Awa di Bida Ta Core den Ándes

Cerunan Ándes ta pasa meimei di Perú bai abou, partiendo e pais na dos: un region secu cant’i costa parti west i un selva berde i húmedo parti oost. Riba e careda di ceru aki ta biba mas cu un tercera parti di Perú su poblacion di 27 miyon hende. Nan ta biba sea riba plateau haltu i n’e barica di cerunan steil di Ándes of den ravijnnan profundo i vayenan fértil dje sierra ei.

 E TERENO di Ándes yen di baranca ta stroba penetracion fácil di pafó. Como resultado, e miyones di hendenan cu ta biba ei ta un poco isolá. Hopi bes nan no ta sinti ningun efecto di suceso i desaroyonan pafó di nan teritorio.

Cantu dje riunan a forma diferente pueblito pa haña e awa tan necesario pa cultivo di mata i pa tou di lama, alpaka, vicuña (famia di lama) i carné. Sin embargo, tin un otro tipo di awa vital cu ta core den Ándes: awa spiritual refrescante cu ta bini di Jehova, “e fuente di awa bibu.” (Jeremías 2:13) Dios ta usa su Testigonan pa yuda hende di e pueblitonan cu ta biba na haltu den Ándes gana conocimentu exacto tocante dje i su propósitonan.—Isaías 12:3; Juan 17:3.

Siendo cu e boluntad di Dios ta pa “tur clase di hende ser salbá i yega na un conocimentu exacto dje berdad,” e ministernan aki ta haci hopi esfuerso pa hiba e mensahe di bida cu tin den Bijbel na comunidadnan difícil pa alcansá. (1 Timoteo 2:4) E mensahe bíblico aki ta iluminador i noble. El a libra hende local di curason onrado for di supersticion, i for di custumber i ideanan cu a tene nan den gara di miedu di morto, miedu di mal spiritu i dje forsanan di naturalesa. Mas importante ainda, e mensahe aki ta duna nan e speransa glorioso di bida sin fin den un paradijs riba tera.

E Esfuerso Cu Nan Ta Haci

E predicadónan di Reino cu ta bishitá e regionnan remoto aki tin cu haci hopi ahuste. Pa alcansá curason dje hendenan, esnan cu ta siña otro hende di Bijbel mester tin algun conocimentu di quechua of aymara, e dos idiomanan local.

No ta fácil pa alcansá e pueblitonan den Ándes. Ta masha poco spoorban di trein ta yega te den e regionnan ei. Medionan di transporte ta iregular i ta ser influenciá dor di mal weer i tereno inusual. Anto ta con e Testigonan ta alcansá e hendenan pa hiba e mensahe di Reino pa nan?

Cu curashi predicadónan dje bon nobo a aceptá e tarea difícil i a respondé cu e mésun spiritu di profeta Isaías: “At’ami akí! Manda mi.” (Isaías 6:8) Nan a usa tres caravan pa biaha bai e áreanan nort, central i sur. Yen di celo i ekipá cu bastante caha di Bijbel i literatura bíblico, e pioneronan, esta ministernan di tempu completo, a sembra simia dje berdad di Bijbel entre e pueblonan amigabel, hospitalario i di curason onrado cu ta biba einan.

Foral e bogtnan dje camindanan den ceru ta peligroso. Pa por pasa algun dje bogtnan ei cu ta zigzag, vehículonan mester bai dilanti bin patras. Durante un maniobra asina, un misionero cu tabata sintá riba e stul patras den un bus a wak pafó di bentana i a ripará cu un dje wielnan patras tabata net na rand di un abismo di mas cu 190 meter! El a cera su wowonan te ora e bus a hala dilanti.

Algun dje cayanan ta den mal estado i ta masha smal. Pasando un tereno malu asina, un dje caravannan cu tabata bahando un caya smal a topa un truck ta bini ariba. E caravan mester a bek subi yega un lugá caminda e dos vehículonan por a pasa net banda di otro.

No obstante, e resultadonan di tal esfuerso persistente tabata sobresaliente. Lo bo kier haña sa mas dje esfuersonan ei?

“Hibando Awa” na Lago Titicaca

Lago Titicaca ta den un conchi di Cerunan Ándes na un haltura di 3.800 meter riba nivel di laman. E ta e masa di awa mas haltu na mundu situá den interior di un pais, riba cua boto ta nabegá. Mayoria dje 25 riunan cu ta caba den Titicaca ta originá den top dje cerunan cubrí cu sneu, di cua algun ta mas cu 6.400 meter haltu. Debí n’e haltura, e clima ta friu, i hende cu no a nace den e área ei ta bira malu dor dje haltura.

