“Ken Hende Ta Bisa Cu Mi Ta?”

TA TEMPORADA di Pascu atrobe. Rond mundu hende ta scoge pa celebrá e fecha di nacementu aki. Ken su fecha di nacementu? Di e Yu di Dios of simplemente di un hudiu deboto cu tabata determiná pa reformá e religion cu a predominá den su área durante promé siglo? Tabata fecha di nacementu di un defensor di hende pober, of di un rebelde cu tabata un menasa asina grandi p’e Imperio Romano cu nan a ehecut’é, of tal bes di un sabio cu a enfatisá e importancia di conocé bo mes i cultivá sabiduria? Pues bo tin bon motibu pa puntra: ‘Ken Jesucristo tabata realmente?’

Jesus mes tambe tabata interesá pa sa con hende a contestá e pregunta ei. Un biaha el a puntra su disipelnan: “Ken hende ta bisa cu mi ta?” (Marco 8:27) Di con el a haci e pregunta ei? Hopi hende ya a stop di siguié. Otronan a keda aparentemente confundí i decepcioná despues cu el a rechasá nan intento pa hacié rey. Ademas, ora Jesus su enemigunan a reta Jesus p’e duna un señal for di shelu pa comprobá ken e tabata, e no a hacié. P’esei ora su apostelnan a contestá e pregunta ei, ken nan a bisa cu e ta? Wel nan a mencioná algun opinion cu a reina den e pueblo: “Algun ta bisa Juan Bautista, otronan Elías, tambe otronan Jeremías of un dje profetanan.” (Mateo 16:13, 14) Nan no a mencioná e hopi bijnaamnan ofensivo cu tabata circulá e tempu ei den Palestina tocante Jesus, manera blasfemadó, charlatan, profeta falsu i asta homber loco.

E Hopi Caranan di Jesus

Si Jesus a haci e mésun pregunta ei awe, lo e por a asta cambi’é asin’akí: “Ken e intelectualnan ta bisa cu mi ta?” Un biaha mas e contestanan lo ta básicamente esaki: Tin hopi diferente opinion. Segun David Tracy di Universidad di Chicago, diferente hende tabatin diferente opinion i interpretacion di Jesus i di loke el a bisa i haci. Durante siglo pasá, intelectualnan a usa un gran cantidad di método complicá di sociologia, antropologia i tambe literario den nan intento pa formulá contesta riba e pregunta ken Jesus tabata realmente. Al final, ta ken nan ta pensa cu Jesus ta realmente?

Tin algun intelectual ta sigui pretendé cu e Jesus histórico tabata un profeta hudiu cu a proclamá fin di mundu i a urgi hende pa repentí. Sin embargo, nan no ta yam’é e Yu di Dios, Mesías ni Redentor si. Mayoria di nan ta cuestioná e relato bíblico di Jesus su orígen celestial i su resureccion. Pa otro intelectualnan, Jesus tabata simplemente un homber cu via su bida i siñansanan ehemplar a inspirá vários religion cu despues di tempu a forma den cristianismo. Manera Theology Today ta mencioná, tambe tin hende cu ta mira Jesus como un “cínico, un sabio ambulante of un campesino místico; un organisadó di comunidad, un poëta hippie cu a criticá e órden establecí, of un provocadó di problema cu tabata familiar cu e pueblo comun i cu tabata expresá su opinion francamente den e pueblitonan rabiá, pober i socialmente cla pa explotá den e pais atrasá di Palestina.”

Tin tambe puntonan di bista mas straño ainda. E imágen di un Jesus color scur ta aparecé cada bes den música rap, arte urbano i asta baile. * Otro hende ta speculá cu Jesus tabata en realidad un muher. Den zomer di aña 1993, hende cu a bishitá e Feria di Orange County na California a mira un estatua di “Cristie,” un “Cristo” femenino sunú, na crus. Rond di mésun tempu na New York, nan tabatin un exhibicion di “Crista,” un “Jesus” femenino crucificá. Ámbos estatua a causa bastante controversia. I na principio di 1999, hende cu tabata haci cómpras por a haña un buki “tocante e amor [cu] Niño Jesus i su cachó, Angel, tabatin pa otro.” Segun e descripcion dje buki, nan relacion ta “spiritualmente conmovedor i ta mustra con e mucha i e cachó ta dispuesto na sacrificá nan bida pa otro.”

Ta Ègt Importante pa Sa Ken Jesus Tabata?

Pakico bo mester ta interesá den ken Jesus tabata i ken e ta? Un motibu ta cu (citando e palabranan di Napoleon) “Jesucristo a influenciá i a goberná Su pueblo sin Su presencia visibel corporal.” Jesus su siñansanan dinámico i e manera cu el a biba, tabatin un efecto poderoso riba bida di miles di miyones di hende pa casi dos mil aña. Aptamente un escritor a remarcá: “Tur ehército cu hamas a marcha, tur forsa naval hamas trahá, i tur parlamento cu hamas a sinta, tur rey cu hamas a reina, huntu no a influenciá bida di hende riba tera asina poderosamente.”

Ademas bo tin cu sa ken Jesus tabata i ken e ta, pasobra lo e tin un efecto directo riba bo futuro. Bo tin e chens di bira súbdito di un gobiernu celestial establecí: e Reino di Dios bou di mando di Jesus. Bou di guia di Jesus nos planeta yen di problema lo ser restorá bek na su magnífico variedad di bida i balansa ecológico. Profecia bíblico ta sigurá nos cu e Reino di Jesus lo alimentá hende hambrá, cuida hende pober, cura hende enfermo i resucitá e mortonan.

Sigur lo bo kier sa ki clase di persona ta encabesá e gobiernu ei cu mundu tin asina tantu mester di dje. E siguiente artículo lo yuda bo haña un bon comprendimentu dje berdadero Jesus.

[Nota]