Con Bo Por Yuda un Yu “Perdí”?

“Alegrá, pasobra . . . [e] tabata perdí i a ser hañá.”—LUCAS 15:32.

1, 2. (a) Con algun hóben a reaccioná na e berdad cristian? (b) Con mayor i yunan den tal situacion lo por sinti nan?

“MI TA bai for dje berdad!” Si un yu mester bisa e palabranan aki, nan ta cai hopi duru den orea di mayornan cu ta teme Dios i cu a traha duru pa cria nan yunan den e caminda cristian! Otro hóbennan ta djis “drif bai” sin laga sa specíficamente cu ta esei nan tin intencion di haci. (Hebreonan 2:1) Hopi di nan ta manera e yu perdí den e comparacion di Jesus cu a bai laga cas di su tata i malgastá su herencia den un pais leu.—Lucas 15:11-16.

² Mayoria Testigo di Jehova no tin e problema aki. Pa esnan cu sí tiné, no tin palabra di consuelo cu por kita nan pena por completo. I nos no mester lubidá e infelicidad cu e hóben rebelde mes por pasa aden. Kisas den su curason, su concenshi ta molesti’é. Den e comparacion di Jesus, un dia e yu perdí a “recobrá su sano huicio,” loke a alegrá su tata. Con mayornan i otro hende den congregacion por yuda yunan perdí ‘recobrá nan sano huicio’?—Lucas 15:17.

Di Con Algun Ta Dicidí di Bai

3. Kico asina ta pone cu hóbennan ta dicidí di bai laga e congregacion cristian?

³ Tin cientos di miles di hóben cu ta sirbi Jehova felismente den e congregacion  cristian. Di con anto otro hóbennan ta bandon’é? Kisas nan ta sinti cu nan ta perdiendo algu cu mundu ta ofrecé. (2 Timoteo 4:10) Of kisas nan ta haña cu Jehova su curá di carné di proteccion ta limitá nan muchu hopi. Concenshi sushi, un interes fuerte den sexo opuesto, of e deseo pa su pareunan acept’é tambe por pone un hóben drif bai for di Jehova su tou di carné. Un hóben lo por stop di sirbi Dios debí cu, den su bista, sea su mayornan of un otro cristian ta haci cos di hipócrita.

4. Kico hopi bes ta e rais dje problema ora hóbennan ta dual?

⁴ Hopi bes e actitud i conducta rebelde di un hóben ta síntoma di debilidad spiritual; un refleho di loke tin den su curason. (Proverbionan 15:13; Mateo 12:34) Maske ki motibu un hóben por tin pa dual, hopi bes e rais dje problema ta cu e no tin un “conocimentu exacto dje berdad.” (2 Timoteo 3:7) Ta importante pa hóbennan no adorá Jehova djis pa rutina, sino cultivá un relacion personal íntimo cuné. Kico lo yuda nan haci esei?

Hala Cerca Dios

5. Kico ta esencial pa un hóben por cultivá un relacion personal cu Dios?

⁵ Disipel Santiago ta skirbi: “Hala cerca Dios, i lo e hala cerca boso.” (Santiago 4:8) Pa un hóben hala cerca Dios, mester yud’é desaroyá apetit p’e Palabra di Dios. (Salmo 34:8) Na cuminsamentu lo e tin mester di “lechi,” e siñansanan básico di Bijbel. Pero segun cu e cuminsá haña deleite den e Palabra di Dios i e haña apetit pa “cuminda sólido,” esta, informacion spiritual profundo, lo no falta hopi p’e alcansá madures spiritual. (Hebreonan 5:11-14; Salmo 1:2) Un hóben cu a admití cu el a yega di cai den e moda di biba mundano a cuminsá haña aprecio pa balornan spiritual. Kico a yud’é cambia? El a haci caso dje conseho pa lesa henter Bijbel, i a cuminsá tene su mes na un programa regular di lesamentu di Bijbel. Sí, lesa e Palabra di Dios cu regularidad ta esencial pa nos forma un relacion íntimo cu Jehova.

6, 7. Con mayornan por yuda nan yunan desaroyá amor p’e Palabra di Dios?

