‘Bisti Boso cu Gran Pacenshi’

“Bisti boso cu tierno cariño di compasion . . . i gran pacenshi.” —COLOSENSENAN 3:12.

1. Relatá un excelente ehempel di gran pacenshi.

RÉGIS, bibá den zuidwest di Francia, a bira un Testigo di Jehova bautisá na 1952. Pa vários aña su esposa a haci tur loke e tabata por pa strob’é di sirbi Jehova. El a purba bora tayer di su vehículo pa strob’é di bai reunion, i un biaha el a asta cana su tras ora e tabata predicá e mensahe di Bijbel di cas pa cas, i ridiculis’é ora e tabata papiando cu e doño di casnan tocante e bon nobo dje Reino. Apesar dje oposicion constante aki, Régis a sigui mustra gran pacenshi. Pues, e ta un excelente ehempel pa tur cristian, pasobra Jehova ta spera pa tur su adoradónan mustra gran pacenshi den nan trato cu otro hende.

2. Kico ta e nificacion literal dje palabra griego pa “gran pacenshi,” i kico e palabra ta nificá?

 ² Literalmente, e palabra griego pa “gran pacenshi” kier men “largura di spiritu.” E Traduccion di Mundu Nobo ta traducí e palabra aki dies bes como “gran pacenshi,” tres bes como “pacenshi,” i un biaha como “ehercé pacenshi.” Tantu e expresion hebreo como esun griego cu ta ser traducí como “gran pacenshi” ta encerá entre otro: mustra pacenshi, dominá bo mes bou di provocacion i tarda pa rabia.

3. Ki diferencia tabatin den e manera cu cristiannan i griegonan di promé siglo a mira gran pacenshi?

³ E griegonan di promé siglo no a mira gran pacenshi como un birtud. E filósofonan stoico no a usa e palabra ei mes. Segun William Barclay, un erudito di Bijbel, gran pacenshi “ta net contrali cu e idea griego di birtud.” Pa nan, “nenga di tolerá cualkier insulto of inhusticia” por ehempel, tabata un gran muestra di birtud. E ta bisa cu “pa griegonan, un gran homber ta unu cu ta busca vengansa sin tin cunes cu nada. Pa un cristian, un gran homber ta unu cu ta keda sin tuma vengansa maske e ta den posicion pa hacié.” Maske griegonan a mira gran pacenshi como un señal di debilidad, aki atrobe, mescos cu den otro caso, “un cos bobo di Dios ta mas sabí cu hende, i un cos swak di Dios ta mas fuerte cu hende.”—1 Corintionan 1:25.

Cristo Su Ehempel di Gran Pacenshi

4, 5. Ki ehempel maraviyoso di gran pacenshi Jesus a pone?

⁴ Cristo Jesus ta un ehempel excelente di gran pacenshi. Ta Jehova su ehempel so ta mas grandi. Ora Jesus tabata bou di hopi preshon, el a mustra un dominio propio asombroso. Un profecia tocante dje ta bisa: “E tabata den pertá severo, i el a laga nan afligié; no obstante, e no a habri su boca. Nan a hib’é manera un carné pa matadero; i manera un carné hembra cu dilanti su feitadónan a bira muda, e tampoco no a habri su boca.”—Isaías 53:7.

⁵ Jesus a mustra un gran pacenshi remarcabel durante henter su ministerio riba tera! El a wanta pregunta tramposo di su enemigunan i insulto di su opositornan. (Mateo 22:15-46; 1 Pedro 2:23) E tabatin pacenshi cu su disipelnan, asta ora nan tabata pleita constantemente tocante cua di nan tabata mas grandi. (Marco 9:33-37; 10:35-45; Lucas 22:24-27) I esta un dominio propio admirabel Jesus a mustra riba e anochi cu el a ser traicioná, ora Pedro cu Juan a pega soño despues cu el a bisa nan pa nan “sigui vigilá”!—Mateo 26:36-41.

