Un Sosiedat sin Distinshon di Klase Realmente Ta Posibel?

JOHN ADAMS, kende tabata e segundo presidente di Merka, ta un di esnan ku a firma e famoso Deklarashon di Independensia. Den dje tin e siguiente palabranan noble: “Nos ta kere ku e bèrdatnan aki ta masha kla, ku tur hende a ser kreá igual.” Tòg ta parse ku John Adams tabatin su dudanan si hende ta igual di bèrdat, pasobra el a skirbi: “Dios Todopoderoso a krea hende asina distinto for di otro pa loke ta Mente i Kurpa ku niun plan maestro por pone nan bira igual.” Na kontraste, e historiadó britániko H. G. Wells sí por a imaginá su mes un sosiedat den kua tur hende lo ta igual. Pa logra esaki, el a pensa ku tres kos ta nesesario: un religion komun rònt mundu ku ta puru i sin kontaminashon, edukashon pa tur hende, i no mester tin trupanan armá.

Te awe no tin ningun sosiedat den kua tur hende ta igual manera Wells a visualisá. Hende ta leu di ta igual, i te ainda distinshon di klase ta un karakterístika dominante  di sosiedat. Tal separashon di klase a yuda sosiedat den su totalidat? Nò. Ora posishon sosial ta eksistí, esei ta dividí hende, e ta pone hende odia i envidiá otro. Ademas, e ta duna nan doló di kurason i ta kousa dramamentu di sanger. E mentalidat ku un tempu a eksistí na Áfrika, Oustralia i Nort Amérika, esta ku rasa blanku ta superior, a kousa sufrimentu pa hende di otro rasa. Un ehèmpel di esaki ta e masakre kompleto di e habitantenan original dje Tera di Van Diemen (awor Tasmania). Na Europa nan tabata konsiderá rasa hudiu komo inferior, i esei a hiba na e Holokousto. E rikesa inmenso di aristokrat i e echo ku esnan dje klase inferior i e klase medio tabata malkontentu, ta faktornan ku a hiba na e Revolushon di Fransia di siglo 18 i na e Revolushon Bolcheviki di Rusia den siglo 20.

Un hòmber sabí di pasado a skirbi: “Hende a dominá hende pa su perhuisio.” (Eklesiástes 8:9, NW) Loke el a bisa ta konta tantu pa hende individual ku ta dominá otro komo pa klase sosial ku ta dominá otro. Ora un grupo ta halsa su mes riba un otro, e konsekuensia inevitabel ta sufrimentu i miseria.

Dilanti Dios Tur Hende Ta Igual

Akaso tin grupo di hende ku di naturalesa ta superior ku otro grupo? No den bista di Dios. Beibel ta bisa: “For di ún sanger el a traha tur nashon di hende pa biba riba henter mundu.” (Echonan 17:26) Ademas e Kreador “no ta duna preferensia na prensnan, ni ta duna e riku mas atenshon ku e pober, pasobra nan tur ta obra di su mannan.” (Job 34:19) Tur hende ta bin di e mesun antepasadonan, i dilanti Dios tur a nase igual.

Kòrda tambe ku ora un hende muri, tur su pretenshonnan di ku e ta superior ku otro hende ta disparsé. E egipsionan di antigwedat no a kere esei. Ora un fárao a muri, nan tabata pone artíkulonan di hopi balor den su graf pa asina e por a disfrutá di nan segun ku el a sigui okupá su puesto haltu den un otro bida. Esei tabata e kaso? Nò. Gran parti dje rikesa ei a bin kai den man di ladron di graf, i vários kos ku e ladronnan no a bai kuné por ser mirá awe den museonan.

