Con Jesus Ta Salba?

“Jesus ta salba!” “Jesus ta nos Salbador!” Bo por mira e mensahenan ei riba muraya di edificio i den otro lugánan público den hopi pais rond mundu. Miyones di hende di berdad ta kere cu Jesus ta nan Salbador. Si bo puntra nan, “Con Jesus ta salba nos?” probablemente nan lo contestá, “Jesus a muri pa nos” of, “Jesus a muri pa nos picánan.” Sí, Jesus su morto ta habri caminda pa nos ser salbá. Pero con e morto di un solo homber por paga p’e picánan di un multitud? Si ta abo nan a haci e pregunta, “Con e morto di Jesus por salba nos?” kico lo bo bisa?

E CONTESTA cu Bijbel ta duna riba e pregunta aki ta masha simpel pero cla i yen di nificacion. Sin embargo, pa capta su importancia, na promé lugá nos tin cu mira Jesus su bida i morto como un solucion pa un problema masha difícil. Ta e ora ei so nos por comprendé corectamente ki un balor enorme e morto di Jesus tin.

Dios a laga Jesus duna su bida pa solucioná un problema cu a presentá tempu cu Adam a peca. E picá ei sí tabata un tragedia! E promé homber i su casá, Eva, tabata perfecto. E bunita hofi di Eden tabata nan hogar. Dios a duna nan e trabou significativo di cuida nan hogar cu tabata un hofi. E intencion tabata pa nan tin e otro criaturanan bibu riba tera bou di nan dominio  amoroso. I segun cu nan lo a multiplicá i yena tera cu miyones di hende, nan mester a extendé e paradijs pa cubri tera completo. (Génesis 1:28) Ki un trabou deleitabel i excitante nan a haña! Ademas, nan tabatin e compañerismo amoroso di otro. (Génesis 2:18) Nan no a falta nada. Felicidad eterno tabata spera nan.

Ta difícil pa imaginá con Adam of Eva por a peca. Pero e promé pareha humano a rebelá contra net esun cu a crea nan: Jehova Dios. Usando un colebra, e criatura spiritual Satanas e Diabel a gaña Eva i pon’é desobedecé Jehova. Adam a siguié.—Génesis 3:1-6.

No tabatin duda tocante kico e Creador lo a haci cu Adam i Eva. El a mustra claramente caba kico lo tabata e consecuencia di desobedencia ora el a bisa: “Bo por come di tur palu dje hofi te na satisfaccion. Pero, en cuanto e palu di conocimentu di bon i malu, bo no mag come di dje, pasobra den e dia cu bo come di dje lo bo muri positivamente.” (Génesis 2:16, 17) Awor un pregunta di hopi mas importancia a exigí un contesta.

Humanidad Ta Pará Dilanti un Problema Serio

E picá original a crea un problema masha serio pa humanidad. Adam a cuminsá su bida como un hende perfecto. P’esei, su yunan lo por a disfrutá di un bida eterno i perfecto. Sin embargo, Adam a peca promé cu el a bira tata. Henter e rasa humano tabata den su órganonan reproductivo ainda ora el a ricibí e sentencia: “Cu sodó di bo cara lo bo come pan te ora bo bolbe na suela, pasobra bo a ser tumá for di dje. Pasobra stof bo ta i na stof lo bo bolbe.” (Génesis 3:19) Pues ora Adam a peca i a cuminsá muri manera Dios a bisa cu lo a sosodé, humanidad completo a ser sentenciá na morto huntu cuné.

P’esei mes apostel Pablo a skirbi despues: “Pa medio di un solo hende [Adam] picá a drenta mundu i morto pa medio di picá, i asina morto a plama na tur hende pasobra nan tur a peca.” (Romanonan 5:12) Sí, pa motibu dje picá original, yunan cu lo mester a nace perfecto pa biba pa semper, awor a bin na mundu pa haña nan cu enfermedad, behes i morto.

Un hende lo por bisa: “Esei no ta hustu. No ta nos a scoge pa desobedecé Dios. Ta Adam. Pakico nos tambe tin cu perde nos chens di biba pa semper den felicidad?” Nos sa cu si un corte laga cera un yu den prizon pasobra su tata a horta un auto, e yu lo tin derecho di reclamá: “Esei no ta hustu! Mi no a haci nada malu.”—Deuteronomio 24:16.

Kisas Satanas a pensa cu lo el a pone Dios dilanti un dilema, ora el a pone e promé homber i muher peca. Diabel a lansa su atake hopi trempan den historia dje rasa humano—promé cu yunan a cuminsá nace. Na momento cu Adam a peca, a lanta un pregunta importante: Kico Jehova lo haci tocante e yunan cu Adam cu Eva lo haña?

