Jehova Su Bendicion Ta Haci Nos Ricu

“E bendicion di Jehova—esei ta loke ta haci ricu, i e no ta agregá ningun dolor na dje.”—PROVERBIONAN 10:22.

1, 2. Pakico felicidad no ta mará na rikesa material?

AWE bida di miyones di hende ta dominá pa corementu tras di cos material. Pero cos material ta haci nan felis? “Mi no por corda un tempu cu hende tabata asina pesimista tocante nan suerte den bida,” The Australian Women’s Weekly ta bisa. E ta agregá: “Esei ta algu contradictorio. Nan ta bisa nos cu economia di Australia ta floreciendo, cu bida ta mihó cu nunca promé. . . . Tog, pesimismo ta reina na tur parti dje nacion. Tantu homber como muher ta sinti cu nan bida falta algu pero nan no por definí kico esei ta.” E Scritura tin rason berdad ora e ta bisa cu ni felicidad ni bida no ta resultá for dje cosnan cu nos ta poseé!—Eclesiástes 5:10; Lucas 12:15.

² Bijbel ta siña nos cu e mayor felicidad ta bini for dje bendicion di Dios. Den e contexto aki Proverbionan 10:22 ta declará: “E bendicion di Jehova—esei ta loke ta haci ricu, i e no ta agregá ningun dolor na dje.” Hopi bes, acumulacion di rikesa material na un manera golos ta bai compañá cu dolor. Tabata apropiado pa apostel Pablo spierta: “Esnan cu ta determiná di bira ricu ta cai den tentacion i un trampa i hopi deseo insensato i perhudicial, cu ta tira hende den destruccion i ruina. Pasobra amor pa placa ta rais di tur sorto di  cos perhudicial, i percurando pa realisá e amor aki algun a ser desviá for dje fe i a hinca nan mes tur caminda cu hopi dolor.”—1 Timoteo 6:9, 10.

3. Pakico sirbidó di Dios ta pasa den prueba?

³ Di otro banda, bendicion sin dolor ta alcansá tur hende cu ta “sigui scucha e bos di Jehova.” (Deuteronomio 28:2) Pero, tal bes tin hende ta puntra: ‘Si Jehova no ta agregá dolor na su bendicion, pakico asina tantu sirbidó di Dios ta sufri?’ Bijbel ta revelá cu Dios ta permití nos pasa den prueba pero cu en realidad nan ta originá di Satanas, di su mal sistema di cosnan i di nos mes naturalesa imperfecto. (Génesis 6:5; Deuteronomio 32:4, 5; Juan 15:19; Santiago 1:14, 15) Jehova ta e fuente di “tur bon don i tur regalo perfecto.” (Santiago 1:17) P’esei, hamas su bendicionnan ta causa dolor. P’esei laga nos considerá algun dje regalo of donnan perfecto di Dios.

E Palabra di Dios—Un Regalo Preciosísimo

4. Ki bendicion i regalo preciosísimo e pueblo di Jehova ta disfrutá di dje durante e “tempu di fin” aki?

⁴ Relacioná cu “e tempu di fin,” e profecia di Daniel ta declará: “Berdadero conocimentu lo bira abundante.” Sin embargo, no pa tur hende, manera e siguiente palabranan ta mustra: “Ningun malbado lo comprendé; pero esnan cu tin perspicacia lo comprendé.” (Daniel 12:4, 10) Imaginá bo! E Palabra di Dios—foral profecia—ta ser expresá cu un sabiduria divino cu no ta permití e malbadonan capta e berdadero sentido di dje, pero e pueblo di Jehova sí ta capt’é. “Mi ta alabá bo públicamente, Tata, Señor di shelu i tera,” e Yu di Dios a bisa den oracion, “pasobra bo a sconde cuidadosamente e cosnan aki for di hende sabí i intelectual, i a revelá nan na baby.” (Lucas 10:21) Ki un bendicion di por tin e regalo preciosísimo dje Palabra skirbí di Dios, Bijbel, i di por ta entre esnan cu Jehova a duna comprendimentu penetrante di cosnan spiritual!—1 Corintionan 1:21, 27, 28; 2:14, 15.

