Kico Kier Men Ser Leal?

E HUDIUNAN hasidim di siglo 2 P.E.C. a considerá nan mes como berdaderamente leal. Nan nomber ta bini di e palabra hebreo básico pa “leal” cu ta cha·sidh. E ta ser derivá for dje sustantivo ché·sedh, cu frecuentemente ta ser traducí como “bondad amoroso,” “amor leal,” “bondad,” i “misericordia.” Segun e Theological Dictionary of the Old Testament, ché·sedh “ta activo, social, cu awante [i] e no ta referí djis na un actitud humano sino tambe na e accion cu ta resultá for di e actitud aki. I ta un accion cu ta conserbá i promové bida. E ta intervencion na fabor di un persona cu ta sufri debí na calamidad of angustia. E ta demostracion di amistad.”

Obviamente, den hopi idioma no tin un palabra pa expresá e nificacion completo asociá cu e palabra hebreo aki manera Bijbel ta us’é. En todo caso, lealtad den sentido bíblico ta nificá mas cu pega fielmente na promesa. E ta encerá e idea di un apego amoroso i tambe tuma accion positivo pa beneficiá otronan. Pa comprendé loke berdadero lealtad ta nificá, considerá con Jehova a demostrá lealtad na Abraham, Moises, David, e nacion di Israel i humanidad en general.

Jehova A Demostrá Lealtad

Jehova a bisa su amigu Abraham: “Mi ta un escudo pa bo.” (Génesis 15:1; Isaías 41:8) Esakinan no tabata palabranan bashí. Jehova a protehá i libra Abraham i su hendenan di cas for di Fárao i di Abímelec. El a yuda Abraham rescatá Lot for di cuater rey cu a cera cabes. Jehova a restorá e podernan procreativo di Abraham kende tabatin 100 aña di edad i di Sara cu tabatin 90 aña pa asina e Simia primintí por a bini via nan. Regularmente Jehova a comunicá cu Abraham mediante vision, soño i angelnan mensahero. De facto, Jehova a demostrá lealtad na Abraham miéntras e tabata na bida i tambe hopi tempu despues cu el a muri. Atrabes di siglonan, Jehova a cumpli cu su promesanan na desendientenan di Abraham, e nacion di Israel, apesar di nan desobedencia. E relacion entre Jehova cu Abraham tabata un demostracion di loke berdadero lealtad ta: amor transformá den accion.—Génesis capítulo 12 pa 25.

Bijbel a bisa cu “Jehova tabata papia cara cara cu Moises, mescos cu un homber lo a papia cu su compañero.” (Éxodo 33:11) Sí, Moises tabatin e relacion di mas íntimo cu Jehova cu cualkier profeta promé cu Jesucristo por tabatin cu Jehova. Con Jehova a demostrá su lealtad na Moises?

Como un homber di 40 aña di edad cu poder i abilidad, di un manera presumido Moises a dicidí riba su mes pa liberá su  pueblo. Pero no tabata tempu pa esei ainda. E mester a hui pa su bida. Pa 40 aña el a cuida carné na Madian. (Echonan 7:23-30) Sin embargo, Jehova no a bandon’é. Ora e tempu tabata oportuno, Moises a ser trecé bek pa guia Israel for di Egipto.

Di mes manera, Jehova a demostrá lealtad na David, e famoso segundo rey di Israel. Tempu cu David tabata un hóben ainda, Jehova a bisa profeta Samuel: “Lanta, ungié, pasobra esaki ta esun!” Desde e tempu ei padilanti, Jehova a protehá i guia David lealmente, miéntras el a madurá como e futuro rey di henter Israel. Jehova a libr’é “for di gara dje leon i for di gara dje beer” i for di man di e filisteo gigante Góliat. El a duna David un victoria tras di otro riba e enemigunan di Israel, i Jehova a libra David for dje spada di Saul kende tabata yalurs i vengativo.—1 Samuel 16:12; 17:37; 18:11; 19:10.

Claro cu David no tabata un homber perfecto. De facto, el a cometé picá grave. Sin embargo, en bes di bandon’é, Jehova a extendé amor leal na David kende a repentí sinceramente. Atrabes di David su bida, bes tras bes Jehova a actua pa conserbá i promové bida. El a intervení na fabor di esnan cu tabata den angustia. Esaki sí tabata bondad amoroso!—2 Samuel 11:1–12:25; 24:1-17.

