Ken Lo Separá Nos for dje Amor di Dios?

“En cuanto nos, nos ta stima, pasobra el a stima nos promé.”—1 JUAN 4:19.

1, 2. (a) Pakico ta importante pa sa cu nos ta un persona stimá? (b) Ken su amor nos tin mas mester di dje?

KI IMPORTANTE ta pa bo sa cu bo ta un persona stimá? Tantu chikitu como grandi ta bona ora otro hende ta mustra amor na nan. Bo a yega di mira con un mama ta tene su baby dushi asina den su brasanan? Hopi bes, sin importá kico ta pasa rond dje chikitin, ora e ta wak e sonrisa riba cara di su mama, e ta sinti su mes cómodo, trankil den e brasanan di un mama cu ta stim’é. Of bo ta corda con bo tabata durante e añanan di bo adolesencia? Añanan cu tin bes tabata turbulento. (1 Tesalonicensenan 2:7) Algun biaha lo bo no tabata sa mes kico bo tabata kier ni con bo a sinti. No obstante, tabata importante pa bo sa cu bo tata i bo mama a stima bo! No tabata probechoso pa sa cu bo por a acercá nan cu cualkier problema of pregunta? Realmente, durante henter nos bida, un di nos mayor necesidadnan ta di ser un persona stimá. Tal amor ta sigurá nos cu nos tin balor.

² E amor duradero di bo mayornan sigur ta contribuí na bon desaroyo i ekilibrio. Pero, e confiansa cu nos Tata celestial Jehova ta stima nos ta muchu mas crucial pa nos bienestar spiritual i emocional. Kisas algun lector dje revista aki no tabatin mayor cu a ègt interesá den nan. Si esei ta e caso cu bo, cobra ánimo. Asta si bo no a ricibí amor di bo mayornan, of si e tabata insuficiente, e amor leal di Dios ta compensá esei.

3. Con Jehova a garantisá su pueblo di su amor pa nan?

³ Pa medio di su profeta Isaías, Jehova a mustra cu un mama lo por “lubidá” su criatura na pechu, pero cu é si lo no lubidá su pueblo. (Isaías 49:15) Di igual manera, David a bisa cu confiansa: “Den caso cu mi mes tata i mi mes mama bandoná mi, asta Jehova mes lo ricibí mi.” (Salmo 27:10) Bunita consuelo! Sea cual sea bo circunstancianan, si bo a drenta den un relacion cu Jehova Dios como un persona dedicá na dje, bo mester corda semper cu e amor cu e tin pa bo ta hopi mas grandi cu esun di cualkier ser humano!

Mantené Bo Mes den e Amor di Dios

4. Con Dios a sigurá e cristiannan di promé siglo di su amor?

⁴ Na ki tempu bo a siña conocé e amor di Jehova? Probablemente, bo experencia tabata casi mescos cu esun dje cristiannan di promé siglo. Capítulo 5 di Pablo su carta n’e romanonan ta describí masha bunita con hende pecadó, cu un tempu tabata alehá for di Dios, a bin conocé Jehova su amor. Nos ta lesa den versículo 5: “E amor di Dios a ser dramá den nos curason mediante e spiritu santu, cu a ser duná na nos.” Den versículo 8, Pablo ta agregá: “Dios ta recomendá su mes amor na nos den e echo cu, miéntras nos tabata pecadó ainda, Cristo a muri pa nos.”

5. Con bo a yega na comprendé i apreciá e magnitud dje amor di Dios?

⁵ Di igual manera, ora e berdad dje Palabra di Dios a ser presentá na bo i bo a cuminsá ehercé fe, Jehova su spiritu santu a cuminsá obra den bo curason. Den e manera aki bo a cuminsá comprendé i apreciá e magnitud di loke Jehova a haci ora el a manda su Yu stimá bin muri pa bo. Asina Jehova a yuda bo mira ègt cuantu e ta stima humanidad. Ora bo a realisá cu, aunke bo a nace como pecadó alehá for di Jehova, el a habri e caminda pa hende ser declará hustu cu e speransa di biba pa semper, esei no a  conmové bo curason? Bo no a sinti un amor pa Jehova?—Romanonan 5:10.

6. Pakico tin bes nos por sinti nos un poco distanciá for di Jehova?

⁶ Despues cu e amor di bo Tata celestial a atraé bo i despues cu bo a ahustá bo bida pa ser aceptabel den su bista, bo a dedicá bo bida na Dios. Awor bo ta disfrutá di pas cu Dios. Apesar di esei, bo sa sinti bo de bes en cuando un poco alehá for di Jehova? Esei por sosodé cu cualkier un di nos. Pero semper corda cu Dios no ta cambia. Su amor ta mes constante i invariabel cu solo, cu nunca ta stop di manda su rayonan di lus cayente na tera. (Malakías 3:6; Santiago 1:17) Di otro banda, nos sí por cambia—maske ta temporalmente. Segun cu tera ta bira, mitar dje planeta ta bai sconde den scuridad. Mescos tambe, si nos alehá for di Dios, asta na un grado limitá, nos relacion cuné por fria un tiki. Kico nos por haci pa corigí e situacion ei?

