Berdadero Fe Ta Posibel Ainda?
Berdadero Fe Ta Posibel Ainda?
“Fe ta un confiansa bibu i cu curashi den e gracia di Dios, cu ta asina sigur, cu un creyente lo pone su bida mil bes na peliger p’e.”—MARTIN LUTHER, 1522.
“Prácticamente nos ta bibando caba den un sociedad seglar caminda fe i custumbernan cristian a casi muri.”—LUDOVIC KENNEDY, 1999.
PUNTO DI BISTA tocante fe ta varia enormemente. Den pasado, fe den Dios tabata normal. Awendia, den un mundu di skepticismo i sufrimentu, berdadero fe den Dios i den Bijbel ta disparciendo lihé.
Berdadero Fe
Segun hopi hende, “fe” kier men djis cu bo tin un creencia religioso, of cu bo ta practicá un cierto forma di adoracion. Pero den Bijbel, básicamente “fe” ta nificá un confiansa completo i firme den Dios i den su promesanan. E ta un cualidad cu ta identificá disipel di Jesucristo.
Na un ocasion, Jesucristo a papia tocante e necesidad di haci oracion “sin entregá.” Bisando esei el a lanta un pregunta relacioná cu si berdadero fe lo existí mes den nos tempu of no. El a puntra: “Ora e Yu di hende yega, realmente lo e haña e fe aki riba tera?” Pakico el a lanta un pregunta asina?—Lucas 18:1, 8, nota na pia di página.
Fe Perdí
Tin hopi cos cu por pone hende perde e grado di fe cu nan tin. Entre otro, tin trauma i prueba di bida diario. Por ehempel, Profesor Michael Goulder tabata pastor di e parokia di Manchester, Inglatera, tempu e desaster aéreo di 1958 a tuma lugá na Munich, den cua hopi hungadó dje tim di futbol Manchester United a muri. Na un programa di television di BBC, locutora Joan Bakewell a splica cu Goulder “a sintié impotente ora el a mira cuantu e hendenan ei a sufri.” Un dje consecuencianan di esaki tabata cu el a “perde su fe den un Dios cu ta
intervení den destino di hende.” Goulder a expresá cu el a kere cu “Bijbel no ta . . . e palabra infalibel di Dios,” sino mas bien “e palabra falibel di hende, cu kisas un tiki inspiracion divino aki aya.”Tin bes fe ta djis caba na nada. Esei ta loke a pasa cu e escritor i locutor Ludovic Kennedy. E ta bisa cu for di su infancia e tabatin “duda i insiguridad cu ta keda bai bini [tocante Dios], i [su] fe a sigui mengua.” Parce cu niun hende no por a dun’é contesta razonabel riba su preguntanan. Morto di su tata riba laman tabata un sla duru pa su fe, cu ya tabata hopi swak caba. Su oracionnan pa Dios “warda nos dje peligernan di laman i dje violencia dje enemigu” no a ser contestá. Barcunan di guera aleman a atacá e barcu crusero modificá pa guera cu su tata tabata ariba den Segundo Guera Mundial.—All in the Mind—A Farewell to God (Puru Imaginacion—Despedida di Dios).
Experencianan asina no ta straño. Manera apostel Pablo ta bisa: “No ta tur hende tin fe.” (2 Tesalonicensenan 3:2) Kico abo ta pensa? Den e mundu cada bes mas sképtico aki, fe den Dios i den su Palabra ta posibel ainda? Examiná loke e siguiente artículo tin di bisa riba e tema.