Como un grupo completo, e nacion di Israel a drenta den un relacion special dedicá na Jehova ora nan a bai di acuerdo cu e palabranan di e pacto di Ley di Moises na ceru di Sinaí. (Éxodo 19:3-8) P’esei, Israel ta ser describí como si fuera den un relacion matrimonial cu Jehova. A ser bisá na Israel: “Jehova a yama bo como si fuera bo tabata un esposa.” I Jehova a bis’é: “Cu bondad amoroso te na tempu indefiní lo mi tene misericordia cu bo.” (Isaías 54:6, 8) Con Jehova a demostrá lealtad den e relacion special aki?

Jehova a tuma iniciativa pa percurá pa e necesidadnan di e israelitanan i pa fortalecé nan relacion cuné. El a libra nan for di Egipto, a organisá nan den un nacion i a trece nan den “un tera cu ta abundá cu lechi i miel.” (Éxodo 3:8) El a percurá instruccion spiritual regular mediante e sacerdotenan, e levitanan, i un fluho constant di profeta i mensahero. (2 Crónicanan 17:7-9; Nehemías 8:7-9; Jeremías 7:25) Ora e nacion a bai sirbi otro diosnan, Jehova a corigí nan. Ora nan a repentí, el a pordoná nan. Mester admití sí cu e nacion di Israel tabata un “esposa” difícil pa trata cuné. Tog, Jehova no tabata lihé pa bandon’é. Debí na su promesanan na Abraham, El a pega lealmente n’e israelitanan te ora cu Su propósitonan relacioná cu nan tabata cumplí. (Deuteronomio 7:7-9) Esta un excelente ehempel pa hende casá awe!

Tambe Jehova a demostrá lealtad na humanidad en general den e sentido cu e ta percurá e necesidadnan básico di bida pa tur hende, tantu hustu como inhustu. (Mateo 5:45; Echonan 17:25) Fuera di esei, el a percurá e sacrificio di rescate di su Yu pa asina  humanidad completo por tin e oportunidad di ser librá for di sclabitud na picá i morto i disfrutá di e glorioso prospectonan di bida eterno perfecto den Paradijs. (Mateo 20:28; Juan 3:16) E regalo di e rescate ta e acto supremo pa conserbá i promové bida. En berdad e tabata “un intervencion na fabor di un persona cu ta sufri debí na calamidad of angustia.”

Proba Bo Lealtad cu Actonan Positivo

Dor cu lealtad ta sinónimo di bondad amoroso, e tin tambe un sentido fuerte di cu e mester bini di dos banda. Si bondad amoroso ser mustrá na bo, anto ta ser verwagt cu abo ta haci mescos bek. Lealtad ta paga bek cu lealtad. E echo cu David a comprendé e implicacionnan relacioná cu ché·sedh, ta bisto den su palabranan: “Lo mi buig den direccion di bo tempel santu, i lo mi alabá bo nomber.” Di con? “Pa causa di bo bondad amoroso i pa causa di bo apego n’e berdad.” (Salmo 138:2) Obviamente, como un persona cu a ricibí Jehova su bondad amoroso, David a ser motivá pa ador’é i alab’é. P’esei anto, ora nos contemplá con Jehova ta demostrá amor na nos, nos ta ser motivá pa haci mescos bek? Por ehempel, ora hende ta trece reproche riba e nomber di Jehova, bo interes den Dios su reputacion ta motivá bo pa defend’é?

Esei a sosodé cu un cristian relativamente nobo i su casá, ora nan a bai entiero di un miembro di famia cu a muri den un accidente di motosaikel. E ceremonia no tabata unu religioso, i a permití esnan presente bisa algu di e defuntu. Un orador a culpa Dios p’e morto prematuro dje yoncuman dor di bisa cu ta ‘pasobra Dios tabata kier e den shelu el a tum’é.’ Nos ruman cristian a sinti cu e no por a keda ketu. El a subi e plataforma, maske e no tabatin Bijbel ni nota. El a puntra: “Boso ta kere cu un Dios todopoderoso, misericordioso i cu compasion ta aprobá un situacion manera esaki?” Despues el a sigui cu un discurso improvisá di dies minuut den cua el a cita textonan di Bijbel cu ta splica di con nos ta muri, kico Dios a haci pa rescatá humanidad for di morto, i e maraviyoso prospecto di un resureccion pa bida eterno riba un tera paradísico. Spontáneamente, e mas cu 100 hendenan presente a cuminsá bati man. Despues e ruman homber ta corda: “Mi a sinti un goso interno cu nunca promé mi no a sinti. Mi a gradicí Jehova cu el a educá mi den su sabiduria i a duna mi e oportunidad pa defendé su nomber santu.”

Lealtad na Jehova ta encerá ser leal na su Palabra, Bijbel. Di con? Pasobra atrabes di e páginanan di Bijbel, Jehova ta siña nos con pa biba. E ley i principionan registrá den Bijbel, sigur ta e instruccionnan di mas excelente i beneficioso pa bida. (Isaías 48:17) No laga preshon di otro hende of bo mes debilidadnan stroba bo di pega na Jehova su leynan. Keda leal n’e Palabra di Dios.