7. Con examinacion personal por yuda nos permanecé den e amor di Dios?

⁷ Ora nos sinti nos un poco separá for dje amor di Dios, nos mester puntra nos mes: ‘Mi ta mira Dios su amor como algu comun? Mi a alehá gradualmente un poco for dje Dios bibu i amoroso, mustrando den vários manera cu mi fe a bira débil? Mi a fiha mi mente riba “e cosnan di carni,” en bes di riba “e cosnan di spiritu”?’ (Romanonan 8:5-8; Hebreonan 3:12) Si nos a distanciá nos mes for di Jehova, nos por dal paso pa corigí esei, i bolbe bek na un relacion estrecho i caluroso cuné. Santiago ta urgi nos: “Hala cerca Dios, i lo e hala cerca boso.” (Santiago 4:8) Tuma na pechu e palabranan di Hudas: “Stimánan, dor di edificá boso mes riba boso santísimo fe, i haci oracion cu spiritu santu, mantené boso den e amor di Dios.”—Hudas 20, 21.

Cambio den Circunstancia No Ta Afectá e Amor di Dios

8. Ki cambionan por sosodé di ripiente den nos bida?

⁸ Nos bida den e sistema di cosnan aki ta sometí na hopi cambio. Rey Sálomon a remarcá cu “tempu i suceso imprevisto ta cai riba [nos] tur.” (Eclesiástes 9:11) Di un dia pa otro nos bida por cambia completamente. Un dia nos tin bon salú, e siguiente dia nos por ta hopi  malu. Un dia nos trabou seglar ta parce stabil, e siguiente dia nos ta sin trabou. Sin ningun aviso, un ser kerí por muri di ripiente. Den un cierto pais cristiannan por ta gosando di condicionnan pacífico pa algun tempu, pa despues, di ripiente persecucion violento dal aden. Podisé nos ta ser acusá falsamente, i pa motibu di esaki, nos ta sufri algun inhusticia. Sí, bida no ta stabil ni completamente liber di insiguridad.—Santiago 4:13-15.

9. Pakico lo ta bon pa considerá un parti di Romanonan capítulo 8?

⁹ Ora cosnan tristu sosodé cu nos, nos por cuminsá sinti nos mes bandoná, asta imaginando cu e amor cu Dios tin pa nos a mengua. Dor cu cosnan asina por sosodé cu nos tur, nos ta haci bon di considerá cuidadosamente e palabranan di gran consuelo cu apostel Pablo a skirbi na Romanonan capítulo 8. E palabranan ei a ser dirigí na cristiannan ungí cu spiritu. Pero, en principio nan ta aplicá tambe n’e otro carnénan cu a ser declará hustu como amigu di Dios, mescos cu Abraham den tempu pre-cristian.—Romanonan 4:20-22; Santiago 2:21-23.

10, 11. (a) Ki acusacionnan enemigunan sa lansa tin biaha contra e pueblo di Dios? (b) Pakico e acusacionnan ei no ta ègt importá cristiannan mashá?

¹⁰ Lesa Romanonan 8:31-34. Pablo ta puntra: “Si Dios ta pa nos, ken lo ta contra nos?” Ta cierto cu Satanas i su mundu malbado ta contra nos. Enemigunan por acusá nos falsamente, asta den e cortenan di pais. Algun mayor cristian a ser acusá di ta odia nan yunan dor di no permití nan aceptá proceduranan médico cu ta violá e ley di Dios of dor di no laga nan participá den celebracionnan pagano. (Echonan 15:28, 29; 2 Corintionan 6:14-16) Otro cristian fiel a ser acusá falsamente di ta instigá rebelion contra gobiernu pasobra nan no ta mata nan próhimo den guera ni participá den política. (Juan 17:16) Algun opositor a plama mentira difamatorio den medionan di comunicacion, asta acusando Testigonan di Jehova falsamente di ta un secta peligroso.

¹¹ Pero no lubidá cu den tempu dje apostelnan, hende a bisa: “Pa loke ta e secta aki, ta conocí pa nos cu tur caminda hende ta papia contra dje.” (Echonan 28:22) Acusacionnan falsu ta cos di preocupá cuné? Ta Dios ta declará cristiannan berdadero hustu, basá riba nan fe den e sacrificio di Cristo. Pakico Jehova lo stop di stima su adoradónan despues cu el a duna nan e regalo mas precioso cu e por a duna, esta, su mes Yu stimá? (1 Juan 4:10) Awor cu Cristo a ser lantá for di morto i a ser poné na man drechi di Dios, e ta sali activamente na defensa di cristiannan. Ken por tin un base pa refutá e defensa di Cristo na fabor di su siguidónan of cuestioná e manera faborabel cu Dios ta evaluá su fiel adoradónan? Niun hende!—Isaías 50:8, 9; Hebreonan 4:15, 16.

