí awe como Testigonan di Jehova) ta recuperando di un periodo di persecucion feros. Pa hinca ánimo bek den nan hermandad, nan a tene un congreso na Cedar Point, Ohio, Merca, di 1 pa 8 di september 1919. Riba e último dia di congreso, un multitud entusiasmá di 7.000 persona ta scucha atentamente segun cu ruman Rutherford ta animá cada un di esnan presente cu e palabranan: “Boso ta embahador dje Rey di reynan i Señor di señornan, anunciando na hende . . . e glorioso reino di nos Señor.”

For di tempu di Israel di antigwedad, Jehova su pueblo tabata tene congreso. (Éxodo 23:14-17; Lucas 2:41-43) E reunionnan ei tabata ocasionnan gososo i a yuda tur presente fiha nan mente riba e Palabra di Dios. Mescos tambe, e congresonan di Testigonan di Jehova den tempu actual ta enfocá riba interesnan spiritual. Pa observadónan sincero, e reunionnan gososo ei ta duna evidencia innegabel cu ta lasonan fuerte di hermandad cristian ta uni e Testigonan.

Esfuersonan pa Asistí

Cristiannan di tempu actual ta realisá cu nan congresonan ta periodonan di refrescamentu spiritual i di instruccion den e Palabra di Dios. Nan ta mira e reunionnan grandi aki como un medio indispensabel pa yuda nan “para completo i cu conviccion firme den henter e boluntad di Dios.” (Colosensenan 4:12) Pues, e Testigonan ta sostené e reunionnan aki di henter nan curason, i ta haci hopi esfuerso pa asistí na nan.

Pa algun, nan presencia so caba n’e congresonan ei ta rekerí pa nan ehercé fe i vence obstáculo grandi. Tuma por ehempel un Testigo di edad avansá na Austria. Aunke e ta diabético i tin cu pasa angua di insulina tur dia, el a haci sigur di asistí tur e dianan di un congreso di distrito den su pais. Na India, un famia grandi di Testigo cu ta hopi pober a haña cu tabata casi imposibel pa asistí na un congreso. Un miembro dje famia a duna un man. El a bisa: “Dor cu mi no kier a perde e ocasion, mi a bende mi renchi di orea di oro pa financiá e biahe. E sacrificio tabata bale la pena, ya cu e asociacion i experencianan a fortalecé nos fe.”

Na Papua Nueva Guinea, un grupo di hende interesá no-bautisá tabata determiná pa asistí na un congreso di distrito den e capital. Nan a acercá un homber den nan pueblo cu tabatin un vehículo público i a puntr’é cuantu e ta cobra pa hiba nan n’e congreso. Dor cu e montante cu el a pidi tabata mas di loke nan tabatin, nan a haci areglo pa remodelá e homber su cushina. Dje manera ei nan por a bai e congreso di distrito i saca beneficio dor di asistí na henter e programa.

 Distancia no ta un problema insuperabel pa Testigonan di Jehova cu pone nan mes pa bai un congreso. Na 1978, pa por a asistí na un congreso na Lille, Francia, un delegado hóben di Polonia a biaha 1.200 kilometer cu baiskel den seis dia. Durante e zomer di 1997, dos Testigo for di Mongolia a haci un biahe di 1.200 kilometer pa asistí na un reunion cristian na Irkutsk, Rusia.

Berdadero Hermandad den Accion

E unidad i hermandad cu e Testigonan ta manifestá na nan congresonan ta claramente bisto pa observadónan cu tin un mente obhetivo. Hopi di nan a keda impresioná p’e echo cu no ta existí parcialidad entre esnan cu ta asistí na congreso i cu asta entre esnan cu kisas ta topa otro pa promé bes tin un berdadero calor di amistad.

Durante un congreso internacional recien na Australia, un guia di tour cu a compañá delegadonan bishitante pa un siman largu kier a keda cu nan un poco mas pa disfrutá di nan compania. Impresioná pa nan amor i unidad, e no por a kere cu nan tabata sali asina bon cu otro, siendo cu mayoria di nan no tabata conocé otro promé. Ora a yega e momento cu e mester a bai, el a pidi nan scuch’é un ratu. Dirigiendo su mes na nan como “rumannan,” el a cuminsá na gradicí nan pero no por a terminá pasobra su ‘gemoed’ a yena i el a cuminsá yora.

Na 1997, Sri Lanka a tene su promé congreso di distrito na tres idioma den un stadion grandi. Henter e programa a ser presentá simultáneamente na ingles, singales i tamil. Den un mundu di creciente tension étnico, un reunion asina di tres grupo di idioma no a keda sin hala atencion. Un polis a puntra un ruman: “Ta ken ta dirigí e congreso aki—e singalesnan, e tamilnan of e inglesnan?” “No ta niun dje gruponan ei ta dirigí e congreso,” e ruman a contestá. “Nos tur ta haciendo esaki huntu.” E polis no por a caba di kere. Ora tur e tres gruponan di idioma a djoin pa e oracion final i un “Amen” colectivo a resoná den henter e stadion, e presentenan a aplaudí spontáneamente. Casi tur hende den e auditorio tabata cu awa na wowo. Sí, en berdad congresonan ta confirmacion gososo di nos hermandad.—Salmo 133:1. *

[Nota]