Bo Por Haña Berdadero Fe

Tempu cu Sarah Jayne tabatin 19 aña, el a haña sa cu e tabatin cancer na ovario. Despues di su operacion el a sinti bon, i a mira futuro cu optimismo. De echo, e tabata asina optimista, cu ora e tabatin 20 aña el a comprometé i cuminsá haci preparacion pa su casamentu. E mésun aña ei e cancer a lanta bek, i nan a bis’é cu ta un par di siman di bida so e tabatin. Sarah Jayne a muri na juni di aña 2000, net promé cu el a cumpli 21 aña.

LOKE a impresioná esnan cu a bishitá Sarah Jayne na hospital ta e trankilidad i confiansa cu e tabatin tocante futuro, i e fe profundo cu e tabatin den Dios i su Palabra, Bijbel. Apesar dje teribel tragedia cu el a enfrentá, e tabatin pleno confiansa den e speransa di resureccion; cu lo e mira tur su amigunan bek. (Juan 5:28, 29) El a bisa: “Lo mi mira boso tur den Dios su mundu nobo.”

Tin hende cu no ta tuma e tipo di fe ei na serio; nan ta pensa cu ta co’i loco e ta. Ludovic Kennedy ta puntra: “Kico otro bida despues di morto ta, cu no ta un creencia di hende cu ta sinti nan insigur, di cu durante e último trompet lo tin ‘bolo cu cerbes,’ [esta, fiestamentu] i asta caviar i tocamentu di trompet pa nan mes tambe, i cu den un Eden berde nan ta bai pasa ratunan contentu cu esnan cu a bai promé cu nan i otronan cu lo por bini despues di nan?” Pero nos tin cu contrarestá e pregunta aki cu un otro pregunta. Kico ta mas razonabel? Kere cu “e bida aki ta tur loke nos tin, pues mihó nos saca mas probecho posibel for di dje” manera Kennedy ta sugerí nos, of kere den Dios i su promesa di resureccion?  Sarah Jayne a scoge pa kere. Con el a desaroyá un fe asina?

‘Busca Dios i Realmente Hañ’é’

Pa bo desaroyá fe i confiansa den un persona, bo mester conoc’é i haña sa con e ta pensa i actua. E proceso aki tin di haci tantu cu bo mente como cu bo curason. Realmente ta mescos ora di desaroyá fe den Dios. Bo mester siña conocé Dios, siña tocante su cualidadnan i su personalidad, pa bo haña sa con digno di confiansa el a proba di ta den tur loke el a bisa i haci.—Salmo 9:10; 145:1-21.

Tin hende ta kere cu e cos ei no ta posibel. Nan ta bisa cu Dios ta muchu leu for di nos, muchu misterioso, esta, si acaso e ta existí mes. Un sképtico lo puntra: “Si Dios ta mes real cu loke cristiannan manera Sarah Jayne ta kere, pakico e no ta revelá su mes na nos (cu no ta kere) tambe?” Pero di berdad ta asina cu Dios ta muchu leu for di nos i incomprendibel? Den un discurso n’e filósofonan i e intelectualnan na Aténas, apostel Pablo a bisa cu “e Dios cu a traha mundu i tur loke tin den dje” a percurá tur loke ta necesario pa hende por ‘busca Dios i realmente hañ’é.’ De echo, Pablo a bisa: “E no ta leu for di cada un di nos.”—Echonan 17:24-27.

Con anto bo por ‘busca Dios i realmente hañ’é’? Tin hende a haci esaki simplemente dor di observá e universo rond di nan. Pa hopi hende, esei riba su mes ta duna suficiente evidencia pa convencé nan di cu mester tin un Creador. * (Salmo 19:1; Isaías 40:26; Echonan 14:16, 17) Nan ta sinti mescos cu apostel Pablo, esta, cu “[Dios] su cualidadnan invisibel ta ser mirá claramente desde creacion di mundu padilanti, pasobra nan ta ser percibí den e cosnan trahá, asta su poder eterno i Divinidad.”—Romanonan 1:20; Salmo 104:24.

Bo Tin Mester di Bijbel

Pero pa bo edificá berdadero fe den e Creador, bo tin mester di un otro cos cu el a percurá. Kico esei ta? Bijbel—Dios su Palabra inspirá den cua e ta revelá su boluntad i su propósito. (2 Timoteo 3:16, 17) Pero tin hende lo bisa: “Wanta un ratu. Con bo por kere cualkier cos cu Bijbel ta bisa, si bo mira cuantu cos teribel ta ser hací dor di hende cu ta pretendé di sigui Bijbel?” Ta berdad cu cristiandad tin un historia spantoso di hipocresia, brutalidad i inmoralidad. Pues cualkier hende razonabel por mira cu ta pretendé so cristiandad ta pretendé di sigui principionan bíblico.—Mateo 15:8.

Bijbel mes a spierta cu hopi hende lo pretendé di adorá Dios, i cu sin embargo nan lo “nenga asta e doño cu a cumpra nan.” Apostel Pedro a bisa cu “pa causa di esakinan nan lo papia malu di e caminda dje berdad.” (2 Pedro 2:1, 2) Jesucristo a bisa cu e hendenan aki ta “hacidónan di maldad” cu lo keda identificá claramente dor di nan actonan malbado. (Mateo 7:15-23) Rechasá e Palabra di Dios pa motibu dje historia di cristiandad, ta manera tira un carta di un amigu confiabel afó, djis pasobra esun cu a entregá nos e carta tin un mal reputacion.

