Teme Jehova i Warda Su Mandamentunan

“Teme e Dios berdadero i warda su mandamentunan. Pasobra esaki ta henter e obligacion di hende.”—ECLESIÁSTES 12:13.

1, 2. (a) Con temor por protehá nos físicamente? (b) Pakico mayornan sabí ta purba hinca un miedu saludabel den nan yunan?

LEONARDO DA VINCI a yega di remarcá: “Mescos cu curashi ta pone bida na peliger, temor ta proteh’é.” Un actitud prufiá ta ciega bo pa peliger, pero temor ta corda bo pa tene cuidou. Por ehempel, si nos para na un lugá hopi haltu anto wak abou i mira for di con haltu nos por kai, mayoria di nos lo hala atras instintivamente. Mescos, un temor saludabel, ademas di yuda nos tene un bon relacion cu Dios manera nos a siña den e artículo anterior, ta yuda nos evitá di sufri daño tambe.

² Sin embargo, ta siña nos mester siña teme hopi peliger di tempu moderno. Debí cu mucha chikitu no ta conciente di peliger di coriente ni tráfico, ta fácil pa nan haña un accidente serio. * Mayornan sabí ta purba hinca un temor saludabel den nan yunan dor di spierta nan bes tras bes dje peligernan cu ta rondoná nan. Un mayor sa cu e temor aki lo por asta scapa bida di su yu.

3. Pakico i con Jehova ta spierta nos di peliger spiritual?

³ Jehova tambe tin un interes asina den nos bienestar. Como un Tata amoroso, e ta siña nos beneficiá nos mes pa medio di su Palabra i su organisacion. (Isaías 48:17) Parti dje programa di educacion divino aki ta enbolbé spiertamentunan cu nos ta ricibí “bes tras bes” tocante peligernan spiritual, pa nos desaroyá un temor saludabel dje peligernan ei. (2 Crónicanan 36:15; 2 Pedro 3:1) Atrabes di historia, hopi desaster spiritual i hopi sufrimentu por a ser evitá, ‘si solamente hende a desaroyá nan curason p’e teme Dios i semper warda su mandamentunan.’ (Deuteronomio 5:29) Den e ‘tempu crítico aki, duru pa trata cuné,’ con nos por desaroyá nos curason p’e teme Dios i tene nos leu for di peliger spiritual?—2 Timoteo 3:1.

Apartá for di Maldad

4. (a) Ki tipo di odio cristiannan mester cultivá? (b) Kico Jehova ta sinti pa conducta pecaminoso? (Mira nota na pia di página.)

⁴ Bijbel ta splica cu “e temor di Jehova kier men odia maldad.” (Proverbionan 8:13) Un diccionario di Bijbel ta describí e odio aki como “un actitud emocional tocante persona i cosnan cu bo ta oponé, detestá, despreciá; cosnan cu bo no kier tin ningun contacto ni relacion cuné.” Pues, teme Dios ta encerá sinti  un asco of disgustu pa tur loke ta malu den Jehova su bista. * (Salmo 97:10) E ta move nos pa apartá for di loke ta malu, mescos cu nos lo hala for di rand di un lugá hopi haltu ora nos instinto spierta nos. Bijbel ta bisa: “Den temor di Jehova hende ta apartá for di maldad.”—Proverbionan 16:6.

5. (a) Con nos por fortalecé nos temor di Dios i nos odio pa loke ta malu? (b) Kico historia dje nacion di Israel ta siña nos tocante esaki?

⁵ Nos por reforsá nos temor saludabel i e odio cu nos ta sinti pa loke ta malu dor di pensa riba e consecuencianan cu picá ta trece cuné inevitablemente. Bijbel ta sigurá nos cu nos lo cosechá loke nos sembra—sea cu nos sembra segun carni, of segun e spiritu. (Galationan 6:7, 8) Ta p’e motibu aki Jehova a describí bon cla kico lo a sosodé si Israel a bira lomba pa Su mandamentunan i bandoná adoracion berdadero. Sin proteccion divino, e nacion vulnerabel ei lo tabata na merced di su bisiñanan cruel i poderoso. (Deuteronomio 28:15, 45-48) E resultado trágico di Israel su desobedencia a keda registrá detayadamente den Bijbel “como spiertamentu” pa nos por siña un les i cultivá temor di Dios.—1 Corintionan 10:11.

