“E Bendicion di Jehova—Esei Ta Loke Ta Haci Ricu”

NOS tur kier haña bendicion. E ta algu cu ta promové felicidad, bienestar of prosperidad. Siendo cu Jehova ta e Dunador di “tur bon don i tur regalo perfecto,” tur bendicion real i duradero ta originá cu nos amoroso Creador. (Santiago 1:17) E ta bendicioná humanidad completo abundantemente, asta hende cu no conoc’é. Jesus a bisa di su Tata: “E ta haci su solo sali riba hende malbado i bon i ta haci awa yobe riba hende hustu i inhustu.” (Mateo 5:45) Sin embargo, Jehova ta mustra interes special den esnan cu ta stim’é.—Deuteronomio 28:1-14; Job 1:1; 42:12.

E salmista a skirbi: “Jehova mes lo no retené nada di loke ta bon for di esnan cu ta cana liber di falta.” (Salmo 84:11) Sí, hende cu ta sirbi Jehova tin un bida ricu yen di nificacion. Nan sa cu “e bendicion di Jehova—esei ta loke ta haci ricu, i e no ta agregá ningun dolor na dje.” Tambe Bijbel ta bisa: “Esnan cu [Jehova] bendicioná, nan lo poseé e tera.” (Proverbionan 10:22; Salmo 37:22, 29) Ki un bendicion esei lo ta!

Con nos por ricibí Jehova su bendicion? Na promé lugá, nos tin cu cultivá cualidadnan cu ta agradá Jehova. (Deuteronomio 30:16, 19, 20; Mikéas 6:8) Nos ta mira esaki den e ehempel cu tres sirbidó di Jehova di antigwedad a pone.

Jehova Ta Bendicioná Su Sirbidónan

Noe tabata un sirbidó di Dios sobresaliente. Na Génesis 6:8 nos ta lesa: “Noe a haña fabor den bista di Jehova.” Di con? Pasobra Noe tabata obediente. E relato ta bisa: “Noe a cana cu e Dios berdadero.” Noe a sigui e principionan hustu di Jehova i a obedecé su mandamentunan. Na un tempu ora e mundu a cai profundamente den violencia i inmoralidad, Noe tabata motivá pa “haci conforme cu tur loke Dios a mand’é. El a haci precisamente asina.” (Génesis 6:9, 22) Esei a pone cu Jehova a duna Noe instruccion pa construí “un arca p’e salbacion di [Noe] su famia di cas.” (Hebreonan 11:7) Di e manera aki, Noe i su famia—i via nan e rasa humano—a sobrebibí e destruccion di e generacion ei. I Noe a muri cu e speransa di ser resucitá cu e prospecto di bida eterno riba un tera paradísico. Esta un bendicion ricu el a ricibí!

Abraham tambe tabatin cualidadnan cu a agradá Jehova. Esun principal tabata fe. (Hebreonan 11:8-10) Abraham a bandoná un bida confortabel na Ur i despues na Haran pasobra e tabatin fe den e promesa di Jehova di cu su simia lo bira hopi i un bendicion pa tur nacion. (Génesis 12:2, 3) Maske el a pasa prueba pa hopi aña, su fe a ser recompensá ora su yu Isaac a nace. Mediante e yu aki, Abraham a bira antepasado di e nacion di Israel cu Dios a scoge, i cu tempu tambe di e Mesías. (Romanonan 4:19-21) Ademas, e ta “tata di tur esnan cu tin fe,” i el a ser yamá “amigu di Jehova.” (Romanonan 4:11; Santiago 2:23; Galationan 3:7, 29) Ki un bida significante el a hiba, i esta hopi bendicion el a ricibí!

 Considerá tambe e homber fiel Moises. Loke a sobresalí entre su cualidadnan tabata su aprecio pa cosnan spiritual. Moises a bira lomba pa tur rikesa di Egipto i “a sigui firme como si fuera el a mira Esun cu ta invisibel.” (Hebreonan 11:27) Despues di a keda 40 aña na Madian, el a regresá Egipto como un homber di edad i cu curashi el a enfrentá e poder mas grandi dje tempu ei, esta Fárao, pa exigí e libertad di su rumannan. (Éxodo 7:1-7) E tabata testigo di e dies plaganan, e partimentu di laman Corá i e destruccion di e ehércitonan di Fárao. Jehova a usa Moises pa duna e Ley na Israel i como mediador entre Su pacto i e nacion nobo. Pa 40 aña Moises a guia e nacion di Israel den desierto. Su bida tabatin un berdadero propósito, i el a disfrutá di hopi bendicion maraviyoso di sirbishi.

Bendicionnan di Awendia

E relatonan aki ta demostrá cu bida di hende cu ta sirbi Dios ta realmente significativo. Segun cu e pueblo di Jehova ta desaroyá cualidadnan manera obedencia, fe i aprecio pa cosnan spiritual, nan ta ser bendicioná ricamente.