Algun tempu pasá, un grupo di pionero cu ta  papia quechua i aymara a haci un biahe p’e islanan Amantani i Taquile riba lago Titicaca. Nan a bai cu un presentacion di ‘slide’ titulá “Un Bista Mas Djacerca di Iglesianan,” un análisis franco dje falsedadnan di cristiandad. Esaki a haña un bon acohida. Un cierto homber a ricibí e rumannan hospitalariamente i a ofrecé un lugá espacioso den su cas caminda nan por a keda i siña hende Bijbel.

E promé reunion na Amantani a hala 100 hende; n’e reunion na Taquile tabatin 140 persona presente. E presentacion tabata na quechua. Un pareha cu ántes tabata biba riba tera firme a bisa: “Ya tabata tempu pa boso Testigonan di Jehova corda riba nos. Nos a resa pidi pa boso bini.”

Ademas dje dos islanan mas grandi aki, algun dje mas o ménos 40 islanan “flotante” den lago Titicaca tambe a ser alcansá cu e bon nobo. Islanan flotante? Sí, esakinan ta trahá di totora, esta, richi cu ta crece den algun parti plat dje lago. Totora ta crece bou di awa i sali riba superficie. Pa forma un isla, e hendenan local ta dobla e richinan, cu nan rais ainda den fondo dje lago, i ta flegtu nan den otro pa forma manera un plataforma. Despues nan ta yena e plataforma cu lodo i refors’é cu mas richi cortá. Riba esaki nan ta traha casita di richi pa biba aden.

Testigonan di Jehova a busca un boto pa predicá na hende riba e islanan di lago Titicaca. E boto tin capacidad pa carga 16 hende. Despues cu nan mara n’e islanan flotante, e Testigonan ta cana riba e plataforma di richi di un casita pa otro. Nan ta bisa cu normalmente nan ta sinti e suela bou di nan pia move levemente. Esaki no ta lugá pa hende cu ta marea fácil!

Pa loke ta e poblacion cu ta papia aymara, nan ta habitá e numeroso comunidad i pueblitonan cant’i costa dje lago i riba e penínsulanan cu ta extendé den e lago. Ta mas fácil pa yega esakinan via boto cu via tera. Na tur, segun cálculonan tin casi 400.000 hende ta biba den e region cu ta haña e mensahe di Reino via e botonan ei. Lo tin trabou p’e botonan pa basta un par di tempu mas.

Calmando Sed Spiritual

Flavio tabata biba den e pueblo di Santa Lucía, pegá cu Juliaca, den Ándes. Den su Iglesia Evangélico, nan a siñ’é e doctrina di fiernu di candela. Pa añanan largu el a biba den temor di tal castigu di candela eterno. Hopi bes el a puntra su mes con un Dios di amor lo por torturá hende den candela pa tempu indefiní. Ora Tito, un minister di tempu completo di Testigonan di Jehova, a bishitá e pueblo ei, el pasa cerca Flavio.

Un dje promé preguntanan cu Flavio a hacié tabata: “Boso religion ta siña cu hende ta ser tormentá den fiernu di candela?” Tito a contestá cu un idea asina ta repugnante p’e Creador i ta trece reproche riba e nomber di Jehova, e Dios di amor. Usando Flavio su mes version di Bijbel, Tito a mustr’é cu e mortonan no ta conciente di nada i cu nan ta warda riba un resureccion terenal bou dje Reino di Dios. (Eclesiástes 9:5; Juan 5:28, 29) Flavio a keda babucá. Mesora el a aceptá un studio di Bijbel i pronto el a bira un cristian bautisá.

Un Pueblo Gradicidu

Imaginá bo ki emocionante ta pa trece e Scritura cerca habitante di pueblo cu nunca promé a yega di mira un ehemplar di Bijbel of pa predicá den pueblonan caminda hende nunca a yega di tende di Testigonan di Jehova of dje bon nobo cu nan ta predicá! Esei tabata e experencia di tres ruman muher pionero—Rosa, Alicia i Cecilia—kendenan a predicá den e pueblonan di Izcuchaca i Conayca, situá na un haltura di mas cu 3.600 meter den e parti central di Perú.

 Ora nan a yega e promé pueblo, nan no tabatin caminda di keda. Nan a papia cu e comandante local di polis i splik’é e motibu di nan bishita. Kico tabata e resultado? El a laga nan pasa anochi den e warda di polis. Su siguiente dia, e pioneronan por a haña cuartonan mas permanente cu a bira e centro di nan actividadnan.