6. Cua ta algun ehempel bíblico cu nos por pensa ariba pa nos siña teme Dios? (Mira nota na pia di página.)

⁶ Ademas di loke a sosodé Israel como nacion, Bijbel ta contené experencia di bida real di hende individual cu a laga yaluzí, inmoralidad, golosidad of orguyo dominá nan. * Algun dje hombernan aki a sirbi Jehova pa hopi aña. Pero na un cierto momento crucial den nan bida, nan temor di Dios no tabata suficiente fuerte, i nan a cosecha consecuencianan trágico. Dor di meditá riba e ehempelnan ei di Bijbel, nos por fortalecé nos determinacion pa no cometé e mésun fayonan. Lo ta hopi tristu si nos warda te ora nos cai den un tragedia personal pa nos tuma Dios su consehonan na pechu! Maske hopi hende ta pensa cu experencia ta e mihó maestro, en realidad no ta asina, specialmente ora ta trata di experencia den bai tras di bo propio deseonan.—Salmo 19:7.

7. Ken Jehova ta invitá pa drenta den su tent simbólico?

⁷ Otro motibu fuerte pa nos cultivá temor di Dios ta nos deseo pa cuida nos relacion cuné. Nos tin miedu di desagradá Jehova dor  cu nos ta balorá nos amistad cuné mashá. Ken Dios ta considerá su amigu? Ken lo e invitá pa bini den su tent simbólico? Únicamente esun “cu ta cana liber di falta i ta practicá husticia.” (Salmo 15:1, 2) Si nos ta balorá e relacion privilegiá aki cu nos tin cu nos Creador, nos lo paga tinu pa cana sin falta den su bista.

8. Con algun israelita den tempu di Malakías no a balorá nan amistad cu Dios manera mester ta?

⁸ Lamentablemente, algun israelita den tempu di Malakías no a balorá nan amistad cu Dios manera mester ta. Na lugá di teme Jehova i onr’é, nan tabata ofrecé bestia enfermo i lam riba su altar. Otro cos cu a reflehá nan falta di temor di Dios tabata e actitud cu nan tabatin tocante matrimonio. Nan tabata divorciá nan casá di hubentud pa cualkier motibu chikitu, pa bai casa cu hende muher mas hóben. Malakías a bisa nan cu Jehova ta odia “divorcio,” i cu nan actitud traicionero a alehá nan for di nan Dios. Con Dios por a aprobá nan sacrificionan si e altar tabata como si fuera tapá cu lágrima—lágrima amargo di esposanan bandoná? E gran falta di respet ei pa Jehova su normanan a impuls’é pa puntra: “Unda e temor di mi ta?”—Malakías 1:6-8; 2:13-16.

9, 10. Con nos por mustra cu nos ta balorá Jehova su amistad?

⁹ Awe tambe Jehova ta mira e curason kibrá di hopi casá i yu inocente, lagá pa nan cuenta dor di esposo i tatanan, i tin bes asta esposa i mamanan, egoista i inmoral. E cosnan aki ta hacié tristu sigur. Un amigu di Dios lo mira asuntu manera Dios ta mira nan, i lo e traha duru pa haci su matrimonio fuerte, rechasá pensamentu mundano cu ta minimisá e importancia di laso matrimonial, anto “hui di fornicacion.”—1 Corintionan 6:18.

¹⁰ Mescos cu den otro área di bida, den matrimonio tambe odio pa loke ta malu den Jehova su bista, i un aprecio profundo pa su amistad lo duna nos Jehova su fabor i aprobacion. Apostel Pedro a declará firmemente: “Siguramente mi ta percibí cu Dios no ta parcial, sino cu den tur nacion e hende cu ta tem’é i ta obra husticia ta aceptabel p’e.” (Echonan 10:34, 35) Nos tin hopi ehempel bíblico cu ta mustra con temor di Dios a motivá hende pa haci loke ta bon bou di vários circunstancia difícil.

Tres Hende Cu A Teme Dios

11. Bou di ki circunstancia Abraham a ser declará un hende “temeroso di Dios”?

¹¹ Tin un homber den Bijbel cu Jehova mes a yama su amigu—e patriarca Abraham. (Isaías 41:8) Abraham su temor di Dios a pasa den prueba ora Dios a pidié ofrecé su único yu Isaac como sacrificio, siendo cu ta pa medio di dje Dios lo a cumpli cu su promesa cu e desendientenan di Abraham lo a bira un nacion grandi. (Génesis 12:2, 3; 17:19) E “amigu di Jehova” aki lo a pasa e prueba doloroso ei cu éxito? (Santiago 2:23) Net ora Abraham a hisa su cuchú pa mata Isaac, Jehova su angel a bisa: “No saca bo man contra e mucha i no hacié nada, pasobra awor mi sa di berdad cu bo ta temeroso di Dios, siendo cu bo no a nengá mi bo yu, bo único.”—Génesis 22:10-12.

