Protehá Bo Concenshi

E IDEA di bula den un avion cu un computer mal programá ta duna hende miedu. Pero imaginá bo cu ta un hende a mors cu e sistema di nabegacion dje avion, of cu el a falsificá e datonan pa malu! Wel, den un sentido figurativo, esei ta precis loke un cierto persona ta purba haci cu bo concenshi. Su intencion ta di saboteá bo sistema di nabegacion moral. Su meta ta di pone bo den conflicto cu Dios!—Job 2:2-5; Juan 8:44.

Ken ta e mente maligno tras dje sabotahe aki? Den Bijbel e ta ser yamá “e colebra original, esun yamá Diabel i Satanas, cu ta gañando henter e tera habitá.” (Revelacion 12:9) Den hofi di Eden el a persuadí Eva cu razonamentu astuto p’e ignorá loke e tabata sa cu ta corecto, i rebelá contra Dios. (Génesis 3:1-6, 16-19) For dje dia ei Satanas ta e ‘celebro’ cu a diseñá institucionnan completo pa gaña hende, cu intencion di pone hende na gran cantidad den enemistad cu Dios. Di tur e institucionnan aki, esun mas culpabel ta religion falsu.—2 Corintionan 11:14, 15.

Religion Falsu Ta Corumpí Concenshi

E buki bíblico di Revelacion ta pinta religion falsu como un prostituta simbólico cu yama Babilonia e Grandi. Su siñansanan a daña e sentido di moralidad di hopi hende. Nan a pone nan odia otro hende cu tin creencia diferente, i asta actua cu violencia contra nan. De echo, segun Revelacion, Dios ta tene religion falsu como e responsabel principal pa e sanger “di tur esnan cu a ser matá riba tera,” incluso su mes adoradónan.—Revelacion 17:1-6; 18:3, 24.

Jesus a advertí su disipelnan di te na ki grado religion falsu lo a bruha e compas moral di algun hende, bisando: “E ora ta bini cu tur esnan cu ta mata boso lo pensa cu nan a rindi un sirbishi sagrado na Dios.” Hende violento asina ta sumamente ciegu den sentido moral! Jesus a bisa: “Nan no a yega di conocé ni e Tata ni ami.” (Juan 16:2, 3) No muchu tempu despues cu Jesus a bisa e palabranan ei, e mes a ser asesiná pa cumpli cu deseo di algun lider religioso, cu no tabatin problema pa biba cu nan concenshi, apesar di nan crímen. (Juan 11:47-50) Na contraste, Jesus a bisa cu su berdadero siguidónan ta ser identificá dor dje amor cu nan tin entre nan. Pero nan amor ta asta mas extenso, pasobra nan ta stima asta nan enemigunan.—Mateo 5:44-48; Juan 13:35.

Un otro manera cu religion falsu a saboteá concenshi di hopi hende ta dor di apoyá cualkier moralidad, of falta di moralidad, cu ta na moda na un dado momento. Apostel Pablo a pronosticá esaki, bisando: “Lo tin un periodo  di tempu ora nan lo no soportá siñansa saludabel, sino, di acuerdo cu nan mes deseo, nan lo acumulá maestro pa nan mes pa agradá nan oido.”—2 Timoteo 4:3.

Awendia lidernan religioso ta agradá orea di hende dor di bisa cu sex pafó di matrimonio por ta aceptabel pa Dios. Algun otro ta consentí cu actonan homosexual. De echo, algun miembro di clero mes ta homosexual activo. Un artículo den e korant británico The Times a bisa cu “diestres miembro di clero cu ta reconocé abiertamente di ta homosexual” a ser elegí pa forma parti dje Sínodo General di Iglesia Anglicano. Si lidernan di iglesia ta bandoná moralidad bíblico, i nan iglesianan ta haci poco pa evitá esei, ta ki normanan nan parokianonan mester sigui? No ta nada straño cu miyones di hende ta completamente confundí.

