Historia di Bida

Aceptá Invitacion di Jehova Ta Trece Recompensa

SEGUN E RELATO DI MARIA DO CÉU ZANARDI

“Jehova sa kico e ta haci. Si el manda un invitacion pa bo, bo mester acept’é humildemente.” Asina mi tata a bisa mas o ménos 45 aña pasá. I e palabranan ei a yuda mi aceptá e promé invitacion cu mi a ricibí dje organisacion di Jehova pa sirbi como minister di tempu completo. Te awe mi ta gradicidu na mi tata p’e conseho ei, pasobra dor di aceptá invitacionnan asina mi a ser recompensá ricamente.

NA 1928, Tata a cuminsá aboná riba e revista Toren di Vigilancia, i su interes den Bijbel a lanta. Dor cu e tabata biba den centro di Portugal, su único contacto cu e congregacion di Dios tabata e publicacionnan cu el a ricibí via post i un Bijbel cu tabata di mi welanan. Na 1949 tempu cu mi tabatin 13 aña, nos famia a muda bai Brazil, mi mama su pais natal, i nos a establecé nos mes den e suburbionan di Rio de Janeiro.

Nos bisiñanan nobo a invitá nos na nan misa, i nos a bai un par di biaha. Tata tabata gusta haci nan pregunta tocante fiernu di candela, alma i futuro dje tera. Pero nan no por a contest’é. Tata tabata bisa: “E único cos cu nos por haci ta spera riba e berdadero studiantenan di Bijbel.”

Un dia un homber ciegu a yama na nos porta pa ofrecé E Toren di Vigilancia i Spierta! Tata a puntr’é e mésun cosnan, i el a duna contestanan razonabel for di Bijbel. E siguiente siman un otro Testigo di Jehova a bishitá nos. Despues di a contestá mas pregunta, el pidi despensa i a bisa cu e tin cu bai den “veld.” Ora  Tata a keda sorprendí cu Testigonan ta haci deporte, e Testigo a lesa p’e Mateo 13:38 cu na portugues ta bisa: “E veld ta e mundu.” Tata a puntra: “Mi tambe por bai?” E Testigo a contestá: “Sigur no!” Nos tabata masha contentu cu nos a haña e berdad di Bijbel atrobe! Tata a bautisá n’e siguiente congreso, i ami a bautisá djis despues na november 1955.

Mi A Aceptá Mi Promé Invitacion

Un aña i mei despues mi a ricibí un envelop maron grandi for di e oficina di sucursal di Testigonan di Jehova na Rio di Janeiro. Den dje tabatin un invitacion pa mi drenta den e trabou di predicá di tempu completo. E tempu ei Mama tabata hopi malu, p’esei mi a acercá mi tata pa conseho. Su contesta firme tabata: “Jehova sa kico e ta haci. Si el a manda un invitacion pa bo, bo mester acept’é humildemente.” Animá dor dje palabranan aki, mi a yena e formulario di solicitud, i mi a drenta sirbishi di tempu completo dia 1 di juli 1957. Mi promé asignacion tabata na Três Rios, un pueblo den estado Rio de Janeiro.

Na promé instante, e habitantenan di Três Rios no tabata masha entusiasmá pa scucha nos mensahe pasobra nos no a usa un version di Bijbel católico. Nos a haña yudansa ora nos a cuminsá studia Bijbel cu Geraldo Ramalho, un católico activo. Cu su yudansa mi a logra haña un Bijbel cu firma dje pastor local. For di e tempu ei, ki ora cu un persona bini cu un obhecion, mi tabata mustr’é e firma dje pastor, i e no tabata puntra mas. Despues Geraldo a bautisá.

Mi tabata masha contentu ora cu na 1959 nos a tene un asamblea precis den e centro di Três Rios. E hefe di polis cu durante e tempu ei tabata studia Bijbel asta a haci areglo pa cologá pamfleta den henter e pueblo pa anunciá e programa. Despues cu mi a traha tres aña na Três Rios, mi a haña invitacion pa un asignacion nobo na Itu, rond di 110 kilometer west di São Paulo.

Buki Corá, Buki Blou i Buki Geel

Despues di a busca un poco, ami cu mi partner pionero a haña alohamentu cómodo den centro dje pueblo cerca Maria, un biuda bondadoso. Maria a cuida nos como si fuera nos tabata su yunan. Sin embargo, no a dura mashá cu el a haña bishita di e obispu católico romano di Itu cu a bis’é p’e core cu nos. Pero el a para firme i bisa: “Dia mi casá a muri, boso no a haci nada pa consolá mi. E Testigonan di Jehova aki sí a yuda mi maske mi no ta miembro di nan religion.”

