Ansianonan—Entrená Otronan pa Karga Responsabilidat

DEN kongregashonnan di Testigunan di Yehova rònt mundu, tin un nesesidat urgente di hende hòmber ku por sirbi den posishon di supervishon. Tin tres motibu prinsipal pa e desaroyo aki.

Na promé lugá, Yehova ta kumpliendo ku su promesa di hasi ‘esun di mas ménos bira un nashon poderoso.’ (Isaías 60:22) Dor di su bondat inmeresí, kasi un mion disipel nobo a batisá komo Testigu di Yehova den e último tres añanan. Mester di hòmbernan responsabel pa yuda esnan ku a kaba di batisá progresá i bira kristiannan maduro.—Hebreonan 6:1.

Na di dos lugá, algun ansiano ku a sirbi pa dékadanan kaba a haña nan fòrsá ta baha man n’e kantidat di trabou ku nan ta hasi den kongregashon dor ku nan a bira grandi òf tin problema ku salú.

I na di tres lugá, awor akí tin hopi ansiano kristian seloso ku ta sirbi komo miembro di Komité di Kontakto ku Hospital, Komité di Konstrukshon Regional i Komité di Salon di Asamblea. Den algun kaso, pa nan por ta balansá, nan mester a entregá algun responsabilidat den nan kongregashon lokal.

Pa satisfasé e nesesidat urgente aki, kon por haña mas hòmber kualifiká? Entrenamentu ta e solushon. Beibel ta animá superintendentenan kristian pa entrená “hòmbernan fiel, kendenan lo ta kapas pa siña otro hende tambe.” (2 Timoteo 2:2) E verbo entrená ta nifiká siña un hende p’e ta kapasitá, kualifiká òf kompetente. Laga nos mira kon ansianonan por entrená otro hòmbernan pa bira kualifiká.

Sigui Yehova Su Ehèmpel

No tin duda ku Hesukristu tabata kapasitá, kualifiká i kompetente den su trabou, i esei no ta nada straño! Ta Yehova Dios mes a entren’é. Ki faktornan a pone ku e programa di entrenamentu aki tabata asina eksitoso? Hesus a menshoná tres kos na Huan 5:20: “E Tata [1] ta stima e Yu i [2] ta mustr’é tur kos ku e mes ta hasi; [3] i obranan mas grandi ku esakinan e lo mustr’é.” Dor di analisá kada un di e faktornan aki ansianonan lo por komprendé e tópiko di entrenamentu mas mihó.

Ripará ku e promé kos ku Hesus a bisa ta: “E Tata ta stima e Yu.” Desde komienso di kreashon Yehova tabatin un relashon kaluroso ku su Yu. Proverbionan 8:30 ta duna detaye di e relashon ei: “E tempu ei mi [Hesus] tabata na [Yehova Dios] su lado, manera un trahadó eksperto, i dia tras dia mi tabata su delisia, regosihando semper su dilanti.” No tabatin duda den Hesus su mente ku Yehova tabatin “delisia” den dje. I Hesus no a skonde e goso ku el a sinti miéntras e tabata traha huntu ku su Tata. Esta agradabel ta ora tin un relashon kaluroso i franko entre ansianonan kristian i esnan ku nan ta entrená!

E di dos faktor ku Hesus a menshoná ta ku e Tata “ta mustr’é tur kos ku e mes ta hasi.” E palabranan aki ta konfirmá loke Proverbionan 8:30 ta bisa, esta ku Hesus ‘tabata na lado’ di Yehova miéntras e universo a ser kreá. (Génesis 1:26) Ansianonan por sigui e bon ehèmpel ei dor di traha personalmente ku e sirbidónan ministerial, mustrando nan kon pa kumpli ku nan asignashonnan di un manera efikas. Pero no ta sirbidónan ministerial nobo so mester di entrenamentu progresivo. Kiko di e ruman hòmbernan fiel ku pa hopi aña ta trahando pa alkansá puesto di superintendente pero ku nunka no a ser nombrá? (1 Timoteo 3:1) Ansianonan tin ku duna konseho spesífiko na  e rumannan aki pa nan por sa riba kiko nan tin ku traha.

