Imitá Jehova den Entrenamentu di Bo Yunan

“Tur mayor no ta corigí nan yunan?”—HEBREONAN 12:7, Contemporary English Version.

1, 2. Di con mayornan tin problema pa lanta nan yunan awe?

UN ENCUESTA na Japon un par di aña pasá a revelá cu rond di mitar di tur e adultonan cu nan a entrevistá a haña cu tin muchu poco comunicacion entre mayor i yu, i cu mayornan no ta suficiente estricto cu nan yunan. Den un otro encuesta den e pais ei, casi un cuart di esnan cu a respondé a admití cu nan no tabata sa con pa trata cu mucha. E tendencia aki no ta algu di paisnan oriental so. “Hopi mayor canades a admití cu nan no sa sigur con pa ta un bon mayor,” The Toronto Star a informá. Tur caminda mayornan tin dificultad pa cria nan yunan.

² Di con mayornan tin problema pa lanta nan yunan? Un motibu principal ta cu nos ta bibando den “e último dianan,” i “tempu crítico, duru pa trata cuné” a presentá. (2 Timoteo 3:1) Ademas, Bijbel ta bisa cu “e inclinacion di curason di hende ta malu for di su hubentud.” (Génesis 8:21) I hóbennan ta particularmente vulnerabel pa e atakenan di Satanas, cu ta yag riba hende sin experencia manera “un leon cu ta grita.” (1 Pedro 5:8) Sin duda, mayornan cristian ta enfrentá un cantidad di obstáculo ora nan ta purba cria nan yunan “den e disiplina i reglamentu mental di Jehova.” (Efesionan 6:4) Con mayornan por yuda nan yunan crece bira adoradónan maduro di Jehova, capas pa distinguí “tantu loke ta bon como loke ta malu”?—Hebreonan 5:14.

3. Pakico entrenamentu i guia di mayornan ta esencial pa lanta yunan exitosamente?

³ Sálomon e rey sabí a remarcá: “Bobedad ta mará na curason di mucha homber.” (Proverbionan 13:1; 22:15) Pa saca tal bobedad for di nan curason, yunan tin mester di coreccion amoroso di nan mayornan. Pero no ta semper nan ta apreciá tal coreccion. De echo, hopi bes nan no ta gusta ora nan ricibí conseho, sin importá ta di ken e ta bini. P’esei, mayornan mester siña “entrená un mucha homber conforme cu e caminda p’e.” (Proverbionan 22:6) Ora mucha pega na tal disiplina, esei por nificá bida pa nan. (Proverbionan 4:13) Pues, ta vital pa mayornan sa kico ta nificá entrená nan yunan!

Loke Disiplina Ta Nificá

4. Kico ta e nificacion principal di “disiplina” den Bijbel?

⁴ Pa miedu cu hende lo acusá nan di maltrato, sea físico, verbal of emocional, algun mayor ta evitá di corigí nan yunan. Nos no tin nodi sinti miedu di esei. Den e sentido cu Bijbel ta usa e palabra “disiplina,” e no ta implicá ningun tipo di abusu ni crueldad. E palabra griego pa “disiplina” tin di haber principalmente cu instruccion, educacion, coreccion, i tin bes castigu firme pero amoroso.

5. Di con ta beneficioso pa presta atencion n’e manera cu Jehova ta trata su pueblo?

⁵ Jehova Dios ta pone e ehempel perfecto den duna disiplina dje manera ei. Comparando Jehova cu un tata humano, apostel Pablo a skirbi: “Tur mayor no ta corigí nan yunan? . . . Nos mayornan humano ta corigí nos pa un tempu corticu, i nan ta hacié manera nan ta haña ta bon. Pero Dios ta corigí nos pa nos mes bon, pasobra e kier pa nos ta santu.” (Hebreonan  12:7-10, Contemporary English Version) Sí, Jehova ta disipliná su pueblo pa nan por ta santu, of puru. Sin duda nos por siña hopi tocante disipliná yu dor di presta atencion n’e manera cu Jehova a entrená su pueblo.—Deuteronomio 32:4; Mateo 7:11; Efesionan 5:1.

Amor—E Forsa Motivador

6. Di con por ta difícil pa mayornan imitá Jehova su amor?

⁶ Segun apostel Juan: “Dios ta amor.” Pues, semper e entrenamentu cu Jehova ta duna nos ta motivá pa amor. (1 Juan 4:8; Proverbionan 3:11, 12) Esei kier men cu si un mayor ta sinti cariño natural pa su yu, lo ta fácil p’e imitá Jehova den esaki? No necesariamente. E amor di Dios ta amor basá riba principio. I un erudito di idioma griego ta mustra cu “no ta semper [e amor ei] ta cuadra cu nos inclinacionnan natural.” Sentimentalismo no ta ciega Dios. Semper e ta wak kico ta mihó pa su pueblo.—Isaías 30:20; 48:17.