Siendo ku fárao tabata morto, sigur e no por a hasi uso di tur e kosnan karu ei. E mortonan no ta pertenesé na un klase inferior ni superior, ni no ta riku ni pober. Beibel ta bisa: “Hende sabí ta muri; e bobo i esnan sin sintí ta peresé na e mesun manera . . . Ma hende ku tur su onor no ta permanesé; e ta meskos ku bestia ku ta peresé.” (Salmo 49:10, 12) Sea ku nos ta rei òf katibu, e palabranan inspirá aki ta konta pa nos tur: “Ma e mortonan no sa nada, ni nan no tin rekompensa mas, . . . pasobra no tin ni aktividat ni planifikashon ni sabiduria den Sheol, kaminda bo ta bai.”—Eklesiástes 9:5, 10.

Nos tur a nase igual den Dios su bista, i nos tur ta muri igual. P’esei no ta bale la pena pa halsa un grupo riba otro durante nos bida kòrtiku!

Kon un Sosiedat sin Distinshon di Klase Lo Ser Lográ?

Pero, tin speransa ku un dia lo tin un sosiedat di hende na bida den kua klase sosial lo no ta importante mas? Sí, tin speransa. Kasi 2.000 aña pasá, ora Hesus tabata riba tera, el a pone fundeshi pa un sosiedat asina. Hesus a entregá su bida komo un sakrifisio di reskate pa “ken ku kere den dje no bai pèrdí, ma tin bida eterno.”—Huan 3:16.

Pa mustra ku ningun di su siguidónan mester halsa nan mes riba otro kompañero kreyente, Hesus a bisa: “Boso no mester wòrdu yamá rabi, pasobra ta un ta boso Maestro, i boso tur ta ruman. I no yama ningun hende riba tera boso tata, pasobra ta un ta boso Tata, esun ku ta  den shelu. I boso no mester wòrdu yamá maestro, pasobra ta un ta boso Maestro, esta, Kristu. Ma esun di mas grandi meimei di boso lo ta boso sirbidó. I ken ku halsa su mes lo wòrdu humiá, i ken ku humiá su mes lo wòrdu halsá.” (Mateo 23:8-12) Pa Dios, tur berdadero disipel di Hesus ta igual den fe.

E kristiannan di promé a konsiderá nan mes igual ku otro? Esnan ku a kapta e sentido di loke Hesus a siña a hasi esei. Nan tabata konsiderá otro komo igual den fe i a demostrá esaki dor di yama otro “ruman.” (Filemon 1, 7, 20) Hesus no a animá ningun persona pa pensa ku e ta mihó ku otro hende. Mira por ehèmpel e manera humilde ku Pedro a deskribí su mes den su di dos karta: “Simon Pedro, un sirbidó i apòstel di Hesukristu, na esnan ku a risibí e mesun fe presioso ku nos.” (2 Pedro 1:1) Hesus personalmente a duna Pedro instrukshon, i komo apòstel, e tabatin un posishon di hopi responsabilidat. Tòg, el a konsiderá su mes un sirbidó òf esklabo i el a rekonosé ku otro kristiannan den e bèrdat tabatin mesun privilegio kuné.

Algun hende kisas ta bisa ku e echo ku den tempu pre-kristian Dios a hasi Israel su nashon spesial, ta kontradisí e ideal di igualdat. (Éksodo 19:5, 6) Por ta nan ta bisa ku esaki ta un ehèmpel di superioridat di rasa, pero esei no ta asina. Ta bèrdat ku e israelitanan, komo desendiente di Abraham, tabatin un relashon spesial ku Dios i nan tabata Su kanal di revelashon. (Romanonan 3:1, 2) Pero esei no tabata ku e propósito di halsa nan. Tabata mas bien pa ‘tur e nashonnan ser bendishoná.’—Génesis 22:18; Galationan 3:8.

Pero loke a sosodé ta ku mayoria israelita no a imitá e fe di nan antepasado Abraham. Nan no tabata fiel i a rechasá Hesus komo Mesias. P’e motibu ei Dios a rechasá nan. (Mateo 21:43) Ma esei no kier men ku esnan mansu entre humanidat lo a keda sin haña e bon kosnan ku a ser primintí. Na Pentekòste di aña 33 Era Komun, e kongregashon kristian a kuminsá funshoná. A yama e organisashon di kristiannan aki ku a ser ungí pa spiritu santu “e Israel di Dios,” i el a resultá di ta e kanal mediante kua e bendishonnan ei lo bini.—Galationan 6:16.