Ta hopi mas mihó pa laga e berdadnan spiritual i moral den Bijbel guia nos manera un faro! (Salmo 43:3; Juan 17:17) Por ehempel, Bijbel ta siña cu ni fornicadó ni adúltero “lo heredá e reino di Dios.” (1 Corintionan 6:9, 10) E ta bisa nos cu homber i muher cu ta “cambia e uso natural di nan mes na loke ta contrario cu naturalesa” ta “obrando loke ta obseno” den bista di Dios. (Romanonan 1:26, 27, 32) E berdadnan moral aki no ta cos cu hende imperfecto a inventá; nan ta normanan cu Dios a inspirá, i cu nunca e no a hala atras. (Galationan 1:8; 2 Timoteo 3:16) Pero Satanas tin mas manera pa saboteá concenshi.

Scoge Entretenimentu cu Cuidou

Forsa un hende p’e cometé un echo malu ta un cos, pero logra pa e mes deseá di cometé un acto asina ta algu henteramente otro. Esei ta e meta di “e gobernante di mundu,” Satanas. P’e hinca su moda di pensa degradá den mente i curason di hende imprudente of cu ta muchu confiá—i principalmente mucha, esnan mas vulnerabel—e ta usa medionan manera literatura, película, música i wega di computer cuestionabel, i web-site di pornografia riba Internet.—Juan 14:30; Efesionan 2:2.

Segun un informe den e revista Pediatrics: “Ta ser calculá cu hóbennan [na Merca] ta mira como 10.000 acto violento tur aña, i programa pa mucha ta esnan mas violento cu tur.” E informe a revelá tambe cu “tur aña tienernan ta mira casi 15.000 referencia, insinuacion i chiste sexual.” El a bisa cu asta durante ‘prime-time,’ (entre 7 or i 11 or djanochi, ora tin mas tantu hende ta wak television) “tin mas cu 8 acto sexual pa ora; mas cu cuater bes mas tantu cu na 1976.” No ta nada straño cu e estudio a revelá cu “uso di palabra malu tambe ta subiendo drásticamente.” Tog, tantu Bijbel como un gran cantidad di estudio científico ta advertí cu contacto regular cu e tipo di cosnan ei tin un mal efecto riba hende. Pues, si di berdad bo kier agradá Dios i beneficiá bo mes, haci loke Proverbionan 4:23 ta bisa, esta:  “Protehá bo curason, pasobra for di dje ta e fuentenan di bida.”—Isaías 48:17.

Hopi cantica popular tambe ta corumpí concenshi. Un informe den e korant australiano The Sunday Mail ta spierta cu un cierto cantante kende su canticanan a subi masha lihé riba cartelera musical den hopi pais occidental, ta haci “un esfuerso special pa shok hende.” E artículo ta bisa cu “su canticanan ta glorificá droga, incesto i violacion,” i cu e ta “canta tocante mata su casá i tira su curpa den un lago.” E artículo a mencioná otro letra di dje cu ta muchu malu pa nos ripití. Tog el a gana un premio prestigioso cu su música. Lo bo kier planta pensamentunan sushi manera esnan mencioná aki den bo mente i bo curason, maske nan ta bunita presentá cu música? Ban spera cu no, pasobra esnan cu ta actua asina ta susha nan concenshi, i cu tempu ta crea “un curason malbado” den nan mes, i esei lo haci nan bira enemigu di Dios.—Hebreonan 3:12; Mateo 12:33-35.

Pues, sea sabí ora di scoge entretenimentu. Bijbel ta urgi nos: “Cualkier cos cu ta berdadero, cualkier cos cu ta di consideracion serio, cualkier cos cu ta hustu, cualkier cos cu ta decente, cualkier cos cu ta amabel, cualkier cos cu tin bon reputacion, cualkier birtud cu tin i cualkier cos digno di alabansa cu tin, sigui considerá e cosnan aki.”—Filipensenan 4:8.

Esnan Cu Bo Ta Anda Cuné Tin Efecto Riba Bo Concenshi

Como mucha, Neil cu Franz a disfrutá di asociacion edificante cu cristiannan berdadero. * Pero segun Neil, cu tempu el a “cuminsá cana cu hende robes.” Esei a hib’é na crímen i prizon, i awor e ta lamentá. Franz su historia ta similar. E ta lamentá: “M’a kere cu mi por a anda cu hende hóben di mundu sin cu nan afectá mi. Pero manera Galationan 6:7 ta bisa: ‘Hende no por tene mofa di Dios. Pasobra kico cu un hende sembra, esaki lo e cosechá tambe.’ M’a descubrí na mal manera cu ta ami tabata robes, i cu Jehova tabatin rason. Mi tin cu sinta un condena di bida largu den prizon p’e maldad cu mi a cometé.”

