Mayornan Satisfacé Necesidad di Boso Yunan!

MUCHA tin mester di guia i disiplina amoroso foral di nan mayornan. Relacioná cu e asuntu aki, un educadó di Brazil, Tania Zagury ta bisa: “Tur mucha ta gusta hunga i pasa pret. Mester pone límite pa nan. I ta nan mayornan mester haci esaki. Si nan no hacié, e muchanan ta bai for di man.”

Sin embargo, den hopi pais ta existí e influencia di un sociedad cu ta permití tur cos i cu ta duna hopi balor na libertad personal. Esaki por haci cu ta masha difícil pa sigui e conseho mencioná ariba. Unda mayornan por acudí pa haña yudansa anto? Mayornan temeroso di Dios ta reconocé cu nan yunan ta “un herencia for di Jehova.” (Salmo 127:3) P’esei nan ta busca guia den Bijbel, e Palabra di Dios, pa cria nan yunan. Por ehempel, Proverbionan 13:24 ta bisa: “Esun cu ta retené su bara ta odia su yu, pero esun cu ta stim’é ta esun cu di berdad ta busk’é cu disiplina.”

Nos tin cu comprendé cu ora Bijbel ta usa e palabra “bara,” e no ta referí únicamente na sota; bara ta representá cualkier método pa duna coreccion. Sí, hopi bes solamente algun palabra por ta suficiente pa corigí un mucha di su mal conducta. Proverbionan 29:17 ta bisa: “Castigá bo yu i lo e trece descanso pa bo i duna hopi placer na bo alma.”

Mester duna mucha disiplina amoroso pa yuda nan kita característicanan indeseabel. Tal coreccion firme i bondadoso ta duna evidencia cu un mayor ta interesá den su yu. (Proverbionan 22:6) P’esei mayornan, no entregá! Dor di sigui e conseho sano i práctico di Bijbel, lo bo agradá Jehova Dios i gana respet di bo yunan.