E Regla di Oro Ta Práctico

Aunke mayoria hende ta pensa cu e Regla di Oro ta un siñansa moral cu Jesus a formulá, e mes a bisa: “Loke mi ta siña no ta di mi, sino ta pertenecé na esun cu a manda mi.”—Juan 7:16.

SÍ, TA esun cu a manda Jesus, esta, e Creador Jehova Dios, ta e Originador di loke Jesus a siña, entre otro loke despues a bira conocí como e Regla di Oro.

Originalmente Dios su propósito tabata pa henter humanidad trata otro manera nan mes lo kier pa hende trata nan. É a pone e mihó ehempel posibel den e manera cu el a mustra interes den e bienestar di hende ora el a crea nan: “Dios a procedé na crea hende den su imágen, den imágen di Dios el a cre’é; machu i hembra el a crea nan.” (Génesis 1:27) Esei kier men cu amorosamente Dios a duna hende un midí di su propio cualidadnan maraviyoso pa nan por a gosa di bida den pas, felicidad i armonia—i posiblemente pa semper.  Cu bon entrenamentu, e concenshi cu Dios a duna nan lo a guia nan pa trata otro hende manera nan mes lo kier pa hende trata nan.

Egoismo A Tuma Control

Ya cu humanidad tabatin un comienso asina maraviyoso, ta kico a pasa anto? Den poco palabra, loke a pasa ta cu hende a cuminsá actua egoista. Mayoria hende ta bon conocí cu e relato bíblico na Génesis capítulo 3 cu ta mustra loke e promé pareha humano a haci. Instigá dor di Satanas, un opositor di tur Dios su normanan hustu, Adam cu Eva a rechasá Dios su gobernacion egoistamente, i a preferá independencia i autodeterminacion. Nan accion egoista i rebelde a hiba no solamente na un gran pérdida pa nan mes, sino tambe na consecuencianan trágico pa tur nan desendientenan den futuro. Esaki ta mustra bon cla ki consecuencia desastroso tin ora nos ignorá e siñansa cu despues a bira conocí como e Regla di Oro. Como resultado, “pa medio di un solo hende picá a drenta mundu i morto pa medio di picá, i asina morto a plama na tur hende pasobra nan tur a peca.”—Romanonan 5:12.

Apesar cu henter humanidad a bira lomba pa Jehova Dios su forma amoroso di actua, é no a bandoná nan. Por ehempel Jehova a duna e nacion di Israel su Ley pa guia nan. El a siña nan trata otro hende manera nan mes lo kier pa hende trata nan. E Ley a duna nan guia tocante con pa trata cu esclabo, yu sin tata i biuda. El a detayá con mester trata cu atraco, secuestro i hortamentu. Leynan di higiena tabata un muestra di interes den salú di otro hende. Tabatin ley asta tocante asuntunan cu tin di haber cu sexualidad. Jehova a resumí su Ley dor di bisa e pueblo: “Bo tin cu stima bo próhimo mescos cu bo mes,” un declaracion cu despues Jesus a cita. (Levítico 19:18; Mateo 22:39, 40) Tambe e Ley a mustra con mester a trata stranheronan cu tabata meimei  dje israelitanan. E Ley a manda: “Bo no mag oprimí un residente stranhero, pasobra boso mes a conocé alma di residente stranhero, pasobra boso tabata residente stranhero den tera di Egipto.” Cu otro palabra, e israelitanan mester a mustra bondad comprensivo na hende den situacion desfaborabel.—Éxodo 23:9; Levítico 19:34; Deuteronomio 10:19.

Tanten cu Israel a keda sigui e Ley fielmente, Jehova a bendicioná e nacion. Bou di reinado di David cu Sálomon, e nacion a prosperá i e pueblo tabata felis i satisfecho. Un relato histórico ta conta nos: “Huda i Israel tabata hopi, manera e pipitanan di santu cu tin cant’i laman di hopi cu nan tabata, comiendo i bebiendo i alegrando. I Huda i Israel a sigui biba den siguridad, cada un bou di su mes mata di wijndruif i bou di su mes palu di figu.”—1 Reynan 4:20, 25.

Lamentablemente, e pas i siguridad dje nacion no a dura largu. Maske e israelitanan tabatin e Ley di Dios, nan no a cumpli cuné. Nan a laga egoismo sofocá nan interes den hende. Esaki, i tambe nan apostasia, a pone nan pasa den tempu difícil, individualmente i como nacion. Finalmente na aña 607 P.E.C., Jehova a permití e babilonionan destruí e reino di Huda, e stad Jerusalem, i asta e magnífico tempel den dje. Pa ki motibu? “‘Pa motibu cu bo no a obedecé mi palabranan, ata mi ta manda i lo mi tuma tur e famianan di nort,’ ta e expresion di Jehova, ‘i asta mi ta manda Nabucodonosor rey di Babilonia, mi sirbidó, i lo mi trece nan contra e tera aki i contra su habitantenan i contra tur e nacionnan aki tur rond; i lo mi destruí nan completamente i haci nan bira un obheto di asombro i algu pa fluit i lugánan ruiná pa tempu indefiní.’” (Jeremías 25:8, 9) Esta un prijs nan mester a paga dor cu nan a bandoná Jehova su adoracion puru!

