E Berdadero Jesus

DESPUES cu Jesus a tende for di su apostelnan kico hende tabata pensa di dje, el a puntra nan: “Pero, boso, ken boso ta bisa cu mi ta?” E Evangelio di Mateo ta mencioná e contesta di apostel Pedro: “Abo ta e Cristo, e Yu di e Dios bibu.” (Mateo 16:15, 16) Tabatin otro hende cu tambe a pensa asina. Natanael, cu despues a bira un dje apostelnan, a bisa Jesus: “Rabi, bo ta e Yu di Dios, bo ta Rey di Israel.” (Juan 1:49) Jesus mes a papia dje importancia di su papel: “Ami ta e caminda i e berdad i e bida. Ningun hende no ta yega n’e Tata sino pa medio di mi.” (Juan 14:6) Na vários ocasion el a referí na su mes como “e Yu di Dios.” (Juan 5:24, 25; 11:4) I el a duna prueba di esaki efectuando obranan milagroso, i asta lantando morto.

E Dudanan Ta Fundá?

Pero realmente nos por confia loke e Evangelionan ta bisa di Jesus? Nan ta describí e berdadero Jesus? E profesor di criticismo i splicacion bíblico di Universidad di Manchester, Inglatera, defuntu Frederick F. Bruce, a yega di declará: “Por lo general no ta posibel usa argumentonan histórico pa demostrá cu tur detaye di un antiguo obra skirbí ta berdad, sea cu esei ta obra bíblico of no. Si nos ta razonablemente sigur cu un escritor ta digno di confiansa, esei ta suficiente; si esei keda establecí, probablemente nos por asumí cu su detayenan ta berdad. . . . E echo cu cristiannan ta aceptá e Testament Nobo como literatura ‘sagrado,’ no ta un motibu pa consider’é históricamente inconfiabel.”

Despues di a examiná e dudanan cu tin tocante Jesus segun e descripcion dje Evangelionan, James R. Edwards, profesor di religion na Jamestown College, North Dakota, Merca, a skirbi: “Nos por afirmá cu confiansa cu e Evangelionan ta conserbá un conhunto variá i significante di prueba tocante e berdad real di Jesus. . . . E contesta mas razonabel riba e pregunta di con e Evangelionan ta presentá Jesus dje forma ei, ta cu básicamente asina Jesus tabata. E Evangelionan ta conserbá fielmente e recuerdo cu el a laga riba su siguidónan, esta, cu realmente Dios a mand’é i dun’é e autoridad pa ta Dios su Yu i Sirbidó.” *

En Busca di Jesus

Kico dje referencianan no-bíblico na Jesucristo? Con hende ta evaluá nan? E obranan  skirbí di Tácito, Suetonio, Josefo, Plinio e Menor, i di un par di otro escritor clásico ta contené vários referencia na Jesus. The New Encyclopædia Britannica (1995) ta bisa di nan: “E relatonan independiente aki ta duna prueba cu den tempu antiguo ni e opositornan di cristianismo nunca a duda cu Jesus tabata un persona real. Esei a ser cuestioná pa promé bes i sin base adecuá na fin di siglo 18, durante siglo 19 i na principio di siglo 20.”

Lamentablemente, ta parce cu intelectualnan moderno den nan búskeda dje “berdadero” Jesus, of e Jesus “histórico,” a sconde su berdadero identidad tras di vários capa di speculacion sin base, dudanan sin sentido i teorianan infundá. Den un sentido, nan mes ta culpabel di net loke nan ta acusá e escritornan di Evangelio falsamente di dje, esta, di crea un leyenda. Tin di nan ta asina ansioso pa bira mas popular den bista di otro hende i pa conectá nan nomber cu un teoria nobo sensacional, cu nan no ta haci un examinacion onesto dje evidencia tocante Jesus. Den e proceso, nan ta crea un “Jesus” cu ta cuadra cu e imaginacion di intelectualnan.

Hende cu kier haña e berdadero Jesus, por hañ’é den Bijbel. Luke Johnson, profesor den orígen di cristianismo i di Testament Nobo na e Scol di Teologia di Candler na Emory University, ta argumentá cu mayoria investigacion relacioná cu e Jesus histórico ta pasa por haltu dje propósito bíblico. Segun Johnson, kisas ta interesante pa examiná e situacion social, político, antropológico i cultural dje bida i era di Jesus. Sin embargo e ta agregá cu ‘e propósito dje Scritura no ta’ pa descubrí loke intelectualnan ta yama e Jesus histórico. Mas bien e Scritura ta “mas interesá den describí e caracter di  Jesus,” su mensahe i su papel como Rescatador. Pues anto, kico tabata e berdadero caracter i mensahe di Jesus?