Con nos ta ser bendicioná? Wel, miéntras miles di hende den cristiandad ta sufri di hamber spiritual, nos por ta “radiante pa motibu di Jehova su bondad.” (Jeremías 31:12) Mediante Jesucristo i “e esclabo fiel i  discreto,” Jehova a percurá un abundancia di cuminda spiritual cu ta yuda nos keda riba “e caminda cu ta hiba na bida.” (Mateo 7:13, 14; 24:45; Juan 17:3) Asociacion cu nos hermandad cristian ta un otro bendicion ricu. Sea ta na reunion of na otro ocasion, ora nos ta huntu cu compañeronan di creencia cu ta desplegá amor i cu sinceramente ta haci esfuerso pa bisti “e personalidad nobo,” esei ta fuente di gran felicidad. (Colosensenan 3:8-10; Salmo 133:1) Sin embargo, nos bendicion di mas grandi ta e privilegio precioso di por tin un relacion personal cu Jehova Dios i di sigui den e pasonan di su Yu Cristo Jesus.—Romanonan 5:1, 8; Filipensenan 3:8.

Ora nos refleccioná riba e bendicionnan ei, nos ta realisá ki balioso nos sirbishi na Dios realmente ta. Kisas nos ta pensa riba e ilustracion di Jesus tocante e comerciante biahero cu tabata busca perla di hopi balor. Jesus a bisa di e homber aki: “Ora cu el a haña un perla di hopi balor, el a bai i un bes a bende tur loke e tabatin i a cumpr’é.” (Mateo 13:46) Esaki sigur ta e manera cu nos ta sinti en cuanto nos relacion cu Dios, nos privilegio di sirbié, nos asociacion cristian, nos speransa cristian i tur e otro bendicionnan relacioná cu nos fe. Den nos bida no tin nada cu tin mas balor cu esakinan.

Duna Bek na Jehova

Dor cu nos ta reconocé Jehova como e Dunador di tur bon regalo, nos curason ta ser impulsá pa expresá aprecio p’e bendicionnan cu nos ta ricibí. Con nos por haci esei? Un manera ta dor di yuda otro hende  pa nan tambe disfrutá di e mésun bendicionnan aki. (Mateo 28:19) Den mas cu 230 pais, Testigonan di Jehova ta bishitando nan próhimo pa haci hustamente esei. Segun cu nan ta haci esei, nan ta usa nan recursonan personal limitá—tempu, energia i posesionnan material—pa yuda otro hende “yega na un conocimentu exacto dje berdad.”—1 Timoteo 2:4.

Considerá e caso di e pioneronan cu ta biba na Glendale, California, Merca. Tur diasabra mainta nan ta biaha rond di 100 kilometer ida i buelta pa bishitá un prizon federal. Maske ta un par di ora so nan por dedicá na e detenidonan durante cada bishita, nan no ta desanimá. Un di nan ta bisa: “Ta masha recompensador pa sirbi den e teritorio inusual aki. Nos ta hacié cu hopi goso. Nos tin asina hopi hende interesá cu ta difícil pa cumpli cu tur. Actualmente nos ta studia cu cincu persona, i cuater mas a pidi un studio di Bijbel.”

Ministernan cristian celoso ta contentu pa ofrecé nan servicionan grátis pa efectuá e trabou salbador di bida aki. Nan ta reflehá e actitud di Jesus, kende a bisa: “Boso a ricibí grátis, duna grátis.” (Mateo 10:8) Miyones di hende rond mundu ta participá den e mésun tipo di sirbishi inegoista aki, i como resultado, multitud di hende di curason onrado ta reaccioná i ta bira disipel. Den e último cincu añanan aki so, casi 1,7 miyon hende a dedicá nan bida na Jehova. Pa percurá pa e necesidadnan di e expansion creciente aki, mester producí Bijbel i publicacionnan basá riba Bijbel, i tambe construí Salon di Reino i otro lugánan nobo pa reuní. Di unda e placa pa financiá e necesidadnan aki ta bini? Tur ta bini di donacionnan boluntario.

Debí n’e mal condicion económico den algun parti di mundu, hopi hende ta lucha pa por percurá p’e necesidadnan básico di bida di nan famia. Segun e revista New Scientist, mil miyon hende ta gasta por lo ménos 70 porciento di nan entrada doméstico na cuminda. Hopi di nos rumannan cristian ta den e situacion ei. Sin yudansa di nan compañeronan creyente, di ningun manera nan lo no por aford cosnan manera publicacionnan cristian of Salonnan di Reino adecuá.