5. Kico ta sabiduria, i con nos por obten’é?

⁵ Nos lo no a comprendé cosnan spiritual mes si no tabata pa “e sabiduria djariba.” (Santiago 3:17) Sabiduria ta e abilidad pa usa conocimentu i comprendimentu pa resolvé problema, evitá of prevení peliger, logra meta of duna conseho sano. Con nos ta obtené sabiduria divino? Proverbionan 2:6 ta declará: “Jehova mes ta duna sabiduria; for di su boca tin conocimentu i dicernimentu.” Sí, Jehova lo bendicioná nos cu sabiduria si nos pidié esei cu insistencia, mescos cu el a duna rey Sálomon “un curason sabí i cu dicernimentu.” (1 Reynan 3:11, 12; Santiago 1:5-8) Pa gana sabiduria, tambe nos tin cu sigui scucha Jehova dor di studia su Palabra regularmente i aplik’é.

6. Pakico ta sabí pa aplicá e ley i principionan di Dios den nos bida?

⁶ Den e ley i principionan di Bijbel nos ta haña bon ehempel di sabiduria divino. Esakinan ta beneficiá nos den tur manera: den sentido físico, mental, emocional i spiritual. Ta masha apropiado cu e salmista a canta: “E ley di Jehova ta perfecto, e ta restorá alma. E recordatorio  di Jehova ta digno di confiansa, e ta haci hende sin experencia sabí. E ordunan di Jehova ta recto, nan ta haci curason alegrá; e mandamentu di Jehova ta limpi, e ta haci wowo briya. E temor di Jehova ta puru, e ta para pa semper. E decisionnan hudicial di Jehova ta berdadero; nan tur a resultá di ta hustu. Nan mester ser deseá mas cu oro, sí, cu hopi oro refiná.”—Salmo 19:7-10; 119:72.

7. Kico ta e consecuencia di pasa por haltu dje normanan hustu di Dios?

⁷ Di otro banda, esnan cu ta pasa por haltu dje normanan hustu di Dios no ta haña e felicidad i libertad cu nan ta busca. Tardi of trempan, nan ta descubrí cu bo no por haci mofa di Dios, pasobra hende lo cosechá loke e ta sembra. (Galationan 6:7) Miyones di hende cu ta neglishá principionan bíblico ta cosechando e consecuencianan trágico manera embaraso no-deseá, malesa repugnante of adiccion debilitante. A ménos cu nan repentí i cambia nan curso di bida, nan caminda lo hiba nan finalmente na morto i tal bes destruccion na man di Dios.—Mateo 7:13, 14.

8. Pakico amantenan dje Palabra di Dios ta felis?

⁸ Sin embargo, bendicion ricu awor i den futuro lo alcansá esnan cu ta stima i aplicá e Palabra di Dios. Nan tin motibu pa sinti cu e ley di Dios a libra nan, cu nan ta berdaderamente felis i ta spera ansiosamente e tempu ora cu nan lo ta liber di picá i su efectonan mortífero. (Romanonan 8:20, 21; Santiago 1:25) E speransa aki ta sigur pasobra e ta basá riba e regalo di mas amoroso cu Dios a duna humanidad: e sacrificio di rescate di su Yu unigénito, Jesucristo. (Mateo 20:28; Juan 3:16; Romanonan 6:23) Un regalo inigualabel asina ta confirmá e profundidad dje amor cu Dios tin pa humanidad i ta garantisá bendicionnan sin fin pa tur esnan cu sigui scucha Jehova.—Romanonan 8:32.

Gradicidu p’e Don di Spiritu Santu

9, 10. Con nos ta beneficiá di Jehova su don di spiritu santu? Duna un ehempel.

