Protehá Bo Curason

“Mas cu tur cos cu tin cu ser vigilá, protehá bo curason, pasobra for di dje ta e fuentenan di bida.”—PROVERBIONAN 4:23.

1, 2. Di con nos tin cu protehá nos curason?

UN HOMBER bieu riba un isla caribeño a sali for di su lugá di sconde despues cu un horcan a pasa. Ora el a bira wak e daño rond di dje, el a realisá cu un palu masivo cu tabata pará pa hopi aña pegá cu su porta di curá a disparcé. ‘Con por ta,’ el a puntra su mes, ‘siendo cu palunan mas chikitu den becindario sí a keda pará?’ Ora el a wak e troncon dje palu cu a cai, el a haña sa e motibu. E palu aparentemente inmovibel tabata tur putrí paden, i e tormento a djis saca e parti putrí ei na cla.

² Ta ki un tragedia ora un adoradó berdadero cu ta parce di ta firmemente establecí den e curso di bida cristian sucumbí ora su fe ser poné na prueba. Bijbel ta bisa corectamente cu “e inclinacion di curason di hende ta malu for di su hubentud.” (Génesis 8:21) Esaki ta nificá cu sin vigilancia constante, asta un bon curason por ser tentá pa haci loke ta malu. Siendo cu ningun curason humano imperfecto ta immuun pa corupcion, nos tin cu tuma e siguiente conseho na serio: “Mas cu tur cos cu tin cu ser vigilá, protehá bo curason.” (Proverbionan 4:23) Awor, con nos por protehá nos curason figurativo?

Chekup Regular Ta Indispensabel

3, 4. (a) Ki preguntanan por ser hací relacioná cu un curason literal? (b) Kico lo yuda nos examiná nos curason figurativo?

³ Ora bo bai un dokter pa un chekup físico, probablemente lo e examiná bo curason. Bo condicion di salú general, incluso bo curason, ta indicá cu bo ta hañando suficiente nutricion? Con ta cu bo preshon? Bo curason ta bati regular i duru? Bo ta haci suficiente ehercicio? Bo curason ta bou di muchu stres?

⁴ Si bo curason literal tin mester di chekup regular, kico di bo curason figurativo? Jehova ta examin’é. (1 Crónicanan 29:17) Nos tambe mester examin’é. Con? Dor di haci pregunta manera: Mi curason ta haña suficiente alimento spiritual mediante studio personal i asistencia na reunion? (Salmo 1:1, 2; Hebreonan 10:24, 25) E mensahe di Jehova ta pegá na mi curason manera “un candela ardiente cerá den mi wesunan,” impulsando mi pa participá den e trabou di predicá e Reino i haci disipel? (Jeremías 20:9; Mateo 28:19, 20; Romanonan 1:15, 16) Mi ta sinti mi impulsá pa haci esfuerso vigoroso, pa participá den algun rasgo dje ministerio di tempu completo ora ta posibel? (Lucas 13:24) Na ki clase di ambiente mi ta exponiendo mi curason figurativo? Mi ta busca asociacion cu hende kende nan curason ta uní den adoracion berdadero? (Proverbionan 13:20; 1 Corintionan 15:33) Laga nos ta lihé pa tuma nota di cualkier deficiencia i dal pasonan corectivo mesora.

5. Ki propósito útil situacionnan cu ta pone nos fe na prueba por tin?

⁵ Hopi bes nos ta haña nos cu situacionnan cu ta pone nos fe na prueba. Esakinan ta duna nos oportunidad pa tuma nota dje condicion di nos curason. Moises a bisa e israelitanan cu tabata a punto di drenta e Tera Primintí: “Jehova bo Dios a pone bo cana e cuarenta añanan aki den desierto, pa haci bo humilde, pa pone bo na prueba p’e sa kico tabatin den bo curason, si lo bo a warda su mandamentunan of no.” (Deuteronomio 8:2) Nos no sa keda sorprendí hopi bes cu sintimentu, deseo  of reaccionnan cu ta sali na cla ora nos ta enfrentá situacionnan of tentacionnan inesperá? E pruebanan cu Jehova ta permití tuma lugá sigur por haci nos conciente di nos debilidadnan, dunando nos un oportunidad pa mehorá. (Santiago 1:2-4) Laga nos nunca keda sin refleccioná huntu cu oracion riba e manera cu nos a reaccioná riba prueba!

Kico Nos Palabranan Ta Revelá?