6. Con Pablo a beneficiá di Jesus su gran pacenshi, i kico nos ta siña di esaki?

⁶ Despues di su morto i su resureccion, Jesus a sigui mustra gran pacenshi. Specialmente apostel Pablo tabata bon conciente di esei, pasobra promé e tabata un persiguidó di cristian. Pablo a skirbi: “Fiel i merecedor di pleno aceptacion ta e palabra di cu Cristo Jesus a bini na mundu pa salba pecadó. Di esakinan mi ta esun mas notabel. No obstante, e motibu cu mi a ser mustrá misericordia tabata cu pa medio di mi como e caso mas notabel Cristo Jesus por demostrá tur su gran pacenshi como muestra di esnan cu lo pone nan fe den dje pa bida eterno.” (1 Timoteo 1:15, 16) Sin importá con nos a biba den pasado, Jesus lo tin gran pacenshi cu nos si nos pone fe den dje. Claro cu e ta spera tambe pa nos producí ‘obra cu ta pas cu repentimentu.’ (Echonan 26:20; Romanonan 2:4) E mensahenan cu Cristo a manda pa e shete congregacionnan na Asia Menor ta mustra cu maske e tin gran pacenshi, e ta spera pa hende drecha nan conducta sí.—Revelacion, capítulo 2 i 3.

Un Fruta di Spiritu

7. Ki relacion tin entre gran pacenshi i spiritu santu?

⁷ Na capítulo 5 di Pablo su carta n’e galationan, e ta mustra di un banda kico e obranan di carni ta, i di otro banda kico e frutanan di spiritu ta. (Galationan 5:19-23) Ya cu gran pacenshi ta un di Jehova su atributonan, e cualidad  aki ta originá cuné i e ta un fruta di su spiritu. (Éxodo 34:6, 7) Sí, den Pablo su lista e ta mencioná gran pacenshi como e di cuater fruta di spiritu , huntu cu “amor, goso, pas, . . . amabilidad, bondad, fe, suavedad, dominio propio.” (Galationan 5:22, 23) P’esei, ora Dios su sirbidónan manifestá su gran pacenshi, ta bou di influencia di spiritu santu nan ta hacié.

8. Kico lo permití nos cultivá e frutanan di spiritu, incluso gran pacenshi?

⁸ Pero esei no kier men cu Jehova ta obligá niun hende di actua di acuerdo cu su spiritu. Ta boluntariamente nos mester aceptá su influencia riba nos. (2 Corintionan 3:17; Efesionan 4:30) Dor di cultivá e frutanan di spiritu den tur loke nos haci, nos ta permitié obra den nos bida. Ora Pablo a caba di mencioná un pa un kico ta e obranan di carni i kico ta fruta di spiritu, el a agregá: “Si nos ta biba pa spiritu, laga nos sigui cana ordenadamente tambe pa spiritu. No sea gañá: hende no por tene mofa di Dios. Pasobra kico cu un hende sembra, esaki lo e cosechá tambe; pasobra esun cu sembra cu su carni na bista lo cosechá corupcion for di su carni, pero esun cu sembra cu e spiritu na bista lo cosechá bida eterno for dje spiritu.” (Galationan 5:25; 6:7, 8) Si nos kier cultivá gran pacenshi cu éxito, tambe nos mester cultivá e sobrá dje frutanan cu spiritu santu ta producí den cristiannan.