Rond di e tempu ei, un señora a informá nos cu e pastornan católico di Itu a prohibí nan parokianonan di aceptá ehemplar di “e buki corá tocante Diabel.” Nan tabata referí na “Laga Dios Sea Hañá Berdadero,” cu ta un publicacion basá riba Bijbel cu nos tabata ofrecé hende durante siman. Ya cu e pastornan a “prohibí” e buki corá, nos a prepará un presentacion pa ofrecé e buki blou (“Shelu Nobo i  un Tera Nobo”). Despues, ora clero a haña sa dje cambio aki, nos a usa e buki geel (Kico Religion A Haci pa Humanidad?), i asina nos a sigui. Ta bon cu nos tabatin vários buki cu cada un otro color di kaft!

Despues cu mi tabatin mas o ménos un aña na Itu, mi a ricibí un invitacion via telegram pa mi bin traha temporalmente na Betel, e oficina di sucursal di Testigonan di Jehova na Rio de Janeiro, pa yuda prepará p’e asamblea nacional. Mi a aceptá gustosamente.

Mas Privilegio i Desafio

Na Betel tabatin hopi trabou, i mi tabata contentu di por yuda caminda tabata posibel. Tabata mashá educativo pa asistí como famia tur mainta na e consideracion dje texto di dia, i tur dialuna atardi n’e Studio di Toren di Vigilancia! E oracionnan sincero di Otto Estelmann i otro miembronan experenciá dje famia di Betel tabatin un influencia profundo riba mi.

Despues di e asamblea nacional mi a paketá mi maleta pa mi regresá Itu. Pero pa mi sorpresa, e sirbidó di sucursal, Grant Miller, a duna mi un carta di invitacion pa bira un miembro permanente di e famia di Betel. Mi compañera di cuarto, ruman Hosa Yazedjian, te ainda ta sirbi na Betel di Brazil. E tempu ei e famia di Betel tabata chikitu, nos tabata 28 persona so, i nos tur tabata amigu cerá.

Na 1964, João Zanardi, un minister di tempu completo hóben, a bin Betel pa ricibí entrenamentu. E tempu ei e tabata asigná den cercania como sirbidó di circuito, esta, un superintendente biahero. Nos tabata topa de bes en cuando ora e tabata bin Betel pa entregá su raportnan. Dor cu e sirbidó di sucursal a duna João permit pa asistí n’e studio di famia riba dialuna anochi, nos por a pasa mas tempu huntu. Na augustus 1965 ami cu João a casa. Contentu mi a aceptá e invitacion pa djoin mi casá den e trabou di circuito.

Durante e tempu ei, traha den e parti interior di Brazil tabata manera un aventura. Nunca mas lo mi lubidá e bishita cu nos a haci cerca e grupo di publicadó na Aranha, na estado Minas Gerais. Nos mester a coge trein i despues cana e resto dje caminda. Anto nos tabata cargá cu maleta, mashin di tik, proyector pa pasa slide, tas di sirbishi i literatura. Nos a keda masha contentu cu Lourival Chantal, un ruman homber di edad, tabata warda nos na stacion p’e yuda nos carga nos ekipahe.

Na Aranha nan tabata tene e reunionnan den un cas di huur. Nos a drumi den un kamber chikitu parti patras. Na un banda dje kamber nos tabata cende un candela cu palu pa cushiná i herebé awa cu e rumannan tabata trece pa nos den hember. Un buracu den tera meimei di un plantacion di bambu den cercania a sirbi como wc. Anochi nos tabata laga un lampi di gas cendé pa desviá tòr barbero—insecto cu por transmití e malesa di Chagas. Tur mainta nos tabata lanta cu nos nanishi pretu-pretu di huma. Un experencia basta interesante!

Ora nos tabata sirbiendo den un circuito na estado Paraná, nos a bolbe ricibí un dje envelopnan maron grandi for di oficina di sucursal. Un otro invitacion for dje organisacion di  Jehova, pero e biaha aki pa bai sirbi na Portugal! E carta a consehá nos pa considerá e principio di Lucas 14:28 i calculá e gastu promé cu nos aceptá e asignacion aki pasobra nos obra cristian tabata prohibí na e pais ei. I gobiernu di Portugal a arestá hopi ruman caba.

Nos mester a bai un pais caminda nos lo haña nos cu e clase di persecucion ei? João a puntra: “Si e rumannan portugues por biba einan i sirbi Jehova fielmente, di con nos no por?” Ora mi a corda riba e palabranan di animacion di mi tata, mi a bai di acuerdo: “Si Jehova a manda un invitacion pa nos, nos mester acept’é i confia den Jehova.” Djis despues di esei, nos tabata na Betel na São Paulo ta ricibí mas instruccion i prepará nos documentonan p’e biahe.