6. Kico e tópiconan cu nos gusta papia di dje ta revelá tocante nos curason?

⁶ Con nos por determiná kico nos a atesorá den nos curason? Jesus a bisa: “Un bon hende ta producí loke ta bon for dje bon tesoro di su curason, pero un mal hende ta producí loke ta malu for di su mal tesoro; pasobra for di abundancia di curason su boca ta papia.” (Lucas 6:45) Loke nos generalmente ta papia di dje ta un bon indicacion di loke nos curason ta determiná pa haci. Nos ta papia hopi bes tocante cosnan material i logronan seglar? Of nos combersacionnan frecuentemente ta drei rond di cosnan spiritual i metanan teocrático? En bes di cana papia tocante erornan di otro hende, nos ta incliná amorosamente pa tapa nan? (Proverbionan 10:11, 12) Nos tin tendencia di papia hopi riba hende i di loke ta pasa den nan bida pero masha poco tocante principio i cosnan spiritual? Esaki no por ta un señal cu nos ta mustrando muchu interes den asuntu di otro hende?—1 Pedro 4:15.

7. Ki les tocante protehá nos curason nos por siña for dje relato tocante e dies rumannan di Josef?

⁷ Pensa riba loke a sosodé den un cierto famia grandi. Jacob su dies yunan mayor “no por a papia pacíficamente” cu nan ruman menor Josef. Pakico? Nan tabata yalurs pasobra e tabata e pret’i wowo di nan tata. Mas despues, ora Dios a bendicioná Josef cu soñonan, mustrando cu e tabatin e aprobacion di Jehova, nan a haña “mas motibu pa odi’é.” (Génesis 37:4, 5, 11) Cruelmente, nan a bende nan ruman como catibu. Anto, pa purba tapa nan malecho, nan a pone nan tata kere cu ta un bestia salbahe a mata Josef. Dies ruman di Josef no a protehá nan curason n’e ocasion ei. Si nos ta cla pa criticá otro hende, esei no por ta un evidencia di envidia of yaluzí den nos curason? Nos mester ta alerto pa examiná kico ta sali for di nos boca i ser lihé pa eliminá inclinacion inapropiado.

8. Kico lo yuda nos examiná nos curason si nos sucumbí na papia un mentira?

 ⁸ Mientras “ta imposibel pa Dios gaña,” hende imperfecto sí tin tendencia di gaña. (Hebreonan 6:18) “Tur hende ta mentiroso,” e salmista a lamentá. (Salmo 116:11) Asta apostel Pedro a saca mentira i nenga Jesus tres bes. (Mateo 26:69-75) Ta claro anto cu nos tin cu tene cuidou pa evitá mentira, pasobra Jehova ta odia “un lenga falsu.” (Proverbionan 6:16-19) Si un dia nos sucumbí na papia un mentira, lo ta bon pa analisá e causa. Esei tabata debí na miedu di hende? Miedu di castigu tabata e motibu? Puru egoismo tabata rais dje problema of tabata un esfuerso pa no daña nos reputacion? Sea cual sea e motibu, ta masha apropiado pa nos refleccioná riba e asuntu, admití nos limitacionnan humildemente i roga Jehova pa su pordon, buscando su yudansa pa vence e debilidad! “E ancianonan dje congregacion” lo ta den e mihó posicion pa duna e yudansa ei.—Santiago 5:14.

9. Kico nos oracionnan por revelá tocante nos curason?

⁹ Reaccionando riba hóben Rey Sálomon su peticion pa sabiduria i conocimentu, Jehova a bis’é: “Pa motibu cu esaki a resultá di ta pegá na bo curason i bo no a pidi rikesa, posesion material ni onor . . . , e sabiduria i conocimentu lo ser duná na bo; tambe rikesa i posesion material i onor lo mi duna bo.” (2 Crónicanan 1:11, 12) For di loke Sálomon a pidi i loke e no a pidi, Jehova tabata sa kico tabata pegá na Sálomon su curason. Kico nos oracionnan na Dios ta revelá tocante nos curason? Nos oracionnan ta saca na cla nos sed pa conocimentu, sabiduria i dicernimentu? (Proverbionan 2:1-6; Mateo 5:3) Interesnan di Reino ta pegá na nos curason? (Mateo 6:9, 10) Si nos oracionnan a bira mecánico i superficial, esaki lo por ta un indicacion cu ta necesario pa nos tuma tempu pa meditá riba Jehova su obranan. (Salmo 103:2) Tur cristian mester ta alerto pa saca afó kico nan oracionnan ta revelá.

Kico Nos Accionnan Ta Bisa?

10, 11. (a) Di unda adulterio i fornicacion ta originá? (b) Kico lo yuda nos pa no ‘cometé adulterio den nos curason’?