7, 8. (a) Ki ehempel di amor basá riba principio Jehova a pone den su trato cu su pueblo? (b) Con mayornan por imitá Jehova den yuda nan yunan desaroyá e abilidad di sigui principionan bíblico?

⁷ Wak cuantu amor Jehova a mustra den su trato cu e israelitanan. Moises a usa un bunita comparacion pa describí Jehova su amor p’e nacion recien formá di Israel. El a bisa: “Mescos cu un águila ta trece movecion den su neshi, ta keda zweef rond riba su yunan chikitu, ta span su halanan, ta tuma nan, ta carga nan riba su plumanan, Jehova so a sigui guia [Jacob].” (Deuteronomio 32:9, 11, 12) P’e siña su yunan bula, e mama águila ta “trece movecion den su neshi” dor di bati cu su alanan p’e pone su yunan cuminsá bula. Ora cu por fin e puitu bula for dje neshi, cu hopi bes ta situá na haltu riba un baranca, e mama ta “zweef rond riba” e yu. Si ta parce cu e yu ta bai cai na suela, e mama ta bula pasa bou di dje, i cargu’é “riba su plumanan.” Cu amor Jehova a cuida e nacion di Israel recien nací na un manera similar. El a duna e pueblo e Ley di Moises. (Salmo 78:5-7) Despues di esei Dios a cuida e nacion cu hopi atencion, cla pa rescatá su pueblo ora nan tabata den problema.

⁸ Con mayornan cristian por imitá e amor di Jehova? Di promé, nan mester siña nan yunan e principio i normanan cu tin den e Palabra di Dios. (Deuteronomio 6:4-9) E meta ta pa siña e muchanan tuma decision na armonia cu principionan bíblico. Mayornan amoroso ta haci esaki bulando riba nan yunan na moda di papia, i observando con nan ta aplicá e principionan cu nan a siña. Segun cu e yunan crece i ricibí mas i mas libertad, e mayornan interesá ta cla pa bula pasa bou di nan, na moda di papia, i ‘carga nan yunan riba nan plumanan’ ki ora cu tin peliger. Ki tipo di peliger?

9. Pa ki peliger en particular mayornan amoroso mester ta alerto? Ilustrá.

⁹ Jehova Dios a spierta e israelitanan dje consecuencianan di mal asociacion. (Númeronan 25:1-18; Ésdras 10:10-14) Awe tambe,  anda den e grupo di hende robes ta un peliger comun. (1 Corintionan 15:33) Ta bon pa mayornan cristian imitá Jehova den esaki. Un mucha muher di 15 aña cu yama Lisa a bira interesá den un mucha homber cu no tabatin e mésun balornan moral i spiritual di su famia. Lisa ta conta: “Mesora mi mayornan a ripará un cambio den mi actitud, i nan a bira preocupá. Tin bes nan tabata corigí mi, i tin bes nan tabata animá mi cu ternura.” Nan a sinta scucha Lisa cu pacenshi, i asina a yud’é enfrentá loke nan a dicerní cu tabata e problema fundamental: su deseo di tin aprobacion di su pareunan. *

Mantené e Canal di Comunicacion Habrí

10. Den ki maneranan Jehova a pone un excelente ehempel den comunicá cu e israelitanan?

¹⁰ Pa mayornan por tin éxito den entrená nan yunan, nan tin cu haci esfuerso pa mantené e canal di comunicacion cu nan yunan habrí. Maske Jehova ta completamente conciente di kico ta biba den nos curason, e ta animá nos pa comunicá cuné. (1 Crónicanan 28:9) Ora el a caba di duna e israelitanan e Ley, el a nombra e levitanan pa instruí nan, i el a manda profeta pa razoná cu nan i corigí nan. Tambe el a mustra cu e tabata dispuesto pa scucha nan oracion.—2 Crónicanan 17:7-9; Salmo 65:2; Isaías 1:1-3, 18-20; Jeremías 25:4; Galationan 3:22-24.

11. (a) Con mayornan por stimulá un bon comunicacion cu nan yunan? (b) Di con ta importante pa mayornan ta bon scuchadó ora nan ta comunicá cu nan yunan?

¹¹ Con mayornan por imitá Jehova ora nan ta comunicá cu nan yunan? Mas cu tur cos, nan tin cu traha tempu pa nan. Ademas, ta bon pa mayornan evitá di haci comentario poco bondadoso cu ta ridiculisá nan, manera: “Esei ta tur? Anto m’a kere cu ta un cos”; “Esei ta co’i kens”; “Wel, ta kico bo por spera? Ta mucha bo ta.” (Proverbionan 12:18) Mayornan sabí cu kier animá nan yunan pa papia ta purba di ta bon scuchadó. Mayornan cu ignorá nan yunan ora nan ta chikitu lo bin ripará cu ora nan bira mas grandi, ta e yunan ta ignorá nan. Semper Jehova tabata dispuesto pa scucha su pueblo. E ta tene su orea habrí pa esnan cu ta acudí na dje humildemente den oracion.—Salmo 91:15; Jeremías 29:12; Lucas 11:9-13.