Nos no por edificá berdadero fe sin e Palabra di Dios. Ta mediante e páginanan di Bijbel so Jehova ta presentá su banda dje medaya, na moda di papia. E ta aclará preguntanan persistente, manera pakico el a permití sufrimentu i dolor i kico e ta bai haci tocante e situacion aki. (Salmo 119:105; Romanonan 15:4) Sarah Jayne a yega n’e conclusion di cu Bijbel ta e Palabra inspirá di Dios. (1 Tesalonicensenan 2:13; 2 Pedro 1:19-21) Con? No djis pasobra su mayornan a bis’é, sino debí cu el a tuma tempu pa evaluá onestamente tur evidencia cu ta mustra cu Bijbel ta un revelacion único di parti di Dios. (Romanonan 12:2) Entre otro el a nota con Bijbel tin un influencia poderoso riba bida di esnan cu ta tene nan mes na su principionan. Tambe, cu yudansa di publicacionnan manera E Bijbel—e Palabra di Dios of e palabra di hende?, * el a examiná cuidadosamente e enorme cantidad di evidencia cu tin den Bijbel mes, cu ta proba cu e ta inspirá dor di Dios.

 “Fe Ta Sigui Loke A Ser Tendé”

Sin embargo, djis tin un Bijbel of asta kere cu e ta inspirá no ta suficiente. Apostel Pablo a skirbi: “Fe ta sigui loke a ser tendé.” (Romanonan 10:17) Ta dor di tende Bijbel nos fe ta ser edificá, no djis dor di tin un Bijbel. Bo ta “tende” loke Dios tin di bisa dor di lesa i studia su Palabra. Asta mucha por haci esaki. Pablo ta bisa cu e mama i e wela di Timoteo a siñ’é ‘e scrituranan santu for di infancia.’ Esei ta duna di comprendé cu den un sentido nan a ‘brainwash’ Timoteo? No! Nan no a manipulá ni gaña Timoteo di ningun manera. Nan a ‘persuadié pa kere’ loke el a tende i lesa.—2 Timoteo 1:5; 3:14, 15.

Sarah Jayne a ser persuadí dje mésun manera. Mescos cu e bereanonan di promé siglo, el a “ricibí e palabra [for di su mayornan i otro maestronan] cu mayor anhelo mental.” Como mucha chikitu, sin duda el a confia instintivamente den loke su mayornan a bis’é. Despues, ora el a crece, e no a djis aceptá tur loke nan a siñ’é ciegamente of sin accion personal. El a ‘examiná cuidadosamente e Scritura diariamente en cuanto si e cosnan aki tabata asina.’—Echonan 17:11.

Bo Por Edificá Berdadero Fe

Abo tambe por edificá berdadero fe, e clase di fe cu apostel Pablo a describí den su carta n’e cristiannan hebreo. El a bisa cu e clase di fe ei ta “e expectativa sigur di cosnan sperá, e demostracion evidente di realidadnan aunke nan no ta ser contemplá.” (Hebreonan 11:1) Cu un fe asina lo bo ta completamente sigur cu tur bo speransanan i tur loke bo ta spera ariba lo realisá, incluso Dios su promesa di resureccion. Lo bo keda convencí cu e speransanan ei ta basá riba garantianan sólido, no riba ilusion. Lo bo haña sa cu nunca Jehova no a yega di keda sin cumpli cu su promesa. (Hosué 21:45; 23:14; Isaías 55:10, 11; Hebreonan 6:18) E mundu nobo cu Dios a primintí lo ta real pa bo, como si fuera e t’ei caba. (2 Pedro 3:13) I lo bo mira claramente cu wowo di fe, cu Jehova Dios, Jesucristo i e Reino di Dios ta real, no fantasia.

Jehova no ta keda sin yuda bo edificá berdadero fe. Ademas di haci su Palabra masha fácil pa obtené, Jehova a percurá e congregacion cristian mundial cu ta dedicá na yuda hende cu bon inclinacion di curason pa edificá fe  den Dios. (Juan 17:20; Romanonan 10:14, 15) Aceptá tur yudansa cu Jehova ta haci disponibel pa medio di e organisacion ei. (Echonan 8:30, 31) I ya cu fe ta fruta di Dios su spiritu santu, resa constantemente pa tal spiritu yuda bo desaroyá berdadero fe.—Galationan 5:22.

Tin hende sképtico cu ta ridiculisá ken cu profesá fe den Dios i den su Palabra. No laga nan stroba bo. (1 Corintionan 1:18-21; 2 Pedro 3:3, 4) De echo, berdadero fe lo yuda bo masha tantu pa bira mas fuerte contra e tipo di atakenan ei. (Efesionan 6:16) Sarah Jayne a descubrí esaki, i semper e tabata animá esnan cu bin bishit’é na hospital pa edificá nan propio fe. E tabata bisa nan: “Haci e berdad di bo mes. Studia e Palabra di Dios. Keda cerca di Dios su organisacion. Haci oracion semper. Keda activo den Jehova su sirbishi.”—Santiago 2:17, 26.

Mirando e fe cu Sarah Jayne tabatin den Dios i den resureccion, un di su verpleegsternan a bisa: “Di berdad bo ta kere den e cos aki, no?” Ora nan a puntr’é ta kico tabata dun’é un punto di bista asina optimista apesar di su pruebanan, el a contestá: “Dor cu mi tin fe den Jehova. E ta un berdadero amigu pa mi, i mi ta stim’é mashá.”

[Nota]

[Plachi na página 6]

E mama i e wela di Timoteo a siñ’é ‘e scrituranan santu for di infancia’

[Plachi na página 6]

E bereanonan a ricibí elogio debí cu nan a examiná e Scritura diariamente

[Rekonosementu]

Di “Photo-Drama of Creation,” 1914

[Plachinan na página 7]

Ta dor di tende Bijbel i haci loke e ta bisa nos ta edificá fe, i no djis dor di tin un Bijbel

[Plachi na página 7]

“Lo mi mira boso tur den Dios su mundu nobo”