Generalmente hende manera Neil i Franz no ta bira criminal di un dia pa otro; na un promé instante, e idea ei so caba lo spanta nan. Normalmente e cambio ta tuma lugá den fase, i hopi bes e promé fase ta: mal asociacion. (1 Corintionan 15:33) Uso di droga of exceso di alcohol lo por ta e siguiente paso. De echo, hende a yega di bisa apropiadamente cu concenshi ta “e parti di bo personalidad cu ta larga den alcohol.” Una bes cu bo yega asina leu, crímen of inmoralidad ta masha cerca.

Pakico dal e promé paso anto? Mas bien, asociá cu hende sabí cu di berdad ta stima  Dios. Nan lo yuda bo fortalecé bo concenshi pa e por guia bo bon, i evitá bo di pasa den hopi dolor. (Proverbionan 13:20) Maske ainda nan ta den prizon, awor Neil cu Franz ta considerá nan concenshi como un regalo di Dios cu nan mester entrená bon; sí, un regalo cu nan mester atesorá. Ademas nan ta trahando duru pa forma un bon relacion cu nan Dios Jehova. Sea sabí i siña for di nan foutnan.—Proverbionan 22:3.

Cuida Bo Concenshi

Nos ta mustra cu nos kier cuida nos concenshi si nos ta edificá amor pa Dios, fe den dje i un temor saludabel di dje. (Proverbionan 8:13; 1 Juan 5:3) Bijbel ta mustra nos cu ora un concenshi ta falta e influencianan aki, hopi bes e no tin suficiente stabilidad moral. Por ehempel, Salmo 14:1 ta papia di esnan cu ta bisa den nan curason: “No tin Jehova.” Con e falta di fe aki ta afectá nan conducta? E versículo ta sigui: “Nan a actua ruinosamente, nan a actua repugnantemente den nan tratamentu.”

Hende cu no tin berdadero fe den Dios no tin un speransa firme pa un mihó futuro tampoco. P’esei nan tin e tendencia di biba pa awe so, i entregá na deseo di carni. Nan filosofia ta: “Laga nos come i bebe, pasobra mañan nos tin cu muri.” (1 Corintionan 15:32) Di otro banda, esnan cu ta tene nan bista riba e recompensa di bida eterno no ta laga e placernan temporal dje mundu aki desviá nan. Nan concenshi entrená ta manera un bon computer di nabegacion cu ta tene nan riba e bon caminda, esta, obedencia leal na Dios.—Filipensenan 3:8.

Pa bo concenshi por sigui traha su trabou, i cu precision, e tin mester di guia regular dje Palabra di Dios. Cu e palabranan figurativo aki, Bijbel ta bisa nos cu un guia asina ta disponibel: “Bo propio oreanan lo tende un palabra bo tras ta bisa: ‘Esaki ta e caminda. Cana den dje,’ den caso cu boso mester bai na banda drechi of den caso cu boso mester bai na banda robes.” (Isaías 30:21) Pues, apartá tempu tur dia pa lesa Bijbel. Esaki lo fortalecé bo i animá bo den bo lucha pa haci loke ta bon, of ora nubia di preocupacion i ansiedad ta tapa bo. Keda sigur cu Jehova lo guia bo den sentido moral i spiritual si bo pone tur bo confiansa den dje. Sí, imitá e salmista cu a skirbi: “Mi a pone Jehova mi dilanti constantemente. Dor cu e ta na mi man drechi, nan lo no haci mi tambaleá.”—Salmo 16:8; 55:22.

[Nota]

[Plachinan na página 5]

Religion falsu, cu Bijbel ta yama “Babilonia e Grandi,” ta e culpabel cu a swak concenshi di hopi hende

[Rekonosementu]

Pastor ta bendicioná soldá: U.S. Army photo

[Plachinan na página 6]

Mira violencia i inmoralidad lo haci bo concenshi daño

[Plachi na página 7]

Guia regular dje Palabra di Dios lo protehá bo concenshi