Un Bida Yen di Sorpresa den Sirbishi di Jehova
Historia di Bida
Un Bida Yen di Sorpresa den Sirbishi di Jehova
SEGUN E RELATO DI ERIC I HAZEL BEVERIDGE
“Pa medio di esaki mi ta sentenciá bo na seis luna di prizon.” Miéntras e palabranan aki tabata resoná den mi orea, nan a hiba mi n’e Prizon Strangeways na Manchester, Inglatera. Tabata na december 1950, i mi tabatin 19 aña di edad. Mi a caba di pasa un dje pruebanan di mas duru di mi hubentud: Mi a nenga di inscribí pa servicio militar.—2 Corintionan 10:3-5.
MI TABATA un minister pionero di tempu completo di Testigonan di Jehova, i esaki lo mester a nificá exoneracion di servicio militar, pero ley británico no a aceptá nos státus como minister. Asina mi a resultá mi so den un cel di prizon. Mi a pensa riba mi tata. Indirectamente, ta pa su motibu mi tabata den prizon.
Bo sa, Tata, un funcionario di prizon, tabata un habitante di Yorkshire cu conviccion i principionan fuerte. Debí na su experencianan den ehército i como funcionario di prizon, e no tabata gusta catolicismo niun tiki. Su promé contacto cu Testigonan ta data di comienso di añanan ’30 di siglo 20 ora cu el a bai porta pa core cu nan, i a bolbe bek cu algun di nan bukinan den su man! Despues el a aboná riba e revista Consuelo (awor Spierta!). E Testigonan tabata bishit’é tur aña pa anim’é pa renobá su abonament. Tempu cu mi tabatin rond di 15 aña nan a enbolbé Tata den un otro combersacion, i mi a djoin e combersacion na banda di e Testigonan. E tempu ei mi a cuminsá studia Bijbel.
Na edad di 17 aña mi a simbolisá mi dedicacion na Jehova mediante bautismo na mart 1949. Mas despues den e aña ei mi a topa cu John i Michael Charuk. Nan a caba di gradua na Galad, e scol di misionero, i nan tabata riba
caminda pa bai Nigeria. Nan spiritu di misionero a impresioná mi mashá. Sea cu nan tabata conciente of no, nan a implantá e spiritu ei den mi curason.Miéntras mi tabata studia Bijbel, mi a perde interes den busca lugá na universidad. Denter di un aña cu mi a bandoná cas pa bai traha na e oficina di ‘Invoerrechten’ i Accijns na Londen, mi a sinti cu si mi sigui traha trabou administrativo pa gobiernu, mi no por a cumpli cu mi dedicacion na Dios. Ora mi a kita for di mi trabou di oficina, un colega di oficina cu tabatin hopi experencia den su trabou a felicitá mi cu mi a bandoná “un trabou cu ta destruí hende su alma.”
Promé cu esaki mi a enfrentá un otro prueba: con pa bisa mi tata cu mi kier a bandoná mi trabou sigur, pa bira un minister di tempu completo. Un anochi cu mi tabata na cas cu vakansi, mi a laga e bom cai. Mi a verwagt cu Tata lo explotá i cuminsá zundra. Pa mi sorpresa el a djis bisa: “Ta bo decision i ta abo tin cu carga e consecuencianan. Pero si bo faya, no core bini cerca mi.” Loke mi a skirbi den mi diario dia 1 di januari 1950 ta bisa: “Mi a bisa Tata tocante traha pionero. Su actitud razonabel i cooperativo a sorprendé mi mashá. Mi no por a yuda, pero su bondad a pone mi yora.” Mi a kita for di trabou den gobiernu i a aceptá un asignacion como pionero di tempu completo.
Un Asignacion i un “Casita”
Anto mi debocion na Dios a ser poné na prueba atrobe. Mi a haña un asignacion pa pionero den cua mi mester a compartí un “casita” na Lancashire cu Lloyd Griffiths, un compañero cristian di Wales. Yen di optimismo i fantasia tocante e casita, mi a yega Bacup, un pueblo monótono i bou di awaceru. No a dura mashá cu mi mester a baha di mi nubianan pasobra a resultá cu e casita tabata un bodega! Anochi nos tabatin compania di raton cu kakalaka. Mi tabata a punto di cambia di idea i bai cas bek. En bes di esei, mi a haci oracion den silencio pidi Dios forsa pa enfrentá e prueba aki. Di ripiente mi a sinti un pas, i mi a cuminsá mira e situacion obhetivamente. Esaki ta e asignacion cu e organisacion di Jehova a duna mi. Lo mi confia den Jehova pa yudansa. Mi ta masha gradicidu cu mi a soportá e situacion, pasobra si mi a bandoná mi asignacion, esei lo a cambia mi bida pa semper!—Isaías 26:3, 4.
