Tin Algu Cu di Berdad Por Uni Hende?

SEA cual sea bo creencianan, probablemente bo ta di acuerdo cu mester tin amante di loke ta berdad den casi tur religion. Den hindú, católico, hudiu i otro religion tin hende cu ta apreciá profundamente loke ta berdadero i cu ta dispuesto pa busk’é. Sin embargo, ta parce cu religion ta dividí humanidad. Tin hende asta ta usa religion pa finnan malbado. Lo ta posibel un dia pa hende sincero di tur religion, hende cu stima loke ta bon i berdadero, forma un union? Nan lo por ta uní pa un propósito comun?

E echo cu ta net religion ta mas i mas e causa di division ta molestiá hopi hende! Tuma nota di algun dje conflictonan aki. Hindú ta bringa contra budista na Sri Lanka. Protestant, católico i hudiu a drama sanger den vários conflicto. “Cristian” ta bringa contra musulman na Bosnia, Chechenia, Indonesia i Kósovo. I na mart 2000, dos dia di conflicto relacioná cu religion a causa morto di 300 nigeriano. Sí, odio religioso a haci e conflictonan aki mas feros.

E maldadnan cu ta ser practicá den nomber di religion hopi bes ta laga hende sincero keda hororisá. Por ehempel, hopi baidó di misa ta keda babucá con algun iglesia a tolerá oficialmente pastornan cu a abusá sexualmente di mucha. Otro creyentenan ta sinti nan sumamente incómodo cu e division cu tin den asina tantu secta supuestamente cristian riba cuestionnan manera homosexualidad i aborto. Ta bisto anto cu religion no a uni humanidad. Pero manera e siguiente experencianan ta mustra, den hopi religion tin hende cu ègt ta stima e berdad.

Nan A Anhelá pa e Berdad

Fidelia tabata un adoradó sincero i deboto den Iglesia Católico di San Francisco na La Paz, Bolivia. E tabatin custumber di cai na rudia dilanti e imágen di Maria i pone e mihó belanan cu e por a cumpra dilanti e crucifiho. Tur siman, e tabata haci donacion di un gran cantidad di cuminda na pastor pa repartí entre e pobernan. Sin embargo, cincu di Fidelia su babynan a muri promé cu nan por a bautisá. Ora pastor a bis’é cu nan tur tabata sufri den e scuridad di limbo, Fidelia a puntra su mes: ‘Si Dios ta bon, con esei por ta ?’

Tara, un dokter, a lanta como hindú na Kathmandu, Népal. Fiel n’e custumbernan di siglonan bieu di su antepasadonan, e tabata adorá su diosnan den e tempelnan hindú i tabatin imágen den su cas. Pero e preguntanan aki a molestiá Tara: Pakico tin asina tantu sufrimentu? Pakico hende ta muri? El a haña masha poco contesta satisfactorio den su religion.

Di otro banda, Panya a lanta como budista den un cas cant’i riu na Bangkok, Tailandia. Nan a siñ’é cu sufrimentu ta bini dor di actonan cometé den bida anterior i cu pa scapa for  di esaki bo tin cu deshací di tur deseo. Mescos cu otro budista sincero, nan a siñ’é p’e tin respet profundo p’e sabiduria di mónik bistí na paña hel cu tabata bini nan cas tur mainta trempan pa pidi limosna. E tabata practicá meditacion i tabata colectá imágen di Buda, keriendo cu esakinan tabata trece proteccion. Despues cu e tabata den un accidente serio cu a lagu’é paralisá for di cintura bai abou, Panya a bishitá monasterionan budista cu e speransa sincero di haña un curacion milagroso. E no a haña un curacion ni iluminacion spiritual. En bes di esei, el a keda exponé na spiritismo i a cuminsá mete un poco cu esei.

Virgil a nace na Merca i a djoin e movementu di ‘Black Muslim’ na universidad. Yen di fanatismo e tabata repartí literatura cu a opiná cu hende blancu ta Diabel. Nan a pensa cu ta esei ta e motibu pakico hende blancu a cometé asina tantu atrocidad contra hende color scur. Aunke e tabata sincero den su creencianan, Virgil a keda preocupá cu preguntanan manera: Con tur hende blancu por ta malu? I pakico asina tantu di nan sermonnan a drei rond di placa?

Maske Charo a lanta na Sur América cu ta predominantemente católico, e tabata un protestant sincero. E tabata contentu di por a keda leu for dje idolatria rond di dje. Charo tabata gusta bai misa tur diadomingo p’e sirbishi cargá cu emocion, caminda e tabata grita “Aleluya!” i djoin e cantamentu i bailamentu religioso cu a sigui despues. Charo a kere sinceramente cu e ta salbá i cu el a nace di nobo. E tabata paga un décimo di su entrada na misa, i ora su tele-evangelista faborito tabata pidi contribucion, e tabata manda placa p’e, pa esaki na su turno por a manda pa mucha na África. Sin embargo, ora el a puntra su pastor pakico un Dios di amor ta tormentá alma den fiernu, el a realisá cu e pastor no tabatin un contesta na drechi. Mas despues, el a descubrí tambe cu nan no tabata usa su contribucionnan pa yuda mucha na África.

Aunke e cincu personanan aki a bini for di diferente antecedente, nan tabatin un cos en comun. Nan a stima loke ta berdad i sinceramente a busca contesta verídico riba nan preguntanan. Pero nan lo por a ègt uni den adoracion berdadero? E siguiente artículo lo contestá e pregunta ei.

[Plachi na página 4]

Ta posibel pa hende di diferente antecedente ta ègt uní?

[Rekonosementu pa Potrèt na página 3]

G.P.O., Jerusalem