Con Abo Ta Trata cu Hipocresia?

DEN e hofi di Getsémani, Hudas Iscariote a bai cerca Jesus i “a dun’é un sunchi masha tiernamente.” Esaki tabata un expresion di custumber di tierno cariño. Pero Hudas su gesto tabata djis un pretension pa identificá Jesus na esnan cu a bin pa arest’é den anochi. (Mateo 26:48, 49) Hudas tabata un hipócrita—un persona cu ta pretendé di ta loke e no ta, un persona cu ta sconde su mal intencionnan tras di un mascarada di sinceridad. E palabra griego traducí como “hipócrita” ta nificá “un persona cu ta contestá” i tambe ta referí na un actor di teatro. Cu tempu, a usa e palabra aki pa referí na un persona cu ta djis hunga un rol pa gaña otronan.

Con bo ta reaccioná na hipocresia? Por ehempel, bo no ta rabia ora bo ta mira companianan di sigaria ta promové humamentu apesar di evidencia médico cu nan producto ta perhudicial? E hipocresia di esnan cu tin otro hende bou di nan cuido pero cu ta abusá di nan, no ta indigná bo? Bo no ta sinti bo ofendí ora un persona cu bo a pensa tabata un bon amigu ta resultá di ta falsu? Con hipocresia religioso ta afectá bo?

“Ai di boso . . . Hipócritanan!”

Considerá e ambiente religioso cu a existí tempu Jesus tabata riba tera. E escriba i fariseonan a pretendé di ta maestro leal dje Ley di Dios, pero en realidad nan a yena hende su mente cu siñansa di hende cu a kita nan atencion for di Dios. E escriba i fariseonan a pega estrictamente n’e letter dje ley, pero a ignorá principionan fundamental cu ta reflehá amor i compasion. Den público nan a pretendé di ta dedicá na Dios, pero na scondí nan tabata yen di maldad. Nan obranan nunca tabata na armonia cu nan palabra. Nan meta pa haci cosnan tabata “pa hende mira.” Nan a parce “grafnan blanchá, cu di pafó en berdad ta parce bunita pero di paden ta yen di wesu di hende morto i di tur sorto di sushedad.” Cu curashi Jesus a saca nan hipocresia na cla dor di bisa nan bes tras bes: “Ai di boso, escriba i fariseonan, hipócritanan!”—Mateo 23:5, 13-31.

Si bo a biba den e tempu ei, mescos cu otro hende di curason sincero, kisas e hipocresia religioso ei lo a ègt disgustá bo. (Romanonan 2:21-24; 2 Pedro 2:1-3) Pero, lo bo a laga e hipocresia dje escriba i fariseonan amargá bo te n’e grado cu lo bo a rechasá tur religion, incluso esun cu Jesucristo i su disipelnan a practicá i siña? Esei lo no a perhudicá bo?

Conducta hipócrita di hende religioso por pone nos disgustá i alehá di religion. Sin embargo, e reaccion aki tambe lo stroba nos di dicerní e sinceridad di adoradónan berdadero. De echo, net e barera cu nos ta forma como proteccion contra hipocresia por alehá nos for di berdadero amigu. Pues, nos reaccion pa cu hipocresia mester ta razonabel i balansá.

“Tene Boso Wowo Habrí”

Promé, nos tin cu siña con pa identificá e hipócritanan. Esaki no ta semper fácil. Un famia a siña esaki despues cu nan a ser perhudicá formalmente. E mama a cai den coma. Pa lanta un caso contra e hospital pa e mal trabou cu nan a haci, e famia a dicidí di busca un  abogado kende tabata un predicadó tambe den un misa local. Apesar cu e hospital a paga seis miyon florin na daño i perhuicio, e tragedia dje famia a bira pió. E mama a muri como un hende pober i no tabatin placa pa paga pa su entiero. Pakico? Pasobra e abogado a hinca mayoria di e placa den su sacu. Relacioná cu e abogado aki, un revista hurídico a bisa: “Si e predicá e clase di conducta cu e ta practicá . . . , su mensahe lo mester ta asina aki: laga nos plunder otro hende.” Con nos por protehá nos mes di hende asina?

Den su tempu, Jesus a duna spiertamentu na esnan cu a confrontá hipocresia religioso pa ‘tene nan wowo habrí.’ (Mateo 16:6; Lucas 12:1) Sí, nos mester ta cauteloso. Hende por pretendé di tin e intencionnan di mas noble i desplegá cierto sinceridad, pero nos mester ta razonablemente cauteloso i no aceptá un bes tur loke hende ta bisa djis pa nan aparencia. Nos lo no controlá nos placa di papel bon si nos sa cu tin placa falsu den circulacion?