João Maria cu Maria João

Dia 6 di september 1969, nos boto Eugênio C a sali for di haf di Santos, estado São Paulo. Despues di a nabegá nuebe dia nos a yega Portugal. Na promé instante nos a traha vários luna huntu cu rumannan experenciá den e cayanan smal di Alfama i Mouraria, den e distrito bieu di Lisboa. Nan a entrená nos pa nos paga tinu di tal forma cu polis lo no gara nos fácil.

Nos tabata tene e reunionnan di congregacion den cas di Testigonan. Asina cu nos a ripará cu e bisiñanan ta bira sospechoso, mesora nos tabata muda e reunionnan pa un otro sitio ya polis no ta bin tene razia den e cas of arestá e rumannan. Nos tabata tene nos asambleanan (cu nos tabata yama picnic) na Parke Monsanto, situá pafó di Lisboa, i tambe na Costa da Caparica, un área yen di palu cant’i costa. Nos bistínan p’e ocasion tabata casual, i un grupo di vigilante a tene warda na sitionan stratégico. Si tabatin un hende sospechoso na caminda, nos tabatin tempu pa improvisá un wega, cuminsá cu e picnic of cuminsá canta un cantica folklórico.

Pa haci mas difícil pa polis di siguridad identificá nos, nos a evitá di usa nos nomber mes. E rumannan tabata conocé nos como João Maria i Maria João. Nos no tabata usa nos nomber den ningun corespondencia ni registro. En bes di esei, nos tabata usa number. Concientemente mi a haci esfuerso pa no corda adres dje rumannan for di mi cabes. Di e  forma ei, si polis a arestá mi mes, lo no ta posibel pa mi traicioná mi rumannan.

Apesar di e restriccionnan, ami cu João tabata decididu pa probechá di tur oportunidad cu nos haña pa predicá, pasobra nos tabata sa cu un ora pa otro nos por a perde nos libertad. Nos a siña dependé riba nos Tata celestial Jehova. Como nos Protector, el a usa su angelnan di tal manera cu nos a sinti cu nos tabata “mira Esun cu ta invisibel.”—Hebreonan 11:27.

Un biaha cu nos tabata predicá di cas pa cas na Porto, nos a topa un homber cu a insistí pa nos drenta. Dor cu e ruman muher cu mi tabata traha cuné a aceptá mesora, mi no por a haci nada otro cu siguié. Pero mi a spanta sin fin ora mi a ripará cu den gang di e cas tabatin un potret di un persona cu uniform militar. Kico awor? E meneer cu a laga nos drenta a bisa nos sinta, i el a puntra mi: “Si nan manda yama bo yu homber, lo bo lagu’é sirbi den ehército?” E situacion tabata delicado. Despues cu mi a haci oracion den silencio mi a respondé trankil: “Mi no tin yu, i mi tin sigur cu si ta ami a haci bo un pregunta imaginario asina, lo bo a contestá mi mescos.” El a keda ketu. Pues mi a sigui: “Awor, si bo kier puntra mi con un hende ta sinti ora e perde un ruman homber of su tata, esei sí mi por contestá. Pasobra tantu mi ruman homber como mi tata a muri.” Segun cu mi tabata papia, mi wowo a yena cu awa, i mi a ripará cu e homber tambe casi a cuminsá yora. El a conta nos cu recientemente su casá a muri. Ora nos a splica e speransa di resureccion, el a scucha cu hopi atencion. Despues nos a yam’é ayó nèchi i a sali bai sano i salbo, lagando e asuntu den man di Jehova.

Apesar di e prohibicion, nos a yuda hende sincero gana conocimentu di e berdad. Ta na Porto mi casá a cuminsá un studio cu Horácio, un negoshante cu a progresá rápidamente. Despues su yu homber Emílio, kende tabata un dokter excelente, tambe a tuma su posicion na banda di Jehova i a bautisá. Realmente no tin nada cu por stroba Jehova su spiritu santu.

“Nunca Bo No Sa Kico Jehova Lo Permití”

Na 1973, ami cu João a haña invitacion pa asistí n’e asamblea Internacional “Victoria Divino” na Brussel, Bélgica. Tabatin miles di ruman di Bélgica i Spaña presente. Tambe tabatin delegado di Mozambique, Angola, Cabo Verde, Madeira i Azóres. Den su comentarionan di conclusion, ruman Knorr di sede mundial na New York a urgi: “Sigui sirbi Jehova fielmente. Nunca bo no sa kico Jehova lo permití. Ken sa, kisas e siguiente congreso internacional na cua boso lo asistí ta na Portugal!”