⁶ Ta sumamente vital pa mayornan yuda nan yunan desaroyá amor pa e Palabra di Dios! Apesar cu un mucha muher tiener tabatin un studio di famia regular, e tabata asociá cu hóbennan delincuente. Tocante su studio di famia, e ta corda: “Ora Tata tabata haci pregunta, mi tabata djis lesa e contesta sin ni sikiera hisa cara wak e.” Na lugá di djis cubri material durante e studio di famia, mayornan sabí ta usa e arte di siña. (2 Timoteo 4:2) Pa un hóben por disfrutá di e studio, e mester sinti cu e studio ta relevante p’e. Pakico no puntra e hóben kico ta su punto di bista riba cierto asuntunan, i lagu’e expresá su mes? Animá e hóben p’e aplicá e material cu ta ser considerá. *

⁷ Ademas, hinca bida den e consideracion bíblico. Ora ta apropiado, laga e muchanan actua suceso i dramanan bíblico. Yuda nan visualisá e lugá i e rasgonan dje tera caminda e sucesonan en cuestion a tuma lugá. Por ta útil pa usa mapa i tabèl. Sí, cu un tiki imaginacion, un studio di famia por haña bida i variacion. Ademas, ta bon pa mayornan examiná nan propio relacion cu Jehova. Segun cu nan mes ta hala mas cerca di Jehova, nan por yuda nan yunan tambe hacié.—Deuteronomio 6:5-7.

8. Con oracion ta yuda nos hala cerca Dios?

⁸ Oracion tambe ta yuda bo hala cerca Dios. Un mucha muher tiener a sintié dividí entre e forma di bida cristian i su asociacion cu amigunan cu no a compartí su creencianan. (Santiago 4:4) Kico el a haci? “Pa promé bes,” e ta admití, “mi a ègt resa na Jehova tocante mi sintimentunan.” Ora cu despues el  a haña un amiga di confiansa den e congregacion cristian, el a sinti cu su oracion a ser contestá. Ya cu el a sinti cu Jehova tabata gui’é, el a cuminsá desaroyá un relacion personal cu Dios. Mayornan por yuda nan yunan dor di mehorá e calidad di nan propio oracionnan. Ora di haci oracion como famia, mayornan por habri nan curason pa asina nan yunan por sinti e laso personal cu ta existí entre nan mayornan i Jehova.

Mustra Pacenshi, Pero Sea Firme

9, 10. Ki ehempel Jehova a pone den mustra gran pacenshi na e israelitanan rebelde?

⁹ Ora un hóben cuminsá drif bai, lo e por purba isolá su mes i resistí cualkier esfuerso cu su mayornan ta haci pa sinta considerá asuntunan spiritual cuné. Kico mayornan por haci den un situacion difícil asina? Pensa kico Jehova a haci cu Israel di antigwedad. El a soportá e israelitanan “cabesura” pa mas cu 900 aña promé cu el a laga nan pa nan cuenta den nan rebeldia. (Éxodo 34:9; 2 Crónicanan 36:17-21; Romanonan 10:21) Apesar cu bes tras bes nan a ‘pon’é na prueba,’ Jehova “tabata misericordioso” cu nan. “Hopi bes el a bira su rabia, i e no a lanta tur su furia.” (Salmo 78:38-42) Dios su trato cu nan tabata liber di falta. Mayornan amoroso ta imitá Jehova, i ta mustra pacenshi si e yu no ta reaccioná mesora ora nan purba yud’é.

¹⁰ Mustra gran pacenshi kier men entre otro, cu bo ta nenga di perde speransa di cu boso relacion dañá por drecha. Jehova a pone ehempel den con pa mustra gran pacenshi. El a tuma iniciativa dor di “sigui manda” su mensaheronan n’e israelitanan. Jehova a “sinti compasion pa su pueblo,” apesar cu “nan tabata burla dje mensaheronan dje Dios berdadero i tabata despreciá su palabranan.” (2 Crónicanan 36:15, 16) El a apelá n’e israelitanan bisando: “Por fabor, cada ken bira bek di su mal caminda.” (Jeremías 25:4, 5) Sin embargo, Jehova no a comprometé su principionan hustu. El a bisa e israelitanan pa nan “bira bek” na Dios i na su normanan.

11. Con mayornan por mustra gran pacenshi, i sin embargo ser firme den nan trato cu nan yu cu ta bayendo riba mal caminda?

¹¹ Mayornan por imitá Jehova su gran pacenshi dor di no perde speransa muchu lihé  pa nan yu cu ta bayendo riba mal caminda. Si nan no perde speransa, nan por tuma iniciativa pa tene e canal di comunicacion habrí, of pa reestablecé comunicacion. Maske mayornan lo pega na principionan hustu, nan por “sigui” apelá na nan yu p’e bolbe riba e caminda dje berdad.

Ora un Menor di Edad Ser Expulsá

12. Ki responsabilidad mayornan tin pa un yu menor di edad cu ta biba cerca nan, pero cu a ser expulsá for di congregacion?

