Pregunta di Lector

Con un esposa cristian por balansá lealtad na Dios cu sumision na su esposo no-creyente si e esposo ta participá den actividadnan di fiesta religioso?

E esposa tin mester di sabiduria i tacto p’e mantené e balansa entre e dos obligacionnan aki, i ta bon p’e haci esfuerso pa logra esei. Jesus a duna conseho tocante un situacion paralelo ora el a bisa: “P’esei, paga bek e cosnan di César na César, pero na Dios e cosnan di Dios.” (Mateo 22:21) Ta cierto cu den e caso aki Jesus tabata papia di obligacionnan pa cu gobiernu. I despues cristiannan a haña mandato pa keda sumiso na gobiernu. (Romanonan 13:1) No obstante, e paralelo ta sinta den e echo cu un esposa mester balansá su obligacionnan pa cu Dios cu e sumision cu Bijbel ta manda p’e mustra na su esposo, maske esaki no ta creyente.

Tur hende cu conocé Bijbel sa cu e ta enfatisá cu e obligacion principal di un cristian ta pa semper ser leal na e Dios Todopoderoso. (Echonan 5:29) Sin embargo, den hopi caso un berdadero adoradó por cumpli cu e peticion of exigencianan di un autoridad cu no ta creyente sin violá Dios su leynan elevá.

Manera e buki di Daniel capítulo 3 ta mustra, nos por saca un bon les for dje ehempel dje tres hebreonan. Gobiernu, den e persona di Nabucodonosor, a decretá cu nan mester a presentá huntu cu e otro hendenan riba e yanura di Dura. Siendo cu e tres hebreonan tabata sa cu actonan di adoracion falsu lo a bai tuma lugá einan, probablemente nan lo a preferá di no presentá mes. Kisas Daniel sí por a dispensá su mes, pero e tresnan aki sí no tabata por. *  P’esei, nan a cumpli te n’e punto di ta presente. Pero nan lo no a participá—i nan no a participá—na ningun acto robes.—Daniel 3:1-18.

Asina tambe por sosodé cu durante dianan di fiesta, un esposo cu no ta creyente ta pidi of exigí pa su esposa cristian haci algu cu e esposa lo a preferá di evitá. Considerá algun ehempel: E ta pidié cushiná un cierto cuminda riba un fecha cu e esposo i otro hende lo celebrá un dia di fiesta. Of e ta exigí pa su famia (incluso su esposa) bai bishitá su famianan riba e dia ei pa un comementu of djis pa haci un bishita social. Of asta promé cu e dia di fiesta, lo e por pidi su esposa pa ora e ta haci cómpras, e cumpra algun cos p’e. Esakinan por ta cumindanan típico pa e dia di fiesta, regalo, papel di regalo i tarheta pa pone huntu cu e regalonan.

Den e caso aki tambe e esposa cristian mester ta determiná pa no participá den actonan di religion falsu. Pero kico dje peticionnan ei? E esposo ta cabes di famia, i e Palabra di Dios ta bisa: “Esposanan, keda sumiso na boso esposo, pasobra esei ta bunita den Señor.” (Colosensenan 3:18) E por mustra sumision di esposa i tog keda leal na Dios den e situacionnan aki? E tin cu balansá su obedencia na su casá cu loke ta mas importante, esta, su obedencia na Jehova.

Den un otro temporada, kisas su esposo ta pidié cushiná un cierto cuminda, sea pasobra e ta su cuminda faborito of pasobra e tin custumber di come e cuminda ei den un temporada particular. Deseo di e esposa ta pa mustra cu e ta stima su casá i cu e ta reconocé cu e homber ta cabes. E esposa por haci esei, asta si e esposo ta pidié e cosnan ei p’e ocasion di un dia di fiesta? Algun esposa cristian por cushiná e cuminda ei sin cu nan concenshi ta molestiá nan, ya cu nan ta considerá esaki como parti di nan tarea normal di prepará cuminda. Ningun cristian leal no ta conectá cuminda asina cu ningun dia di fiesta, maske cu su esposo sí ta haci esei. Asina tambe e esposo lo por exigí pa su esposa compañ’é bai bishitá su famianan na vários ocasion durante luna of aña. E esposa por haci esei, asta si e dia aki ta un dia di fiesta? Of, e esposa por cumpra e cosnan cu e esposo pidi gewoon sin husga loke e esposo tin intencion di haci cu e cosnan cu e esposa a cumpra p’e miéntras e tabata haci su cómpras?

Claro cu un esposa cristian mester pensa ki efecto su decision tin riba otro hende. (Filipensenan 2:4) Lo e no kier duna ningun impresion cu e ta celebrá e dia di fiesta, mescos cu e tres hebreonan probablemente lo a preferá pa otro hende no mira nan cana bai e yanura di Dura. Pues, e esposa lo por trata di razoná cu tacto cu su esposo pa mira si e esposo lo por tene cuenta cu su sintimentunan. I kisas esaki lo pone cu e esposo mes ta haci su cosnan cu tin di haber cu dia di fiesta pa complacé su esposa cu ta stim’é i respet’é. E esposo lo por comprendé cu ta sabí pa no pone nan tur dos den un situacion cu por bira incómodo caminda kisas e esposa lo tin cu nenga di participá den actonan di religion falsu. Sí, combersacion calmu di antemano lo por hiba na un solucion pacífico.—Proverbionan 22:3.

Pues na final di cuenta, e cristian fiel mester evaluá e echonan i despues dicidí kico pa haci. Mescos cu den caso di e tres hebreonan, obedencia na Dios mester ta na promé lugá. (1 Corintionan 10:31) Cu esei na mente, cada cristian mester dicidí cu cua peticion di parti di esun cu tin autoridad den famia of den comunidad nan por cumpli sin cu esei ta comprometé nan fe.

[Nota]