Bo Ta Corda?

Bo a disfrutá di e edicionnan recien di E Toren di Vigilancia? Wel, wak si bo por contestá e siguiente preguntanan:

• E Tribunal Federal Constitucional di Alemania a contribuí na ki victoria legal cu ta enbolbé religion?

E corte ei a anulá un sentencia negativo cu un otro corte a dicta relacioná cu Testigonan di Jehova i nan derecho pa ser reconocé como un corporacion legal. E sentencia victorioso a bisa cu den cuadro di libertad religioso, un persona por ‘obedecé principionan di creencia’ mas cu exigencianan di Estado.—15/8, página 8.

• Cuantu tempu Job a sufri?

E buki di Job no ta indicá cu Job su sufrimentu a dura hopi aña. Kisas Job su sufrimentu i fieldad bou di prueba a dura un par di luna, podisé ménos cu un aña.—15/8, página 31.

• Di con nos por ta sigur cu Diabel ta mas cu supersticion?

Jesucristo tabata sa cu Diabel ta un persona real. Ta un persona real a tenta Jesus, i no un maldad cu e tabatin den dje. (Mateo 4:1-11; Juan 8:44; 14:30)—1/9, página 5-6.

• Proverbionan 10:15 ta bisa: “E cosnan balioso di e ricu ta su stad fuerte. E ruina di esnan di condicion humilde ta nan pobresa.” Den ki sentido esaki ta berdad?

Rikesa por sirbi como proteccion contra cierto insiguridadnan den bida, mescos cu un stad fortificá ta duna un grado di siguridad na esnan cu ta biba den dje. Di otro banda, pobresa por ta desastroso ora desaroyonan inesperá surgi.—15/9, página 24.

• Den ki sentido “hende a cuminsá inbocá e nomber di Jehova” den e dianan di Enos? (Génesis 4:26)

Desde comienso di historia humano, hende a usa e nomber di Dios; p’esei, loke a cuminsá den tempu di Enos no tabata e acto di inbocá Jehova den fe. Podisé ta den un manera irespetuoso hende a aplicá Dios su nomber na nan mes of na otro hende via ken nan a pretendé di adorá Dios.—15/9, página 29.

• Kico Bijbel kier men cu e palabra “disiplina”?

E palabra no ta implicá ningun tipo di abusu ni crueldad. (Proverbionan 4:13; 22:15) E palabra griego pa “disiplina” tin di haber principalmente cu instruccion, educacion, coreccion, i tin bes, castigu firme pero amoroso. Un manera importante cu mayornan por imitá Jehova ta dor di haci esfuerso pa mantené e canal di comunicacion cu nan yunan habrí. (Hebreonan 12:7-10)—1/10, página 8 i 10.

• Con cristiannan berdadero djawe ta mustra cu ta Dios ta goberná nan?

Dor cu Testigonan di Jehova ta apoyá e Reino di Dios, nan no ta participá den política ni fomentá rebelion, ni sikiera den paisnan caminda tin prohibicion riba e Testigonan. (Tito 3:1) Nan ta duna un contribucion positivo na e manera cu Jesus i su disipelnan di promé a haci esfuerso pa yuda, i de echo, a yuda hende adoptá balornan sano di Bijbel manera onrades, limpiesa moral i bon custumbernan di trabou.—15/10, página 6.

• Con e awa di bida ta core den Ándes?

Einan Testigonan di Jehova ta haci esfuerso pa hiba e berdadnan di Bijbel p’e pueblo. Nan ta haci esaki asta den e dos idiomanan local cu ta quechua i aymara. E Testigonan ta bishitá hende cu ta biba riba e islanan cu ta situá den Lago Titicaca, incluso e islanan “flotante” den forma di plataforma trahá di richi cu ta crece den e lago.—15/10, página 8-10.

• Kico Dios a duna nos como guia cu nos por compará cu e sistema di guia computerisá den un avion di pasahero moderno?

Dios a duna hende e capacidad pa desaroyá un guia moral, un sentido interno di normanan moral. Esaki ta nos concenshi heredá. (Romanonan 2:14, 15)—1/11, página 3-4.

• Di con e morto di Jesus tin hopi balor?

Ora cu e homber perfecto Adam a peca, el a perde bida humano pa su mes i pa su desendientenan. (Romanonan 5:12) Como un homber perfecto, Jesus a sacrificá su bida humano, i a percurá asina e rescate cu ta haci posibel pa hende fiel por gana bida eterno.—15/11, página 5-6.

• Ken tabata e skitanan cu Colosensenan 3:11 ta mencioná?

E skitanan tabata un nacion nomádico cu desde aña 700 te cu 300 P.E.C. tabatin dominio riba e sabananan cu ta cai den Europa i Asia. Nan tabata guerero i coredónan di cabai impresionante. Kisas Colosensenan 3:11 no a referí na un nacion specífico, pero n’e hendenan di mas salbahe.—15/11, página 24-25.

• Di con nos por bisa cu e Regla di Oro ta un siñansa cu merecé nos atencion regular?

Tantu hudaismo, budismo, filosofia griego i confucianismo tabatin un splicacion di e regla moral fundamental aki. Sin embargo, loke Jesus a instruí den e Sermon Riba Ceru ta rekerí accion positivo, i e ta toca bida di hende di tur edad i na tur parti. (Mateo 7:12)—1/12, página 3.