Informe di Proclamadónan di Reino

“Bo Tin Number Robes”

NA Johannesburg, Sur África, Leslie cu Caroline tabata predicá beurt pa beurt via telefon na hende den un comunidad di hende di edad caminda bo no por drenta sin permit. Nan a haña masha poco hende na cas, i e hendenan no tabatin masha interes den nan mensahe cristian. P’esei, ora un señora a contestá, Caroline a sintié animá.

Caroline a puntra: “Ta sra. B—?”

Un stem amigabel a contestá: “No, ta sra. G—. Bo tin number robes.”

Dor cu Caroline a nota con amabel su stem a zona, el a bisa: “Wel, laga mi splica Señora ta kico mi kier a bisa sra. B—.” E ora ei el a cuminsá papi’é tocante e bendicionnan dje Reino di Dios cu ta na caminda. Despues cu nan a haci areglo pa Caroline pasa laga e foyeto Kico Dios Ta Rekerí di Nos?, sra. G— a puntr’é: “Anto ta di ki religion boso ta?”

Caroline a respondé: “Nos ta Testigonan di Jehova.”

“Ai no, e religion ei sí no! Mihó boso no bini.”

Caroline a puntr’é sinceramente: “Pero sra. G—, pa 20 minuut mi a compartí un speransa asina maraviyoso cu Señora, mustrando Señora for di Bijbel kico e Reino di Dios ta bai haci pronto pa humanidad. Señora a keda masha contentu—asta excitá—di tende e cosnan aki, i Señora kier a sa mas. Kico Señora sa eigenlijk tocante Testigonan di Jehova? Si Señora ta malu, Señora lo bai un mecánico? Di con Señora no ta laga ami mes bisa Señora kico Testigonan di Jehova ta kere aden?”

Despues di un silencio breve, e señora a contestá: “Bo tin rason sí. Mihó bo bini numa. Pero corda cu ami sí lo bo no combertí nunca!”

Caroline a contestá: “Sra. G—, ni si mi tabata kier lo mi no por combertí Señora. Ta Jehova so por.”

E bishita pa pasa laga e foyeto a bai bon, i sra. G— (Betty) a bai di acuerdo pa Caroline bolbe bishit’é. Ora Caroline a bolbe cerca dje, Betty di cu el a bisa e señoranan cu ta sinta na mesa cuné pa come, cu e tabata papiando cu Testigo di Jehova. Nan a hisa man na laira i puntr’é: “Con bo por haci un cos asina? E hendenan ei no ta ni kere den Jesus!”

Mesora Caroline a corda Betty kico tabata e punto principal di nan último combersacion tocante e Reino di Dios.

Caroline a puntr’é: “Ken lo ta e Rey?”

Betty a contestá: “Jesus, no!”

Caroline di: “Precis.” E ora ei el a cuminsá splik’é cu Testigonan di Jehova ta kere cu Jesus ta e Yu di Dios, pero no cu e ta igual cu Dios como parti di un Trinidad.—Marco 13:32; Lucas 22:42; Juan 14:28.

Despues di un par di bishita mas, a bira obvio cu aunke e tabatin un spiritu positivo i contentu, Betty su salú no tabata bon. De echo, e tabatin cancer i e tabatin miedu di muri. El a confesá: “Mare mi por a tende e cosnan aki hopi aña pasá pa mi por tin mes tantu fe cu abo.” Caroline a consol’é dor di lagu’é mira pasashinan di Bijbel cu ta mustra cu morto ta manera un soño profundo, i cu hende por lanta for di dje den e resureccion. (Juan 11:11, 25) Esei a yuda Betty hopi, i awor e ta disfrutá di un studio di Bijbel regular. Ta su salú cu ta sigui bai atras so ta strob’é di asistí na reunionnan na Salon di Reino.

Caroline ta remarcá: “Pa mi, ta bisto cu angel ta dirigí e trabou aki. Pasobra, ta pa motibu cu mi a bel un ‘number robes,’ mi a haña Betty, anto pa coroná asuntu ta 89 aña e tin!”—Revelacion 14:6.