Asta den e congregacion cristian berdadero e hipócritanan a aparecé. E disipel Hudas a duna spiertamentu tocante nan, bisando: “Esakinan ta e barancanan scondí bou di awa den boso banketenan di amor miéntras cu nan ta banketeá cu boso, wardadó cu ta alimentá nan mes sin miedu; nubia sin awa cu e bientu ta hiba p’aki i p’aya; palu na fin di otoño, pero sin fruta.”—Hudas 12.

‘Tene nos wowo habrí’ kier men evitá di ser gañá pa un persona cu ta pretendé di ta amoroso, pero cu mas bien ta egoista i ta promové opinion cu no ta basá riba e Palabra di Dios. Un persona asina ta manera un baranca skerpi net bou di e superficie di awa calmu, cu por causa naufragio spiritual di esnan cu no ta alerto. (1 Timoteo 1:19) E hipócrita por primintí hopi refrescamentu spiritual, pero ta resultá di ta ‘nubia sin awa’—cu no ta producí ni un gota. Mescos cu un palu sin fruta, un gañadó no ta duna ningun fruta di cristian berdadero. (Mateo 7:15-20; Galationan 5:19-21) Sí, nos mester ta alerto contra e gañadónan aki. Sin embargo, nos tin cu haci esei sin tin nodi di desconfiá tur hende su intencionnan.

“Stop di Husga”

Esta fácil ta pa hende imperfecto mustra riba fout di otro hende miéntras nan ta ignorá esnan di nan mes! Pero e inclinacion aki ta haci nos vulnerabel pa hipocresia. Jesus a bisa: “Hipócrita! saca promé e biga for di bo mes wowo, i e ora ei lo bo mira claramente con pa saca e splenter for dje wowo di bo ruman.” Ta pa nos mes bon pa sigui su conseho: “Stop di husga pa boso no ser husgá; pasobra cu e huicio cu cua boso ta husga, boso lo ser husgá . . . Pakico, anto, bo ta wak e splenter den e wowo di bo ruman, pero no ta tuma na cuenta e biga den bo mes wowo?”—Mateo 7:1-5.

Nos mester tene cuidou pa no core marca un hende como hipócrita djis pasobra el a yega di haci cosnan cu ta parce hipocresia. Por ehempel, apostel Pedro “a cuminsá apartá i separá su mes” for dje compañeronan creyente no-hudiu na Antiokia, pa asina e complacé bishitantenan di antecedente hudiu di Jerusalem. Barnabas ‘tambe a ser hibá huntu cu Pedro i otronan den e fingimentu aki.’  Pedro a haci esaki apesar di e echo cu e tabatin e privilegio di habri e caminda pa hende no-hudiu ser aceptá den e congregacion cristian. (Galationan 2:11-14; Echonan 10:24-28, 34, 35) Pero siguramente e fout aki sin mal intencion di parti di Barnabas i Pedro no a pone nan den e mésun categoria cu e escriba i fariseonan of Hudas Iscariote.

“Laga Boso Amor Ser Sin Hipocresia”

Jesus a consehá: “Ora bo haci bon na otro hende, no busca un tocadó di trompet pa bai bo dilanti—manera e hendenan den e snoanan i cayanan cu ta haci cosnan pa haci sigur cu hende ta admirá nan.” (Mateo 6:2, Phillips) Apostel Pablo a bisa: “Laga bo amor ser sin hipocresia.” (Romanonan 12:9) El a animá e hóben Timoteo pa e tin ‘amor for di un curason limpi . . . i for di fe sin hipocresia.’ (1 Timoteo 1:5) Si nos amor i fe ta berdadero—no manchá cu egoismo i engaño—otro hende lo confia nos. Nos lo bira un fuente di berdadero fortalesa i animacion pa esnan rond di nos. (Filipensenan 2:4; 1 Juan 3:17, 18; 4:20, 21) I mas cu tur cos, nos lo tin Jehova su aprobacion.

Di otro banda, cu tempu hipocresia lo hiba esnan cu ta practik’é na morto. Na final di cuenta, tur loke ta hipocresia lo keda completamente desenmascará. Jesucristo a bisa: “No tin nada tapá cu lo no yega di ser destapá, ni secreto cu lo no yega di bira conocí.” (Mateo 10:26; Lucas 12:2) E rey sabí Sálomon a bisa: “E Dios berdadero mes lo trece na huicio tur clase di obra relacioná cu tur cos scondí, en cuanto si e ta bon of malu.”—Eclesiástes 12:14.

Miéntras tantu, pakico nos mester laga hipocresia di otro hende afectá nos te cu nos ta keda sin haña e amor sincero cu berdadero amigu ta mustra na nos? Nos por ta cauteloso sin tin nodi di bira muchu desconfiá. I laga nos haci tur nos esfuerso pa nos keda cu nos amor i fe sin hipocresia.—Santiago 3:17; 1 Pedro 1:22.

[Plachinan na página 22, 23]

Abo lo a laga e hipocresia di e escriba i fariseonan alehá bo for di Jesucristo i su disipelnan?