“Amor Tin Gran Pacenshi”

9. Pakico kisas Pablo a bisa e corintionan cu “amor tin gran pacenshi”?

⁹ Pablo a mustra cu ta existí un relacion special entre amor i gran pacenshi, dor di bisa: “Amor tin gran pacenshi.” (1 Corintionan 13:4) Un erudito di Bijbel, Albert Barnes, ta bisa cu kisas Pablo a enfatisá e punto aki debí na e rivalidad i e pleitunan cu a existí den e congregacion cristian di Corinto. (1 Corintionan 1:11, 12) Barnes ta hala atencion n’e echo cu “e palabra usá aki [pa gran pacenshi] ta nificá lo contrario cu ansha: lo contrario cu rabiamentu lihé, i expresion i pensamentunan bou di rabia. E ta duna e idea di un estado mental cu por SOPORTÁ PA HOPI TEMPU bou di opresion of provocacion.” Te awe, amor i gran pacenshi ta contribuí mashá na e pas cu tin den e congregacion cristian.

10. (a) Con amor ta yuda nos mustra gran pacenshi, i ki conseho apostel Pablo ta duna nos tocante esaki? (b) Ki comentario un erudito di Bijbel a haci relacioná cu Dios su gran pacenshi i su bondad? (Mira nota na pia di página.)

¹⁰ “Amor tin gran pacenshi i ta bondadoso. Amor . . . no ta busca su mes interes, no ta bira provocá.” Pues, amor ta yuda nos den vários manera pa mustra gran pacenshi. *  (1 Corintionan 13:4, 5) Amor ta permití nos soportá otro cu pacenshi i keda corda cu nos tur ta imperfecto i sa faya. E ta yuda nos pordoná i mustra consideracion. Apostel Pablo ta animá nos pa cana “cu pleno humildad di mente i suavedad, cu gran pacenshi, soportando otro den amor, haciendo esfuerso sincero pa observá e unidad dje spiritu den e banchi unificador di pas.”—Efesionan 4:1-3.

11. Pakico ta specialmente importante pa mustra gran pacenshi den comunidadnan cristian?

¹¹ Sea ta trata di congregacion, cas di Betel, cas di misionero, tim di construccion of scol pa entrená cristiannan, e gran pacenshi dje miembronan ta contribuí na pas i felicidad den comunidadnan cristian asina. Debí na diferencia di personalidad, preferencia, criansa, norma di cortesia i asta higiena, de bes en cuando por surgi situacion difícil. Den famia ta mescos. Tarda pa rabia ta un cualidad masha importante. (Proverbionan 14:29; 15:18; 19:11) Nos tur mester mustra gran pacenshi, esta: wanta cu pacenshi i spera cu cos lo drecha.—Romanonan 15:1-6.

Gran Pacenshi Ta Yuda Nos Mustra Awante

12. Pakico ta importante pa mustra gran pacenshi bou di circunstancia difícil?

¹² Gran pacenshi ta yuda nos wanta situacionnan difícil cu por parce di no tin fin, of di no tin ningun solucion a corto plaso. Régis, cu nos a mencioná na cuminsamentu, tabata den un situacion asina. Pa añanan largu su casá a oponé su esfuersonan pa sirbi Jehova. Pero un dia e casá a bini cerca dje cu awa na wowo i bis’é: “Mi sa cu esaki ta e berdad. Yuda mi. Mi kier un studio di Bijbel.” Cu tempu el a bautisá como Testigo di Jehova. Régis ta bisa: “Esei a proba cu Jehova a bendicioná e añanan ei di lucha, pacenshi i awante.” Su gran pacenshi a ser recompensá.

13. Kico a yuda Pablo mustra awante, i con su ehempel por yuda nos mustra awante?

¹³ Den promé siglo di era comun, apostel Pablo tabata un ehempel excelente di gran pacenshi. (2 Corintionan 6:3-10; 1 Timoteo 1:16) Cerca di fin di Pablo su bida, consehando Timoteo, su compañero mas hóben, el a spiert’é cu tur cristian lo enfrentá prueba. Pablo a cita su propio ehempel i a recomendá cualidadnan cristian básico cu ta necesario pa por mustra awante. El a skirbi: “Bo a sigui cu sumo cuidou mi siñansa, mi moda di anda den bida, mi propósito, mi fe, mi gran pacenshi, mi amor, mi awante, mi persecucion, mi sufrimentu, e sorto di cosnan cu a pasa mi na Antiokia, na Iconio, na Listra, e sorto di persecucion cu mi a soportá; i tog Señor a libra mi for di nan tur. Realmente, tur esnan cu ta deseá di biba deboto na Dios den asociacion cu Cristo Jesus lo ser persiguí tambe.” (2 Timoteo 3:10-12; Echonan 13:49-51; 14:19-22) Pa nos mustra awante, nos tur tin mester di fe, amor i gran pacenshi.

