Bo Por Evitá un Atake di Curason Spiritual

Un atleta di nivel mundial cu tabata excelente den su ramo di deporte, i cu a parce di ta den excelente condicion físico, a cai muri di ripiente durante entrenamentu. E atleta tabata Sergei Grinkov. Dos bes el a yega di gana medaya Olímpico di oro pa schaatsen. Net ora su carera a cuminsá coge un bon rumbo el a terminá di ripiente, ora e atleta tabatin apénas 28 aña di edad. Esta un tragedia! Di kico el a muri? Di un atake di curason. Nan ta bisa cu su morto a bini totalmente di sorpresa, pasobra no tabatin ningun señal cu a indicá cu e tabatin problema di curason. Pero esnan cu a examin’é a nota cu su curason tabata hinchá, i cu su adernan di curason tabata mal blokeá.

MASKE por parce cu hopi atake di curason ta sosodé sin duna aviso, autoridadnan médico ta bisa cu masha poco bes esei ta e caso. Echo ta cu hopi bes hende ta ignorá indicacionnan i factornan cu ta yuda hiba na un atake, manera rosea corticu, sobrepeso i dolor den pechu. Como resultado, asta si e víctimanan no muri ora nan haña e atake, hopi ta keda cu problema di salú grave pa resto di nan bida.

Awendia mayoria autoridad médico ta di acuerdo cu pa bo evitá un atake di curason, bo mester vigilá constantemente bo dieta i bo estilo di bida, i haci chekeo médico regular. * Si bo tuma e medidanan ei, i bo ta berdaderamente dispuesto di haci cambio caminda ta necesario, esei lo yuda bo scapa e efectonan trágico di un atake di curason.

Pero tin un otro aspecto di nos curason cu merecé asta mas atencion. Bijbel ta advertí nos: “Mas cu tur cos cu tin cu ser vigilá, protehá bo curason, pasobra for di dje ta e fuentenan di bida.” (Proverbionan 4:23) Claro cu e texto bíblico aki ta referí principalmente na nos curason simbólico. Nos mester paga tinu pa cuida nos curason físico, pero ta asta mas importante pa nos keda alerto si nos  kier protehá nos curason simbólico contra enfermedadnan cu por hiba na morto spiritual.

Análisis di un Atake di Curason Simbólico

Mescos cu den caso di malesa di curason literal, un dje mihó maneranan pa evitá un atake di curason spiritual ta dor di siña kico ta e cosnan cu ta caus’é, i dal paso pa evitá nan. P’esei, laga nos wak un par di factor básico cu ta contribuí na problema di curason—tantu esun literal como esun simbólico.

Comementu. Mayoria hende ta di acuerdo cu maske ‘junk food’ ta dushi, e ta di poco of ningun beneficio pa bo salú. Junk food pa bo mente tambe ta fácil pa haña, i e por ta dushi pa mira of tende, pero e ta malu pa bo salú spiritual. Medionan di comunicacion ta yen di sex, droga, violencia i cos sobrenatural, cu nan ta presentá na nos cu hopi astucia. Alimentá nos mente cu e tipo di cosnan ei por ta fatal pa nos curason simbólico. E Palabra di Dios ta duna e advertencia aki: “Tur loke tin den mundu—e deseo di carni i e deseo di wowo i e exhibicion grandioso di bo medio di biba—no ta originá cu e Tata, sino ta originá cu mundu. Ademas, mundu ta pasa bai i tambe su deseo, pero esun cu haci e boluntad di Dios ta permanecé pa semper.”—1 Juan 2:16, 17.

Cuminda saludabel manera fruta i berdura no ta atraé un adicto di junk food. Asina tambe, kisas cuminda spiritual saludabel i sólido no ta atraé un hende cu a custumbrá di alimentá su mente i curason cu cos mundano. Kisas e “lechi” dje Palabra di Dios ta yud’é keda na bida pa un tempu. (Hebreonan 5:13) Riba término largu e no ta desaroyá e madures spiritual necesario p’e carga su responsabilidadnan spiritual básico den e congregacion cristian i den e ministerio. (Mateo 24:14; 28:19; Hebreonan 10:24, 25) Algun hende den e situacion ei a permití nan fortalesa spiritual baha te na e punto cu nan a bira inactivo. Nan ta bira Testigonan cu no ta practicá nan fe!

Un otro peliger ta cu aparencia por gaña. Dor di cumpli cu su debernan cristian “djis pa cumpli numa,” un cristian lo por tapa e echo cu su curason simbólico ta birando dia pa dia mas swak dor cu den secreto e ta permití su mes di bai tras di filosofianan materialista, of entretenimentu cu ta contené inmoralidad, violencia of spiritismo. Kisas un mal dieta spiritual asina no ta parce di tin ningun efecto riba nos spiritualidad, pero e por para nos curason simbólico mescos cu malnutricion por haci nos adernan duru i daña nos curason literal. Jesus a spierta nos pa no laga deseo robes drenta nos curason. El a bisa: “Tur cu sigui wak un muher afin di tene pasion p’e ya a cometé adulterio cuné caba den su curason.” (Mateo 5:28) Sí, un mal dieta spiritual por hiba na un atake di curason spiritual. Pero tin mas cos cu mester paga tinu cuné.