Mi a predicá pa mas o ménos nuebe luna den e vaye di Rossendale cu e tempu ei tabata den un situacion económico deplorabel, promé cu nan a hiba mi prizon pasobra mi a nenga di drenta servicio militar. Despues di dos siman den e Prizon Strangeways, mi a ser transferí na Prizon Lewes na costa sur di Inglatera. Cu tempu nos tabata cincu Testigo huntu einan, i nos por a celebrá e Memorial dje morto di Cristo den un cel di prizon.
Un biaha Tata a bin wak mi. Esei mester a pone su orguyo na prueba—un funcionario di prizon bon conocí ta bishitá su yu homber encarcelá! Semper lo mi keda gradicidu cu el a bishitá mi. Por fin mi a haña mi libertad na april 1951.
Ora mi a haña mi libertad na Lewes, mi a coge trein bai Cardiff, Wales, caminda mi tata tabata traha como e funcionario principal n’e prizon. Mi tabata e mayó di e cuater yunan, esta, tres mucha homber i un mucha muher. Mi mester a busca un trabou part time pa mi por a sostené mi mes i tog sigui traha pionero. Mi a bai traha den un pacus di paña, pero mi propósito principal den bida tabata mi ministerio cristian. Rond di e tempu ei, nos mama a bai laga nos. Esei tabata un sla duru pa Tata i pa nos cu tabata muchanan entre 8 pa 19 aña. Lamentablemente nos mayornan a divorciá.
Esun Cu Haña un Bon Esposa . . .
Den e congregacion tabatin vários pionero. Entre nan tabatin un ruman muher cu tur dia tabatin cu bini for di e vaye di Rhondda unda tabatin mina di carbon, p’e bai su trabou seglar i predicá. Su nomber ta Hazel Green—un excelente pionero. Hazel a conocé e berdad hopi aña promé cu mi. Su mayornan tabata
asistí na reunionnan di Studiantenan di Bijbel (awor conocí como Testigonan di Jehova) for di añanan ’20 di siglo 20. Pero laga e mes conta su relato.“Mi no a tuma Bijbel na serio sino te na 1944 ora mi a lesa e foyeto chikitu Religion Ta Cosechá Remolino. Mi mama a motivá mi pa bai e asamblea di circuito na Cardiff. Sin casi nada di conocimentu di Bijbel, mi a haña mi den un centro comercial principal cu un poster cologá na mi garganta cu ta anunciá un discurso público. Maske clero i otro hende a molestiá mi, mi a sobrebibí e experencia. Mi a bautisá na 1946 i a cuminsá traha pionero e aña ei na december. Anto na 1951 un pionero hóben cu a caba di sali for di prizon a presentá na Cardiff. Esei tabata Eric.
Nos a bai predicá huntu. Nos a pas bon cu otro. Nos tabatin e mésun metanan den bida, esta, avansá e interesnan dje Reino di Dios. Nos a casa na december 1952. Maske nos tur dos tabata den e sirbishi di pionero di tempu completo i tabatin un entrada limitá, nunca nos no a falta nada básico. Tin biaha nos tabata ricibí regalo for di un Testigo cu pa casualidad a cumpra muchu djèm of habon huntu cu su comestibelnan, i esaki a sosodé net ora nos tabatin mester di nan! Nos a apreciá gestonan útil manera esakinan mashá. Pero tabatin sorpresa mas grandi ta spera nos.”
Un Sorpresa Cu A Cambia Nos Bida
Na november 1954, ami cu Hazel a ricibí un sorpresa inesperá—un aplicacion for dje oficina di sucursal di Testigonan di Jehova na Londen, pa mi bira un superintendente biahero, bishitando un congregacion diferente tur siman. Nos tabata convencí cu esaki tabata un ekibocacion, p’esei nos no a bisa niun hende den congregacion. Sin embargo, mi a yena e formulario i mand’é bek i nos a keda den expectativa ansioso. Un par di dia despues, e contesta a bin: “Bini Londen pa entrenamentu”!
