Historia di Bida

Un Bida Ricu den e Sirbishi di Jehova

SEGUN E RELATO DI RUSSELL KURZEN

Mi a nace dia 22 di september 1907, shete aña promé cu e era remarcabel cu a cuminsá cu e promé guera mundial. Nos famia tabata ricu den e sentido di mas importante. Mi ta kere cu lo bo bai di acuerdo cu esei, despues cu bo caba di tende algun detaye di mi historia.

FOR di tempu cu e wela di famia Kurzen tabata mucha chikitu, e tabata en busca di e berdad tocante Dios. Promé cu el a yega edad di tiener, el a bishitá vários religion den su stad natal pintoresco, Spiez, na Suisa. Na 1887, algun aña despues cu el a casa, famia Kurzen a djoin e ola di imigrantenan cu a yega costa di Merca.

E famia a establecé su mes na Ohio, i rond di aña 1900 Wela a haña e tesoro cu e tabata busca. El a hañ’é den e buki na aleman E Tempu Ta Cerca, di Charles Taze Russell. Mesora el a comprendé cu loke el a lesa den e buki aki a contené lus di berdad bíblico. Maske Wela casi no por a lesa ingles, tog el a aboná riba e revista Toren di Vigilancia na ingles. Asina el a siña mas berdad di Bijbel i, na mésun tempu, e idioma ingles. Opa si nunca no tabatin e mésun interes cu su casá tabatin den asuntunan spiritual.

Di e 11 yunan di Wela Kurzen, 2 di su yu hombernan, esta, John cu Adolph, a mustra aprecio p’e tesoro cu Wela a haña. John ta mi tata, i el a bautisá na 1904 n’e congreso di St. Louis, Missouri, di Studiantenan di Bijbel, manera Testigonan di Jehova tabata conocí e tempu ei. Siendo cu mayoria Studiante di Bijbel no tabatin masha moda, a programá  e congreso na mésun tempu cu tabatin e Expo Mundial na St. Louis pa asina nan por a probechá di e tarifanan special di trein. Despues na 1907, mi tio Adolph a bautisá na un congreso na Niagara Falls, New York. Cu celo mi tata i mi tio a predicá loke nan a siña for di Bijbel, i cu tempu tur dos a bira minister di tempu completo (loke awor ta ser yamá pionero).

P’esei, p’e tempu cu mi a nace na 1907, mi famia tabata ricu caba den sentido spiritual. (Proverbionan 10:22) Mi tabata un baby ainda na 1908 ora mi mayornan John cu Ida a hiba mi n’e congreso “Na Caminda pa Triunfo” na Put-in-Bay, Ohio. Einan Joseph F. Rutherford, cu e tempu ei tabata un minister biahero, tabata presidente dje congreso. Un par di siman promé, e tabata na Dalton, Ohio, caminda el a bishitá nos cas i duna discurso n’e Studiantenan di Bijbel local.

Claro cu ami personalmente no ta corda e sucesonan aki, pero loke sí mi ta corda ta e congreso na Mountain Lake Park, Maryland, na 1911. Einan ami cu mi ruman muher chikitu Esther a topa cu Charles Taze Russell, kende tabata supervisá e actividadnan mundial di predicá di e Studiantenan di Bijbel.

Dia 28 di juni 1914, e dia cu e asesinato di arkiduke Ferdinand i su esposa na Sarajevo a hiba mundu na guera, mi a asistí huntu cu mi famia na un congreso trankil na Columbus, Ohio. Desde e promé añanan ei, mi tabatin e privilegio di ta presente na hopi congreso dje pueblo di Jehova. Na algun di nan tabatin mas o ménos 100 hende so presente. Otronan tabata reunionnan masal den algun dje stadionnan mas grandi di mundu.

Nos Cas na un Sitio Stratégico

Mas o ménos for di aña 1908 te cu 1918, un congregacion chikitu di Studiantenan di Bijbel tabata tene e reunionnan na nos cas na Dalton—situá na mitar dje caminda entre Pittsburgh, Pennsylvania i Cleveland, Ohio. Nos cas a bira un tipo di centro di hospedahe pa hopi orador biahero. Nan tabata mara nan cabai cu garoshi tras di nos mangasina i conta esnan cu a reuní experencianan emocionante i otro berdadnan bíblico. Esta animante e ocasionnan aki tabata!