¹⁰ Segun un dicho, accionnan ta bisa mas cu palabra. Nos accionnan sigur ta bisa masha hopi di loke nos ta di paden. Por ehempel, den asuntunan di moralidad, protehá e curason ta encerá mas cu simplemente evitá un acto di fornicacion of adulterio. Den su Sermon Riba Ceru, Jesus a declará: “Tur cu sigui wak un muher afin di tene pasion p’e ya a cometé adulterio cuné caba den su curason.” (Mateo 5:28) Con nos por evitá di cometé adulterio asta den nos curason?

¹¹ Job, e patriarca fiel, a pone un bon ehempel pa cristiannan casá. Sin duda Job tabatin trato comun i coriente cu muher mas hóben i asta a yuda nan bondadosamente si nan tabatin mester di yudansa. Pero e idea di tin un interes romántico den nan tabata fuera di cuestion p’e homber di integridad aki. Pakico? Pasobra e tabatin e determinacion firme pa no wak hende muher cu deseo apasioná. El a bisa: “Mi a cera un pacto cu mi wowo. Pues, con mi por mustra mi mes atento na un bírgen?” (Job 31:1) Laga nos haci un pacto similar cu nos wowonan i protehá nos curason.

12. Con lo bo aplicá Lucas 16:10 pa loke ta protehá bo curason?

¹² “E persona fiel den loke ta mínimo ta fiel tambe den loke ta hopi,” e Yu di Dios a declará, “i e persona inhustu den lo mínimo ta inhustu tambe den loke ta hopi.” (Lucas 16:10) Sí, nos tin cu examiná nos conducta den e cosnan aparentemente chikitu di bida di tur dia, asta esnan cu ta tuma lugá den privacidad di nos cas. (Salmo 101:2) Ora nos ta sinta den nos cas ta wak television of ta conectá riba Internet, nos ta haci sigur di cumpli cu e spiertamentu bíblico: “Laga fornicacion i impuresa di tur sorto of golosidad ni sikiera ser mencioná entre boso, net manera ta pas pa hende santu; tampoco conducta bergonsoso ni papiamentu di disparate ni chiste obseno, cosnan  cu no ta decente”? (Efesionan 5:3, 4) I kico dje violencia cu lo por tin na television of den weganan di video? Segun e salmista: “Jehova mes ta examiná e hustu i tambe e malbado, i cualkier persona cu ta stima violencia, Su alma ta odia sigur.”—Salmo 11:5.

13. Ki spiertamentu ta na su lugá ora nos ta reflehá riba loke ta sali for di nos curason?

¹³ “E curason ta mas traicionero cu cualkier otro cos i ta desesperá,” Jeremías a spierta. (Jeremías 17:9) E traicion di curason aki lo por manifestá su mes ora nos ta bini cu excuus pa nos erornan, minimisá nos debilidadnan, hustificá nos deficiencianan di personalidad of exagerá nos logronan. Tambe, un curason desesperá ta capas di bira hipócrita: lipnan cu ta bisa un cos, accionnan cu ta indicá otro cos. (Salmo 12:2; Proverbionan 23:7) Ta masha vital anto pa nos ta onesto ora nos ta examiná loke ta sali for di nos curason!

Nos Wowo Ta Simpel?

14, 15. (a) Kico ta wowo “simpel”? (b) Ora nos tene e wowo simpel, con esei ta yuda nos protehá e curason?

¹⁴ Jesus a bisa: “E lampi dje curpa ta e wowo.” El a agregá: “P’esei, si bo wowo ta simpel, henter bo curpa lo ta briyante.” (Mateo 6:22) E wowo cu ta simpel ta enfocá riba un solo meta, of propósito, sin ser distraí of desviá for di dje. En berdad, nos wowo mester ta enfocá riba ‘busca promé e reino i Dios Su husticia.’ (Mateo 6:33) Kico por sosodé cu nos curason figurativo si nos no tene nos wowo simpel?

¹⁵ Pensa riba e asuntu di gana nos pan di cada dia. Un rekisito pa cristiannan ta cu nos tin cu percurá pa e necesidadnan di nos famia. (1 Timoteo 5:8) Pero kico lo pasa si nos ta ser tentá pa un deseo di tin lo último, lo mihó, i lo mas deseabel pa loke ta cuminda, paña, cas i otro cos? Esei realmente lo no sclabisá nos curason i mente, i haci nos dividí den nos adoracion? (Salmo 119:113; Romanonan 16:18) Pakico nos mester bira asina absorbá den percurá pa nos necesidadnan físico cu nos bida ta drei solamente rond di cosnan material, di famia i di negoshi? Corda e conseho inspirá: “Presta atencion na boso mes pa boso curason nunca bira cargá debí na comementu di mas i bebementu di mas i ansiedadnan di bida, i di ripiente e dia ei ta riba boso instantáneamente manera un las. Pasobra lo e bini riba tur esnan  cu ta biba riba e cara di henter e tera.”—Lucas 21:34, 35.