12. Kico a motivá Abraham pa teme Dios, i con nos por mustra un actitud similar?

¹² Maske Abraham a yega di mustra caba den pasado cu el a teme Jehova, n’e ocasion aki el a mustra cu e ta teme Dios na un manera sobresaliente. E echo cu e tabata dispuesto di sacrificá Isaac a demostrá cu e tabatin hopi mas cu un simpel obedencia respetuoso. Abraham a ser motivá dor di un confiansa completo cu su Tata celestial lo a cumpli cu Su promesa dor di resucitá Isaac si tabata necesario. Ta manera Pablo a skirbi: Abraham tabata ‘plenamente convencí cu loke Dios a primintí e por a haci tambe.’ (Romanonan 4:16-21) Nos ta cla pa cumpli cu Dios su boluntad asta ora e ta nificá cu nos mester haci sacrificio grandi? Ya cu nos sa cu Jehova ta “e recompensador di esnan cu ta busk’é cu empeño,” nos tin confiansa total cu nos obedencia lo trece beneficio di término largu? (Hebreonan  11:6) Esei ta berdadero temor di Dios.—Salmo 115:11.

13. Di con Josef por a describí su mes corectamente como un homber cu a ‘teme e Dios berdadero’?

¹³ Laga nos examiná un otro ehempel di temor di Dios den accion: Josef. Como esclabo den cas di Pótifar, Josef tabata hañ’é enfrentá tur dia cu preshon pa cometé adulterio. Parce cu no tabatin moda pa el a evitá contacto cu esposa di su doño, kende tabata persistí cu su proposicionnan inmoral den Josef su direccion. Finalmente, ora “e muher a gar’é na su paña,” Josef a “hui i a sali pafó.” Kico a motiv’é pa apartá mesora for di maldad? Sin duda, e factor principal tabata temor di Dios; e deseo di evitá “e gran maldad aki i realmente peca contra Dios.” (Génesis 39:7-12) Josef por a describí su mes corectamente como un homber cu a ‘teme e Dios berdadero.’—Génesis 42:18.

14. Con e misericordia di Josef ta un muestra cu el a teme Dios di berdad?

¹⁴ Añanan despues Josef a bin topa cara-cara cu su rumannan cu a bend’é sin misericordia como esclabo. Lo tabata masha fácil pa el a venga su mes p’e malu cu nan a hacié, dor di probechá dje echo cu nan tabata desesperá pa haña cuminda. Pero cometé abusu di poder contra hende no ta mustra cu bo ta teme Dios. (Levítico 25:43) P’esei, ora Josef a haña suficiente prueba cu su rumannan a cambia nan actitud, el a pordoná nan misericordiosamente. Mescos cu Josef, si nos ta teme Dios esei lo motivá nos pa vence malu cu bon, i tambe lo e yuda nos pa no cai den tentacion.—Génesis 45:1-11; Salmo 130:3, 4; Romanonan 12:17-21.

15. Di con Job su conducta a alegrá Jehova su curason?

¹⁵ Job ta un otro gran ehempel di un hende cu a teme Dios. Jehova a bisa Satanas: “Bo a fiha bo curason riba mi sirbidó Job, cu no tin ningun manera e riba tera, un homber sin culpa i recto, temeroso di Dios i apartá di loke ta malu?” (Job 1:8) Job su conducta sin culpa a haci curason di su Tata celestial contentu pa hopi aña. Job a teme Dios dor cu e tabata sa cu ta corecto pa tem’é, i cu esei ta e mihó manera di biba. Job a sclama: “Mira! Temor di Jehova—ta esei ta sabiduria, i apartá for di maldad ta comprendimentu.” (Job 28:28) Como homber casá, Job no a mustra atencion inapropiado na hende muher hóben, ni e no tabatin plannan adúltero den su curason. Maske e tabata un homber ricu, el a nenga di confia den rikesa, i el a keda leu for di tur forma di idolatria.—Job 31:1, 9-11, 24-28.

16. (a) Den ki maneranan Job a mustra bondad amoroso? (b) Con Job a demostrá cu e no a keda sin pordoná?