N’e oficina na Londen, mi no por a kere cu ami, na edad di 23 aña, tabata entre rumannan sobresaliente cu na mi parecer tabata gigantenan spiritual. Nan tabata Pryce Hughes, Emlyn Wynes, Ernie Beavor, Ernie Guiver, Bob Gough, Glynn Parr, Stan cu Martin Woodburn i hopi otro di cua e mayoria a muri. Na añanan ’40 i ’50 di siglo 20, nan a pone un fundeshi sólido di celo i integridad na Gran Bretania.
Trabou di Circuito na Inglatera —Nunca No Tabata Laf
Nos trabou di biahero a cuminsá den e winter di aña 1954/55 cu tabata cargá cu sneu. Nos a ser asigná na Oost Anglia, un área plat di Inglatera cu ta exponé n’e bientunan friu di Noordzee. E tempu ei tabatin 31.000 Testigo so na Gran Bretania. E promé rond di circuito tabata un experencia difícil cu a siña nos hopi; p’e rumannan cu nos a bishitá tampoco e no tabata fácil semper. Debí na mi falta di experencia i tambe mi frankesa di Yorkshire, tabatin bes cu mi a ofendé nan. Atrabes di añanan mi mester a siña cu bondad ta mas importante cu eficiencia i cu hende ta mas importante cu procedura. Ainda mi ta purba sigui Jesus su ehempel di refrescá otronan, pero no ta tur biaha mi ta logra.—Mateo 11:28-30.
Despues di a traha 18 luna na Oost Anglia, nos a haña asignacion pa sirbi den un circuito na nortoost Inglatera, na Newcastle despues na Tyne i Northumberland. Mi a stima e hendenan caluroso di e region bunita aki. E superintendente
di distrito bishitante, Don Ward, di Seattle, Washington, Merca, tabata di gran yudansa pa mi. El a gradua den e di 20 klas di Galad. Como orador mi tabatin e custumber di papia masha purá. El a siña mi baha mi velocidad, tuma pausa i duna instruccion.Un Otro Sorpresa Cu A Cambia Nos Bida
Na 1958 nos a ricibí un carta cu a cambia nos bida. Nos a haña invitacion pa asistí n’e Scol di Galad na South Lansing, New York, Merca. Nos a bende nos auto Austin Seven di aña 1935 i a cumpra nos pasashinan pa bai New York cu boto. Promé nos a asistí na e congreso internacional di Testigonan di Jehova na New York City. Di einan nos a bai Peterborough, Ontario, pa traha pionero pa seis luna promé cu nos a coge rumbo pa Scol di Galad.
Entre e instructornan di scol tabatin Albert Schroeder, cu awor ta un miembro di e Cuerpo Gobernante, i tambe Maxwell Friend i Jack Redford cu a muri despues. E asociacion entre e 82 studiantenan for di 14 pais tabata masha edificante. Nos a cuminsá comprendé un tiki di otro su cultura. Dor di mescla entre e studiantenan stranhero cu tabata lucha cu ingles nos a haña un bista di antemano di e problemanan cu nos lo a enfrentá ora di siña un otro idioma. Den cincu luna nos a completá nos entrenamentu i nos a ser asigná na 27 pais. Despues a bini graduacion, i denter di algun dia nos tabata na New York City sperando riba nos barcu, Queen Elizabeth, pa nos bai Europa bek.
Nos Promé Asignacion den Estranheria
Cua asignacion nos a haña? Portugal! Nos a yega Lisboa na november 1959. Awor a bin e prueba pa adaptá nos mes na un idioma i cultura nobo. Na 1959 tabatin 643 Testigo activo na Portugal, entre un poblacion di casi 9 miyon habitante. Pero nos trabou di predicá no tabata legalmente reconocí. Maske nos tabatin Salonnan di Reino, parti pafó no tabatin borchi cu ta indicá esakinan.
Despues cu ami cu Hazel a siña portugues cerca e misionera Elsa Piccone, nos a bishitá e congregacion i gruponan situá rond di Lisboa, Faro, Evora i Beja. Anto na 1961, cos a cuminsá cambia. Mi tabata studia Bijbel cu un yoncuman cu yama João Gonçalves Mateus. El a dicidí di tuma su posicion como un cristian neutral den e asuntu di servicio militar. Djis despues di esei, mi a ser yamá na e warda di polis principal pa interogacion. Otro sorpresa! Un par di dia despues, nos a haña notificacion cu nos tabatin 30 dia pa bandoná e pais! E mésun cos a sosodé cu nos compañeronan misionero Eric cu Christina Britten i Domenick cu Elsa Piccone.
