“Via Lus di Bo Nos Por Mira Lus”

HOPI bes nos no ta duna masha balor na lus, sino te ora cu coriente bai i henter nos becindario keda den scuridad. Felismente, nos “central di energia”—solo—ta completamente confiabel. I debí na lus di solo, nos por mira, come, hala rosea i biba.

Siendo cu lus ta esencial pa bida, no mester ta un sorpresa pa nos cu Génesis ta bisa cu lus a aparecé riba e promé dia di creacion. “Dios a bisa: ‘Laga tin lus.’ Anto tabatin lus.” (Génesis 1:3) Hombernan cu respet profundo pa Dios manera Rey David, semper a reconocé Jehova como e fuente di bida i lus. David a skirbi: “E fuente di bida ta cerca bo; via lus di bo, nos por mira lus.”—Salmo 36:9.

E palabranan di David ta cierto tantu den sentido literal como figurativo. Encyclopædia Britannica ta indicá: “Lus sigur ta responsabel pa bista.” Despues e ta agregá: “Mente di hende ta ricibí mas informacion via di wowo cu via cualkier un dje otro sentidonan.” Siendo cu hopi di loke nos ta siña ta dependé di e don di bista—cu tin mester di lus p’e funcioná bon—e Scritura ta usa lus den un sentido figurativo tambe.

P’esei, Jesus a bisa su disipelnan: “Ami ta e lus di mundu. Esun cu ta sigui mi di ningun manera lo cana den scuridad, sino cu lo e poseé e lus di bida.” (Juan 8:12) E lus figurativo cu Jesus a referí na dje tabata e mensahe dje berdad cu el a predicá, esta, e berdad cu por a iluminá mente i curason di su oyentenan. Despues di hopi aña di scuridad spiritual, por fin e disipelnan di Jesus por a comprendé Dios su propósito pa humanidad i e speransa dje Reino. Esei tabata ègt “lus di bida,” pasobra e conocimentu ei por a duna hende bida eterno. Den oracion na su Tata celestial, Jesus a bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) Laga nos nunca considerá e lus spiritual aki como algu di poco balor!