 Ehercicio. Ta bon conocí cu un estilo di bida cu tiki movecion por yuda hiba na atake di curason. Mescos, un estilo di bida cu poco actividad spiritual tambe por tin consecuencia serio. Por ehempel, kisas un hende ta participá te na cierto grado den e ministerio cristian. Pero e ta haci esaki te caminda e ta sintié cómodo, esta, tanten cu e no strob’é cu cosnan cu e gusta. Kisas e no ta haci esfuerso p’e bira “un trahadó sin nada di tene bergwensa di dje, manehando e palabra dje berdad corectamente.” (2 Timoteo 2:15) Of kisas nos ta bai reunion cristian pero sin haci masha esfuerso pa prepará, of participá den nan. Kisas e persona no tin meta spiritual ni entusiasmo pa cos spiritual. Cu tempu e falta di ehercicio spiritual aki ta swak e fe cu nos por tabatin un tempu, i asta caba cuné mes. (Santiago 2:26) Apostel Pablo a papia dje peliger aki ora el a skirbi e cristiannan hebreo, dor cu aparentemente algun di nan a cai den un estilo di bida asina, cu tiki actividad spiritual. Wak con el a spierta nan dje mal efecto cu esaki por tabatin riba nan spiritualidad. “Cuidou, rumannan, pa nunca desaroyá den un di boso un curason malbado cu ta falta fe, dor di hala for dje Dios bibu; pero sigui consehá otro tur dia, miéntras cu e por ser yamá ‘Awe,’ pa temor cu un di boso bira duru dor dje poder engañoso di picá.”—Hebreonan 3:12, 13.

Stres. Otro causa principal di atake di curason literal ta stres di mas. Mescos, ta fácil pa stres, of “ansiedadnan di bida,” resultá fatal pa nos curason simbólico. E ansiedadnan aki por asta pone e víctima stop di sirbi Dios por completo. E advertencia di Jesus tocante e asuntu aki ta oportuno: “Presta atencion na boso mes pa boso curason nunca bira cargá debí na comementu di mas i bebementu di mas i ansiedadnan di bida, i di ripiente e dia ei ta riba boso instantáneamente manera un las.” (Lucas 21:34, 35) Stres por afectá nos curason simbólico tambe si nos ta sufri debí na un picá secreto pa muchu hopi tempu. Rey David a siña di experencia cuantu dolor e tipo di stres perhudicial ei por causa. El a bisa: “No tin pas den mi wesunan pa motibu di mi picá. Pasobra mi mes erornan a pasa riba mi cabes; manera un carga pisá nan ta demasiado pisá pa mi.”—Salmo 38:3, 4.

Confiansa di mas. Hopi víctima di atake di curason tabata bon confiá cu nan tabatin bon  salú, net promé cu nan a sufri un atake di curason. Hopi di nan no a preocupá pa haci chekeo na dokter, i tin di nan a asta haci mofa dje idea, pasobra segun nan un chekeo tabata completamente innecesario. Mescos, kisas algun hende ta pensa cu, ya cu nan tin basta tempu como cristian, nada lo por pasa nan. Kisas nan ta keda sin haci chekeo spiritual, esta, examiná nan mes estado spiritual, te ora desaster dal aden. Ta esencial pa nos tene na mente e bon conseho cu apostel Pablo a duna contra confiansa di mas: “Laga esun cu ta kere cu e ta pará tene cuidou p’e no cai.” E proceder sabí ta di reconocé cu nos ta imperfecto, i examiná nos spiritualidad regularmente.—1 Corintionan 10:12; Proverbionan 28:14.

No Ignorá Señalnan di Advertencia

Ta cu bon motibu Bijbel ta duna tantu prioridad na e estado di nos curason simbólico. Na Jeremías 17:9 i 10 nos ta lesa: “E curason ta mas traicionero cu cualkier otro cos i ta desesperá. Ken por conoc’é? Ami, Jehova, ta scudriñá e curason, ta examiná e nirnan, sí, pa duna cada un di acuerdo cu su camindanan, di acuerdo cu e fruta di su tratonan.” Pero ademas di examiná nos curason, Jehova ta haci percuracionnan amoroso disponibel tambe pa yuda nos examiná nos mes manera mester ta.

Via “e esclabo fiel i discreto” nos ta ricibí recordatorio oportuno. (Mateo 24:45) Por ehempel, un dje maneranan principal cu nos curason simbólico lo por gaña nos, ta dor di pone nos entregá na fantasia mundano. Esei ta encerá imaginá cos irealístico, soña lantá of pensa leu. E cosnan aki por bira hopi perhudicial, specialmente si nan lanta pensamentu impuru. P’esei, nos mester rechasá nan completamente. Si nos ta odia maldad mescos cu Jesus, nos lo protehá nos curason pa nos no entregá na fantasia mundano.—Hebreonan 1:8, 9.