E Berdadero Jesus

E Evangelionan—esta e cuater relatonan bíblico di Jesus su bida—ta describí un homber cu a desplegá hopi comprension. Duele i compasion a impulsá Jesus pa yuda hende ciegu, i tambe hende cu tabata sufri di otro malesa i problema. (Mateo 9:36; 14:14; 20:34) E morto di su amigu Lázaro i e tristesa cu esaki a causa e ruman muhernan di Lázaro a pone Jesus ‘suspirá i yora.’ (Juan 11:32-36) De echo, e Evangelionan ta revelá cu Jesus a desplegá un gran variedad di emocion: compasion pa un persona cu lepra, alegria debí n’e éxito di su disipelnan, indignacion contra esnan cu a pega estrechamente na ley pero cu tabatin curason duru, i tristesa p’e echo cu Jerusalem a rechasá e Mesías.

Ora Jesus a haci un milager, el a enfocá hopi bes riba e papel cu e ricibidó a hunga den e proceso: “Bo fe a cura bo.” (Mateo 9:22) El a elogiá Natanael como “un israelita di berdad,” bisando: “No tin nada falsu den dje!” (Juan 1:47, Today’s English Version) Ora algun hende a haña cu e regalo di gratitud di un cierto muher tabata di mas, Jesus a defend’é i a bisa cu pa hopi tempu hende lo corda su generosidad. (Mateo 26:6-13) El a demostrá di ta un berdadero amigu i un compañero cariñoso pa su siguidónan i “a stima nan te na fin.”—Juan 13:1; 15:11-15.

Tambe e Evangelionan ta mustra cu Jesus a ripará masha lihé kico tabata e necesidad of actitud di mayoria hende cu el a topa. Sea cu e tabata papia cu un hende muher na un pos, cu un maestro religioso den un hofi of cu un piscadó cant’i awa, el a toca nan curason mesora. Despues di Jesus su palabranan di introduccion, hopi dje hendenan aki a revelá nan pensamentunan di mas íntimo na dje. Loke el a bisa a impresioná nan. Aunke hende di su tempu lo a tene hombernan den autoridad na un distancia, den Jesus su caso hende tabata bosha rond di dje. Nan a gusta ta cu Jesus; nan a sinti nan mes cómodo den su compania. Mucha a sinti nan mes trankil cerca dje, i ora e tabata usa un mucha como ehempel, e no a djis pone e mucha para dilanti su disipelnan, sino tambe “a bras’é.” (Marco 9:36; 10:13-16) Sí, e Evangelionan ta describí Jesus como un homber cu tabatin asina un carisma cu hende a keda tres dia cerca dje djis pa tende su palabranan fasinante.—Mateo 15:32.

 E echo cu Jesus tabata perfecto no a hacié supercrítico ni arogante i dominante cu e hendenan imperfecto, yen di picá, meimei di ken el a biba i predicá. (Mateo 9:10-13; 21:31, 32; Lucas 7:36-48; 15:1-32; 18:9-14) Jesus nunca tabata exigente. E no a pone mas carga riba hende. Al contrario, el a bisa: “Bini cerca mi, boso tur cu ta afaná . . . lo mi refrescá boso.” Su disipelnan a haña cu e tabata di “genio suave i humilde di curason”; su yugo tabata suave, i su carga tabata leve.—Mateo 11:28-30.

E caracter di Jesus revelá mediante e relatonan di Evangelio definitivamente tin e tono di ta berdad. No ta fácil pa cuater diferente persona inventá un personahe extraordinario, anto caba presentá un cuadro consistente di dje den cuater diferente relato. Si e persona ei nunca no a existí, lo ta casi imposibel pa cuater escritor describí e mésun persona i consistentemente presentá e mésun cuadro di dje.

Historiadó Michael Grant ta haci un pregunta cu ta stimulá pensamentu serio: “Con por ta cu den tur tradicion di Evangelio sin excepcion, ta sali un potret pintá remarcablemente firme di un homber hóben atractivo cu a move libremente entre tur sorto di hende muher, incluyendo esnan claramente di mala fama, sin ningun indicacion di sentimentalismo, abnormalidad, of moralidad exagerá, i tog, na tur ocasion a mantené un simpel integridad di caracter?” E contesta razonabel ta cu un homber asina di berdad a existí i a actua manera Bijbel ta bisa.

E Berdadero Jesus i Bo Futuro

Fuera di duna un cuadro realístico di Jesus tempu cu e tabata riba tera, Bijbel ta mustra tambe cu e tabatin un existencia prehumano como e Yu unigénito di Dios, “e primogénito di tur creacion.” (Colosensenan 1:15) Binti siglo pasá, Dios a transferí bida di su Yu celestial na e matris di un bírgen hudiu p’e nace como hende. (Mateo 1:18) Durante su ministerio terenal, Jesus a proclamá e Reino di Dios como e único speransa pa humanidad angustiá, i el a train su disipelnan pa sigui cu e trabou di predicá aki.—Mateo 4:17; 10:5-7; 28:19, 20.