Jehova Dios a haci loke tabata hustu. E homber hustu Elihú a declará: “Leu sea dje Dios berdadero pa actua na un manera malbado, i dje Todopoderoso pa actua inhustamente!” (Job 34:10) I profeta Moises a skirbi relacioná cu Jehova: “E Baranca, perfecto ta su actividad, pasobra tur su camindanan ta husticia. Un Dios di fieldad, cu ken no tin inhusticia; hustu i recto e ta.” (Deuteronomio 32:4) E manera cu e Dios berdadero a solucioná e problema cu e picá di Adam a crea no ta kita nos oportunidad di haña bida eterno den un paradijs riba tera.

 Dios Ta Percurá un Solucion Perfecto

Analisá e solucion cu Dios a mencioná den e sentencia cu el a pronunciá contra Satanas e Diabel. Jehova a bisa Satanas: “Lo mi pone enemistad entre abo i e muher [Dios su organisacion celestial] i entre bo simia [mundu bou di dominio di Satanas] i su simia [Jesucristo]. Lo e machicá bo [Satanas] den cabes i abo lo machik’é den hilchi [morto di Jesus].” (Génesis 3:15) Den e promé profecia di Bijbel aki, Jehova a referí na su propósito di laga su Yu spiritual den shelu bini na tera pa biba como e homber perfecto Jesus, anto muri—ser machicá den hilchi—den e condicion sin picá ei.

Pakico Dios a rekerí pa un hende perfecto muri? Wel, kico tabata Jehova Dios su castigu pa Adam si el a peca? Esei no tabata morto? (Génesis 2:16, 17) Apostel Pablo a skirbi cu “e salario cu picá ta paga ta morto.” (Romanonan 6:23) Adam a paga pa su picá cu su mes morto. El a haña bida, ma el a scoge pa peca, i el a muri como castigu pa su picá. (Génesis 3:19) Kico dje condenacion cu a bini riba henter e rasa humano pa motibu dje picá ei? Un morto tabata necesario pa compensá pa nan picánan. Pero ken su morto lo por a cumpli cu e norma legal pa cubri e ofensanan di henter humanidad?

E Ley di Dios n’e nacion di Israel di pasado a exigí “alma pa alma [of, bida pa bida].” (Éxodo 21:23) Segun e principio legal aki, e morto pa cubri e ofensanan di humanidad lo mester tabata di mésun balor cu loke Adam a perde. Ta solamente e morto di un otro hende perfecto lo por a paga e salario di picá. Jesus tabata un hende asina. En berdad, Jesus tabata “un rescate corespondiente” pa salbacion di henter humanidad rescatabel cu a bini for di Adam.—1 Timoteo 2:6; Romanonan 5:16, 17.

Jesus Su Morto Tin Gran Balor

E morto di Adam no tabatin balor; el a merecé di muri pa su picá. Sin embargo, Jesus su morto sí tabatin gran balor pasobra el a muri den un condicion sin picá. Jehova Dios por a aceptá e balor di Jesus su bida perfecto como un rescate p’e desendientenan di Adam pecaminoso. I e balor di Jesus su sacrificio no ta pa compensá solamente nos picánan di pasado. Si esei tabata e caso, nos lo no tabatin futuro. Dor cu nos ta concibí den picá, nos ta faya atrobe sigur. (Salmo 51:5) Nos por ta masha gradicidu cu e morto di Jesus ta duna nos oportunidad pa gana e perfeccion cu Jehova originalmente tabata kier p’e desendientenan di Adam cu Eva haña.

Nos por compará Adam cu un tata cu a muri i laga nos den un debe financiero (picá) asina grandi cu ta imposibel pa nos sali afó. Di otro banda, Jesus ta manera un bon tata cu a muri i laga un herencia grandi pa nos. E herencia aki no solamente ta libra nos for dje debe enorme cu Adam a buta riba nos, sino tambe ta suficiente pa nos por sigui biba pa eternidad. Jesus su morto no ta simplemente un cancelacion di picánan di pasado: e ta tambe un percuracion maraviyoso pa nos futuro.

Jesus ta salba pasobra el a muri pa nos. I su morto sí ta un percuracion di balor! Ora nos mira esei como parti dje manera cu Dios a solucioná e problema complicá di Adam su picá, nos fe den Jehova i su manera di haci cosnan ta bira mas fuerte. Sí, e morto di Jesus ta un medio pa rescatá “tur cu ehercé fe” den dje for di picá, enfermedad, behes i asta morto. (Juan 3:16) Abo ta gradicidu na Dios p’e manera amoroso aki cu el a percurá pa nos salbacion?

[Plachi na página 5]

Adam a trece picá i morto riba humanidad

[Plachi na página 6]

Jehova a percurá un solucion perfecto