12, 13. (a) Ki condicion of circunstancianan no por separá nos for dje amor di Dios? (b) Kico Diabel kier logra dor di causa dificultad pa nos? (c) Pakico cristiannan ta sali completamente victorioso?

¹² Lesa Romanonan 8:35-37. Ademas di nos mes, tin un hende of un cos cu por separá nos for dje amor di Jehova i di su Yu, Cristo Jesus? Satanas lo por usa su agentenan terenal pa hinca cristiannan den hopi problema. Durante siglo 20, hopi di nos rumannan cristian tabata obheto di persecucion violento den hopi pais. Awe, den algun lugá, nos rumannan tur dia ta enfrentá problemanan económico. Algun ta sinti e dolor di hamber of falta di suficiente paña. Kico Diabel kier logra dor di causa tur e condicionnan angustioso aki? Su propósito ta pa por lo ménos en parte, desanimá nos di rindi adoracion berdadero na Jehova. Satanas kier pone nos kere cu e amor di Dios a fria. Pero esei ta e caso?

¹³ Mescos cu Pablo, kende a cita Salmo 44:22, nos a studia e Palabra skirbí di Dios. Nos ta comprendé cu ta pa causa dje nomber di Dios e cosnan aki ta sosodé cu nos, su ‘carnénan.’ E santificacion dje nomber di Dios i e vindicacion di su soberania universal ta den wega. Ta dor dje cuestionnan principal ei Dios a permití  prueba bini riba nos, no pasobra e no ta stima nos mas. Sea cual sea e circunstancia angustioso, Dios ta sigurá nos cu e amor cu e tin pa su pueblo, incluso pa cada un di nos, no a cambia. Cualkier aparente derota cu nos lo por sufri lo resultá den un victoria si nos mantené nos integridad. E garantia dje amor inkebrantabel di Dios ta fortalecé nos i ta sostené nos.

14. Pakico Pablo tabata convencí dje amor di Dios apesar di e contratempunan cu cristiannan por sufri?

¹⁴ Lesa Romanonan 8:38 i 39. Kico a convencé Pablo cu nada lo por separá cristiannan for dje amor di Dios? Sin duda Pablo su experencianan personal den e ministerio a reforsá su conviccion cu contratempu no por afectá e amor cu Dios tin pa nos. (2 Corintionan 11:23-27; Filipensenan 4:13) Tambe, Pablo a conocé Jehova su propósito eterno i e manera cu el a trata Su pueblo den pasado. Morto lo por conkistá e amor cu Dios tin pa esnan cu a sirbié lealmente? Di ningun manera! Tal personanan fiel cu ta muri lo sigui biba den e memoria perfecto di Dios, i lo e resucitá nan na su debido tempu.—Lucas 20:37, 38; 1 Corintionan 15:22-26.

15, 16. Relatá algun dje cosnan cu hamas i nunca por pone Dios stop di stima su fiel sirbidónan.

¹⁵ Maske ki desgracia toca na nos porta awe—sea un accidente cu ta manca nos, un enfermedad fatal of un calamidad económico—nada por destruí e amor cu Dios tin pa su pueblo. Angelnan poderoso, manera e angel desobediente cu a bira Satanas, no por influenciá Jehova pa stop di stima su sirbidónan deboto. (Job 2:3) Gobiernunan por prohibí, encarcelá i maltratá sirbidónan di Dios i podisé catalogá nan como “persona non grata.” (1 Corintionan 4:13) Tal odio inhustificá di parti dje nacionnan por pone preshon riba hende pa bai contra nos, pero esei no ta influenciá e Soberano di universo p’e bandoná nos.

¹⁶ Como cristian, nos no tin nodi tene miedu cu algun dje cosnan cu Pablo a yama “cosnan aki awor”—e sucesonan, condicionnan i situacionnan den e sistema di cosnan actual—ni “cosnan pa bini” den futuro por kibra e cariño cu Dios tin pa su pueblo. Aunke podernan terenal i celestial ta bringa contra nos, Dios su amor leal t’ei pa sostené nos. Manera Pablo a enfatisá, ni “haltura ni profundidad” ta stroba e amor di Dios. Sí, nada cu por tin tendencia di desanimá nos, ni nada cu por tin tendencia di ehercé un influencia superior riba nos, por separá nos dje amor di Dios; ni ningun otro creacion por kibra e relacion cu e Creador tin cu su fiel sirbidónan. E amor di Dios no ta faya nunca; e ta eterno.—1 Corintionan 13:8.