Mi a haci apelacion pa un audiencia, i nos a haña permit pa bishitá e hefe di polis secreto. El a bisa nos cu palabranan cla i convincente pakico nos a ser pidí pa bai i el a mencioná un nomber: João Gonçalves Mateus, mi studiante di Bijbel! El a bisa nos cu contrario cu Gran Bretania, Portugal no por a permití su mes e luho di cu hende ta oponé algu pa motibu di concenshi. Pues nos mester a bandoná Portugal, i mi a perde contacto cu João. Anto tabata un goso enorme pa, 26 aña despues, topa e cu su casá i tres 1 Corintionan 3:6-9.
yu muher na e dedicacion di e Betel nobo di Portugal. Nos ministerio na Portugal no tabata en bano!—Kico tabata nos siguiente asignacion? Sorpresa! Pais bisiña Spaña. Na februari 1962, cu awa na wowo nos a subi trein na Lisboa i coge rumbo pa Madrid.
Adaptando na un Otro Cultura
Na Spaña nos mester a custumbrá cu e manera clandestino di predicá i tene nos reunionnan. Generalmente ora nos tabata predicá, nunca nos no a yama na dos cas pegá cu otro. Despues di duna testimonio na un porta, nos ta bai den un otro caya, na un otro edificio. Esei a haci cu tabata difícil pa polis of e pastornan gara nos. Corda bon cu nos tabata biba bou di un gobernacion dictatorial facista i católico, i nos trabou di predicá tabata prohibí. Ya cu nos tabata stranhero nos a cuminsá usa nombernan spañó como proteccion pa nan no identificá nos. Mi nomber a bira Pablo, i Hazel a bira Juana.
Despues cu nos tabatin un par di luna na Madrid nos a ser asigná cu e trabou di circuito na Barcelona. Nos a bishitá vários congregacion den e stad, i hopi bes nos a keda dos of tres siman na cada un. E bishitanan a dura hopi pasobra nos mester a bishitá tur grupo di studio di buki mescos cu un congregacion, i normalmente esei a nificá dos grupo pa siman.
Un Desafio Inesperá
Na 1963 nos a haña invitacion pa cuminsá cu e trabou di distrito na Spaña. Pa sirbi casi 3.000 Testigo activo, nos mester a cubri henter e pais, bishitando e nuebe circuitonan cu a existí e tempu ei. Nos a tene algun di nos asambleanan di circuito clandestino di mas memorabel den e selvanan cerca di Seville, na un hacienda cerca di Gijon, i cantu di riunan na Madrid, Barcelona i Logroño.
Como precaucion ora nos ta predicá di cas pa cas, mi tabata wak con e cayanan bisiña tabata core i planea un ruta pa hui si dado caso algu bai robes. Un dia cu ami cu un otro Testigo tabata predicá na Madrid, i nos tabata riba un piso ariba, di ripiente nos a tende gritamentu na e piso abou. Ora nos a baha bai abou, tabatin un grupo di tiener mucha muher, miembro di e grupo católico cu yama Hijas de María (Yu Muhernan di Maria). Nan tabata spierta e bisiñanan contra nos. Nos no por a razoná cu nan, i mi tabata sa cu nos lo mester a bai for di einan lihé of polis lo arestá nos. Pues, nos a hui mesora!
Nos a pasa añanan masha emocionante na Spaña. Einan nos a purba animá rumannan excelente, incluso ministernan pionero special. Nan a core riesgo di bai prizon i hopi bes a wanta adversidad pa por a predicá e bon nobo dje Reino di Dios i pa establecé i edificá congregacionnan.
Durante e periodo aki nos a ricibí mal noticia tambe. Hazel ta splica: “Na 1964 mi mama, un Testigo fiel, a muri. E tabata un sla duru i tristu pa perd’é sin sikiera por a yam’é ayó. Esei ta un dje prijsnan cu e trabou di misionero ta cobra i cu hopi otro ruman tambe mester a paga.”