Tata tabata maestro di scol, pero e tabata sinti hopi mas pa e ministerio cristian, cu ta un programa di educacion mas importante.  El a haci sigur di siña su famia tocante Jehova, i tur anochi nos tabata haci oracion huntu como famia. Durante lente di 1919, Tata a bende nos cabai i garoshi pa 315 florin i el a cumpra un auto Ford di aña 1914 p’e por a alcansá mas tantu hende posibel den e trabou di predicá. Ta cu e auto ei nos famia a bai e congresonan notabel di Studiantenan di Bijbel na Cedar Point, Ohio, na 1919 i 1922.

Henter nos famia—Mama, Tata, Ester, mi ruman homber mas chikitu John i ami—a participá den e actividad público di predicá. Ainda mi ta corda bon-bon e promé bes cu un doño di cas a haci mi un pregunta tocante Bijbel. Mi tabatin mas o ménos shete aña di edad. “Chikitin, kico ta Armagedon?” e homber a puntra. Cu un poco yudansa di mi tata, mi por a dun’é un contesta for di Bijbel.

Drentando e Ministerio di Tempu Completo

Na 1931, nos famia a asistí n’e congreso di Columbus, Ohio, i tabata emocionante di por tabata presente na momento cu a adoptá e nomber nobo, Testigonan di Jehova. John tabata asina entusiasmá cu el a dicidí cu ami cuné mester cuminsá traha e trabou di pionero. * Asina a sosodé, i Mama cu Tata i Ester tambe a djoin nos. Esta un tesoro nos tabatin! Un famia uní den e trabou gososo di predicá e bon nobo dje Reino di Dios. Nunca mi ta cansa di gradicí Jehova pa e bendicion aki. Nos tabata masha felis, pero ainda tabatin mas goso ta spera nos.

Na februari 1934, mi a cuminsá sirbi na e sede mundial di Testigonan di Jehova (cu nan ta yama Betel) na Brooklyn, New York. Despues di un par di siman, John tambe a bini. Nos a compartí kamber te ora el a casa cu su kerida esposa Jessie na 1953.

Despues cu ami cu John a bai Betel, nos mayornan a aceptá vários asignacion di pionero den e pais. I Ester cu su casá George Read a compañá nan. Nos mayornan a sigui traha pionero te ora nan a finalisá nan curso terenal na 1963. Ester cu su casá a forma un dushi famia, i ami a ser bendicioná cu un cantidad di subrina i subrino cu mi ta stima mashá.

Trabou i Asociacion na Betel

John a usa su abilidadnan técnico na Betel i a traha huntu cu otro betelitanan riba proyectonan manera esun di producí tocadisco portátil. Miles di Testigo di Jehova a usa e aparatonan aki den nan sirbishi di cas pa cas. Tambe John a yuda diseñá i construí mashin pa lora revista i plak etiket pa post nan pa abonadonan.

Mi sirbishi na Betel a cuminsá den e departamento di encuaderná buki. Tabatin otro yoncumannan cu e tempu ei tabata traha den e fábrica cu te ainda ta sirbi fielmente na Betel. Carey Barber i Robert Hatzfeld ta algun di esakinan. Otro personanan asina cu ta duna mi grato recuerdo, pero cu a muri caba, ta Nathan Knorr, Karl Klein, Lyman Swingle, Klaus Jensen, Grant Suiter, George Gangas, Orin Hibbard, John Sioras, Robert Payne, Charles Fekel, Benno Burczyk i John Perry. Nan a traha fielmente aña den aña afó, sin cu nunca nan a keha of spera un “promocion.” Pero tog hopi di e cristiannan leal aki i ungí cu spiritu santu a haña mas responsabilidad segun cu e organisacion a crece. Algun di nan asta a sirbi den e Cuerpo Gobernante di Testigonan di Jehova.

Traha huntu cu e rumannan aki cu a haci sacrificio propio a siña mi un les importante. Hende cu ta haci trabou seglar ta ricibí un salario pa nan labor. Esei ta nan recompensa. Sirbi na Betel ta trece hopi bendicion spiritual, i ta homber i muhernan spiritual so ta reconocé i apreciá e recompensanan aki.—1 Corintionan 2:6-16.

Natan Knorr, kende a bini Betel como tiener na 1923, tabata e superintendente di fábrica na añanan ’30. Tur dia e tabata cana den e fábrica i cumindá cada trahadó. Nos cu tabata nobo na Betel a apreciá e interes personal  aki. Na 1936 nos a ricibí un mashin di imprenta nobo for di Alemania, i algun ruman homber hóben tabatin dificultad pa arm’é. P’esei ruman Knorr a dal su ketelpak i a traha un luna largu huntu cu nan te ora nan a pone e mashin traha.