Mester a siña algun miembro dje kongregashon ei ku tur hende ta igual. Por ehèmpel, disipel Santiago a duna konseho na esnan ku tabata trata kristiannan riku ku mas onor. (Santiago 2:1-4) Esei no tabata korekto. Apòstel Pablo a mustra ku kristiannan no-hudiu di ningun manera tabata inferior ku e kristiannan hudiu, i ku muhernan kristian di ningun manera tabata inferior ku hòmber. El a skirbi: “Boso tur ta yunan di Dios dor di fe den Kristu Hesus. Pasobra boso tur, ku a wòrdu batisá den Kristu, a bisti boso mes ku Kristu. Awor no tin ni hudiu ni griego, no tin ni esklabo ni hende liber, no tin ni hòmber ni muhé; pasobra boso tur ta ún den Kristu Hesus.”—Galationan 3:26-28.

Un Pueblo sin Distinshon di Klase Sosial Awe

Awe Testigunan di Yehova ta purba biba segun e prinsipionan bíbliko. Nan sa ku klase sosial no tin ningun nifikashon spesial den bista  di Dios. P’esei, nan no tin un divishon entre klero i laiko, i nan no ta partí den grupo segun koló di kueru òf rikesa. Maske algun di nan kisas ta riku, nan no ta konsentrá riba ‘e ekshibishon grandioso di nan medio di biba’ pasobra nan sa ku e kosnan ei ta pasahero. (1 Huan 2:15-17, NW) Mas bien, nan adorashon na Yehova Dios e Soberano Universal, ta uni nan.

Kada un di nan ta asumí nan responsabilidat di prediká e bon nobo di e Reino na nan próhimo. Meskos ku Hesus, e Testigunan ta onra esnan oprimí i neglishá dor di bishitá nan na nan kas, i ofresé pa siña nan e Palabra di Dios. Esnan di kondishon humilde den bida ta traha huntu ku esnan ku algun hende kisas ta konsiderá komo di alta sosiedat. Loke ta konta pa nan ta kualidatnan spiritual i no posishon sosial. Manera tabata e kaso den promé siglo, nan tur ta ruman den e fe.

Igualdat No Ta Nifiká Ku No Por Tin Variedat

Naturalmente, igualdat no kier men ku tur kos mester ta meskos. Hòmber i muhé, hóben i bieu, tur ta ser representá den e organisashon kristian aki ku ta inkluí hende ku ta bin di masha hopi antesedente rasial, lingwístiko, nashonal i ekonómiko. Nan abilidatnan mental i físiko ta varia di un persona pa otro. Pero e diferensianan ei no ta hasi esun superior òf inferior ku e otro. En bes di esei, e diferensianan ei ta resultá den un variedat agradabel. E kristiannan aki ta rekonosé ku kualkier talento ku nan tin ta bini di Dios i ku no tin motibu pa sinti nan superior.

Divishon di klase sosial ta konsekuensia di e echo ku hende a purba di goberná nan mes en bes di sigui Dios su guia. Pronto e Reino di Dios lo tuma over e gobernashon di tur dia riba e tera aki. E ora ei lo bin un fin na e distinshon di klase sosial ku hende a krea i tambe na e otro kosnan ku a kousa sufrimentu durante siglonan. E ora ei sí ‘e humildenan mes lo heredá e tera.’ (Salmo 37:11) Hende lo no tin motibu mas pa broma ku nan ta superior ku otro. Nunka mas Dios lo permití klase sosial separá e hermandat mundial di hende.

[Komentario na página 5]

E Kreador “no ta duna preferensia na prensnan, ni ta duna e riku mas atenshon ku e pober, pasobra nan tur ta obra di su mannan.”—Job 34:19.

[Plachi na página 6]

Testigunan di Yehova ta mustra onor na nan próhimo

[Plachinan na página 7]

Loke ta konta entre e kristiannan berdadero ta kualidatnan spiritual