¹⁶ Pero teme Dios ta nificá haci bon tambe, no apartá for di maldad so. Pues, Job a mustra interes bondadoso den hende ciegu, hende lam i hende pober. (Levítico 19:14; Job 29:15, 16) Job a comprendé cu ‘esun cu keda sin mustra bondad amoroso na su compañero lo asta bandoná e temor dje Todopoderoso tambe.’ (Job 6:14) Un manera cu nos por keda sin mustra bondad amoroso ta dor di keda sin pordoná, of carga rencor. Ora Dios a mand’é haci oracion pa su tres compañeronan cu a caus’é asina tantu dolor, Job a hacié. (Job 42:7-10) Nos tambe por pordoná un compañero di creencia cu a hùrt nos di un manera of otro? Un oracion sincero pa esun cu a ofendé nos por ta un gran yudansa pa nos superá nos  rabia. E bendicionnan cu Job a disfrutá di dje debí cu el a teme Dios ta duna nos un avance di e ‘bondad abundante cu Jehova a warda manera tesoro pa esnan temeroso di dje.’—Salmo 31:19; Santiago 5:11.

Temor di Dios i Temor di Hende

17. Kico temor di hende por haci nos, i pakico e temor ei ta muchu enfocá riba término corto so?

¹⁷ Temor di Dios por motivá nos pa haci loke ta bon, pero temor di hende por swak nos fe. P’e motibu aki, ora Jesus tabata animá e apostelnan pa nan ta predicadónan celoso dje bon nobo, el a bisa nan: “No haña temor di esnan cu ta mata curpa pero no por mata alma; sino mas bien teme esun cu por destruí tantu alma como curpa den Gehena.” (Mateo 10:28) Jesus a splica cu temor di hende ta enfocá muchu riba término corto so, pasobra hende no por destruí nos speransa di bida den futuro. Ademas, nos ta teme Dios dor cu nos ta conciente di su enorme poder, i con insignificante e poder di tur nacion ta na comparacion. (Isaías 40:15) Mescos cu Abraham, nos tin pleno confiansa den Jehova su poder pa resucitá Su sirbidónan fiel. (Revelacion 2:10) Pues, nos ta bisa cu confiansa: “Si Dios ta pa nos, ken lo ta contra nos?”—Romanonan 8:31.

18. Con Jehova ta recompensá esnan cu ta tem’é?

¹⁸ Sea cu ta un miembro di nos famia of un mucha abusador riba ‘speelplaats’ di scol ta oponé nos, nos lo mira cu “den e temor di Jehova tin confiansa firme.” (Proverbionan 14:26) Nos por resa pidi Dios forsa, cu confiansa cu lo e scucha nos. (Salmo 145:19) Nunca Jehova no ta lubidá esnan cu ta tem’é. Pa medio di profeta Malakías e ta sigurá nos: “N’e tempu ei, esnan den temor di Jehova a papia un cu otro, cada un cu su compañero, i Jehova a sigui presta atencion i scucha. I un buki di recuerdo a cuminsá ser skirbí dilanti dje pa esnan den temor di Jehova i pa esnan cu ta pensa riba su nomber.”—Malakías 3:16.

19. Cua tipo di temor lo caba, pero cua tipo lo permanecé pa semper?

¹⁹ Pronto tur hende riba tera lo adorá Jehova, i temor di hende lo disparcé. (Isaías 11:9) Temor di hamber, enfermedad, crímen i guera tambe lo disparcé. Pero temor di Dios lo permanecé eternamente, pasobra su sirbidónan fiel den shelu i riba tera lo sigui mustr’é e respet, obedencia i onor cu e ta merecé. (Revelacion 15:4) Entre tantu, laga nos tur tuma e conseho inspirá aki di Sálomon na pechu: “No laga bo curason envidiá pecadó, ma teme Jehova henter dia. Pasobra den tal caso lo tin futuro, i bo propio speransa lo no ser cortá kita afó.”—Proverbionan 23:17, 18.

[Nota]

Bo Ta Corda?

• Con nos ta siña odia loke ta malu?

• Con algun israelita den tempu di Malakías a keda sin mustra e debido balor pa nan amistad cu Jehova?

• Kico nos por siña di Abraham, Josef i Job tocante teme Dios?

• Cua temor lo no disparcé nunca, i di con?

[Preguntanan di Estudio]

[Plachi na página 19]

Mayornan sabí ta hinca un temor saludabel den nan yunan

[Plachi na página 20]

Mescos cu temor ta apartá nos for di peliger, teme Dios ta apartá nos for di maldad

[Plachi na página 23]

Job a keda mustra temor di Dios asta ora el a hañ’é enfrentá cu tres amigu falsu

[Rekonosementu]

For dje traduccion di Bijbel, Vulgata Latina, 1795