“Ungwento pa Hunta Bo Wowonan Cuné”

ESEI ta e recept cu Jesucristo a duna e cristiannan di promé siglo dje congregacion di Laodicea na Asia Menor.

Jesus a bisa: “Cumpra . . . ungwento pa hunta bo wowonan cuné pa bo por mira.” Aki no tabata trata di malesa di wowo literal, sino di cieguedad spiritual cu tabatin mester di tratamentu. E spiritu di prosperidad material cu a reina den e stad caminda e cristiannan di Laodicea tabata biba, a influenciá nan asina tantu cu nan no tabata preocupá mas cu nan berdadero necesidadnan spiritual.

Splicando cu ta esei ta e motibu pakico nan bista a daña, Jesus a bisa: “Bo ta bisa: ‘Mi ta ricu i a gana rikesa i no tin mester di nada mes,’ pero bo no sa cu bo ta miserabel i lastimoso i pober i ciegu i sunú.” E miembronan dje congregacion tabatin mester di “ungwento” pa wowo maske nan mes no tabata conciente di esei. I nan por a haña esaki solamente dor di someté nan mes n’e siñansa i disiplina di Jesucristo. P’esei Jesus a bisa: “Cumpra cerca mi.”—Revelacion 3:17, 18.

Mescos cu tabata e caso cu e cristiannan na Laodicea, cristiannan berdadero djawe tambe mester tene cuidou pa e ambiente di materialismo loco pa placer den cua nan ta biba no afectá nan indebidamente sin cu nan sa. E amonestacion cu Jesus a duna ta indicá e recept pa mantené un bista spiritual sano. E ta bisa: “Cumpra cerca [Jesus] . . . ungwento pa hunta bo wowonan cuné pa bo por mira.”

Ta bon pa tuma nota dje echo cu mester cumpra e “ungwento” pa wowo aki. Tin gastu enbolbí. Mester dedicá tempu pa studia i meditá riba e Palabra di Dios. E salmista ta sigurá nos cu e Palabra aki “ta limpi, e ta haci wowo [spiritual] briya.”—Salmo 19:8.