12. Ki cualidadnan mayornan por desplegá, cu lo yuda nan yunan acercá nan?

¹² Wak tambe con cierto aspectonan di Dios su personalidad a habri caminda pa su pueblo acerk’é mas libremente. Por ehempel, Rey  David di Israel di antigwedad a peca gravemente dor di tin un relacion adúltero cu Bat-seba. Como ser humano imperfecto, David a yega di cometé mas picá serio den su bida. Pero nunca e no a keda sin acercá Jehova i busca su pordon i su reprendementu. Sin duda, Dios su bondad amoroso i su misericordia a haci mas fácil pa David por a bolbe na Jehova. (Salmo 103:8) Dor di desplegá cualidadnan divino manera compasion i misericordia, mayornan por yuda tene e canalnan di comunicacion habrí asta ora nan yunan faya.—Salmo 103:13; Malakías 3:17.

Sea Razonabel

13. Kico ser razonabel ta encerá?

¹³ Mayornan mester ta razonabel i reflehá “e sabiduria djariba” ora di scucha nan yunan. (Santiago 3:17) Apostel Pablo a skirbi: “Laga tur hende sa cu boso ta razonabel.” (Filipensenan 4:5) Kico kier men ser razonabel? Un definicion dje palabra griego traducí como “razonabel” ta “no insistí pa cos bai ‘al pie de la letra.’” Con mayornan por ta razonabel, i na mes momento mantené normanan moral i spiritual firme?

14. Con Jehova tabata razonabel den su trato cu Lot?

¹⁴ Jehova ta un ehempel excelente den ser razonabel. (Salmo 10:17) Ora el a urgi Lot cu su famia pa nan sali for di Sódoma, e stad condená, Lot “a keda tarda.” Despues, ora Jehova su angel a mand’é hui bai den ceru, Lot a bisa: “Mi no por scapa bai den ceru . . . Por fabor, ata tin un stad [Zoar] cerca pa hui bai na dje, i ta un cos chikitu. Por fabor permití mi hui bai ei—no ta un cos chikitu?” Con Jehova a reaccioná? El a bisa: “Mira cu di berdad mi ta mustra consideracion na bo te na e grado aki tambe, dor di no destruí e stad cu bo a papia di dje.” (Génesis 19:16-21, 30) Jehova a keda dispuesto di bai di acuerdo cu Lot su peticion. Sí, mayornan mester tene nan mes na e normanan cu Jehova Dios ta establecé den su Palabra, Bijbel. Pero esei no ta kita cu ta posibel pa complacé deseo di e yunan ora esaki no ta bai contra principio bíblico.

15, 16. Ki les mayornan por siña for dje ilustracion na Isaías 28:24 i 25?

¹⁵ Tambe, ser razonabel kier men prepará curason dje yunan pa nan ta cla pa aceptá conseho. Pa ilustrá, Isaías a compará Jehova cu un cunukero, i a bisa: “Acaso ta henter dia e ploegdó ta ploeg pa sembra, cu e ta los i boltu su tera? Acaso, despues cu el a nivelá e superficie, e no ta stroi comino pretu i ta sprengu e comino, i e no tin cu planta trigu, maishi chikí i puspas grof den e lugá designá, i trigu inferior como su límite?”—Isaías 28:24, 25.

¹⁶ Jehova ta “ploeg pa sembra” i e ta “los i boltu su tera.” Pues, e ta prepará curason di su pueblo promé cu e disipliná nan. Con mayornan por “ploeg” curason di nan yunan ora nan ta corigí nan? Un tata a imitá Jehova ora el a corigí su yu homber di cuater aña. Ora su yu a dal yu dje bisiña, promé cu tur cos e tata a scucha e excuusnan dje yu cu pacenshi. E ora ei e tata a cont’é un cuenta tocante un mucha homber chikitu cu a sufri mashá na man di un mucha abusador. Ta como si fuera e tata a “ploeg” curason di su yu. Ora e yu a tende e cuenta, el a sintié conmoví pa bisa cu mester a castigá e mucha abusador. Cu e tata su ploegmentu, curason dje yu tabata prepará i mas incliná pa mira cu dal yu dje bisiña ta un abusu, i robes.—2 Samuel 12:1-14.