¹² Kico ta pasa si un menor di edad cu ta biba cerca su mayornan cai den malecho serio, i debí na su actitud di no repentí e ser expulsá for dje congregacion? Ya cu e yu ta biba cerca su mayornan, nan ta sigui ta responsabel pa instruyé i disiplin’é na armonia cu e Palabra di Dios. Con nan por haci esei?—Proverbionan 6:20-22; 29:17.

13. Con mayornan por purba alcansá curason di un yu cu ta riba mal caminda?

¹³ Kisas ta posibel—i de echo lo ta mihó—pa dun’é e instruccion i disiplina aki durante un studio di Bijbel privá. Un mayor mester wak mas ayá di un yu su actitud rebelde, i purba mira kico tin den su curason. Kico mas tambe por ta parti di su enfermedad spiritual? (Proverbionan 20:5) Bo por alcansá e parti receptivo di su curason? Ki texto di Bijbel lo bo por usa cu bon resultado? Apostel Pablo ta sigurá nos: “E palabra di Dios ta bibu i ta ehercé poder i ta mas skerpi cu cualkier spada di dos fila i ta penetrá asta pa separá alma i spiritu, i djoint i nan tuti, i por dicerní pensamentunan i intencionnan di curason.” (Hebreonan 4:12) Sí, mayornan por haci mas cu djis bisa nan yunan pa nan no cai den malecho mas. Nan por purba iniciá i stimulá e proceso di curacion.

14. Kico ta e promé paso cu un hóben cu a dual mester tuma pa e restorá su relacion cu Jehova, i con mayornan por yuda e yu dal e paso aki?

¹⁴ Un hóben cu a dual mester restorá su relacion cu Jehova. E promé paso cu e mester dal ta di “repentí, i bira bek.” (Echonan 3:19; Isaías 55:6, 7) Segun cu mayornan ta yuda e hóben den nan cas pa repentí, nan mester ‘mantené nan mes frená bou di maldad, i instruí e yu cu no ta faborablemente dispuesto, cu suavedad.’ (2 Timoteo 2:24-26) Nan mester ‘reprend’é’ den e sentido bíblico. E palabra griego traducí como “reprendé” por ser traducí tambe como “duna evidencia convincente.” (Revelacion 3:19; Juan 16:8) Pues, reprendé ta encerá presentá suficiente evidencia pa convencé un yu cu su proceder ta pecaminoso. En berdad esaki no ta fácil. Pero te caminda nan por, mayornan por purba gana su curason dor di usa tur medio disponibel cu ta na armonia cu Bijbel pa convenc’é. Nan mester purba yud’é comprendé cu e mester “odia loke ta malu, i stima loke ta bon.” (Ámos 5:15) Lo e por bini bek na su “sano huicio for di las di Diabel.”

15. Ki papel oracion ta hunga den restorá e relacion entre un persona cu a dual i Jehova?

¹⁵ Pa restorá nos relacion cu Jehova, oracion ta indispensabel. Claro cu niun hende no mester “haci peticion” pa practicantenan di picá abierto cu a yega di asociá cu e congregacion cristian i cu no ta repentí. (1 Juan 5:16, 17; Jeremías 7:16-20; Hebreonan 10:26, 27) Pero mayornan por pidi Jehova duna nan sabiduria pa por trata cu e situacion. (Santiago 1:5) Si un hóben expulsá ta duna  evidencia di repentimentu pero no tin “frankesa di expresion dilanti Dios,” e mayornan por pidi Dios pa, si e ta mira un base pa pordoná e yu su eror, Su boluntad tuma lugá. (1 Juan 3:21) Ora e yu scucha e oracionnan aki, nan por yud’é mira Jehova como un Dios misericordioso. *—Éxodo 34:6, 7; Santiago 5:16.

16. Con nos por yuda miembronan di famia di menornan cu a ser expulsá?

¹⁶ Si expulsá un hóben bautisá, ta ser sperá di miembronan dje congregacion pa nan ‘no sigui den su compania.’ (1 Corintionan 5:11; 2 Juan 10, 11) Cu tempu esei por yud’é “recobrá su sano huicio” i bolbe na Dios su curá di carné, caminda tin proteccion. (Lucas 15:17) Pero sea cu e bini bek of no, miembronan dje congregacion por animá e famia dje hóben expulsá. Nos tur por busca chens pa mustra “sintimentu di compañero” na nan i ser “tiernamente compasivo” cu nan.—1 Pedro 3:8, 9.

