Pregunta di Lector

Kico ta e “descanso” mencioná na Hebreonan 4:9-11, i con un persona ta “drenta den e descanso ei”?

Apostel Pablo a skirbi e cristiannan hebreo di promé: “Ta keda un descanso di sabat p’e pueblo di Dios. Pasobra e hende cu a drenta den e descanso di Dios, e mes tambe a descansá di su mes obranan, mescos cu Dios a haci for di esnan di dje. P’esei, laga nos haci nos sumo posibel pa drenta den e descanso ei.”—Hebreonan 4:9-11.

Ora Pablo a bisa cu Dios ta descansá di Su obranan, el a referí aparentemente na loke ta skirbí na Génesis 2:2, cu ta bisa: “Pa e di shete dia Dios a completá su obra cu el a traha, i el a pasa na descansá riba e di shete dia for di tur su obra cu el a traha.” Di con Jehova a “descansá riba e di shete dia”? E motibu sigur no tabata cu e mester a recuperá “di tur su obra cu el a traha.” E siguiente versículo ta duna un indicacion: “Dios a bendicioná e di shete dia i hacié sagrado, pasobra riba e dia ei, e ta descansá di tur su obranan cu Dios a crea cu e propósito di traha.”—Génesis 2:3; Isaías 40:26, 28.

E “di shete dia” tabata diferente for di tur e promé seis dianan den e sentido cu e tabata e dia cu Dios a bendicioná i haci sagrado, esta, e dia cu el a apartá pa un propósito special of dedicá na tal propósito special. Kico e propósito ei tabata? Mas promé, Dios a revelá su propósito relacioná cu humanidad i e tera. Dios a bisa e promé homber i su casá: “Sea fructífero i bira hopi i yena e tera i domin’é, i tene dominio riba piscá di laman i riba criatura buladó di shelu i riba tur criatura bibiente cu ta move riba tera.” (Génesis 1:28) Maske Dios a duna humanidad i e tera un principio perfecto, lo a tuma tempu promé cu nan a dominá henter e tera i transform’é den un paradijs yená cu un famia humano perfecto, manera tabata Dios su propósito. Pues, riba “e di shete dia,” Dios a descansá of a stop di crea cosnan riba tera pa asina permití loke el a crea caba, desaroyá na armonia cu su boluntad. Na fin di e “dia” ei, Dios su propósito completo lo a bira un realidad. Cuantu tempu e descanso ei lo dura?

Si nos bai bek na loke Pablo a bisa den Hebreonan, nos ta ripará cu el a indicá cu “ta keda un descanso di sabat p’e pueblo di Dios,” i el a urgi su compañeronan cristian pa haci nan máximo esfuerso pa “drenta den e descanso ei.” Esaki ta mustra cu ora Pablo a skirbi e palabranan ei, “e di shete dia” di e descanso di Dios, cu a cuminsá un 4.000 aña mas promé, tabata aden ainda. Lo e no terminá sino te ora e propósito di Dios relacioná cu humanidad i e tera cumpli completamente na fin di e Reinado di Mil Aña di Jesucristo, kende ta e “Señor di sabat.”—Mateo 12:8; Revelacion 20:1-6; 21:1-4.

Cu e prospecto maraviyoso ei na bista, Pablo a splica con un persona lo por drenta den e descanso di Dios. El a skirbi: “E hende cu a drenta den e descanso di Dios, e mes tambe a descansá di su mes obranan.” Esaki ta bisa nos cu maske hende tabatin un comienso perfecto, humanidad en general no a drenta den e descanso di Dios. Esaki tabata pa motibu cu Adam cu Eva no a warda Dios su descanso pa muchu tempu riba “e di shete dia,” dor di aceptá e areglo cu e tabatin pa nan. Mas bien, nan a rebeldiá i kier a bira independiente di Dios. De echo, nan a sigui loke Satanas a planea en bes di aceptá Dios su direccion amoroso. (Génesis 2:15-17) Como resultado nan a perde e prospecto di biba pa semper riba un tera paradísico. Dje tempu ei padilanti, humanidad completo a bira esclabo di picá i morto.—Romanonan 5:12, 14.

Hende su rebelion no a stroba Dios su propósito. Su dia di descanso ta sigui. Sin embargo, Jehova a haci un percuracion amoroso—e rescate—mediante su Yu Jesucristo, pa asina tur cu ehercé fe den e rescate por mira padilanti pa ser librá i descansá di e carga di picá i morto. (Romanonan 6:23) Ta p’esei Pablo a urgi su compañeronan cristian pa ‘descansá di nan mes obranan.’ Nan mester a aceptá Dios su percuracion pa salbacion i no purba traha pa nan futuro segun  nan propio manera, mescos cu Adam i Eva a haci. Tambe nan mester a evitá di sigui tras di nan mes obranan di hustificá nan mes.

Si un persona bandoná su metanan egoista of mundano pa haci e boluntad di Dios, esei sigur lo refresk’é i dun’é descanso. Jesus a extendé e invitacion aki: “Bini cerca mi, boso tur cu ta afaná i cargá, i lo mi refrescá boso. Tuma mi yugo riba boso i siña di mi, pasobra mi ta di genio suave i humilde di curason, i boso lo haña refrescamentu pa boso alma. Pasobra mi yugo ta suave i mi carga ta leve.”—Mateo 11:28-30.

Pablo su consideracion di e descanso di Dios i di e manera cu un persona por drent’é sigur tabata un fuente di animacion pa e cristiannan hebreo na Jerusalem cu a wanta hopi persecucion i mofa pa motibu di nan fe. (Echonan 8:1; 12:1-5) Di mes manera, e palabranan di Pablo por ta un fuente di animacion pa cristiannan awe. Realisando cu e cumplimentu di e promesa di Dios en cuanto un tera paradísico bou di su Reino hustu ta hopi cerca, nos tambe mester descansá di nos mes obranan i haci nos sumo posibel pa drenta e descanso ei.—Mateo 6:10, 33; 2 Pedro 3:13.

[Plachinan na página 31]

Dios su promesa di un paradijs terenal lo ser realisá na fin dje dia di su descanso