E siguiente aña e trabou di predicá a haña reconocimentu legal na Portugal. I e palabranan  di ruman Knorr a bira realidad na 1978, ora nos a tene nos promé congreso internacional na Lisboa. Tabata un privilegio pa participá den un marcha den e cayanan di Lisboa! Nos a duna testimonio cu poster, revista i invitacion pa e discurso público. Tabata manera un soño a bira realidad.

Nos a stima nos rumannan portugues. Hopi di nan a ser encarcelá i batí pasobra nan a mantené nan neutralidad cristian. Nos deseo tabata pa sigui sirbi na Portugal. Pero no tabata posibel. Na 1982 João a haña problema serio cu su curason, i e oficina di sucursal a sugerí pa nos bai Brazil bek.

Un Tempu di Prueba

E rumannan dje sucursal di Brazil a yuda nos bon i nan a asigná nos n’e congregacion Quiririm na Taubaté, estado São Paulo. João su salú a bai atras lihé, i den poco tempu e no por a sali fo’i cas mas. Personanan interesá a bini nos cas pa studia Bijbel. Tambe a tene reunion di sirbishi tur dia na nos cas i e studio di buki tur siman. E areglonan aki a yuda nos mantené nos spiritualidad.

João a sigui haci loke e tabata por den sirbishi di Jehova te na su morto dia 1 di october 1985. Maske mi tabata tristu i un poco deprimí, mi tabata decididu pa sigui cu mi asignacion. Mi a haña mi cu un otro contratempu na april 1986 ora cu ladron a drenta mi cas i a horta casi tur cos. Pa promé bes den mi bida mi a sinti mi so i cu miedu. Amorosamente, un pareha a invitá mi pa keda un par di tempu cerca nan. Mi a keda masha gradicidu pa esaki.

E morto di João i e ladronicia a afectá mi sirbishi na Jehova tambe. Mi no tabata sinti mi sigur mas den sirbishi. Despues cu mi a skirbi e oficina di sucursal tocante e problema, nan a invitá mi pa pasa un poco tempu na Betel pa asina yuda mi recobrá mi ekilibrio emocional. Mi estadia einan a fortalecé mi mashá!

Asina cu mi a sinti mihó, mi a aceptá un asignacion pa sirbi na Ipuã, un stad den estado di São Paulo. Maske e trabou di predicá a tene mi ocupá, tabatin bes cu mi a sinti mi desanimá. Na momentonan asina, mi tabata bel e rumannan di congregacion Quiririm, i un famia tabata bin bishitá mi pa un par di dia. E bishitanan aki tabata realmente animante! Durante mi promé aña na Ipuã, 38 ruman a haci e biahe largu pa bin bishitá mi.

Na 1992, seis aña despues di morto di João, mi a ricibí un otro invitacion for di Jehova su organisacion. E biaha aki pa mi muda bai Franca, estado São Paulo, caminda ainda mi ta sirbi como minister di tempu completo. E teritorio akinan ta masha productivo. Na 1994 mi a cuminsá un studio di Bijbel cu e alcalde. Durante e tempu ei e tabata den campaña p’e haña un puesto den congreso di Brazil. Pero apesar di su programa ocupá nos a studia tur dialuna atardi. Pa evitá interupcion, e tabata paga su telefon. Mi a keda masha felis di mir’é progresá gradualmente i retirá for di política. Loke tambe a haci mi felis ta cu e berdad a yud’é drecha su matrimonio! E cu su casá a bautisá na 1998.

Mirando atras mi por bisa cu mi bida como minister di tempu completo ta un bida yen di bendicion i privilegionan grandi. Dor cu mi a aceptá e invitacionnan cu Jehova a extendé na mi via su organisacion, mi a ser recompensá ricamente. I sea cual sea e invitacionnan cu bini den futuro, mi ta mas dipuesto cu nunca pa aceptá nan.

[Plachinan na página 25]

Na 1957, ora mi a drenta sirbishi di tempu completo, i awe

[Plachi na página 26]

Huntu cu e famia di Betel di Brazil na 1963

[Plachi na página 27]

Nos casamentu na augustus 1965

[Plachi na página 27]

Un asamblea na Portugal, miéntras e trabou tabata prohibí

[Plachi na página 28]

Predicando riba caya na Lisboa durante e Congreso Internacional di 1978 “Fe Victorioso”