Por Fin Libertad
Despues di añanan di persecucion, por fin na juli 1970 e gobiernu di Franco a reconocé nos trabou legalmente. E apertura di e Salonnan di Reino—promé na Madrid i esun di dos na Lesseps, Barcelona—a emocioná ami cu Hazel mashá. Semper nan tabatin borchinan grandi cu
hopi bes ta iluminá. Nos tabata kier pa hende sa cu nos tabata legal i t’ei pa keda! N’e tempu ei, na 1972, tabatin casi 17.000 Testigo na Spaña.Rond di e tempu aki, mi a haña masha hopi noticia animador for di Inglatera. Mi tata a bishitá nos na Spaña na 1969. E manera cu e Testigonan na Spaña a trat’é a impresion’é asina tantu, cu ora el a bolbe Inglatera el a cuminsá studia Bijbel. Anto na 1971, nan a bisa mi cu Tata a bautisá! Ora cu nos a bishitá cas tabata un momento masha emocionante ora e, como mi ruman cristian, a haci oracion pa nos come. Mi a spera mas cu 20 aña largu riba e dia ei. Mi ruman homber Bob i su casá Iris a bira Testigo na 1958. Actualmente, nan yu homber Phillip ta sirbi como superintendente di circuito na Spaña huntu cu su casá Jean. Nos ta masha contentu di mira nan sirbi den e pais maraviyoso ei.
Nos Sorpresa di Mas Recien
Na februari 1980, un miembro dje Cuerpo Gobernante a bishitá Spaña como superintendente di zona. Pa mi sorpresa, e kier a traha cu mi den e ministerio. Niun ratu so mi no a pensa cu e tabata inspeccioná mi! Anto na september nos a haña invitacion pa muda bai e sede mundial na Brooklyn, New York! Nos a keda babucá. Nos a aceptá e invitacion maske tabata duru pa bandoná nos rumannan spañó. P’e tempu ei tabatin 48.000 Testigo na Spaña!
Ora nos a despedí, un ruman homber a regalá mi un oloshi. E tabatin dos texto grabá riba dje: “Lucas 16:10; Lucas 17:10.” E di cu nan ta mi textonan principal. Lucas 16:10 ta enfatisá cu nos mester ta fiel den cosnan chikitu; i Lucas 17:10 ta bisa cu nos ta “esclabo cu no ta sirbi pa nada” i p’esei nos no tin motibu pa broma. Semper mi a realisá cu sea loke sea nos haci den e sirbishi di Jehova, esaki ta simplemente nos deber como cristiannan dedicá.
Un Sorpresa Relacioná cu Salú
Na 1990, mi a cuminsá haña problema cu curason. Cu tempu, nan mester a hinca un stent (algu cu forma di un tubu) pa habri un ader cu a cera. Durante e tempu difícil di malesa aki, Hazel a apoyá mi den hopi manera. Hopi bes e tabata carga nos tas i maletanan ya cu ami tabata muchu swak pa haci esaki. Anto na mei 2000 mi a pone un pacemaker. Esta un diferencia esaki a haci!
Atrabes di e último 50 añanan, ami cu Hazel a mira cu Jehova su man no ta corticu i cu su propósitonan ta cumpli na su debido tempu, i no na esun di nos. (Isaías 59:1; Habacuc 2:3) Nos tabatin hopi sorpresa gososo den nos bida i tambe algun tristu, pero Jehova a sostené nos atrabes di nan tur. Aki n’e sede di e pueblo di Jehova nos ta bendicioná p’e echo cu tur dia nos ta den contacto cu miembronan dje Cuerpo Gobernante. Tin biaha mi ta puntra mi mes: ‘Di berdad nos ta aki?’ Esaki ta un bondad inmerecí. (2 Corintionan 12:9) Nos tin confiansa cu Jehova lo sigui protehá nos contra Satanas su mañanan i cu lo e cuida nos pa nos por disfrutá dje dia di su gobernacion hustu riba tera.—Efesionan 6:11-18; Revelacion 21:1-4.
[Plachi na página 26]
Prizon Strangeways na Manchester caminda mi a cuminsá mi castigu di prizon
[Plachi na página 27]
Huntu cu nos Austin Seven den e trabou di circuito na Inglatera
[Plachi na página 28]
Un asamblea clandestino na Cercedilla, Madrid, Spaña, na 1962
[Plachi na página 29]
Nos mesa di literatura pa duna testimonio na Brooklyn