Por ehèmpel, kisas un sirbidó ministerial ta konfiabel, puntual i diligente den kumpli ku su asignashonnan. Kisas e ta un bon maestro tambe. Den hopi aspekto e por ta hasi un trabou ekselente den kongregashon. Ma podisé e no ta ripará ku e tin inklinashon di trata su kompañeronan kristian brutu. Ansianonan tin ku mustra “suavedat di sabiduria.” (Santiago 3:13) Lo no ta un muestra di bondat si un ansiano papia ku e sirbidó ministerial, anto mustr’é klaramente kiko ta e problema, dun’é ehèmpelnan spesífiko i dun’é sugerensia útil p’e mehorá? Si e ansiano perkurá pa ‘sasoná su konseho ku salu,’ probablemente su konseho lo kai den bon tera. (Kolosensenan 4:6) Naturalmente, e sirbidó ministerial lo hasi e trabou di e ansiano muchu mas agradabel si e ta dispuesto pa aseptá e konseho ku e ta haña.—Salmo 141:5.

Den algun kongregashon, ansianonan ta duna entrenamentu práktiko i kontinuo na e sirbidónan ministerial. Por ehèmpel, ora e ansianonan bai bishitá esnan enfermo òf esnan di edat, nan ta bai huntu ku un sirbidó ministerial ku ta kompetente. Dje forma aki sirbidónan ministerial ta haña eksperensia den e trabou di pastoriá. Naturalmente, tin hopi kos ku un sirbidó ministerial mes por hasi p’e progresá spiritualmente.—Mira e kuadro aki bou ku tin e tema “Loke Sirbidónan Ministerial Por Hasi.”

E di tres faktor ku a hasi e entrenamentu ku Hesus a risibí asina eksitoso tabata ku Yehova a entren’é ku futuro progreso na mente. Hesus a bisa di su Tata ku lo e mustra e Yu “obranan mas grandi ku esakinan.” E eksperensia ku Hesus a haña ora e tabata riba tera a yud’é desaroyá kualidatnan ku lo e tin mester di dje pa kumpli ku tareanan ku lo e haña den futuro. (Hebreonan 4:15; 5:8, 9) Por ehèmpel, ki un responsabilidat grandi lo e haña pronto, ora e tin ku resusitá i husga míles di miónes di hende ku n’e momentu aki ta morto!—Huan 5:21, 22.

Ora ansianonan ta entrená sirbidónan ministerial awe, nan mester pensa riba futuro. Maske ku por parse di tin sufisiente ansiano i sirbidó ministerial pa perkurá p’e nesesidatnan aktual, esei lo ta e kaso tambe si forma un òf mas kongregashon nobo den futuro? Durante e último tres añanan, tabatin mas ku 6.000 kongregashon nobo rònt mundu. Mester di hopi ansiano i sirbidó ministerial pa perkurá pa e kongregashonnan nobo ei!

Ansianonan, boso ta sigui Yehova su ehèmpel dor di desaroyá un relashon personal i kaluroso ku e hòmbernan ku boso ta entrenando? Boso ta mustra nan kon pa nan hasi nan trabou? Boso ta tene futuro nesesidatnan na mente? Siguiendo Yehova su ehèmpel den  e manera ku el a entrená Hesus lo trese bendishon riku pa hopi hende.

No Tene Miedu di Delegá

Ansianonan kapasitá ku tin kustumber di kumpli ku vários responsabilidat pisá na mes momentu, kisas no ta inkliná pa delegá outoridat na otronan. Kisas nan a purba delegá trabou den pasado pero no a haña e resultado ku nan a deseá. P’esei por ta nan a adoptá e aktitut di: ‘Si bo kier un trabou bon hasí, hasié bo mes.’ Pero e aktitut ei ta na armonia ku Yehova su boluntat ekspresá den e Skritura, esta, pa hòmbernan ménos eksperensiá haña entrenamentu di esnan ku tin mas eksperensia?—2 Timoteo 2:2.