⁹ Un otro regalo of don amoroso di Dios pa cua nos mester ta gradicidu ta su spiritu santu. Riba e dia di Pentecoste di aña 33 E.C., apostel Pedro a urgi e multitud presente na Jerusalem: “Repentí, i laga cada un di boso ser bautisá den e nomber di Jesucristo pa pordon di boso picánan, i boso lo ricibí e don grátis dje spiritu santu.” (Echonan 2:38) Awe, Jehova ta duna spiritu santu na su sirbidónan dedicá cu ta pidi p’e den oracion i cu kier haci su boluntad. (Lucas 11:9-13) Den tempu antiguo, e forsa masha potente aki den universo—e spiritu santu of forsa activo di Dios—a duna poder na homber i muher di fe, incluso e cristiannan di promé siglo. (Zacarías 4:6; Echonan 4:31) E por haci mescos pa nos, aunke nos por haña nos cu obstáculo difícil of cu desafio como Jehova su pueblo.—Joël 2:28, 29.

¹⁰ Tuma por ehempel e caso di Laurel, kende a haña polio i pa 37 aña largu a biba den un mashin pa hala rosea. * Apesar di su circunstancia sumamente difícil, el a sirbi Dios celosamente te na su morto. Den transcurso di añanan, Jehova su bendicion ricu a alcansá Laurel. Por ehempel, el a logra yuda 17 persona yega na un conocimentu exacto dje berdad di Bijbel, aunke e tabata prezu den e mashin 24 ora pa dia! Su situacion ta pone nos corda e palabranan di apostel Pablo: “Ora mi ta débil, e ora ei mi ta poderoso.” (2 Corintionan 12:10)  Sí, cualkier éxito cu nos por tin den predicá e bon nobo no ta originá for di nos mes abilidad i poder, sino for di Dios su yudansa pa medio di spiritu santu, cu e ta duna na esnan cu ta sigui scucha su bos.—Isaías 40:29-31.

11. Ki cualidadnan e spiritu di Dios ta producí den esnan cu ta bisti “e personalidad nobo”?

¹¹ Si nos scucha Dios obedientemente, su spiritu ta producí den nos e cualidadnan di amor, goso, pas, gran pacenshi, bondad, amabilidad, fe, suavedad i dominio propio. (Galationan 5:22, 23) E “fruta di spiritu” aki ta parti di “e personalidad nobo” cu cristiannan ta bisti na lugá di e característicanan salbahe i bestial cu kisas nan a desplegá anteriormente. (Efesionan 4:20-24; Isaías 11:6-9) E fruta mas importante ta amor, “un laso perfecto di union.”—Colosensenan 3:14.

Amor Cristian—Un Don pa Atesorá

12. Con Tabita i otro cristiannan di promé siglo a demostrá amor?

¹² Amor cristian ta un otro don bendicioná cu ta bini di Jehova, un don cu nos ta haci bon di atesorá. E ta basá riba principio, pero e ta asina ricu na cariño cu e ta hala creyentenan asta mas cerca otro cu lasonan carnal. (Juan 15:12, 13; 1 Pedro 1:22) Tuma por ehempel Tabita, un excelente muher cristian di promé siglo. “E tabata abundá den bon obra i donnan di misericordia,” foral na fabor di e biudanan den e congregacion. (Echonan 9:36) E muhernan aki lo tabatin nan famianan carnal, pero Tabita kier a haci tur loke tabata na su alcanse pa yuda nan i animá nan. (1 Juan 3:18) Ki un bunita ehempel Tabita a pone! Amor fraternal a impulsá Prisca i Akila pa “risca nan mes garganta” pa Pablo. Amor a motivá Epafras, Lucas, Onesíforo i otronan tambe pa yuda e apostel tempu cu e tabata encarcelá na Roma. (Romanonan 16:3, 4; 2 Timoteo 1:16; 4:11; Filemon 23, 24) Sí, awe e sorto di cristiannan ei ‘tin amor entre nan mes,’ un don bendicioná cu ta bini di Dios i cu ta identificá nan como berdadero disipel di Jesus.—Juan 13:34, 35.

13. Con nos por mustra cu nos ta apreciá nos hermandad cristian profundamente?

¹³ Abo ta atesorá e amor cu ta ser manifestá den e congregacion cristian? Bo ta gradicidu pa nos hermandad spiritual, cu ta extendé  rond mundu? Esakinan tambe ta regalonan ricu i bendicioná for djariba. Con nos por mustra cu nos ta duna balor na nan? Dor di rindi sirbishi sagrado na Dios, dor di participá den reunionnan cristian i dor di manifestá amor i e otro frutanan di Dios su spiritu.—Filipensenan 1:9; Hebreonan 10:24, 25.

