Kico Tin Berdadero Balor?

Poseé algu di berdadero balor por ta masha excitante. Pero kico e cos ei por ta? Un suma grandi di placa? Hoya caru of exótico? Fama i prominencia? Hopi hende ta duna masha balor na e cosnan aki. E cosnan aki por ta nan medio di biba, por haci bida mas significativo of satisfacé un necesidad interno pa reconocimentu i logro. Nos ta luchando pa logra e cosnan ei, cu e speransa cu nan lo cumpli cu nos meta i aspiracionnan pa futuro?

POR lo general, hende ta basa balor di un cos riba e manera cu esaki ta yena nan necesidadnan i satisfacé nan deseonan personal. Nos ta apreciá cosnan cu ta duna nos un sintimentu di bienestar i cu ta ofrecé e prospecto di un futuro sigur. Nos ta atesorá cosnan cu ta duna alivio mesora, consuelo of reconocimentu. Sin embargo, ora nos ta mara balor di cosnan na nos deseonan i interesnan cu ta cambia cada bes, nos ta duna muestra di tin un punto di bista limitá di mira cosnan. En realidad, berdadero balor ta ser determiná dor di loke nos ta reconocé como nos mayor necesidad.

Kico ta nos mayor necesidad? Sin e ingrediente principal, esta, bida, nada no tin balor. Sin bida, nos no ta existí. Rey Sálomon di Israel di antigwedad a skirbi: “En cuanto e mortonan, nan no ta conciente di nada en absoluto . . . No tin trabou ni formacion di proyecto ni conocimentu ni sabiduria den Sheol [graf comun di humanidad].” (Eclesiástes 9:5, 10) Si morto toca na nos porta, nos ta haña nos obligá di bandoná tur nos pertenencianan. P’esei anto, nos necesidad mayor ta pa haña algu cu lo conserbá nos bida. Kico lo haci esei?

Kico Lo Conserbá Nos Bida?

Rey Sálomon a declará cu “placa ta pa un proteccion.” (Eclesiástes 7:12) Si nos tin suficiente placa, nos por obtené cuminda i un cas confortabel. Placa por permití nos disfrutá dje placer di  biaha bai lugánan leu. E por percurá pa nos necesidadnan ora nos no por traha mas debí na edad of enfermedad. Poseé placa ta duna hopi bentaha. Sin embargo, placa no por conserbá nos bida. Apostel Pablo a instruí Timoteo: “Duna ordu na esnan cu ta ricu den e sistema actual di cosnan pa no ta halsá, i pa pone nan speransa, no den rikesa insigur, sino den Dios.” (1 Timoteo 6:17) Ningun placa na mundu por cumpra bida pa nos.

Considerá e experencia di un homber cu yama Hitoshi. Dor cu Hitoshi a lanta den un famia pober, e tabatin un deseo fuerte pa bira ricu. El a kere asina tantu den e poder di placa, cu el a kere cu bo por a cumpra asta hende cuné. Un dia, un homber a bini na porta di Hitoshi i a puntr’é si e tabata sa cu Jesucristo a muri p’e. E pregunta aki a lanta Hitoshi su curiosidad pasobra el a pensa cu ningun hende lo no muri pa un persona manera e. El a asistí na un discurso público basá riba Bijbel i a keda sorprendí ora el a tende e spiertamentu pa ‘mantené wowo senciyo.’ E orador a splica cu un wowo “senciyo” ta unu cu ta wak den futuro i cu ta enfocá riba cosnan spiritual. (Lucas 11:34) En bes di cansa su curpa pa gana placa, Hitoshi a cuminsá pone balornan spiritual na promé lugá den su bida.

Tambe posesion material por duna nos un midí di stabilidad i siguridad. Abundancia por aliviá nos di ansiedad tocante nos necesidadnan diario. Un cas bunita den un bon bario kisas ta duna nos un sintimentu di logro. Paña moderno i un auto nèchi por pone cu otro hende ta admirá nos.

Ta un bendicion pa ‘mira e bon pa tur nos trabou duru.’ (Eclesiástes 3:13) I ora nos tin sobreabundancia, esei kisas ta permití nos sernan kerí ‘biba trankil, come, bebe i gosa.’ Sin embargo, cos material tin un balor pasahero so. Den un spiertamentu contra golosidad, Jesucristo a bisa: “Asta ora un persona tin na abundancia, su bida no ta resultá dje cosnan cu e ta poseé.” (Lucas 12:15-21) Sin importá e cantidad of balor di posesion material, nan no por garantisá bida.

Liz por ehempel, tabata casá cu un homber cu tabata bon pará financieramente. E ta conta: “Nos tabatin un cas bunita i dos auto, i nos situacion financiero a permití nos e libertad di disfrutá di tur cos cu mundu a ofrecé den sentido material . . . Pero pa straño cu por parce, tog mi tabata preocupá tocante placa.” E ta splica: “Nos tabatin masha hopi cos di perde. Ta parce cu mas bo tin, ménos sigur bo ta sinti bo.”