Apòstel Pablo a keda desepshoná ora un di su kompañeronan di biahe, esta Huan Marko, a bandoná e grupo ora esaki tabata na Pamfilia i a bai kas bèk. (Echonan 15:38, 39) Tòg Pablo no a laga esei desanim’é di entrená otronan. El a skohe un otro ruman hòmber hóben ku yama Timoteo, i a entren’é pa e trabou di misionero. * (Echonan 16:1-3) Na Berea e misioneronan a haña oposishon asina fuerte ku no tabata sabí pa Pablo keda ei. Pues el a laga Sílas, un ruman hòmber mas grandi i madurá, huntu ku Timoteo pa perkurá pa e kongregashon nobo. (Echonan 17:13-15) No tin duda ku Timoteo a siña masha hopi mes di Sílas. Mas despues, ora Timoteo tabata kla pa asumí mas responsabilidat, Pablo a mand’é Tesalónika p’e animá e kongregashon einan.—1 Tesalonisensenan 3:1-3.

E relashon entre Pablo ku Timoteo no tabata estriktamente formal, sin emoshon òf impersonal. Nan tabatin un relashon kaluroso. Ora Pablo a skirbi e kongregashon di Korinto, el a referí na Timoteo—kende el a pensa di manda einan—komo su “yu stimá i fiel den Señor.” Tambe el a bisa: “[Timoteo] lo hasi boso kòrda mi kamindanan ku ta den Kristu.” (1 Korintionan 4:17) Timoteo a apliká loke Pablo a siñ’é i a kualifiká pa kumpli ku su asignashon. Hopi ruman hòmber hóben a bira sirbidó ministerial, ansiano òf asta superintendente biahero kapas. Esaki ta dor ku nan a benefisiá for dje entrenamentu ku nan a haña di hòmbernan mas grandi ku a mustra berdadero interes den nan, nèt loke ku Pablo a hasi den kaso di Timoteo.

Ansianonan, Entrená Otronan!

No tin duda ku e profesia di Isaías 60:22 ta kumpliendo awe. Yehova ta hasi ‘esun di mas ménos bira un nashon poderoso.’ Pa e nashon ei keda “poderoso,” e mester ta bon organisá. Ansianonan, pakiko no pensa riba maneranan adishonal pa entrená hòmbernan dediká ku ta kualifiká pa haña e entrenamentu aki? Hasi sigur ku kada sirbidó ministerial ta bon na haltura di loke e tin ku mehorá aden p’e hasi progreso. I boso ruman hòmbernan batisá, probechá di kualkier atenshon personal ku boso haña. Probechá di oportunidatnan pa oumentá boso abilidat, konosementu i eksperensia. Sin duda Yehova lo bendishoná un programa amoroso asina di yuda otronan.—Isaías 61:5.

[Nota]

[Kuadro na página 30]

Loke Sirbidónan Ministerial Por Hasi

Ansianonan ta duna entrenamentu na sirbidó ministerial, pero tin hopi kos ku sirbidónan ministerial mes por hasi pa nan por progresá spiritualmente.

—Sirbidónan ministerial mester ta diligente i konfiabel ora nan ta kumpli ku nan asignashonnan. Tambe nan mester desaroyá bon kustumber di studia. Progreso ta dependé prinsipalmente di studio i aplikashon di e kosnan ku nan a siña.

—Ora un sirbidó ministerial ta prepará p’e duna un parti na un reunion kristian, e no tin ku vasilá pa pidi un ansiano kapasitá sugerensia riba kon pa presentá e material.

—Tambe e sirbidó ministerial por pidi un ansiano pa wak kon e ta duna un diskurso bíbliko i dun’é konseho p’e mehorá.

Sirbidónan ministerial mester buska, aseptá i apliká konseho dje ansianonan. Dje manera aki nan progreso “por ta bisto pa tur hende.”—1 Timoteo 4:15.