Dia 14 di nísan (mas o ménos 1 di april) di aña 33 Era Comun, nan a arestá Jesus, hib’é dilanti corte, sentenci’é i ehecut’é a base dje acusacion falsu di a incitá rebelion. (Mateo 26:18-20, Mat 26:48–27:50) Jesus su morto ta sirbi como un rescate, librando humanidad creyente di nan estado pecaminoso i asina a habri e caminda pa bida eterno pa tur cu ehercé fe den dje. (Romanonan 3:23, 24; 1 Juan 2:2) Dia 16 di nísan, Jesus a ser resucitá, i poco despues el a subi bek na shelu. (Marco 16:1-8; Lucas 24:50-53; Echonan 1:6-9) Como Jehova su Rey nombrá, Jesus resucitá tin pleno autoridad pa efectuá Dios su propósito original pa hende. (Isaías 9:6, 7; Lucas 1:32, 33) Sí, Bijbel ta presentá Jesus como e figura clave den e realisacion di Dios su propósito.

Den promé siglo, multitud di hende a aceptá Jesus pa loke e tabata: e Mesías primintí, esta Cristo, mandá na tera pa vindicá e soberania di Jehova i pa muri como un rescate pa humanidad. (Mateo 20:28; Lucas 2:25-32; Juan 17:25, 26; 18:37) En bista dje persecucion feros cu tabatin, hende lo no a sinti nan motivá pa bira disipel di Jesus si nan no tabatin sigur ken e tabata. Cu curashi i celo, nan a aceptá e comision cu el a duna nan, esta di “haci disipel di hende di tur nacion.”—Mateo 28:19.

Awe miyones di cristian sincero i informá sa cu Jesus no ta un personahe legendario. Nan ta acept’é como e Rey entronisá di Dios su Reino establecí den shelu, cu ta a punto di tuma pleno control di tera i su asuntunan. E gobiernu divino aki ta bon noticia pasobra e ta primintí alivio for dje problemanan di mundu. Cristiannan berdadero ta manifestá nan apoyo leal na Jehova su Rey scogí dor di declará “e bon nobo aki dje reino” na otro hende.—Mateo 24:14.

Esnan cu ta apoyá e areglo di Reino aki mediante Cristo, e Yu dje Dios bibu, lo biba pa disfrutá di bendicionnan eterno. Bo tambe por ricibí e bendicionnan aki! E publicadónan dje revista aki gustosamente lo yuda bo conocé e berdadero Jesus.

[Nota]

[Kuadro/Plachi na página 6]

Loke Otro Hende A Bisa

“Ami ta considerá Jesus di Názaret di ta un dje maestronan poderoso cu mundu tabatin. . . . Lo mi bisa e hindúnan cu boso bida lo ta incompleto a ménos cu boso studia e siñansanan di Jesus cu profundo respet.” Mohandas K. Gandhi, The Message of Jesus Christ.

“Un personahe asina original, asina completo, asina uniformemente consistente, asina perfecto, asina humano i tog hopi mas elevá cu tur grandesa humano, no por ta un fraude ni fantasia. . . . Lo bo mester di un persona mas grandi cu Jesus pa inventá Jesus.” Philip Schaff, History of the Christian Church.

“Pa algun hende simpel den un solo generacion inventá un personalidad asina poderoso i atractivo, cu principio asina elevá i cu un vision asina inspirador di hermandad humano, lo ta un milager hopi mas increibel cu cualkier milager mencioná den e Evangelionan.” Will Durant, Caesar and Christ.

“Kisas ta parce incomprendibel cu un movementu religioso cu ta abarcá henter mundu lo por a cuminsá dor di un persona inexistente, inventá como e ekivalente antiguo di un estrategia promocional. Esaki por parce asina si nos tuma na cuenta cu tabatin hopi hende real cu indiscutiblemente a purba establecé religionnan, pero cu no a logra esei.” Gregg Easterbrook, Beside Still Waters.

‘Como historiadó literario mi ta perfectamente convencí cu loke sea cu e Evangelionan ta, nan no ta leyenda sí. Nan no ta suficientemente artístico pa ta leyenda. Gran parti dje bida di Jesus ta desconocí pa nos, i niun hende cu ta inventá un leyenda lo no permití pa esei ta e caso.’ C. S. Lewis, God in the Dock.

[Plachi na página 7]

E Evangelionan ta revelá cu Jesus a desplegá un gran variedad di emocion