“Donnan den Hende”

14. Ki rekisitonan un cristian cu kier sirbi como anciano of sirbidó ministerial mester cumpli cuné?

¹⁴ Hombernan cristian cu ta deseá di sirbi nan compañeronan di adoracion como anciano of sirbidó ministerial tin un meta excelente. (1 Timoteo 3:1, 8) Pa cualificá p’e privilegionan aki, un ruman homber mester ta un persona spiritual, bon versá den e Scritura i celoso den sirbishi di veld. (Echonan 18:24; 1 Timoteo 4:15; 2 Timoteo 4:5) E tin cu desplegá humildad, modestia i pacenshi, pasobra bendicion divino no ta alcansá hende arogante, orguyoso i ambicioso. (Proverbionan 11:2; Hebreonan 6:15; 3 Juan 9, 10) Si e ta casá, lo e mester ta un cabes di famia amoroso, capas pa dirigí henter su famia di cas bon. (1 Timoteo 3:4, 5, 12) Dor cu e ta duna balor na rikesa spiritual, un homber asina lo ricibí e bendicion di Jehova.—Mateo 6:19-21.

15, 16. Ken ta resultá di ta “donnan den hende”? Duna ehempel.

¹⁵ Ora esnan cu ta sirbi como anciano den congregacion ta duna tur loke nan tin como evangelisadó, wardadó i maestro, nan ta duna nos motibu sólido pa apreciá e “donnan den hende” ei. (Efesionan 4:8, 11) Kisas no ta tur ora esnan cu ta beneficiá di nan sirbishi amoroso ta expresá nan aprecio, pero Jehova sí ta mira tur loke anciano fiel ta haci. Lo e no lubidá e amor cu nan ta mustra pa su nomber dor di sirbi su pueblo.—1 Timoteo 5:17; Hebreonan 6:10.

¹⁶ Tuma e caso di un anciano diligente cu a bishitá un mucha muher cristian cu dokternan tabata cla pa operá na cabes. “E anciano tabata masha bondadoso, el a duna gran apoyo, i a mustra hopi interes,” un amiga dje famia a skirbi. “El a puntra si e por a haci oracion na Jehova huntu cu nos. Segun e tabata resa, e tata [cu no ta Testigo di Jehova] a cuminsá snik, i tur hende den e kamber di hospital tabata cu awa na wowo. Esta tierno e oracion dje anciano ei tabata, i esta amoroso di parti di Jehova pa mand’é net n’e momentonan ei!” Un otro pashent Testigo a bisa dje ancianonan cu a bishit’é: “Ora nan a bini na mi cama den e unidad di cuido intensivo, mi tabata sa cu kico cu pasa cu mi dje momento ei padilanti, lo mi por a soportá. Mi a bira fuerte i trankil.” Un hende por cumpra un interes amoroso asina? Hamas! Esei ta un regalo of don for di Dios cu e ta haci disponibel mediante e congregacion cristian.—Isaías 32:1, 2.

 E Regalo di Sirbishi di Veld

17, 18. (a) Ki regalo di sirbishi Jehova a haci disponibel pa henter su pueblo? (b) Ki yudansa Dios a duna pa nos por cumpli cu nos ministerio?

¹⁷ E mayor onor cu e ser humano por a ricibí ta esun di sirbi Jehova, e Haltísimo. (Isaías 43:10; 2 Corintionan 4:7; 1 Pedro 2:9) E privilegio di participá den e ministerio público ta habrí pa tur cu tin berdadero deseo di sirbi Dios—grandi i chikitu, homber i muher. Abo ta haci uso dje don precioso aki? Algun hende por hala atras pasobra nan ta sinti nan incapas, pero corda cu Jehova ta duna spiritu santu na esnan cu ta sirbié, i esei ta compensá cualkier deficiencia cu nos por tin.—Jeremías 1:6-8; 20:11.