Dor cu fama i prominencia por trece elogio i onor, hopi hende ta duna hopi balor na esakinan tambe. Den e mundu djawe, un carera exitoso ta un logro cu ta lanta envidia. Cultivá talento i abilidadnan único lo por yuda nos traha un nomber pa nos mes. Podisé otro hende ta elogiá nos, ta duna hopi balor na nos opinion i ta ansioso pa gana nos fabor. Tur esaki por ta excitante i satisfaciente. Sin embargo, al final, nan ta caba na nada. Sálomon tabatin tur e gloria i poder cu un rey por tabatin, pero el a lamentá: “No tin mas recuerdo di e sabí cu tin di e bobo . . . Tur hende ta ser lubidá sigur.” (Eclesiástes 2:16) Fama i prominencia no ta duna hende bida.

Un escultor cu yama Celo a haña masha aprecio pa algu di hopi mas balor cu fama. Debí na su talento, el a cualificá pa ricibí educacion cu a mehorá su abilidadnan. No a dura mashá cu prensa i críticonan profesional den arte a cuminsá elogiá su trabou. Hopi di su obranan a ser exhibí den e stadnan principal di Europa. Celo ta relatá: “Mi tin cu admití cu tabatin un tempu cu arte tabata e cos mas importante den mi bida. Sin embargo, mi a realisá cu si mi sigui mi carera, lo ta mescos cu purba sirbi dos doño. (Mateo 6:24) Mi tabata convencí cu e cos mas importante cu mi por a haci tabata di predicá e bon nobo dje Reino di Dios. P’esei,  mi a tuma e decision personal pa stop di traha como escultor.”

Kico Tin e Balor di Mas Grandi?

Siendo cu sin bida nada no tin nificacion of balor, kico nos por adkerí cu por garantisá nos bida? Tur bida ta originá cu Jehova Dios. (Salmo 36:9) Sí, “pa medio di dje nos tin bida i ta move i ta existí.” (Echonan 17:28) E ta duna e don di bida eterno na esnan cu e ta stima. (Romanonan 6:23) Kico nos mester haci pa bini na remarke pa haña e don aki?

Pa nos ricibí e don di bida eterno, nos mester tin un relacion estrecho cu Jehova. P’esei, e aprobacion di Jehova tin mas balor cu cualkier otro cos cu nos lo por poseé. Ora nos tin e, nos tin e prospecto di logra felicidad berdadero i duradero. Sin embargo, sin e aprobacion ei, un fin eterno ta spera nos. Ta claro anto cu cualkier cos cu lo yuda nos logra un bon relacion cu Jehova ta di inmenso balor.

Loke Nos Tin Cu Haci

Nos éxito ta dependé riba e echo cu nos ta gana conocimentu. E fuente di conocimentu exacto ta e Palabra di Jehova, Bijbel. Ta e so ta bisa nos loke nos tin cu haci pa agradá Dios. P’esei, nos mester studia e Scritura cuidadosamente. Un esfuerso diligente pa siña tur loke nos por tocante Jehova Dios i Jesucristo ta resultá den ‘conocimentu cu ta nificá bida eterno.’ (Juan 17:3) E conocimentu ei ta un tesoro cu nos mester cuida mashá!—Proverbionan 2:1-5.

E conocimentu cu nos ta gana for di e Palabra di Dios ta ekipá nos pa dal e siguiente paso: ehercé fe den Jesucristo. Jehova a decretá cu ken cu kier yega cerca dje mester haci esei mediante Jesus. (Juan 14:6) De echo, “no tin salbacion den ningun otro.” (Echonan 4:12) Na final, nos sobrebibencia no ta dependé riba ‘plata of oro . . . , sino riba e sanger precioso di Cristo.’ (1 Pedro 1:18, 19) Nos tin cu demostrá nos fe dor di kere den e siñansanan di Jesus i sigui su ehempel. (Hebreonan 12:1-3; 1 Pedro 2:21) I esta un sacrificio balioso el a haci! Aplicacion di e beneficionan di e sacrificio aki ta determiná e futuro eterno pa humanidad completo. Ora e ser aplicá completamente na nos fabor, nos ta haña e don di bida eterno cu ta realmente balioso.—Juan 3:16.

Jesus a bisa: “Bo tin cu stima Jehova bo Dios cu henter bo curason i cu henter bo alma i cu henter bo mente.” (Mateo 22:37) Stima Jehova ta nificá cu “nos ta warda su mandamentunan.” (1 Juan 5:3) Su mandamentunan ta rekerí pa nos keda separá for di mundu, mantené un conducta moralmente limpi i apoyá su Reino lealmente. Esei ta e manera cu nos ta “scoge bida” en bes di morto. (Deuteronomio 30:19) Si nos ‘hala cerca Dios, e lo hala cerca nos.’—Santiago 4:8.

Un garantia di Dios su fabor ta bal hopi mas cu tur e tesoronan di mundu. Hende cu tin e fabor di Dios ta esnan mas ricu na mundu! Laga nos anto haci esfuerso pa adkerí e tesoro di berdadero balor: Jehova su aprobacion. Definitivamente, laga nos haci caso di apostel Pablo su amonestacion: “Sigui tras di husticia, debocion na Dios, fe, amor, awante, genio suave. Lucha e lucha excelente di fe, haña un gara firme riba e bida eterno.”—1 Timoteo 6:11, 12.

[Plachinan na página 21]

Na kico bo ta duna hopi balor? Na placa, posesion material, fama, of otro cos?

[Plachi na página 23]

Nos mester studia e Scritura cuidadosamente