Lealtad na Dios ta encerá lealtad na su organisacion tambe. Atrabes di añanan tabata necesario pa corigí i ahustá nos comprendimentu di cierto textonan di Bijbel. Ta un echo cu ningun hende no ta spiritualmente bon alimentá manera nos. (Mateo 24:45-47) Sin duda Jehova a apoyá su organisacion di tempu moderno lealmente. Nos por haci mescos? A. H. Macmillan a hacié. Djis promé cu su morto el a bisa: “Ora mi a dedicá mi mes na Dios na edad di 23 aña na september 1900, mi a mira Jehova su organisacion crece for di un principio chikitu te bira un sociedad mundial di hende felis cu ta proclamá su berdadnan celosamente. . . . Segun cu mi ta mira cu mi sirbishi na Dios riba tera ta yega su fin, mas cu nunca promé mi ta convencí cu Jehova a dirigí su pueblo i a duna nan precis loke nan tabatin mester n’e debido tempu.” Pa casi 66 aña ruman Macmillan a sirbi fielmente i lealmente te na su morto dia 26 di augustus 1966. E tabata  un excelente ehempel di lealtad na Dios su organisacion visibel.

Fuera di cu nos ta leal n’e organisacion, nos lo ta leal tambe na otro? Ora nos haña nos confrontá cu e menasa di persecucion brutal, nos lo keda leal na nos rumannan? Durante Segundo Guera Mundial, nos rumannan na Hulanda a pone un excelente ehempel di lealtad. Un anciano di Congregacion Groningen, Klaas de Vries, a ser someté na interogacion cruel i sin misericordia dor di Gestapo nazi. Nan a cer’é den un cel pa 12 dia largu i a dun’é pan cu awa so, i despues a bolbe interogu’é. Cu revolver di mik riba dje, bou di menasa di morto nan a dun’é dos minuut pa divulgá informacion di rumannan cu ta carga responsabilidad den congregacion, i tambe otro informacion vital. E único cos cu Klaas tabata bisa ta: “Di mi boso lo no tende nada mas. . . . Lo mi no bira un traidor.” Tres bes nan a menas’é cu e revolver. Finalmente Gestapo a entregá i a manda Klaas un otro prizon. Hamas el a traicioná su rumannan.

Nos ta leal na nos famia di mas íntimo, esta, nos casá? Nos ta leal na nos voto matrimonial mescos cu Jehova a onra su relacion basá riba pacto cu e nacion di Israel? Bo no mester ta solamente leal, sino tambe haci esfuerso pa mantené un relacion íntimo cu bo casá. Tuma iniciativa pa fortificá bo matrimonio. Pasa tempu huntu, comunicá libremente i francamente cu otro, apoyá i animá otro, scucha otro, hari huntu, yora huntu, hunga huntu, traha huntu pa logra metanan mutuo, agradá otro i ser amigu di otro. Tene cuidou foral pa no desaroyá sintimentunan romántico pa otro hende. Maske ta bon i corecto pa siña conocé i asta desaroyá amistadnan nobo cu otro hende pafó di bo matrimonio, sintimentunan romántico mester ta limitá na bo casá. No laga niun otro hende bini entre abo i bo casá.—Proverbionan 5:15-20.

Keda leal na amigu i famianan creyente. Segun cu añanan ta pasá, no lubidá nan. Keda den contacto cu nan, skirbi carta, bel i haci bishita. Maske con bo circunstancianan di bida bira, purba di no desapuntá nan. Haci nan contentu di por bisa cu nan conocé bo of cu nan ta bo famia. Lealtad na nan lo mantené bo determiná pa haci loke ta bon i lo e ta un fuente di animacion pa bo.—Ester 4:6-16.

Sí, lealtad ta encerá accionnan positivo pa conserbá relacionnan precioso. Haci loke bo por pa paga Jehova pa su bondad amoroso. Imitá Jehova su lealtad den bo trato cu e congregacion cristian, bo casá, famia i amigunan. Proclamá Jehova su birtudnan lealmente na bo próhimo. E salmista tabatin rason ora el a bisa: “Tocante e expresionnan di bondad amoroso di Jehova lo mi canta asta te na tempu indefiní. Cu mi boca lo mi haci bo fieldad conocí di generacion pa generacion.” (Salmo 89:1) Nos no ta ser atraí na e Dios ei? Sí, “su bondad amoroso ta pa tempu indefiní.”—Salmo 100:5.

[Plachi na página 23]

A. H. Macmillan