Ademas nos tin yudansa di anciano amoroso den e congregacion cristian. Pero maske nos ta apreciá ora otro hende ta mustra interes den nos, ta cada un di nos mes tin e responsabilidad primario di cuida nos curason simbólico. Ta nos mester “haci sigur di tur cos” i ‘sigui examiná si nos ta den e fe.’—1 Tesalonicensenan 5:21; 2 Corintionan 13:5.

Protehá Bo Curason

E principio bíblico cu ta bisa cu “kico cu un hende sembra, esaki lo e cosechá tambe” ta conta pa nos curason spiritual tambe. (Galationan 6:7) Hopi bes ta resultá cu loke por parce di ta un desaster spiritual repentino a bini dor di un trayectoria largu di entrega na actividadnan spiritualmente perhudicial, manera wak pornografia, interesá muchu den cos material, of bringa pa haña prominencia of poder.

P’esei, pa nos protehá nos curason, ta esencial pa nos vigilá nos dieta spiritual. Nos mester alimentá nos mente i nos curason cu e Palabra di Dios. Nos mester evitá e junk food mental cu ta asina fácil pa haña i asina atractivo pa nos carni. Tur loke e ta hiba na dje ta cu nos curason simbólico ta perde heful. E salmista ta spierta nos usando un comparacion apropiado i médicamente corecto tambe: “Nan curason a bira sin heful mescos cu vet.”—Salmo 119:70.

Si bo tin erornan secreto ta cometé pa basta tempu, traha duru pa deshací di nan, pa nan no blokea bo adernan simbólico. Si mundu cuminsá parce bo atractivo, i den bo bista ta parce cu e tin hopi placer di ofrecé, meditá riba e conseho sabí cu apostel Pablo a duna. El a skirbi: “Mi ta bisa esaki, rumannan, e tempu  cu a keda ta reducí. Di awor padilanti, laga esnan cu . . . ta haci uso di mundu [sea] manera esnan cu no ta us’é plenamente; pasobra e esena dje mundu aki ta cambiando.” (1 Corintionan 7:29-31) I si rikesa material cuminsá hala bo atencion, tuma na pechu loke Job a bisa: “Si mi a pone oro como mi siguridad, of mi a bisa oro: ‘Abo ta mi confiansa!’ Esei tambe lo tabata un eror p’e atencion dje huesnan, pasobra lo mi a nenga e Dios berdadero cu ta ariba.”—Job 31:24, 28; Salmo 62:10; 1 Timoteo 6:9, 10.

E spiertamentu aki di Bijbel ta mustra con serio ta si nos cria un custumber di ignorá conseho bíblico: “Un homber reprendé bes tras bes pero cu ta haci su garganta stijf, lo ser kibrá di ripiente, i esei sin curacion.” (Proverbionan 29:1) Pero di otro banda, si nos cuida nos curason simbólico bon, nos por tin e placer i pas mental cu nos ta haña dor di biba un bida simpel i organisá. Semper esaki tabata e tipo di bida cu cristianismo berdadero a recomendá. Apostel Pablo a ser inspirá pa skirbi: “Siguramente, e ta un medio di gran ganashi, e debocion na Dios aki huntu cu keda satisfecho cu loke bo tin. Pasobra nos no a trece nada na mundu, ni tampoco nos no por hiba nada cu nos. Pues, teniendo cuminda, paña i dak, nos lo keda contentu cu esakinan.”—1 Timoteo 6:6-8.

Sí, entrená i ehercitá nos mes den e caminda di debocion na Dios lo garantisá cu nos tin un curason simbólico salú i fuerte. Dor di paga bon tinu con nos ta alimentá nos mes spiritualmente, nos lo no laga lugá pa e custumber i pensamentu destructivo dje mundu aki haci nos spiritualidad niun daño. Mas cu tur cos, laga nos aceptá loke Jehova ta percurá via su organisacion, i examiná nos curason simbólico regularmente. Si nos haci asina diligentemente, esei lo yuda hopi pa nos evitá e consecuencianan lamentabel di un atake di curason spiritual.

[Nota]

[Komentario na página 10]

UN DIETA SPIRITUAL ROBES POR PARA NOS CURASON SIMBÓLICO MESCOS CU UN MAL DIETA POR HACI ADER DURU I DAÑA NOS CURASON LITERAL

[Komentario na página 10]

UN ESTILO DI BIDA CU POCO ACTIVIDAD SPIRITUAL POR TIN CONSECUENCIA SERIO

[Komentario na página 11]

TA FÁCIL PA “ANSIEDADNAN DI BIDA” RESULTÁ FATAL PA NOS CURASON SIMBÓLICO

[Plachi na página 11]

Neglishá nos salú spiritual por hiba na problema grandi

[Plachinan na página 13]

Si nos desaroyá bon custumber spiritual, esei lo protehá nos curason simbólico

[Rekonosementu pa Potrèt na página 9]

AP Potret/David Longstreath