¹⁸ Jehova a confia e obra di predicá e Reino na su sirbidónan humilde, no na personanan cu tin tendencia di ta orguyoso i cu ta confia den nan mes abilidadnan. (1 Corintionan 1:20, 26-29) Hende humilde i modesto ta reconocé nan limitacionnan i ta dependé riba e yudansa di Dios ora nan ta traha den sirbishi di veld. Tambe nan ta apreciá e yudansa spiritual cu e ta duna mediante “e fiel mayordomo.”—Lucas 12:42-44; Proverbionan 22:4.

Bida di Famia Felis—Un Don Excelente

19. Ki factornan ta hiba na éxito den lanta yu?

¹⁹ Matrimonio i un bida di famia felis ta donnan cu ta bini di Dios. (Rut 1:9; Efesionan 3:14, 15) Yu tambe ta un ‘herencia precioso for di Jehova,’ i nan ta trece goso na mayornan cu ta logra inculcá den nan e cualidadnan cu ta agradá Dios. (Salmo 127:3) Si bo ta un mayor, sigui scucha e bos di Jehova dor di entrená bo chikitinnan na armonia cu su Palabra. Esnan cu ta haci esei por conta sigur cu e sosten di Jehova i cu su bendicion ricu.—Proverbionan 3:5, 6; 22:6; Efesionan 6:1-4.

20. Kico por yuda mayornan kende nan yunan ta alehá for di adoracion berdadero?

²⁰ Apesar dje esfuersonan conciencial di mayornan deboto, por sosodé cu algun di nan yunan ta scoge pa alehá for di adoracion berdadero ora nan bira grandi. (Génesis 26:34, 35) Emocionalmente, esaki por ta un sla pa mayornan. (Proverbionan 17:21, 25) Pero, en bes di entregá tur speransa, lo por ta bon pa nan corda e ilustracion di Jesus tocante e yu perdí. Aunke e yu homber ei a bandoná cas i sigui un caminda di desobedencia, mas despues el a regresá cas di su tata, kende a ricibié cu goso i amor. (Lucas 15:11-32) Maske kico pasa, mayornan cristian fiel por ta sigur di Jehova su comprension, su interes amoroso i su apoyo infalibel.—Salmo 145:14.

21. Na ken nos tin cu scucha, i pakico?

²¹ Laga cada un di nos anto determiná loke ta berdaderamente importante den nos bida. Nos ta core desenfrenadamente tras di abundancia material, algu cu por causa dolor na nos i na nos famia? Of nos ta busca pa alcansá e ‘bon donnan i regalonan perfecto’ cu ta bini djariba for di e “Tata dje lusnan celestial”? (Santiago 1:17) Satanas, “e tata di mentira,” kier pa nos lucha pa rikesa material i perde tantu felicidad como bida. (Juan 8:44; Lucas 12:15) Pero Jehova tin nos mihó interesnan na pechu. (Isaías 48:17, 18) Pues anto, laga nos sigui scucha nos amoroso Tata celestial i semper “haña deleite exkisito” den dje. (Salmo 37:4) Si nos sigui un curso di bida asina, Jehova su donnan preciosísimo i su bendicion abundante lo haci nos ricu—anto esei sin niun pinga di dolor.

[Nota]

Bo Ta Corda?

• Unda nos por haña e mayor felicidad?

• Cua ta algun don of regalo cu Jehova ta duna su pueblo?

• Pakico sirbishi di veld ta un regalo?

• Kico mayornan por haci pa gana e bendicion di Dios segun cu nan ta lanta nan yunan?

[Preguntanan di Estudio]

[Plachi na página 16]

Bo ta mustra aprecio p’e regalo di Dios di su Palabra skirbí?

[Plachi na página 17]

Apesar di circunstancia masha difícil, Laurel Nisbet a sirbi Dios celosamente

[Plachinan na página 18]

Mescos cu Tabita, cristiannan djawe ta bon conocí pa nan obranan di amor

[Plachi na página 19]

Ancianonan cristian tin interes amoroso den nan compañeronan di adoracion