16. Ki conseho Jesus a duna relacioná cu nos wowo, i pakico?

¹⁶ Nos wowo ta un canal di comunicacion importante p’e mente i curason. Loke e ta enfocá ariba por influenciá nos pensamentu, emocion i accionnan fuertemente. Jesus a usa idioma figurativo ora el a referí n’e poder di tentacion visual i a bisa: “Awor, si e wowo drechi ei di bo ta haci bo trompecá, sak’é i tir’é afó. Pasobra ta mas probechoso pa bo perde un di bo miembronan cu henter bo curpa ser tirá den Gehena.” (Mateo 5:29) Nos mester stroba nos wowo di concentrá riba cosnan inapropiado pa bista. Por ehempel, nos no mester permití nos wowo mira material cu ta diseñá pa excitá of lanta pasion i deseonan ilícito.

17. Con aplicacion di Colosensenan 3:5 ta yuda nos protehá nos curason?

¹⁷ Ta claro cu nos bista no ta nos único sentido di comunicacion cu e mundu di pafó. Otro sentidonan, manera tacto i oido, ta hunga nan papel, i nos tin cu tuma medidanan di precaucion cu e miembro di curpa cu ta corespondé cu eseinan tambe. Apostel Pablo a advertí: “P’esei, mata boso miembronan di curpa cu ta riba tera pa loke ta fornicacion, impuresa, apetit sexual, deseo perhudicial, i cudishi, loke ta idolatria.”—Colosensenan 3:5.

18. Ki medidanan nos mester tuma relacioná cu pensamentu inapropiado?

¹⁸ Un deseo inapropiado por originá den e profundidad di nos mente. Ora nos ta sigui pensa riba esaki, generalmente e mal deseo ta intensificá i influenciá nos curason. “Anto e deseo, ora e bira fértil, ta duna lus na picá.” (Santiago 1:14, 15) Vários ta esnan cu ta admití cu hopi bes ta asin’akí masturbacion ta cuminsá. Ta ki importante anto pa nos yena nos mente cu cosnan spiritual! (Filipensenan 4:8) I si un pensamentu inapropiado bini na nos mente, nos mester haci esfuerso pa deshací di esaki.

‘Sirbi Jehova cu un Curason Completo’

19, 20. Con nos por logra sirbi Jehova cu un curason completo?

¹⁹ Den su behes, Rey David a bisa su yu: “Sálomon mi yu, conocé e Dios di bo tata i sirbié cu un curason completo i cu un alma gososo; pasobra tur curason Jehova ta scudriñá, i tur inclinacion dje pensamentunan e ta dicerní.” (1 Crónicanan 28:9) Sálomon mes a pidi Dios dun’é “un curason obediente.” (1 Reynan 3:9) Sin embargo, e tabatin e desafio di mantené un curason asina henter su bida.

²⁰ Si nos kier tin éxito den esei, no solamente nos tin cu adkerí un curason cu ta agradá Jehova sino tambe proteh’é. Pa logra esaki, nos tin cu tene e recordatorionan dje Palabra di Dios pegá na nos curason, sí, ‘meimei di dje.’ (Proverbionan 4:20-22) Tambe nos tin cu custumbrá examiná nos curason, meditá huntu cu oracion riba loke nos palabra i accionnan ta revelá. Ki balor e meditacion ei tin si nos no busca cu empeño Jehova su yudansa pa corigí cualkier debilidad cu nos detectá? I ta masha vital pa nos paga bon tinu kico nos ta hinca den nos mente i curason via nos sentidonan! Dor di haci esaki, nos tin e siguransa cu “e pas di Dios cu ta surpasá tur pensamentu lo warda [nos] curason i [nos] facultad mental pa medio di Cristo Jesus.” (Filipensenan 4:6, 7) Sí, laga nos ta determiná pa protehá nos curason mas cu cualkier otro cos cu nos tin cu protehá i sirbi Jehova cu un curason completo.

Bo Ta Corda?

• Pakico ta importante pa protehá e curason?

• Con un análisis di loke nos ta papia ta yuda nos protehá nos curason?

• Pakico nos mester tene nos wowo “simpel”?

[Preguntanan di Estudio]

[Plachinan na página 23]

Kico generalmente nos ta papia di dje den sirbishi di veld, na reunion i na cas?

[Plachinan na página 25]

Wowo cu ta simpel no ta ser distraí