Un Ehempel pa Nos Imitá

Jesucristo, di otro banda, no a djis siña hende e Regla di Oro. E mes a duna e mihó ehempel pa mustra con mester aplik’é. E tabatin interes sincero den bienestar di otronan. (Mateo 9:36; 14:14; Lucas 5:12, 13) Na un ocasion, cerca dje stad Nain, Jesus a mira un biuda cu curason kibrá den un procesion di entiero di su único yu. E relato di Bijbel ta bisa: “Ora e Señor a haña bista di dje, el a ser conmoví cu duele p’e.” (Lucas 7:11-15) Segun Vine’s Expository Dictionary of Old and New Testament Words, e expresion “conmoví cu duele” ta nificá “sinti te den bo paden.” El a sinti e biuda su dolor di curason, i esei a motiv’é pa dal paso pa aliviá su dolor. Esta un goso e biuda a haña ora Jesus a resucitá e mucha homber i a “dun’é na su mama”!

Finalmente, na armonia cu Dios su propósito, Jesus a sufri i a duna su bida boluntariamente como rescate pa humanidad por a ser librá di sclabitud na picá i morto. Esei tabata e ehempel supremo di biba segun e Regla di Oro.—Mateo 20:28; Juan 15:13; Hebreonan 4:15.

Hende Cu Ta Pone e Regla di Oro na Obra

Tin hende den nos tempu cu di berdad ta biba segun e Regla di Oro? Sí, i no ora ta cumbiní nan so. Por ehempel, durante Segundo Guera Mundial den Alemania nazi, Testigonan di Jehova a mantené nan fe den Dios i nan amor pa nan próhimo, i nan a nenga di comprometé e Regla di Oro. Miéntras cu gobiernu tabata hiba un campaña di odio i discriminacion contra tur hudiu, Testigonan a keda sigui e Regla di Oro. Asta den campo di concentracion nan a keda cuida nan próhimo. Nan tabata compartí nan cuminda, maske tabatin poco, tantu cu hudiu como cu no-hudiu cu tabata sufri di hamber. Mas ainda, maske gobiernu tabata ordená nan tuma arma pa mata hende, nan tabata nenga di hacié, ya cu nan mes lo no kier pa otro hende mata nan. Con nan por mata hende cu nan ta stima mescos cu nan mes? Dor cu nan a nenga di hacié, gobiernu a laga cera hopi di nan den campo di concentracion, i a asta mata nan.—Mateo 5:43-48.

Segun cu bo ta lesa e artículo aki, bo ta beneficiando di un otro ehempel dje Regla di Oro  den accion. Testigonan di Jehova sa cu hopi hende awe ta sufri sin speransa ni yudansa. P’esei nan ta tuma accion boluntariamente pa yuda otro hende haña sa dje speransa i e guia práctico cu tin den Bijbel. Tur esaki ta forma parti di un obra di educacion mundial cu ta tumando lugá na un escala sin precedente. Cu ki resultado? Manera ta profetisá na Isaías 2:2-4: “Hopi pueblo,” de echo, mas cu seis miyon hende rond mundu, a ser ‘instruí tocante Jehova su camindanan i ta cana den su bereanan.’ Den un sentido figurativo, nan a siña “bati nan spada haci ploeg i nan lansa haci skèr di snui mata.” Nan a haña pas i siguridad den e tempu trabahoso aki.

Ke Tal di Bo?

Pensa un ratu riba e agonia i sufrimentu cu humanidad mester a pasa aden for di tempu dje rebelion den Eden instigá dor di Satanas e Diabel, dor cu hende a bira lomba p’e Regla di Oro. Jehova su propósito ta pa pronto e haci e situacion bek manera e tabata originalmente. Con? “P’e propósito aki e Yu di Dios a ser manifestá, esta, p’e desbaratá e obranan di Diabel.” (1 Juan 3:8) Esaki lo tuma lugá bou di gobernacion dje Reino di Dios, den man sabí i capas di Jesucristo, cu a siña hende e Regla di Oro i a biba di acuerdo cuné.—Salmo 37:9-11; Daniel 2:44.

Rey David di Israel di antigwedad a remarcá: “Un homber hóben mi tabata, tambe mi a bira bieu, i tog nunca mi a mira un hende hustu bandoná henteramente, ni su yunan buscando pan. Henter dia e ta mustra fabor i fia hende, i pues su desendientenan por spera un bendicion.” (Salmo 37:25, 26) Lo bo no bai di acuerdo cu mayoria hende awendia ta tuma i gara na lugá di “mustra fabor i fia hende”? Claramente, dor di sigui e Regla di Oro nos por haña pas i siguridad, pasobra dor di haci asina nos ta ricibí bendicion awor mes, i tin bendicion ta spera nos den futuro bou di e Reino di Dios. E Reino di Dios lo deshací di delaster un rastro di egoismo i maldad for di riba tera, i remplasá e mundu actual di gobernacion humano corupto, cu un sistema nobo cu Dios lo forma. E ora ei, tur hende lo disfrutá di biba segun e Regla di Oro.—Salmo 29:11; 2 Pedro 3:13.

[Plachinan na página 4, 5]

Jesus no a djis siña hende e Regla di Oro; el a pone e mihó ehempel den practik’é

[Plachinan na página 7]

Dor di sigui e Regla di Oro nos por haña berdadero pas i siguridad