Claro cu esei no ta nificá cu e rumannan ei ta contentu pa laga otro hende carga nan responsabilidad. Pero nan tin mester di yudansa. Ora Moises tabata animá e israelitanan pa contribuí materialmente como un manera pa gradicí Jehova pa nan bendicionnan, el a bisa: “E regalo di man di cada hende mester ta na proporcion cu e bendicion di Jehova bo Dios cu el a duna bo.” (Deuteronomio 16:17) P’esei, ora Jesus a mira un biuda contribuí cu “dos moneda chikitu di masha poco balor” den e tempel, el a elogiá e biuda cerca e disipelnan. E biuda a haci loke e tabata por. (Lucas 21:2, 3) Asina tambe, cristiannan cu ta mas pober ta haci loke nan por. I si tin un deficiencia, compañeronan cristian cu tin poco mas recurso material por cera e buracu ei cu nan contribucion.—2 Corintionan 8:13-15.

Ta importante pa nos tin e motivacion corecto ora nos ta duna Dios bek den e maneranan ei. (2 Corintionan 8:12) Pablo a bisa: “Laga cada un haci net manera el a determiná den su curason, no di mala gana ni bou di obligacion, pasobra Dios ta stima un dunadó alegre.” (2 Corintionan 9:7) Dor di duna libremente di curason, nos ta apoyá e expansion teocrático cu ta tuma lugá awe, i tambe aumentá nos propio goso.—Echonan 20:35.

Dos manera cu nos por duna Jehova bek p’e bendicionnan cu el a duna nos, ta dor di participá den e trabou di predicá i duna contribucion boluntario. I ta masha animante pa sa cu Jehova kier drama su bendicion riba hopi otro hende sincero mas cu kisas no conoc’é ainda! (2 Pedro 3:9) P’esei, laga nos sigui usa nos recursonan den e sirbishi di Dios pa haña hende di curason onrado i yuda nan desaroyá cualidadnan manera obedencia, fe i aprecio. Di e manera ei, nos lo tin e goso di yuda nan “purba i mira cu Jehova ta bon.”—Salmo 34:8.

[Kuadro na página 28, 29]

Maneranan Cu Algun Hende Ta Scoge pa

CONTRIBUÍ NA E OBRA MUNDIAL

Hopi hende ta apartá, of presupuestá, un montante cu nan ta pone den e cahanan di contribucion marcá: “Contribucion p’e Obra Mundial—Mateo 24:14.”

Tur luna congregacionnan ta manda e montantenan aki sea p’e sede mundial di Testigonan di Jehova na Brooklyn, New York, of n’e oficina di sucursal local. Tambe por manda donacion boluntario di placa directamente na e Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, of n’e oficina di sucursal cu ta sirbi bo pais. Tambe por haci donacion di hoya of otro cos di balor. Un carta breve cu ta declará cu esakinan ta un regalo incondicional mester compañá e contribucionnan aki.

AREGLO DI DONACION CONDICIONAL

Por haci donacion di placa via un areglo special den cua, si e dunadó hañ’é den un necesidad personal, lo debolbé e donacion na dje. Pa mas informacion, por fabor, tuma contacto cu e Treasurer’s Office na e adres mencioná.

DONACION PLANEÁ

Ademas di regalo incondicional di placa i donacion condicional di placa, tin otro métodonan di duna na beneficio dje sirbishi di Reino mundial. Esakinan ta incluí:

Seguro: Por nombra Sociedad Watch Tower como beneficiario di un pólisa di seguro di bida of un plan di penshon.

Cuenta di Banco: Por duna Sociedad Watch Tower derecho di usa cuenta di banco, ‘time deposit’ of cuenta di penshon personal, of derecho di cobra nan despues di morto di nan doño, na armonia cu rekisitonan bancario local.

Accion i Bono: Por haci donacion di accion i bono na Sociedad Watch Tower como un regalo incondicional.

Propiedad: Por haci donacion na Sociedad Watch Tower di propiedad cu por ser bendé, sea como regalo incondicional of bou dje condicion cu e dunadó por sigui biba den dje te na su morto. Tuma contacto cu e oficina di sucursal di bo pais promé cu traha e acta pa traspasá cualkier propiedad.

Testament i ‘Trust’: Por nombra Sociedad Watch Tower como heredero di propiedad of placa via un testament legal, of por nombra Sociedad Watch Tower como beneficiario di un areglo di trust. Un trust cu ta beneficiá un organisacion religioso por duna cierto bentahanan di belasting.

Sucursal mester ser informá, i mester ricibí un copia di tur documento relevante di cualkier un di e areglonan aki. Si bo ta interesá den un di e areglonan aki di donacion planeá, bo mester tuma contacto cu Sociedad, via carta of telefon, na e adres indicá aki bou, of na e oficina di Testigonan di Jehova cu ta sirbi bo pais.

Sociedad Watch Tower

P.O. Box 4708 Seroe Loraweg #142A

Curaçao, N.A.

Telefon: (599-9) 461-7528