 Bistí cu Gran Pacenshi

14. Cu kico Pablo a compará cualidadnan cristian manera gran pacenshi, i ki conseho el a duna e cristiannan di Colósas?

¹⁴ Apostel Pablo a papia di gran pacenshi i otro cualidadnan cu ta agradá Dios, como paña cu un cristian mester bisti despues di a kita prácticanan cu ta caracterisá “e personalidad bieu.” (Colosensenan 3:5-10) El a skirbi: “Como scogínan di Dios, santu i stimá, bisti boso cu tierno cariño di compasion, amabilidad, humildad di mente, suavedad, i gran pacenshi. Sigui soportá otro i pordoná otro libremente si un hende tin un motibu pa keha contra otro. Mescos cu Jehova a pordoná boso libremente, asina boso tambe haci mescos. Pero, ademas di tur e cosnan aki, bisti boso cu amor, pasobra e ta un laso perfecto di union.”—Colosensenan 3:12-14.

15. Ora cristiannan “bisti” gran pacenshi i otro cualidadnan cu ta agradá Dios, kico ta e resultado?

¹⁵ Ora miembronan di un congregacion ta ‘bistí’ cu compasion, amabilidad, humildad di mente, suavedad, gran pacenshi i amor, nan por resolvé nan problemanan i sigui padilanti uní den Jehova su sirbishi. Specialmente superintendentenan cristian mester tin gran pacenshi. Por tin bes cu nan mester reprendé un otro cristian, pero tin diferente manera pa reprendé. Pablo a describí e mihó actitud pa nan tin, ora el a skirbi Timoteo lo siguiente: “Reprendé, corigí, consehá, cu tur gran pacenshi i arte di siña.” (2 Timoteo 4:2) Sí, semper mester trata Jehova su carnénan cu gran pacenshi, dignidad i suavedad.—Mateo 7:12; 11:28; Echonan 20:28, 29; Romanonan 12:10.

“Gran Pacenshi pa cu Tur”

16. Si nos tin “gran pacenshi pa cu tur” hende, kico por ta e resultado?

¹⁶ Jehova su gran pacenshi cu humanidad ta duna nos un obligacion moral pa mustra “gran pacenshi pa cu tur.” (1 Tesalonicensenan 5:14) Esei kier men cu nos mester tene pacenshi cu nos famianan cu no ta Testigo, nos bisiñanan, nos coleganan na trabou i nos compañeronan di klas. Hopi prehuicio a ser vencí debí cu Testigonan a soportá comentarionan sarcástico of oposicion mes—tin bes pa hopi aña largu—di hende cu nan a asociá cuné na trabou of na scol. (Colosensenan 4:5, 6) Apostel Pedro a skirbi: “Mantené boso conducta excelente entre e nacionnan, pa den loke nan ta papia contra boso como malechor, nan, como testigo ocular di boso obranan excelente, por glorificá Dios den e dia di su inspeccion.”—1 Pedro 2:12.