Pronto a yega e tempu pa Memorial, e conmemoracion anual dje morto di Cristo. E pioneronan a bishitá tur e casnan den e pueblo di Izcuchaca, a laga hopi Bijbel i a cuminsá un cantidad di studio di Bijbel. Promé cu Memorial, nan a manda invitacionnan p’e evento aki, splicando e propósito dje celebracion i e nificacion dje emblemanan cu ta ser usá durante e conmemoracion. Nan a invitá un grupo di ruman homber pa bin yuda cu e ocasion i un di nan a duna e discurso. Tabata un goso pa mira 50 persona dje pueblo chikitu ei presente n’e evento special aki! Pa promé bes, nan por a comprendé kico e Cena di Señor ta nificá realmente. Tambe, ki precioso tabata pa nan di por tin e Palabra di Dios den nan man!

Alivio for di Carga Pisá

Semper ta un goso pa trece e awa refrescante dje berdad di Bijbel na hende cu ta ser dominá dor di religion falsu. Pisac tabata un lugá fortificá dje Imperio Inca di antigwedad. Awe, mayoria hende cu ta biba ei a ser siñá e doctrina no-bíblico di fiernu di candela. Nan pastornan ta bisa nan cu nan por yega shelu solamente ora pastor intermediá pa nan.

Ta di comprendé cu hende asina tin sed di e awa refrescante dje berdad di Bijbel. Ora Santiago, un minister di tempu completo di Testigonan di Jehova, tabata predicá di cas pa cas, el a haña oportunidad pa splica un homber cu hende hustu ta destiná pa biba den un paradijs riba tera. (Salmo 37:11) Santiago a mustr’é for di Bijbel cu e mortonan lo ser resucitá i cu humanidad lo ser instruí den e camindanan perfecto di Jehova cu mira riba bida eterno. (Isaías 11:9) Te cu e tempu ei, e homber ei tabata un católico deboto, a mete cu spiritismo, i tabata bebe pisá. Awor el a haña un speransa basá riba Bijbel i un meta den bida: biba den Paradijs. El a kima tur su pertenencianan spiritista i a stop di bebe pa loco. El a reuní su famia i a aceptá un studio di Bijbel. Cu tempu, henter e famia ei a dedicá nan mes na Jehova Dios i a bautisá.

Un Pueblo Hospitalario

E hendenan cu ta biba den ceru ta masha hospitalario. Aunke nan casnan ta humilde i nan ta di poco recurso, nan ta ofrecé bishitante loke nan tin. Promé cu un anfitrion siña dje normanan haltu di Bijbel, kisas e ta ofrecé un bishitante blachi di coca pa kou miéntras nan ta combersá. Pero ora e bira un Testigo, kisas e ta ofrecé un cuchara di sucu, cu den e provincianan isolá tin mésun balor cu blachi di coca.

Un ruman homber a pidi un misionero compañ’é bai un rebishita. Despues cu nan a subi un caminda steil den ceru cu hopi dificultad, nan a bati man pa anunciá e doño di cas cu nan a yega. Esaki a invitá nan pa drenta e cas cu dak di cabana. Nan tabatin cu bùk pasa dor dje entrada abou. Cu cuidou nan a cana pasa rond dje parti meimei dje flur di tera, caminda e mama a coba un buracu, pusha un klechi den dje, i pone su baby aden. Sin cu e por a sali afó, e baby aki tabata saca su zonidonan contentu di dje, miéntras hende grandi tabata papia. Despues cu nan tabatin un combersacion animá tocante e bendicionnan dje Reino, e muher a saca un botter grandi dje bebida local. Djis despues e rumannan a baha bek a lo largu dje barica di ceru pa bishitá mas hende.

Un Cosecha Abundante

Actualmente den e region aki tin rond di shen grupo isolá cu mas di mil persona studiando Bijbel cu Testigonan di Jehova. Graduadonan dje Scol di Entrenamentu Ministerial na Lima ta ser mandá aya pa yuda combertí e gruponan ei den congregacion. Personanan di curason onrado cu pa hopi tempu a ser dominá dor di religion falsu i supersticion a haña libertad atrabes dje bon nobo di Reino! (Juan 8:32) Nan sed pa haña awa dje berdad a ser satisfacé.

[Plachi na página 10]

Dunando testimonio riba e islanan “flotante” di lago Titicaca