Ruman Knorr tabata traha asina duru cu mayoria di nos no por a wanta su ritmo. Pero tambe e tabata sa con pa disfrutá di recreo. Asta despues cu el a cuminsá dirigí e actividadnan mundial di predicá di Testigonan di Jehova na januari di 1942, e tabata hunga baseball de bes en cuando cu miembronan dje famia di Betel i cu studiantenan di e scol di misionero di Galad n’e campus cerca di South Lansing, New York.

Na april 1950, e famia di Betel a muda bai den e seccion di dies piso di nos residencia recien construí situá na 124 Columbia Heights, Brooklyn, New York. E comedor nobo a permití cu nos tur por a sinta huntu ora di come. Durante e mas o ménos tres añanan cu construccion di e residencia aki a tuma lugá, nos no por a tene nos programa di adoracion di mainta. Reanudacion dje programa a trece masha goso! Ruman Knorr a asigná mi pa sinta huntu cuné n’e mesa di presidente pa mi por a yud’é corda nomber di e miembronan mas nobo di nos famia. Pa 50 aña largu mi a sinta na e mésun lugá durante adoracion di mainta i desayuno. Anto dia 4 di augustus 2000, ora cu a cera e comedor ei, mi a ser asigná na un dje comedornan renobá den loke ántes tabata Towers Hotel.

Pa un par di tempu den añanan ’50, mi a traha den e fábrica riba un mashin di linotipia. Cu e aparato ei tabata saca letter riba bara fini di metal, cu cua tabata forma página pa usa como plachi di imprenta den e drukkerij. E trabou ei no tabata un di mi faboritonan, pero William Peterson, kende tabata na encargo di e mashinnan, a trata mi asina bon cu mi a disfrutá tog dje tempu cu mi a pasa einan. Despues na 1960 tabatin mester di boluntario pa verf e residencia cu nan a caba di construí na 107 Columbia Heights. Mi tabata contentu di por a ofrecé mi mes pa yuda prepará e facilidadnan nobo aki pa nos famia di Betel cu tabata creciendo.

No muchu tempu despues cu a caba di verf e edificio na 107 Columbia Heights, mi a haña e grato sorpresa cu mi a ser asigná cu e trabou di ricibí bishitantenan na Betel. E último 40 añanan cu mi a sirbi como recepcionista tabata mes maraviyoso cu tur e otro añanan cu mi a pasa na Betel. Sea cu tabata bishitante of miembro nobo dje famia di Betel cu a bini, tabata emocionante pa refleccioná riba e resultadonan di nos esfuersonan combiná pa traha p’e aumento di Reino.

Studiantenan Diligente di Bijbel

Nos famia di Betel ta bona spiritualmente pasobra su miembronan ta stima Bijbel. Ora cu mi a yega Betel nobo-nobo, mi a puntra Emma Hamilton kende tabata traha como ‘proofreader,’ cuantu biaha el a lesa Bijbel. El a contestá: “Trinti’cincu bes, pero despues mi a perde conteo.” Anton Koerber, un otro cristian fuerte cu a sirbi na Betel rond di e mésun tempu, tabata bisa: “Nunca pone bo Bijbel un caminda cu bo no por djis rek bo man i cog’é.”

Despues di morto di ruman Russell na 1916, Joseph F. Rutherford a tuma e responsabilidadnan di organisacion cu a cai bou di Russell. Rutherford tabata un discursante público enérgico i versá, kende como abogado a bringa casonan na fabor di Testigonan di Jehova den Corte Supremo na Merca. Despues di morto di Rutherford na 1942, ruman Knorr a remplas’é i a traha masha duru pa desaroyá su abilidadnan como orador público. Ya cu mi tabata biba den un kamber banda di esun di dje, hopi bes mi tabata tend’é ta practicá su discursonan bes tras bes. Dor di e esfuersonan diligente ei, cu tempu el a bira un excelente orador público.

Na februari 1942, ruman Knorr a yuda instituí un programa pa yuda nos tur como ruman homber na Betel mehorá nos abilidad di siña  hende i papia. E scol a enfocá riba investigacion bíblico i papia den público. Na principio dje scol nos cada un a ser asigná pa duna discursonan chikitu tocante personahenan bíblico. Mi promé discurso tabata tocante e homber Moises. Na 1943, un scol similar a cuminsá den e congregacionnan di Testigonan di Jehova, i el a sigui te awe. Ainda Betel ta pone énfasis riba adkerí conocimentu di Bijbel i desaroyá métodonan eficas di siña hende.