17. Con nos por imitá Jehova su amor i su gran pacenshi, i pakico nos mester hacié?

¹⁷ Jehova su gran pacenshi lo nificá salbacion pa miyones di hende. (2 Pedro 3:9, 15) Si nos imitá Jehova su amor i su gran pacenshi, nos lo keda predicá e bon nobo dje Reino di Dios cu pacenshi, i siña hende someté nan mes na Cristo su gobernacion di Reino.  (Mateo 28:18-20; Marco 13:10) Si nos stop di predicá, ta como si fuera nos kier limitá e gran pacenshi di Jehova. Ta como si fuera nos no a logra comprendé e propósito di su gran pacenshi, esta, di hiba hende na repentimentu.—Romanonan 2:4.

18. Kico Pablo a pidi p’e colosensenan den oracion?

¹⁸ Den su carta n’e cristiannan na Colósas, Asia Menor, Pablo a skirbi: “P’esei nos tambe, desde e dia cu nos a tende di dje, no a stop di haci oracion pa boso i di pidi pa boso por ser yená cu e conocimentu exacto di su boluntad den tur sabiduria i comprendimentu spiritual, pa boso cana di un manera digno di Jehova afin di agrad’é plenamente segun cu boso ta sigui producí fruta den tur bon obra i aumentá den e conocimentu exacto di Dios, siendo hací poderoso cu tur poder te n’e alcanse di su glorioso potencia pa boso wanta plenamente i pa boso tin gran pacenshi cu goso.”—Colosensenan 1:9-11.

19, 20. (a) Con nos por evitá di mira e gran pacenshi cu Jehova a mustra te awor como un prueba? (b) Ki beneficionan nos gran pacenshi lo producí?

¹⁹ E echo cu Jehova su gran pacenshi no a caba ainda lo no ta un prueba pa nos si nos ta “yená cu e conocimentu exacto di su boluntad,” esta, “pa tur clase di hende ser salbá i yega na un conocimentu exacto dje berdad.” (1 Timoteo 2:4) Nos lo “sigui producí fruta den tur bon obra,” i principalmente e obra di predicá “e bon nobo aki dje reino.” (Mateo 24:14) Si nos sigui haci esaki fielmente, Jehova lo haci nos “poderoso cu tur poder” pa nos por ‘wanta plenamente i tin gran pacenshi cu goso.’ Asina nos lo por “cana di un manera digno di Jehova,” i nos lo tin e pas di sa cu nos ta “agrad’é plenamente.”

²⁰ Laga nos keda completamente convencí cu e gran pacenshi di Jehova ta un muestra di su sabiduria. E ta obra pa nos salbacion, i pa salbacion di esnan cu ta scucha nos predicacion i loke nos ta siña. (1 Timoteo 4:16) Dor di cultivá e fruta di spiritu— amor, amabilidad, bondad, suavedad i dominio propio—nos lo por mustra gran pacenshi cu goso. Nos lo ta mihó prepará pa biba na pas cu miembronan di nos famia, i tambe cu nos rumannan den congregacion. Tambe, gran pacenshi lo yuda nos tene pacenshi cu nos compañeronan di trabou i di scol. I nos gran pacenshi lo tin propósito, esta, di scapa malechor i glorificá Jehova, e Dios di gran pacenshi.

[Nota]

Bo Por Splica?

• Den ki maneranan Cristo ta un ehempel maraviyoso di gran pacenshi?

• Kico lo yuda nos cultivá gran pacenshi?

• Con gran pacenshi ta yuda famianan, comunidadnan cristian i ancianonan?

• Ki beneficio nos gran pacenshi lo producí pa nos mes i pa otronan?

[Preguntanan di Estudio]

[Plachi na página 15]

Asta ora e tabata bou di hopi preshon, Jesus tabatin pacenshi cu su disipelnan

[Plachi na página 16]

Ta urgi superintendentenan cristian pa nan pone un bon ehempel di gran pacenshi ora nan ta trata cu nan rumannan

[Plachi na página 17]

Si nos ta imitá Jehova su amor i su gran pacenshi, nos lo sigui predicá e bon nobo

[Plachi na página 18]

Pablo a pidi den oracion pa cristiannan “tin gran pacenshi cu goso”