17. Ki les Isaías 28:26-29 ta duna mayornan tocante coreccion?

¹⁷ Mas aleu Isaías a compará Jehova su coreccion cu un otro cos cu cunukeronan sa haci: bati maishi. Un cunukero ta usa diferente instrumento pa bati, dependiendo di con duru e bagas di e grano ta. E ta usa un palu delegá pa comino pretu—un grano moli—i un pida palu mas pisá pa comino. Pero pa tiponan di grano cu bagas mas duru e ta usa wiel di garoshi. Tog lo e no bati e granonan mas duru te ora nan garna. Mescos, ora Jehova kier kita cualkier cualidad indeseabel for di su  pueblo, e ta trata cada caso segun e necesidad i e circunstancia. Nunca e ta abusá di su poder ni e no ta severo. (Isaías 28:26-29) Tin mucha ta reaccioná riba djis un mirada di nan mayornan, i nada mas no ta necesario. Tin otro mucha cu bo mester keda corda bes tras bes, i tin otro cu bo mester persuadí na un manera mas fuerte. Mayornan razonabel lo aplicá coreccion segun e necesidad individual di cada mucha.

Haci Consideracionnan di Famia Agradabel

18. Con mayornan por traha tempu pa un studio di Bijbel regular como famia?

¹⁸ Dos dje mihó maneranan pa instruí bo yunan ta cu un studio di Bijbel regular como famia i un consideracion bíblico diario. Un studio di famia ta mas eficas si e ta regular. Si e studio no ta planeá, of ta di ripiente ta dicidí di studia, probablemente e studio lo ta iregular, si acaso ta ten’é mes. Pues, mayornan tin cu ‘cumpra tempu’ pa studia. (Efesionan 5:15-17) Por ta difícil pa haña un ora fiho cu ta cumbiní tur hende. Un cabes di famia a ripará cu segun cu e yunan tabata crece, cada bes tabata bira mas difícil pa haña henter e famia huntu debí cu nan tabatin diferente orario. Pero durante e anochinan di reunion di congregacion sí semper e famia tabata huntu. P’esei e tata a haci areglo pa nan tene e studio di famia riba un dje anochinan ei. El a funcioná bon. Awor tur su tres yunan ta sirbidó di Jehova bautisá.

19. Con mayornan por imitá Jehova ora di conducí un studio di famia?

¹⁹ Pero no ta suficiente pa nos djis trata cierto cantidad di material bíblico durante e studio. Jehova a siña e israelitanan restorá na nan pais pa medio di e sacerdotenan, kendenan a ‘splica i pone nificacion’ na e Ley, dunando “comprendimentu na e lesamentu.” (Nehemías 8:8) Un tata cu tabatin éxito den yuda tur su shete yunan stima Jehova, semper a bai den su kamber promé cu e studio di famia p’e prepará, adaptando e material n’e necesidad di cada yu. El a haci e studio agradabel pa su yunan. Un di su yunan cu ya ta grandi caba  ta corda: “Semper e studio tabata dushi. Si nos tabata hunga bala pafó den curá ora nan a yama nos p’e studio di famia, mesora nos tabata pone e bala abou anto core bai paden pa studia. E tabata un dje anochinan di mas dushi di siman.”

20. Ki posibel problema den criansa di yu nos mester considerá ainda?

²⁰ E salmista a declará: “Mira! Yunan ta un herencia for di Jehova; e fruta di barica ta un recompensa.” (Salmo 127:3) Entrená nos yunan ta exigí tempu i esfuerso, pero si nos hacié bon esei por nificá bida eterno pa nan. Esta un excelente recompensa esei lo ta! P’esei, laga nos imitá Jehova cu entusiasmo ora di entrená nos yunan. Sin embargo, maske mayornan ta ser confiá cu e responsabilidad di “cria [yunan] den e disiplina i reglamentu mental di Jehova,” no tin garantia di éxito. (Efesionan 6:4) Asta si duna un mucha e mihó cuido posibel, e por bira rebelde i stop di sirbi Jehova. Kico e ora ei? Esei nos siguiente artículo ta bai trata.

[Nota]

Con Bo Ta Contestá?

• Con mayornan por imitá Jehova su amor describí na Deuteronomio 32:11 i 12?

• Kico bo a siña for dje manera cu Jehova a comunicá cu e israelitanan?

• Kico e echo cu Jehova a scucha e súplica di Lot ta siña nos?

• Ki les tocante corigí yu bo a siña for di Isaías 28:24-29?

[Preguntanan di Estudio]

[Plachi na página 9]

Moises a compará Jehova su manera di entrená su pueblo cu e manera cu un águila ta trata su yunan chikitu

[Plachi na página 10]

Mayornan tin cu traha tempu pa nan yunan

[Plachi na página 12]

“E tabata un dje anochinan di mas dushi di siman”