Un Les for di Palma

“UN FIGURA elegante cu un bunitesa único.” Asina un enciclopedia bíblico ta describí palu di dadel. Den tempu bíblico i awe, palunan di dadel ta embeyecé e vaye di Nilo di Egipto, i nan ta percurá pa sombra refrescante rond di oásisnan den e desierto Négueb.

Mescos cu mayoria tipo di palma, esun di dadel tin un postura stret impresionante. Tin di nan ta yega un haltura di 30 meter i ta sigui duna fruta pa 150 aña largu. Sí, e palu di dadel ta masha agradabel pa mira, i sorprendentemente fructífero. Tur aña e ta pari vários troshi di dadel. Na un troshi so por tin mas cu 1.000 dadel. Relacioná cu dadel, un autor a yega di skirbi: “Hende cu . . . a yega di purba solamente dadel secu cu nan ta bende na paki den tienda, casi no por imaginá con dushi nan ta ora bo come nan frescu.”

Ta apropiado anto cu Bijbel ta compará cierto hendenan cu palma. Pa un persona ta agradabel den bista di Dios, mescos cu un palma fructífero, e mester ta moralmente limpi i e tin cu sigui producí bon obra. (Mateo 7:17-20) P’esei, tantu e tempel di Sálomon como e tempel den e vision di Ezekiel tabata decorá parti paden cu figuranan grabá di palma. (1 Reynan 6:29, 32, 35; Ezekiel 40:14-16, 20, 22) Pues, pa un persona su adoracion ta aceptabel pa Dios, e persona mester tin e característicanan deseabel di un palu di dadel. E Palabra di Dios ta splica: “E hustu lo florecé manera un palma.”—Salmo 92:12.