Atesorá Dios Su Bondad Amoroso pa Semper

17. (a) Pakico poseé e amor di Dios ta “mihó cu bida”? (b) Con nos ta demostrá cu nos ta atesorá Dios su bondad amoroso?

¹⁷ Con importante e amor di Dios ta pa bo? Bo ta pensa mescos cu David, cu a skirbi: “Pasobra bo bondad amoroso ta mihó cu bida, mi propio lipnan lo encomendá bo. Asina lo mi bendicioná bo durante mi bida; den bo  nomber lo mi hisa mi plant’i mannan”? (Salmo 63:3, 4) Realmente, tin algu cu bida den e mundu aki por ofrecé cu ta mihó cu disfrutá di Dios su amor i amistad leal? Por ehempel, un carera seglar lucrativo ta mihó cu e pas mental i felicidad cu un relacion estrecho cu Dios ta trece cuné? (Lucas 12:15) Tin cristian cu a haña nan confrontá cu e decision di sea bira lomba pa Jehova of enfrentá morto. Esei a sosodé cu hopi Testigo di Jehova den campo di concentracion nazi durante Segundo Guera Mundial. Cu masha poco excepcion, nos rumannan cristian a scoge pa permanecé den e amor di Dios, dispuesto pa enfrentá morto si ta necesario. Esnan cu ta permanecé lealmente den su amor por ta sigur di ricibí for di Dios un futuro eterno, algu cu mundu no por duna nos. (Marco 8:34-36) Pero e asuntu ta bai asta mas leu cu bida eterno.

18. Pakico bida eterno ta asina deseabel?

¹⁸ Aunke no ta posibel pa biba pa semper sin Jehova, purba imaginá kico un bida largísimo lo ta sin nos Creador. Lo e ta bashí, sin berdadero propósito. Jehova a duna su pueblo trabou satisfaciente pa haci den e último dianan aki. Pues anto, nos por tin e confiansa cu ora Jehova, e Gran Dios cu ta cumpli cu su propósito, duna bida eterno, lo tin yen di cos fasinante cu ta bale la pena pa nos siña i haci. (Eclesiástes 3:11) Pa cuantu cu nos explorá den e futuro milenionan, hamas nos lo caba di midi “e profundidad dje rikesa i sabiduria i conocimentu di Dios.”—Romanonan 11:33.

E Tata Tin Cariño pa Bo

19. Cu ki palabranan di despedida Jesucristo a trankilisá su disipelnan?

¹⁹ Dia 14 di Nísan di aña 33 E.C., durante su último anochi cu su 11 fiel apostelnan, Jesus a bisa hopi cos pa fortalecé nan pa loke a spera nan. Nan tur a keda huntu cu Jesus ora el a pasa den su pruebanan, i nan a sinti personalmente e amor cu e tabatin pa nan. (Lucas 22:28, 30; Juan 1:16; 13:1) Anto Jesus a sigurá nan: “E Tata mes tin cariño pa boso.” (Juan 16:27) E palabranan ei lo mester a yuda e disipelnan realisá ki un sintimentu tierno nan Tata celestial tabatin pa nan!

20. Kico bo ta determiná pa haci, i den kico bo por tin confiansa?

²⁰ Hopi hende cu ta na bida awor aki a sirbi Jehova fielmente pa décadanan. Sin duda, promé cu e fin dje mal sistema di cosnan aki yega, nos lo enfrentá hopi prueba mas. Nunca laga e prueba of contratempunan ei pone bo duda di e amor leal cu Dios tin pa bo. Nunca ta di mas pa bisa cu Jehova tin cariño pa bo. (Santiago 5:11) Laga cada un di nos sigui haci nos parti, cumpliendo cu e mandamentunan di Dios lealmente. (Juan 15:8-10) Laga nos probechá di tur oportunidad pa alabá su nomber. Nos mester fortalecé nos determinacion pa sigui hala mas cerca Jehova den oracion i studia su Palabra. Sin importá kico mañan por trece, si nos ta haciendo nos best pa agradá Jehova, nos lo keda na pas, completamente sigur di su amor infalibel.—2 Pedro 3:14.

Con Lo Bo Contestá?

• Pa nos mantené nos ekilibrio spiritual i emocional, foral ken su amor nos tin mester di dje?

• Ki cosnan hamas i nunca lo por pone Jehova stop di stima su sirbidónan?

• Pakico e amor cu Jehova ta mustra na nos ta “mihó cu bida”?

[Preguntanan di Estudio]

[Plachinan na página 13]

Si nos ta sinti cu nos a separá for dje amor di Dios, nos por dal paso pa corigí esei

[Plachi na página 15]

Pablo a comprendé pakico el a ser persiguí