Na februari 1943, e promé klas di e scol di Galad pa misionero a cuminsá. Awor, e di 111 klas di Galad a caba di gradua! Den e mas cu 58 añanan cu e scol ta funcioná, el a percurá entrenamentu pa mas cu 7.000 persona por a sirbi como misionero rond mundu. Ta remarcabel cu na 1943 ora e scol a cuminsá, tabatin solamente algu mas cu 100.000 Testigo di Jehova rond mundu. Awor tin mas cu 6.000.000 Testigo ta participá den predicá e bon nobo dje Reino di Dios!

Aprecio pa Mi Herencia Spiritual

Djis promé cu e scol di Galad a ser fundá, tres di nos cu tabata na Betel a haña asignacion pa bishitá e congregacionnan den henter Merca. Nos tabata keda un dia, un par di dia of asta un siman den un esfuerso pa fortalecé e congregacionnan aki spiritualmente. Nan tabata yama nos sirbidónan p’e hermandad, un nomber cu despues a bira sirbidó di circuito of superintendente di circuito. Sin embargo, djis despues cu e scol di Galad a cuminsá, nan a pidi mi pa bolbe pa duna algun les. Mi a sirbi como instructor regular pa e di 2 te cu di 5 klas, i tambe mi a substituí un dje instructornan regular i a duna les na e di 14 klas. E echo cu mi por a repasá cu e studiantenan e promé sucesonan remarcabel di e historia moderno di e organisacion di Jehova—hopi di cua mi por a relatá di experencia personal—a haci mi  apreciá mi herencia spiritual ricu mas plenamente.

Un otro privilegio cu mi a disfrutá di dje atrabes di añanan ta di por a asistí na congresonan internacional di e pueblo di Jehova. Na 1963, mi a biaha rond mundu huntu cu mas cu 500 otro delegado pa asistí n’e congresonan “Bon Nobo Eterno.” Otro congresonan cu a marca historia cu nos a asistí na dje tabata esnan tené na Warshaw, Polonia na 1989, Berlin, Alemania na 1990 i Moscú, Rusia na 1993. Na cada congreso mi tabatin oportunidad di topa cu algun di nos rumannan stimá cu a soportá décadanan di persecucion bou di e régimen nazi, e régimen comunista of tur dos. Esta fortalecedor di fe e experencianan aki tabata!

Mi bida den e sirbishi di Jehova tabata ricu en berdad! E fluho di bendicionnan spiritual no ta caba nunca. I distinto for di rikesa material, mas nos compartí e cosnan balioso aki cu otro hende, mas nos rikesa ta aumentá. De bes en cuando mi ta tende hende bisa cu nan ta deseá di no a lanta como Testigo di Jehova. Segun nan, nan lo a apreciá berdadnan bíblico mas si promé nan a experenciá bida pafó di e organisacion di Dios.

Ora mi tende hóbennan bisa cosnan asina, esei semper ta molestiá mi pasobra cu otro palabra nan ta bisando cu ta mihó pa no ser lantá cu e conocimentu di e camindanan di Jehova. Sin embargo, pensa riba tur e mal custumbernan i maneranan trocí di pensa cu hende mester deshací di dje ora nan haña berdad di Bijbel mas despues den bida. Ami semper tabata masha gradicidu cu mi mayornan a lanta nan tres yunan den e caminda di husticia. John a keda un sirbidó fiel di Jehova te na su morto na juli 1980, i te awe Ester ta un Testigo fiel.

Cu hopi cariño mi ta wak bek riba e hopi amistadnan excelente cu mi a disfrutá di dje cu ruman homber i muhernan cristian fiel. Awor mi tin mas cu 67 aña maraviyoso na Betel. Maske nunca mi no a casa, mi tin hopi yu homber i yu muher spiritual i tambe nietu spiritual. I cu alegria mi ta pensa riba tur e kerido miembronan nobo di nos famia spiritual di rond mundu cu mi tin cu topa ainda. Cada un ta balioso. Ki cierto ta e palabranan: “E bendicion di Jehova—esei ta loke ta haci ricu”!—Proverbionan 10:22.

[Nota]

[Plachi na página 20]

Di robes pa drechi: mi tata cu mi ruman homber John riba su scochi, Esther, ami cu mi mama

[Plachinan na página 23]

Dunando les na un klas di Galad na 1945

Man drechi ariba: Instructornan di Scol di Galad: Eduardo Keller, Fred Franz, ami i Albert Schroeder

[Plachi na página 24]

Refleccionando riba mi bida ricu den e sirbishi di Jehova