Con Otronan Por Yuda

17. Kico miembronan di congregacion mester tene na mente ora nan ta purba yuda un hóben cu ta bayendo den mal caminda?

¹⁷ Kico di un hóben cu no a ser expulsá for dje congregacion cristian, pero cu a bira swak den fe? Apostel Pablo a skirbi cu “si un miembro ta sufri, tur e otro miembronan ta sufri cuné.” (1 Corintionan 12:26) Otro miembronan dje congregacion por mustra interes den un hóben asina na maneranan práctico. Claro cu mester tin un grado di cautela, ya cu un hóben cu ta malu spiritualmente lo por tin un influencia negativo riba otro hóbennan. (Galationan 5:7-9) Den un congregacion, algun hende grandi cu bon intencion, cu kier a yuda un par di hóben cu a bira swak spiritualmente, a invitá nan na algun get-together caminda nan a toca música popular huntu. Aunke e hóbennan a keda contentu di asistí i a disfrutá dje ocasionnan ei, cu tempu e influencia cu nan tabatin riba otro a pone cu nan a stop di asociá cu e congregacion. (1 Corintionan 15:33; Hudas 22, 23) No ta reunion social sin  guia spiritual por yuda un hóben swak spiritualmente. Loke e tin mester ta asociacion cu lo yud’é desaroyá apetit pa cos spiritual. *

18. Con nos por imitá e actitud di e tata dje yu perdí den e comparacion di Jesus?

¹⁸ Ora un hóben cu a bandoná e congregacion ta bolbe presentá na Salon di Reino of na un asamblea, pensa con lo e por ta sintié. Nos lo no mester desplegá e mésun actitud cu e tata dje yu perdí den e comparacion di Jesus, di ricibí e yu cu man habrí? (Lucas 15:18-20, 25-32) Un tiener cu a bandoná e congregacion cristian i cu a asistí na un congreso di distrito despues, a bisa: “M’a kere cu tur hende lo a ignorá un hende manera mi, pero e rumannan a acercá mi i duna mi bon biní. M’a keda profundamente conmoví.” El a cuminsá studia Bijbel atrobe i a bautisá despues.

No Entregá

19, 20. Di con nos mester keda cu un actitud positivo tocante un yu perdí?

¹⁹ Yuda un yu “perdí” “recobrá su sano huicio” ta rekerí pacenshi, i e por ta un reto pa mayornan i otronan. Pero no entregá. “Jehova no ta lento en cuanto su promesa, manera algun hende ta considerá lentitud, pero e tin pacenshi cu boso pasobra e no ta deseá pa ningun hende ser destruí, sino ta deseá pa tur alcansá repentimentu.” (2 Pedro 3:9) Nos tin e garantia bíblico di cu Jehova kier pa su pueblo repentí i biba. De echo, el a tuma iniciativa dor di haci areglo pa reconciliá hende cuné. (2 Corintionan 5:18, 19) Su pacenshi a haci posibel pa miyones di hende recobrá nan sano huicio.—Isaías 2:2, 3.

²⁰ Pues, acaso mayornan lo no mester usa tur medio bíblicamente apropiado cu ta na nan disposicion, pa yuda nan yu perdí menor di edad recobrá su sano huicio? Imitá e gran pacenshi di Jehova segun cu bo ta dal paso pa yuda bo yu bolbe na Jehova. Pega firmemente na principio di Bijbel, i purba reflehá Jehova su cualidadnan manera amor, husticia i sabiduria segun cu bo ta pidié su yudansa den oracion. Mescos cu hopi rebelde cabesura a yega di respondé na Jehova su invitacion caluroso pa bolbe, por ta masha bon cu bo yu perdí lo bolbe n’e tou protector di Dios.—Lucas 15:6, 7.

[Nota]

Bo Ta Corda?

• Kico por ta e rais dje problema ora un hóben ta bandoná e congregacion?

• Con nos por yuda hóbennan desaroyá un relacion personal cu Jehova?

• Di con mayornan mester mustra pacenshi, pero ser firme den yuda un yu perdí?

• Con cristiannan den e congregacion por yuda un hóben perdí bolbe?

[Preguntanan di Estudio]

[Plachi na página 15]

Oracionnan di curason cu mayornan ta haci por yuda nan yunan sinti e laso personal cu ta existí entre nan mayornan i Jehova

[Plachi na página 15]

Pa nos cultivá un relacion íntimo cu Jehova, ta vital pa nos lesa e Palabra di Dios

[Plachi na página 17]

Ricibí un yu perdí calurosamente ora e “recobrá su sano huicio”

[Plachi na página 18]

Dal pasonan positivo pa yuda bo yu bolbe na Jehova