Tin Speransa pa Haña Salbacion?

Siglo 20 a ser yamá un dje siglonan mas sangriente cu humanidad a yega di conocé. Foral den e último par di décadanan, crímen, guera, conflicto étnico, uso di droga, falta di onrades i violencia a reina tur caminda. Ademas di tur esaki tin e dolor i sufrimentu cu enfermedad, behes i morto ta causa. Ken no ta anhelá pa ser librá for dje problemanan enorme cu ta asotá mundu awe? Ora nos wak den futuro, tin speransa pa haña salbacion?

TUMA nota dje vision cu a ser confiá na apostel Juan rond di 2.000 aña pasá. El a skirbi: “Mira! E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai.” (Revelacion 21:3, 4) Mescos tambe, profeta Isaías a profetisá: “Lo e realmente traga morto pa semper, i Señor Soberano Jehova sigur lo seca e lágrimanan for di tur cara. I e reproche di su pueblo lo e kita di tur e tera, pasobra Jehova mes a papi’é.”—Isaías 25:8.

Djis imaginá kico e cumplimentu dje promesanan di Dios lo nificá! Humanidad lo ser rescatá of librá for di opresion i violencia i for dje causanan di sufrimentu i angustia. Sí, ni enfermedad, ni behes ni morto lo no tormentá nos mas! Bijbel, e Palabra di Dios, ta primintí bida eterno bou di condicionnan perfecto riba tera. (Lucas 23:43; Juan 17:3) I esaki ta disponibel pa tur hende cu ta deseá esei. “[Dios] su boluntad ta pa tur clase di hende ser salbá i yega na un conocimentu exacto dje berdad.”—1 Timoteo 2:3, 4.

Pero pa beneficiá di Dios su promesanan, nos tin cu comprendé e papel cu Jesucristo ta hunga den nos salbacion anto ehercé fe den dje. Jesus mes a bisa: “Dios a stima mundu asina tantu cu el a duna su Yu unigénito, pa tur cu ehercé fe den  dje no sea destruí sino haña bida eterno.” (Juan 3:16) Apostel Pedro a señalá n’e papel central di Jesucristo den e asuntu aki ora el a bisa: “No tin salbacion den ningun otro, pasobra no tin otro nomber bou di shelu cu a ser duná entre hende mediante cua nos mester ta salbá.” (Echonan 4:12) Apostel Pablo i su amigu Sílas a urgi un persona sincero cu kier a sa mas: “Kere den Señor Jesus i lo bo ser salbá, abo i bo famia di cas.”—Echonan 16:30, 31.

Sí, Jesucristo ta “e Agente Principal di bida,” i ta mediante dje so salbacion ta posibel. (Echonan 3:15) Pero con un solo homber por ta un figura asina clave den nos salbacion? Un comprendimentu cla di e papel cu e ta hunga den nos salbacion mester fortalecé nos speransa pa haña salbacion.

 [Rekonosementu pa Potrèt na página 2]

Página 3: Avionnan cu ta tira bom: potret di USAF; muchanan morto di hamber: UNITED NATIONS/J. FRAND; bapor di guera na candela: potret di U.S. Navy